#قصص_كهرمانه
#القاضي_والمطلقه
البارت ٤
..........................
ضياء
نزعجت من تصرف ضي
واول مره انرفض
وماتقبل مساعدتي
فهمتها صعبه ومحافظه على كرامتها
بقيت اتابع الدعاوي
وبالي متشتت
ب١ كملت عقلي بعد مايكدر يستوعب الشغل
كمت وطلعت
حامد: ها استاذ
ضياء: اخذني لبيت ضي
حامد: ماشي
صعدت ومستغرب من تصرفي ليش هيج اتصرف
زين اروحلها او لا
ماافهم شبيه المهم ساكت واروح لضي
ذكرتني بأيام طفولتي
.........................
تذكرت حياتي وعزة نفسي
مرت ايام واحنه بلشارع وبس الاكل مدبرين
واني بقيت ساكت مابلغتهم اني رحت لابوي
اخاف من ظفر يضربني
وامي تعبت ومحد الها وحيده بلدنيا
وامي تصير بنت عم ابوي ومتربيه عدهم
وبلاخير طردوها هي واولادها
وصفينا بلشارع شهر
انواع العذاب تعذبنا
من جوع وفقر وبرد وماكو فراش
جنت عاجز وفاقد الامل تتغير حياتي
صارت كل احلامي ثاني يوم نحصل اكل ناكل
لو نام بدون غده وعشا
وامي تحارب الدنيا لاجلنا
وهي تشتغل بلمحلات
تنظف الصبح ويصدقون علينا
جنت اتألم ومااقبل تشتغل وابجي واسحبها
وتضربني وتسكتني
الى ان بيوم ظفر اجه يركض لامي
ظفر: يمه تعاي عوفي كلشي
امي: شكو ولك
ظفر: يمه تعاي لكيت بيت
امي: شلون ولك
ظفر: يمه لكيت شغل وغرفه
امي: شنو الشغل
ظفر: احمل كراتين ومن سولفت قصتي انطاني غرفه نكعد بيها
امي: يمه صدك تحجي
ظفر: اي والله يمه
احلى فرحه عندي من امي راح تبطل من شغلها
ورحنا للغرفه فارغه ووسخه وبيها ريحه
لاتطاق الغرفه بس اسمها تستر علينا
ومن بيتنا القصر لهذه الغرفه
استغرب امي مامهتمه ومامقهوره
واستغرب اشوف ابتسامتها وتضحك وتشاقه ويانا
ابد ماشكت ولاتتحصر كدامنا
علمتنا على الصبر والقوه والعزيمه
وعشنا حياتنا بلغرفه
وماخلتنا نبطل من الدراسه ماقبلت
واني وظفر قسمنا وقتنا
نطلع من ٤ الفجر نحمل وبعدها نطلع للدوام
ومن نكمل الدوام نرجع لشغلنا
وامي بلبيت كامت تطبخ للعمال وتاخذ اتعابها
واني وظفر نصرف دراستنا والاكل والشرب
امي الي تاخذه من شغلها تضمه ومانعرف المن
ومن نسالها ماتجاوبنا
وبقينا سنه ونص على هذا الحال
الى ان بيوم بليل
ندكت الباب بقوه ونكسرت الباب
دخل ابوي واثنين زلم
سحبوا امي جروها جر من شعرها
وبثوبها طلعوها للشارع
مانعرف السبب وليش
بس الضرب وبرجليه يدوس عليها
بوقتها ماكو احد لان بلشورجه عايشين
بلمخازن ومحلات ماكو لاناس ولا بيوت
واني وظفر نبجي ونضربهم نبعدهم عن امي
مانكدر
ومانعرف شنو السبب
وابوي شذكره بينا
وشلون يعرف مكان بيتنا
صالح: جلبه تريدين تفضحينا دخلين محاكم
استغربت من كلامه ومافهمت شنو يقصد
بوكتنا عيب المحكمه للمره
ركض ظفر ورجع والسجينه بأيده
ودخلها بأيد ابوي
كامت امي تصيح وتلطم
وسحبها بدون مايخاف
وجرح الرجال بأيده
وبعدها شردوا من عدنا
وامي مدده من الضرب وتبجي
تصيح على ظفر
حضنتها وكمت ابجي على امي خطيه
واجه ظفر كومها ويبجي وياي
كامت امي وضربت ظفر
تفاجأة بضربها
ظفر: ليش يمه اخ ليش اضربيني
ضياء: يمه اتركي
امي: ماتضرب احد ماترفع سجينه على احد خليك مظلوم مو ظالم شكد اعلم بيكم ليش ماتسمعون الكلام يشتكون عليك وياخذوك وتروح بيها تعلم ماتضرب احد
ظفر: يمه عوفيني كافي الله يخليج
امي: ماتضرب احد فاهم
امي يجري دم من خشمها وتضرب اخوي وتبجي
اول مره اشوف امي بهذا الوضع
مستغرب امي لشنو تريد توصله
بقت تضرب الى ان تعبت ووكعت
وبقت تبجي لدرجة الاورده بجسمها ظهرت
خفت عليها اني وظفر
وبقينا ساكتين
بقيت كاعد الى ان نامت وغفت
بقيت اراقبها اخاف عليها
توقعت بهذا اليوم راح تموت
والحمد لله نامت ونمت بعدها
وكل ساعه افز واشوفها
الى ان صار الصبح
كعدتنا نروح للمدرسه
ظفر: يمه مانروح
امي: ظفر لاتخليني اضربك ثاني مره
ظفر: يمه مانكدر نعوفج
امي: هاي العالم كلها هنا محد يأذيني كوم لدوامك
ظفر: الله يخليج عوفيني جسمي متكسر من الضرب
كعدت على حيلها وحضنته
وباست ايده ورجليه وتشمشم بي
امي: الله يكسر ايدي يايمه اخاف عليكم
ظفر: يمه لاهيج تسوين احنه الي نبوس رجليج ومانوافيج العمر كله
امي: تريد توافيني اريدك رجال وعاقل وصاحب شخصيه انت واخوك ويكولون هذوله ولد زهره
ضياء: يمه زهره احسن مره
امي: اصير احسن من ترفعون راسي بشهايدكم وبلحق
كمت وكلمة امي براسي الحق الحق
ااااااااخ يلحق
مو كل البشر عايشه على الحق
ولا الكل ماخذ حقه بهلدنيا
الحق محد يكدر عليه بهذا زمنا
................................
رجعت لذاكرتي واجاني اتصال
اباوع اغلى اتصال
ضياء: الو
ظفر: ماتسأل على اخوك الجبير نسأل احنه عليك
ضياء: ههههه لا والله ابو بان مشغول بس انت ابالي
ظفر: مبين اني ابالك
ضياء: هسه على بالي انت وامي
ظفر: الله يرحمها لامنا تستحق تكون ابالنا بكل وقت
ضياء: اي والله الله يرحمها
ظفر: شخبارك شخبار ريسان رهف روز
ضياء: بخير يسألون عليك
ظفر: بين يوم ويوم يخابرون عمهم احسن من ابوهم
ضياء: يخابرون ابوهم مو عمهم
ظفر: الله يخليهم الك
ضياء: ماناوي تفرح اخوك بمره
ظفر: لا خليني بلا مره احسن شعندي بشلعان القلب
ضياء: ههههه المره جوهره مو تشلع القلب
ظفر: لا والله يطلعن الروح
ضياء: يعني امي اطلع الروح
ظفر: امي شعليها
ضياء: كل مره اعتبرها امي من تعذبت
ظفر: بضميرك رجاء تعتبرها مثل امي
ضياء: ههههههههههههه
ظفر: ها تضحك
ضياء: مهما يكون بينكم تصير ام بنتك
ظفر: بنتي مامحتاجه امها اني امها وابوها
ضياء: لا تحتاجها بس مادكولك حتى ماتزعل ظفر بان جبيره وعاقله وصارت ام وعوفها تلتقي بامها
ظفر: حتى تهجم بيت بتها بس تلتقي بيها
ضياء: ماتهجم بان تربيتك وعاقله ولاتحرمها من امها
ظفر: اكلك الدنيا هنا ثلج وماتحمل الكلام وياك
ضياء: ههههه ها تتهرب مثل كل مره
ظفر: ماتهرب ياخويه بس يغث كلامك وعوف بنيتي مستقره بيتها وزوجها وابنها
ضياء: الله يسعدها ويخليها النا
ظفر: امين اكلك انت وين
ضياء: بلطريق عندي شغل
ظفر: ها خويه بيها مره
ضياء: هههه لا اطمأن طريقي للحق مو مره
ظفر: الله يكثر اعمالك ياخويه نتخابر بليل ان شاء الله
ضياء: ان شاء الله
بهلاثناء وصلنا
حامد: وصلنا
ضياء: اعرف اريدك تنزل وادك الباب
حامد: تامرني امر
نزل ودك الباب واسمعه يحجي
فتحت جام السياره ونفتحت الباب
طلعت ضي وعيونها صارت عليه
ابتسمت الها وبادلتني نفس الابتسامه
****************
ضي
ماتوقعت جيته النا
ومبتسم مو عصبي
وجهي ضحك لابتسامته مااعرف ليش
اباوع وتمنيته ابويه
لو الله خالق هذا ابوي
اااااااااه نتمنى اشياء صعبه علينا رغم سهله على رب العالمين
الك بيها اراده ربي بهذه حياتي
بقيت ساكته واباوع
نزل من السياره وكلبي يدك ويرجف
ضياء: سلام عليكم ضي
ضي: وعليكم السلام اهلا سيدي
ضياء: ههه سيدي شنو كوليلي عمو
ضي: ماشي عمو سيد
ضياء: هههههههههههههههه عمو بيبي موجودين
ضي: بس بيبي
ضياء: صيحيها
ركضت للبيت وصحت بيبي
ضي: بيبي القاضي بلباب
بيبي: يا صدك تحجين
ضي: اي والله تعاي اطلعي
بيبي: اركضي شيلي مخاد عمج من الهول بسرعه
ضي: يا ادخلي وماموجود عمي
بيبي: دمشي ولج عمج شنو اني مره شكبرني بكيفي المن ادخل
ركضت للهول وبيبي طلعتله دخلته للبيت
واني رحت لغرفتي
وبيبي تصيحني
رحت ولكيته كاعد وبيبي تسولف وياه
بيبي: تعاي يابيبي
ضياء: حجيه عوفيني ويه بنتي احجي وياها
طلعت بيبي وبقيت كدامه كاعده
ضياء: ضي
رفعت راسي اباوعله
ضياء: اولا اني هسه احجي ويه انسانه ناضجه وجبيره مو صغيره ومزوجه وانتي كبرتي ولازم تفكرين بعقل مو عواطف ماشي
ضي: ماشي
ضياء: ليش ترفضين اساعدج ثقي بالله اعتبرج مثل بنتي واساعدج
ضي: اشكرك رحمله والديك
ضياء: مااريد تشكريني اريد تفكرين بعقلج وتفكرين بمصلحتج وبس انتي شنو مصلحتج
ضي: شنو
ضياء: تتعالجين وتكونين حره تريدين نوح او تنفصلين عنا وتزوجين غيره والافضل الي يقدرج وماتخافين من شي ولاتستحين من شي تدرين عمليتج معناها حياتج
ضي؛ اني قابله بقسمتي ونصيبي
ضياء: لا ماكو تقبلين رب العالمين يخلينا تحت اختبارات ولازم نتجاوز هلامتحان وانتي بامتحان ولازم قويه وتنجحين وماتستسلمين
ضي: ليش تريد تساعدني
ضياء: راح اكلج ويبقى سر بينا وعد
ضي: اي
ضياء: لسببين راح اساعدج الاول اني عشت مثلج مظلوم وجنت اتمنى احد يساعدني وحسيت بيج ومااريد احد يعيش نفس الي شفته
ضي: والثاني
ضياء: بنتي بعمرج وهم مريضه وماالها علاج واساعد كل مريض لاجلها لاجل رب العالمين يرحم بحال بنتي
ضي: خطيه
ضياء: ضي اني راح اساعدج وانتي هم اريدج تساعديني
ضي: شلون
ضياء: من توافقين تتعالجين راح تساعديني ربي يشفع لبنتي
كلامه ودموعه محبوسه بلكوه يسولف عن بنته
قهرني شكد قوي وطلع ضعيف امام مرض بنته
ليش ابوي مو مثله
ماتحملت وبجيت نزلت دموعي
ضياء: ليش تبجين ضي
ضي: ابوي مو مثلك يحبني كل الاباء يفكرون باولادهم
ضياء: لا مو كل الاباء اهواي اكو مثل والدج واكثر ومانعرف شنو ظروفه ومايسأل عنج
دخلت بيبي والجاي بأيدها
كتلتني ياهوه الي يجينا نقدمله جاي
اتمنى نقدم ببسي عصير
صيف شتا جاي نقدم
بيبي: والله متفشلين منك
ضياء: ضي بنتي وورده بس اريد اطلع وماتفشليني باجر ادز السايق الكم ماشي ضي
هزيت راسي موافقه
وباوعلي وابتسم
اباوعله هذا حلو ومرتب ومبين صغير مو جبير
والله مداري نفسه وشكله راقي
صارت عيوني بأيده
حلوه بيضه وراقيه والله مبين ابن خير
وكام بسرعه
ضياء: اترخص وسلمولي على اخ سامر
بيبي: ابقى خاله على الغده
ضياء: لاتسلمين حجيه
بيبي: والله ولاتطلع نزعل عليك اله تتغده يمنا
بيبي تلح على الرجال😲
ضياء: مشكوره حجيه والله مستعجل وواصل غداكم
بيبي: يمه خلي بينا عشره وتغده يمنا
اباوع صافنه ياغده لزكتي بلرجال
وهيه مسويه حميسه طماطه وفلفل وتمن بايت
خرب حظي تريد توكل القاضي حميسه بيبيتي
حتى خبز ماعدنا وتعزمه على الغده
ايده مثل الكيمر وتريد توكله خبز يابس
وبلكوه طلع الرجال
بلباب دخل بابا ومنال واخوتي
بابا صافن على القاضي
واني وبيبي واكفات يمه
صلاح: منو الاخ
القاضي التفت على بيبي
ضياء: ابو ضي
منال: اذا غاب القط العب يافار لا سامر ولا صلاح وامك ادخل زلم
عزه شكد عيب كلامها انفضحنا
اني وبيبي خجلنا من القاضي
اله هيبته ومركزه ويساعدنا ومنال تحجي عليه
بيبي: تاكلين نعل ادبسزز اخوتج كالو نأدبج وندزج الظاهر نسوا
عزه انوب بيبي تغلط فضحتنا
صلاح؛ منو هذا يمه😡
بيبي: لاتصير رجال براس امك
بيبي فضحتنا اكثر منهم والرجال صافن علينا
ضياء: شلون هيج تجاوز بحق امك وتصيح وشلون تسمح لزوجتك تجاوز على والدتك
صلاح: منو الاخ صاير ينطي نصايح
ضياء: الظاهر مامؤدب انت
صلاح: ابن العاهره منو المامؤدب شفتني داخل على نسوان وحدهن
بلا وعي ضياء ضرب ابوي
ومانشوف اله كومه زلم دخلت بيتنا
لزموا ابوي وضربوا
وضياء سكتهم وسحبهم
ومنال تصيح فضحتنا
منال: يبووووووو يبوووووووو
نفضحنا فضيحه
ولتمت العالم وزلم القاضي مسلحين
ولزموا ابوي وسحبوا
طلعوا خلوا بلسياره
ومنال تصيح وبيبي تسكتها
اني بس صافنه وابجي
وخايفه
وبيبي تعتذر من القاضي
وهوه اعصاب صار فجأه من نغلط على امه
دخل عمي سامر يركض
مثل المخبل
عباله بيبي ماتت
سامر: يمه شبيها ماتت ولج يمه
وشاف بيبي كدامه
سامر: شكو
شاف منال والقاضي
خطيه وجها صار اصفر عرف مصيبه
بيبي: الحك اخوك غلط على القاضي وتجاوز يايمه امسحها بوجهي والله نعتذر منك
سامر: وينه صلاح
ضياء: راح ياخذوا للمفرزه تجاوز بحق رجل قانون
بيبي: يمه ابني راح بيها
سامر: طبه مرض
تخبلت ابوي راح ينسجن
راح بيها ابوي
******************
ضياء
بعد مرور سنه ونص
واكف بلردهه وبالي يم ضي قلقان
رغم عمليتها ناجحه
روز: بابا لاتخاف ضي قويه
ضياء: الله كريم بابا ان شاء الله دكوم بسلامه
روز: واثقه ضي تطلع بسلامه
واشوف رهف اجتي وتمشي بسرعه
رهف: ها شخبارها كملت شغلي واجيت
روز: بعدها
رهف: محد اجه من اهلها
روز: اكيد لا
رهف: هذوله شنو من بشر
كلبي يدك على ضي ونسيت بناتي
ومااكدر اسيطر على مشاعري
و٥ساعات ياله طلعوا ضي
ونجحت العمليه
واخذناها للغرفه
وكاعده من البنج وتتألم
ضي: ااااااه يوجع يوجع
روز: ضي الحمد لله على سلامتج
ضي: عايش لو ميت
رهف: منو
ضي: ابني
روز: ههههههههه ولج ابنج شنو
رهف: ههههه اي حبيبه عايش
ضي: يشبه منو
رهف: ههههههههههههههههههه
يضحكن البنات عليها وهيه مخدره
ضياء: رهف بابا عيب اضحكين
رهف: دخلناه عمليه لصدرها طلعت عبالها ولاده
روز: هههههههههههههههههه
ضياء: ههههههههههه بابا عيب
ضحكني وضحكت على ضي مثل الطفله
وتخربط بلحجي
ضي: ضياء ابنا عايش
ضياء: 😳
روز و رهف: 😲
وللحكايا بقايا
