#قصص_كهرمانه
#القاضي_والمطلقه
البارت ٣
.........................
ضي
فتحت الباب وشردت للغرفه
ضي: عمو اجه عمو باسل ووياه رجال القاضي الي شفته الصبح
بيبي: يمه ياقاضي شيريد راح بيها ابني
سامر: ليش يمه ابنج المصخم شمسوي بعد
بيبي: يمه يايمه ولك حجي شوف ولدك اشتكى على اخوه اخذوا راح ابنك ياحجي
سامر: يمه شسالفه قاضي ياخذني قابل رئيس مخابرات اشو بسطت زمال البيت وغراب البين
ضي: بيبي هذا القاضي الصبح بلمحكمه وويه عمو باسل شدخل ابوي بلسالفه
اجه عمو باسل للغرفه
باسل: وينكم وين صلاح
سامر: شسوي بصلاح
باسل: يمعود ابو ريسان هنا هذا قاضي ضي وشكله يريد يساعدها وبلعراق كله ماكو قاضي يساعد مطلقه هيج
ضي: يعني هسه راح يطلكني
باسل: لا طلكج واجه يبشرج... مو يشتغل عند الخلفنا يطلكج هسه
ضي: ههههه
باسل: كومي سوي جاي بسرعه ومهيل
بيبي: ولج طلعي الاستكاين الزينه المذهبات والصينيه الجديده
باسل: كوم سامر وصيح صلاح
بيبي: طلع صلاح من البيت يايمه
سامر: يمه مو وكتج ابد اسكتي
بيبي: اي ولدي صايرين مايحترموني ويسكتوني بعد يومين هم تضربني
سامر: اهوووووووو اطلع للرجال احسن الي
طلعوا يم القاضي
ورحت للمطبخ سويت جاي وكملته
رحت دكيت الباب
طلعلي عمو باسل
اخذ الصينيه مني
باسل: البسي عبايه وصيحي بيبي وتعاي ادخلوا
صافنه شكو ياربي
رحت للغرفه وصحت بيبي
ضي: بيبي يردونا كومي وياي
بيبي: يا هذا خاف يريد يخطب
ضي: المن يخطبج
بيبي: دولي يله ولي من يمي
ضي: ماعدنا عزباء بس انتي هههه
بيبي: يلمصخمه يخطبج روحي البسي وعدلي نفسج اغسلي وجهج لاطلعين بهذا وجهج الاصفر
ضي: يا بيبي صدك تحجين اني مزوجه
بيبي: يطلكج ويزوجج
ضي: يا استغفرالله
لبسنا ودخلنا للاستقبال
واضحك على بيبي من شافته جبير
عبالها شاب
اني مدنكه ومستحيه وارجف
ضياء: شلون صرتي بنتي
ضي: بخير
بيبي: يا دهر طره اذا مثل بنته شعنده جاينا
مختنكه مااضحك وبيبي ادردم
ضياء: حجيه انتي بيبيتها
بيبي: اي يايمه
ضياء: اني بعيد كل البعد عن قضيتها اني جاي اساعدها واتبرع اسوي العمليه لضي كل مصاريف العمليه على حسابي بهذه الحاله حتى حياتها الزوجيه تستمر
بيبي: يايمه ينطيك العافيه
اني صافنه وضجت ودموعي نزلت
كمت
ماتحملت ابقى يمهم
................................
ضياء
ضياء: مرحبا باسل
باسل: اهلا استاذ ابو ريسان
ضياء: باسل هذه البنيه اليوم اقاربك شنو سالفتها بلضبط
باسل: هذه امها وابوها منفصلين وهيه ضحيتهم بيبيتها ربتها وكبرتها ومحد يخطبها رغم اخلاق ونادره وحلوه ومؤدبه بس خطيه مرضها مانع زواجها وزوجها يعرف ومااعرف شلون صار الاتفاق المهم من تزوج مايقبل بلبنيه ومايريدها وابوها مايقبل يتنازل عن حقوقها وصايره لخه وخطيه هيه الضحيه بين ابوها وزوجها
ضياء: وضعهم شلونه ليش مايسويلها عمليه ابوها
باسل: استاذ شتحجي عايشه وياه وبلصدفه يشوفها مرات اسبوع يمر ومايدري شي عنها
ضياء: وامها
باسل: اطلكت خلصت عدتها تزوجت وذبت بتها عند بيبيتها وعاشت ويه عماتها وبيبيتها تربت وكبرت
ضياء: ها لا حول الله ولاقوة الله بالله
نهيت المكالمه ويه باسل
وقصتها حزنتني اكثر
وتفكيري تشتت هذه شلون اساعدها البنيه
بقيت افكر بمكتبي
ب٥ المغرب
روز: بابا
ضياء: هاحبيبتي
روز: راح تبقى هنا
ضياء: اكمل شغلي
روز: بابا قريت على البهاق وشفت مااله علاج
ضياء: ليش قريتي عليه
روز: مااعرف من شفت هلبنيه خطيه مريضه تعرف كل مريضه انقهر عليها اتخيل نفسي بمكانها ومحد يريدني لان مريضه تعرف بابا اني احس بيها
ضياء: روز انتي تختلفين عنها
روز: لا بابا اني مريضه بس اني قويه بيك وبحياتنا وهذه البنيه خطيه مبين مسكينه
ضياء: الله يكون بعونها
روز: بابا تمنيت الها علاج
ضياء : ليش
روز : اساعدها بدون تردد
ضياء: شلون تساعديها
روز: اعالجها وترجع لزوجها وتعيش حالها حال البنات بابا اذا اساعدها يمكن مااصير مثلها وربي يساعدني بابا بهذا وكتنا محد يحترم المريض والكل يستنكف منا
ضياء: لا بابا لاهيج تحجين
روز: بابا علمتنا مانجامل لو وحده مثلي او مثل هلبنيه توافق تخطبها لريسان او ريسان يقبل بيها
نزلت دمعتها وطلعت من المكتب
وكسرتني بدموعها
بنتي بكلبها هموم ومكسوره وماادري بيها
اللهي اني شمسوي بدنيتي وتكسر بنتي
شلون اطلعها من هلهم
قررت اساعد ضي وارجعها لزوجها
واحقق حلم روز وساعد هلبنيه
وخابرت باسل واتفقت وياه اروح الهم
واخذني ووصلت لبيتهم
نزلت من سياره واباوع بيت بسيط
دخلني لكراج البيت
شفت قفص ودجاجات
تخيلت ضي كاعده وتوكلهن وتلعبهن
اتخيل ومبتسم
احساس غريب حسيته من تخيلتها
بدون سبب لاشعور تخيلتها
وباسل عافني وشوي ونفتحت الباب شفتها كدامي
ماكدرت اشوفها زين
بس لمحتها لابسه حجاب وبلوز احمر قديم وبجامعه بيجي
لبسها قديم وعادي قهرتني
وركضت طلعت ودخلت
كعدت وباسل تركني وتأخر عليه
واجه هوه وشخص مااعرفه شكيت هوه ابو ضي
وجنت اتمنى اشوف ابوها وارزله
سامر: سلام عليكم
ضياء: وعليكم السلام
باسل: سامر عم ضي
ضياء: اهلا وسهلا
سامر: اهلا بيك سيدي
ضياء: ههه اني هنا ضيف اسمي ابو ريسان خارج عملي
سامر: على راسي
ضياء: يسلم راسك
سامر: أمرنا
ضياء: مايأمر عليكم عدو بس اتمنى التقي بابو ضي
سامر: ماموجود ابو ضي
ضياء: ننتظره اتمنى مايتأخر
سامر: بصراحه مايجي اليوم صار خلاف عائلي ومايجي زعل
ضياء: الله يهدي النفوس وضي وياه
سامر: ههه ياضي هوه يعرف عنده بنيه اسمها ضي
ضياء: لاتزعل مني اخوك مايعتبر اب على حسب كلام باسل
سامر: مو بس اب مايعتبر بشر عباره عن حيوان
باسل: سامر شسالفه
ويسكته
ضياء: عوفه براحته اكو هيج بشر وانذل
....................
تذكرت ابوي صالح
بعد ماطردنا وصفينا بلشارع
وماعدنا
بدون علم امي واخوي رحت لبيت جدي
وبقيت واكف براس الفرع خاتل
انتظر ابوي يطلع او يجي المهم اشوفه
وصار اليل وابوي ماكو
وارجف بارده وانتظر بأبوي
الى ان طلع
ركضت عليه
ضياء: بويه بويه بويه
صالح: ضياء شسوي هنا
ضياء: بويه رجعنا كاعدين بلشارع اني وامي وظفر وامي جدي ماعدنا فلوس نكعد بويه حباب رجعنا
صالح: امك دزتك
ضياء: لا بويه ماتدري امي ولاظفر الله يخليك بويه رجعنا والله ميت من البرد وخطيه امي واخوي
صالح: تعال ادخل ومعليك بامك واخوك خلي يولون
وسحبني يدخلني
دفعته ووخرت عنا
ضياء: خلي اصيح امي واخوي ونجي
صالح: مااريدهم ولك لو تدخل لو تولي يم امك
ضياء: اني مااحبك مااريدك
صالح: ياابن الكلب تربية امك مابيها خير امشي ولي منا لا اجيبلك الجلاب تاكلك بهليل
عفته وركضت واركض اركض
اركض وألتفت اخاف الجلاب تجي تاكلني
ودموعي تجري
واركض بقوه ووكعت على رجلي
تعورت وتألمت ودم طلع من رجلي
اباوع وابجي واصرخ
وبارده ووحدي بلشارع
وكلام ابوي ابالي .... يصيح الجلاب عليه
...................
رجعت الذاكرتي والعبره خانكتني
صالح ابوي مثل صلاح ابو ضي وياسبحان الله تقريبا نفس الاسم
ضياء: ولو تصير زحمه اريد ضي وبيبيتها اريد اطرح سالفتي كدامهم
سامر: خوماكو شي
ضياء: صدكني كل خير لضي واني كلتلك جيتي الكم بعيد عن عملي اني هنا يمكم خطار وعم ضي او ابوي ضي
طلع باسل وصاح ضي وبيبيتها
وشوي واجه باسل وصينية الجاي بأيده
حسيت ضي مسويته
ضياء: سامر ابو شنو
سامر: مامزوج
ضياء: ها وبهذا البيت بس انت والحجيه وضي
سامر: وابو ضي بس بيتهم فوك مشتمل
ضياء: ها
اخذت الاستكان وخطته واباوع على الجاي
عقلي صار بي
وشربته ورواني رواني لدرجة تنفست هوى بارد
خلاني ارتاح ذكرني بجاي أمي الله يرحمها
ضياء: قليل اشرب جاي مال اهلنا قبل
سامر: ضويه سوي احسن جاي
ضياء: الله يحفظها
كدرت اعرف منو مسوي الجاي
انتبهت اني شبيه مثل المراهق
احقق واسأل واتخيل
اني اريد اساعدها ترجع لزوجها
وبكد بناتي هذه البنيه
دخلت ضي وبيبيتها وكعدت كدامي
شكد حلو وفقيره
وحجيت وياها وعرضت عليهم اساعدها
فجأه كامت ضي وتبجي
شفت دموعها نفس دموع روز
وخجلانه من مرضها
ام صلاح: يمه اعذرها من فرحتها بجت وطلعت
ضياء: ماازعل حقها تنقهر وتفرح وتخجل وتستحي
ام صلاح: يابعد كلبي ياخاله ماننسى وكفتك ومساعدتك
ضياء: حجيه ادعي لاولادي الله يحفظهم
ام صلاح: يايمه على هيج اب مايحتاج دعواتي يكفي انت اكبر دعوه لاولادك
ضياء: اشكرج الله يحفظج ياريت اوراق ضي تحاليلها تحظروهن واني اباشر بيها
سامر: ماعدها لاتحاليل ولا اوراق
ضياء: شلون يعني
سامر: مامراجعه من زمان وبس الي نعرفه الها عمليه
ضياء: ليش هيج عايفيها
سامر: اني الي عندي والماعندي على البيت وعلاجات امي وضي حتى زواج مامزوج وابوها مو بحالها
ضياء: عوفوها عليه حتى اشوفلها دكتور جراح زين وشلون تصير السالفه واني اخابركم وانطيني رقمك ورقم الحجيه
تقصدت اذكر الحجيه حتى اخذ رقم ضي
سامر: ماعدهم رقم لا الحجيه ولا ضي
ضياء: ماشي رقمك
اخذت رقمه وكمت من عدهم وتسالمنا
وتشكروا مني
ضي ماطلعت ولا سلمت وبعد ماشفتها
طلعت وصعدت سيارتي
حامد: ها استاذ للبيت ان شاء الله
ضياء: لا اخذني للمزرعه
حامد: ماشي
خابرت رهف واني بلطريق
ضياء: ها باباتي
رهف: هلاو بابا
ضياء: روز يمج
رهف : لا اني بغرفتي وروز تقره بغرفتها
ضياء: بابا روحي شوفيها اليوم تعبانه روز وضايجه لاتعوفين اختج
رهف: ليش شصاير
ضياء: شافت ملف بنيه تريد تطلك ومريضه وتخيلت نفسها وكامت تبجي
رهف: يا هذه البيها بهاق الظهريه كلها تقره على مرضها
ضياء: اي ومتأثره لاتعوفيها
رهف: هسه اكوم اشوفها اوووف روز من اقل شي تتحسس
ضياء: ديربالج عليها
رهف: اكيد بابا هسه اروحلها
ضياء: اني اتأخر ماشي
رهف: ماشي
سديته ووصلنا للمزرعه
حامد: استاذ ريسان سيارته هنا
ضياء: ريسان بلمزرعه
حامد: اعتقد
نزلت ولكيت ابو اسعد كاعد
ضياء: منو جوه ابو اسعد
ابو اسعد: ريسان
ضياء: شيسوي منو وياه
ابو اسعد: اجه هنا يقره
ضياء: ها ماشي
عفتهم ودخلت للبيت
ريسان: بابا
ضياء: اي
ريسان: هم وياك احد
ضياء: مثل منو
ريسان: مثل وحده
ضياء:😡 ريسان لاتجاوز بحق ابوك
ريسان: مامجاوز بس استغربت من وجودك
ضياء: ماتحمل اروح للبيت واشوف روز تبجي
ريسان: ليش شصاير
ضياء: متاثره بموضوع البنيه وبجت على مرضها
ريسان: روز حساسه جدا وتحتاج امي اهواي
ضياء: كلنا نحتاجها مو بس روز
ريسان: بابا انت معوض ماتحتاجها
ضياء: لاتعتقد من ازوج سر ارتاح
ريسان: لعد ليش تزوج
ضياء: مااعرف اكو شي بداخلي متعبني اريد السعاده مااعرف شلون احصلها
ريسان: بابا كل هذا الخير ودكول سعاده تريد
ضياء: عمرها الفلوس ماتسعد بشر شوف مرض اختك كاسر ظهري ومااكدر استمتع بلحياة وخوفي عليكم وقلقي وفراك امك ابني ماكو احد بهلدنيا مرتاح لا الغني ولا الفقير
ريسان: بابا انت اهواي تفكر بينا
ضياء: اتمنى تنتهي الدنيا وانتوا صغار وماتشوفون الدنيا وظلمها
ريسان: لهلدرجه تفكر بينا بابا
ضياء: ريسان هلبنيه ح اساعدها لخاطر روز
ريسان: ضي
ضياء: حفظت اسمها
ريسان: اسمها ضي صلاح وانت ضياء صالح حسيت اكو شي مشترك بينكم
ضياء: ههههههههههه
عفته ورحت للمطبخ اسوي كهوه
وافكر بكلمته
مااعرف ليش فرحت من كال عامل مشترك بينا
.........................
ضي
بعد ماطلع بيبي وعمي سامر صيحوا عليه
لان طلعت وابجي
وكرهت القاضي رغم هوه يساعدني خطيه
ثاني يوم اجه ابوي واخوت منال
وهدوا علينا
وعمي سامر ماموجود
طلعتلهم بيبي
بيبي : ها ولك ابن بطني جاي تهد على امك وبنتك تعلمت تضرب امك
وليد: حجيه شنو يضرب احنه جايين نأدب سامر شلون يضرب اختنا واخو
بيبي: بلاول أدبوها لاختكم علمت ابني يضرب امه
صلاح: يمه عيب هلحجي بلشارع وانتي لاتدخلين كله بسببج
وليد: ابو محمد شهلحجي شلون تصيح على امك
صلاح: ماتعرفها شنو امي
وليد: شنو سالفة الضرب شو ماسولفتولنا
صلاح: ياضرب يمه لاتلفقين
بيبي: تف تف تف على ابن بطني يكول لامه تلفقين
وليد: ابو محمد عيب😡
مازن: هاي شنو ابو محمد
بيبي: هذه اخلاقه لابني ويه امه هوه مرته
وليد: ليش خاله منال شمسويه
بيبي: تقره براس ابني ومايسال على بنته ولا تخلي يروح ويه بنته للمحكمه وجاي اعاتبه وهوه وياها اكلوني وشربوني وسحب بنته ويطردها من البيت وغلطت عليه رد الغلطه عليه وضي سوده عليه ماقبلتله يغلط على امه وهوه ومرته خلوا الطفله جواكم و دك دكوها واجيت اوخرها يدفعني ويضربني واجه سامر وشاف اني وضي مبسوطات وبسطهم
وليد: منال ليش يضربها يجينا واحنه نتصرف
بيبي: يايمه منال تصيح وتعيط فضحتنا وتغلط عليه كدام الجيران وضربها
وليد: ياخاله غير شي سمعنا وماصار شي
بيبي: يايمه العيبه مو منا منهم طلعت ومن اختكم
مازن: خاله نعرف شلون نتوبها لاختنا ومايصير خاطرج اله طيب
وسلموا ورجعوا وابوي وياهم
دخلت بيبي للبيت
بيبي: ام نص فلس مجذبه على اخوتها هيه وهذا الزمال
ضي: اي سمعتهم شكد حقيره
بيبي: همزين سامر ماموجود
ضي: اي
بيبي: اسكتي لاتسولفين لعمج من يرجع
ضي: اني مااسولف انتي تسولفين
ولليل رجع عمي سامر
بدل وغسل وصلى
سامر: اليوم ماكو عشا
ضي: لا اكو بس غير منتظرتك تكمل صلاتك
سامر: يله صبيلي
ضي: ماشي
رحت للمطبخ واسمع بيبي تسولفله
صدك ضحكت عليها
ماتتحمل تسكت
وخليتله الصينيه ويباوعلي
ضي: اليوم تباوعلي اهواي شكو
سامر: اريد احجي وخايف منج
ضي: الي ضرب صلعت صلاح يخاف من ضي المكروده
سامر: ههههه ولج شنو صلعته
ضي: هههه ماتدري بنفسك عاض لسانك وحاضن ركبته لابوي وبوكسيات على صلعته وانت حافي شكلك يضحك ههه وابوي قهرني خطيه جواك ينضرب
سامر: زمال لاتنقهرين عليه
ويصيح عليه
بيبي: ليش تصيح غير ابوها ودافعله وتحبه
سامر: هذا مو ابو وينه هسه
ضي: يوووو كافي حبابين لاتسولفون بنفس الموضوع صار يومين على نفس الموضوع حتى مليت
سامر: هلو عيني ملت ست ضي لعد خلي احجي سالفتي
بيبي: ماتحجي فضنا
سامر: قاضي ضياء خابرني وباجر يدز احد يجي ياخذكم للمستشفى
بيبي: يا هذا سواها صدك يمه ينطي العافيه
سامر: لعد يجذب
ضي: مااروح
بيبي: يا صحلها رجل وكالت عليه اعوج امداني اي والله
ضي: هههه اي مااريد ومااروح
سامر: ليش ولج
ضي: كرامتي فوق كلشي ومااريد مساعدته وانقهر عليه ابقى بمرضي ولا كرامتي احد يدوس عليها
بيبي: ولج ياكرامه شدخلها بهلسالفه
ضي: مااروح والله والله مااروح وحلفت
سامر: وشكله هلرجال ماتروح ضي
ضي: اي لان مااروح
سامر: ضي ياعمي تخسرين اذا ماتروحين ياعمي فرصه اجتج لاتضيعيها
ضي: مااضيعها مااريد ومااتندم
سامر: انتوا اطلعون طوري اكوم منا حتى زقنبوت مااريد وخابري نسيبج يبلغ القاضي اني ماادخل
بيبي: مااخابر ومن غصبن ماعليها تروح
ضي: بيبي مااروح افتهموا مااروح كافي تتحكمون بيه مااريد اني راضيه بوضعي ماتغير هذا اني
سامر: عمي مانتحكم بس نفكر بمستقبلج
ضي: مافكرتوا من زوجتوني نوح وكسرتوني ها ماادخلتوا انت وبيبي ابجي اكللكم مااريد واتورط دكولي مااكدر احجي وابوج بلوجود هسه صرتوا تحبوني وتخافون عليه
سامر: ضي هسه عمي طلعت مقصر بحقج ياعمي ردت تزوجين وتفرحين وعبالي ابن حلال اشتم كفى ايدي اني
ضي: خلاص لعد عوفوني مااروح اني احساسي مايخيب ماردت نوح وهذا حالي وهسه مااريد العمليه ولا اريد يساعدنا القاضي
بيبي: انجبي وانطمر وتروحين من غصبن ماعليج لسانج الزفر طلع علينا وكل تعبنا اني وعمج وطلعتينا مو خوش نفس اخلاق ابوج
سامر: يمه لاهيج تحجين وياها ضي ماكو مثل اخلاقها
نقهرت من كلام بيبي ورحت لفراشي ونمت
وابجي مخنوكه اريد اشم هوى
وليش الله خلقني بهيج حياة
ليش هذا قدري ونصيبي
لا ام لا اب لا اخت لا عائله لا زوج
حتى صحتي مامنطيها الي
لعد ليش خلقتني بهلدنيا حتى تعذبني
بقيت ابجي الى ان غفيت
اسمع بيبي تصيحني
كعدت رفعت راسي
بيبي: يله ضويه اكعدي يله يابيبي كومي اسبحي وبدلي
ضي: شكو
بيبي: ب١٠ يجينا السايق ونروح للمستشفى
ضي: مااروح
سامر: ياعمي استغفري ربج وكومي
ضي: مااروح والله وحلفتلكم
سامر: شسوي هسه
بيبي: كومي لاتخليني املخج
ضي: ملخوني اضربوني مااروح والله
ورجعت نمت
خايفه مااريد اروح
وليش رافضه مااعرف
شبيه اني مخبله ارفض
بس كرامتي ماتسمحلي
.....................................
ضياء
ثاني يوم سألت على المستشفيات وعلى اسماء جراحين وعلى حالة ضي ودكتور زين ورتبت الامور
حارث ساعدني بهلموضوع
ورتبت الامور
وخابرت سامر
ضياء: مساء الخير
سامر: مساء الانوار اهلا ابو ريسان
ضياء: هلا بيك سموري حبيبي خابرتك على موضوع ضي
سامر؛ اي
ضياء: ان شاء الله باجر ادزلكم السايق ب١٠ ياخذها هي والحجيه
سامر: ان شاء الله واشكرك استاذ ابد ماننسى فضلك
وبقى يشكر ويدعيلي
افرح بدعواته الي يصيرون اولادي كدام عيني
ونهيت المكالمه
وفرحان
ثاني يوم الصبح مثل كل يوم اسوي ريوك لاولادي
واوصل روز لمدرستها
واروح للمحكمه
وبالي يم الوقت ب ٩
خابرت حامد
ضياء: حامد وينك روح للجماعه
حامد: ماشي استاذ
سديته ورجعت للقضايه والدعاوي وبالي متشتت
ونهاية سنه
ب١٠ ونص خابرني حامد
رديت بسرعه مثل الطفل
ضياء: ها حامد
حامد: ماكو الجماعه ماافهم شكو واعتذروا مني يعني ارجع
ضياء: هسه اخابر واشوف
سديته ودايخ شكو واتصلت على سامر
ضياء: سامر السايق بلباب
سامر: والله استاذ ابو ريسان مااعرف شكولك خجلان منك
ضياء: شكو
سامر: البنيه نفسيتها تعبانه وماتقبل تروح
ضياء: ليش
سامر: ماتقبل تروح ولاتسوي عمليه رافضه وخايفه
ضياء: من حقها عوفوها براحتها تروح من ترتاح
سامر: اشكرك ابو ريسان على المساعده وسد الموضوع لان شغلتها ميأوس منها
ضياء: ان شاء الله خير عوفوها حاليا ويصير خير
سامر: الله كريم
سديته وضايج وزعلان
ماتروح وقافله وماعندي رقمها احجي وياها
شلون اقنعها دخت
.................................
ضي
رجعت نمت واسمع عمي سامر يعتذر من القاضي
فرحت وزعلت
ثوله ضيعت فرصه ثمينه ماتتكرر بعد
وبيبي ماتحجي وياي
وكمت نظفت البيت وغسلت هدوم
وغسلت الكراج
وب٢ ونص طلعت اوكل الدجاجات اغديهن
وندكت الباب
ضي: منو
محد يرد
ضي: منو
؟: اني اني
ضي: وانت منو اعرف انت انت
؟ ؛ اني حامد
طلعت وفتحت الباب واشوف رجال واكف مااعرفه
وسياره تخبل اباوعلها
شفت القاضي ضياء كاعد 😲
وللحكايا بقايا
