اسفه ع تاخير
وهذا البارت ح يعوضكم
#قصص_كهرمانه
#القاضي_والمطلقه
البارت ٧
..................
ضياء
ماتوقعت ريسان يسألني احب ضي او لا
ضياء: ريسان لاتسأل هذا سؤال ثاني مره وضي مثل بنتي
ريسان: اسف بابا
بقيت ساكت وعصبي
وكلمة ريسان بقت ابالي احبها
معقوله احبها وهي صغيره
معقوله احب مره مزوجه
شوي ووصلنا للمستشفى
وشفتها تعبانه ونايمه على متن بيبيتها
شكلها بريء
جمالها مايبهر ولا جميلة الجميلات
ولكن جمال جذاب
يجذبني الها ومن اول نظره نجذبت
حبيت قبل بس بلعشره
ماحبيت من اول نظره
معقوله ضي حب من اول نظره
اااخ ضياء اصحى كافي
مراهق تحب وحده بكد بنتك
وصلنا يمهم وصار السلام
وحامد شرحلي وضعهم والتحاليل والنتائج
وهي تباوع على ريسان صافنه
وضحكتني الحجيه من سولفت بجمال ريسان
احلى حتى من اخواته
اباوع على ريسان صافن على ضي
ضجت من نفسي
ابني معجب بيها شلون اخليها بالي
تخيلتها زوجة ريسان
كرهت نفسي بهلوقت
واشوفه مركز عليها وناسي نفسه
وصدمني من كال ضي تشبه امي
ماتوقعت يحجي
ام صلاح: اكيد امك احلى من ضي
ريسان: هههه كل أبن يشوف امه احلى البنات
ضي: مو شرط
ريسان: شلون يعني
ضي: مو كل أبن يشوفها احلى اكو يشوفون امهاتهم اقبح ام ومره
ريسان: اكيد
ام صلاح: يمه لاتحجي وتناقش هذه الخبله معليك بيها ويايمه الله يحفظها الك امك
ريسان: الله يرحمها
استحت ضي ودنكت
بيبيتها فشلتها
ضياء: ازعل عليج حجيه دكولين على ضي خبله ورده ضي
مدنكه ومبتسمه
تقدمنا اني وريسان
وواكفين مقابيلهم بس بعيد
ريسان: شكد تشبه امي
ضياء: ملعون دكول لابوك تحبها وانت مخلي عينك عليها
ريسان: ضي لا مستحيل
ضياء: شتفسر نظراتك
ريسان: لان بيها شي من امي بس ماعجبتني اعجاب حب او لفتت نظري وانما اشوف امي بيها وحجي اشوف اختيارك حلو لا
ضياء: هههههه لاتحولها عليه وتستحي مني
ريسان: وروح امي نظراتي الها لان اشوفها مثل امي واشوفها زوجة ابوي ومناسبه اله لو لا
ضياء: ريسان😡 البنيه مزوجه
ريسان: هههههه هسه دكول عجبتني وماعجبتني من توصل الك تتهرب دكول مزوجه لاتستحي حجي اني ابنك
ضياء: شو انت زايحها وياي
ريسان: هذا وكتنا الولد يزوج ابوه مو الابو يزوج ابنه
ضياء: اااااه هسه طلعت انت تزوجني
ريسان: هسه حرام نحجي المره مزوجه خلي تنفصل وتوكل على الله 😂
ضياء: انجب
ريسان: عادي مستحي حقك
ضياء: ريسان لاتخليني اضربك واني عمري مامسويها
ريسان: يابويه كل هذا علمودها من هسه بعتنا 😂
ضياء: ههههههه استغفرالله ياربي
ريسان: ههههه
التفتت واباوعلهم تعبانين
ضياء: الحجيه تعبانه
ريسان: خلي اشوفهم
تقدم عليهم وسولف وياهم
واني ارتاحيت من ريسان مايباوعلها بأعجاب
ريسان صادق وصريح الي بكلبه على لسانه
اتمناله زوجه ملائكيه
لان يستحق زوجه صالحه ومحترمه وخلوقه
ريسان: اذا مايحتاجوكم بعد ارجعوا شكلكم تعبان وحامد يوصلكم
ام صلاح: ياريت يايمه لان نسيت اخذ علاجي واحس ضغطي صاعد
ريسان: هسه اشوف الوضع وارجعلكم حتى ترجعون
حامد: لا يحتاجون ضي
ريسان: ها زين كومي حجيه نشوف ضغطج
ام صلاح: لايبيبي مايحتاج
ضياء: كومي حجيه شوفي ضغطج وريسان اخذلها علاجها
ريسان: ماشي حجي
كامت هي وضي
ضياء: ضي ابقي خاف يجي عمج وريسان وحامد ويه الحجيه
ام صلاح: ابقي هنا يابيبي
ضي: ماشي
كعدت ومستحيه ومدنكه
بقيت يمها
ومن تقدموا كعدت يمها
ضياء: شلونه بابا
ضي: اهواي اشكرك على مساعدتك الي وطلعت بابا واسفه على تصرفه وياك واشكرك وربي يوفقك على هذه مساعدتك
ضياء: لاتشكريني وماجاوبتيني بابا شلونه
ضي: زين
ضياء: يعرف اليوم انت بلمستشفى
ضي: مااعتقد
ضياء: ماشفتي الصبح بارحه بليل
ضي: لا ماشفته الصبح وبليل ماصار كلام على هلموضوع
ضياء: ها .. شلونج على هلاجواء
ضي: زينه
ضياء: خوما خايف
ضي: لا بلعكس شنو يعني اموت هذا يومي
ضياء: ههههه شابه وهيج تحجين اااخ يلعراق شبابك مأيسين من الحياة
ضي: ههه ... تقبل اطلب طلب
ضياء: اكيد
ضي: عمو باسل لادخله بمشكلة بابا مااله ذنب
ضياء: باسل شعليه ومو طبعي ولا اسلوبي ولو اني هيج مااطلع بابا ولا استمر وياج اوكفلج
ضي: صح بس خفت على شغله وهوه ابتله بينا
ضياء: لا ماكو احد يبتلي بلثاني هذا واجبه يساعد وينطي ويوكفلكم لا دكولين ابتلى او واجب او شخص سوالي فضل.. كل انسان يعمل واجبه.. اني الله مكني واجبي اساعد ..انتي بصحه وقويه واجبج تساعدين بيبيتج.. عمج واجبه يشتغل ويصرف عليكم ..والى اخره ..فلا دكولين هذا الشخص اله فضل على الثاني عند الله يعتبر امتحان نأدي واذا عملنا بواجباتنا نجحنا امام الله
ضي: حتى انت
ضياء: ههه اكيد حتى اني الي دااسوي واجب عليه اساعد الي اكدر عليه
ضي: يعني كل قضيه تجيك تساعد
ضياء: مو شرط اكو الي اساعدهم واكو الي مااكدر واكو الي مايستحقون يعني مو صاحبين حق
ضي: اني صاحبة حق
ضياء: اكيد انسانه بريئه شفافه تستحقين كل خير بس مع الاسف ماثمنج وان شاء الله يرجع مثل قبل واكثر
باوعتلي وسكتت ودنكت
ضياء: ضي تريدي
ضي: مااعرف اني مرات اكول اريده واخلص بيت جدو مني مشاكلهم تكثر بوجودي ومرات اكول ماارجعله ومرات اكول هوه مايريدني
ضياء: تحبي
ضي: مااعرف بس هوه اول شخص بحياتي اكيد احبه
ضياء: الله كريم الله يسعدج انتي ياصف
ضي: مخلصه سادس وعلى اساس ادخل جامعه بس تزوجت
ضياء: مايقبل تكملين
ضي: اي
ضياء: انصحج تكملين وادرسين انتي بهلدنيا سلاحج الشهاده
ضي: وينها التعينات
ضياء: ههههه احنه نقره وندرس مو لاجل التعيين لاجل الفكر والعقل نطوره حتى نكدر نواجه الحياة
ضي: كلامك واسلوبك حلو
ضياء: انتي الحلوه
باوعتلها بأبتسامه وخجلت
باوعت بس ريسان اجه
ضي: لعد وين بيبي شو بس هوه اجه
ضياء: هسه نشوف
ريسان: حجي وين موبايلك
ضياء: بجيبي
ريسان: روز حركت الموبايل عليك وخابرتني
ضياء: شكو
ريسان: ح يطلعن روز ورهف لخالتي ماجده
ضياء: ماشي
ضي: وين بيبي
ريسان : هسه اروحلها هستوهم دخلوها
ضياء: لاتعوفها وحدها
ريسان: ماشي وخابر البنات محتاجيك ضروري ماقبلن يكولن شكو
ضياء: ماشي
طلعت موبايلي وريسان راح
وضي ساكته
وتباوع على ريسان
ضياء: ريسان ابني اطيب مني
ضي: مستحيل انت مبين طيب ومثلك طالع
ضياء: بس احلى مني وماطالع عليه
ضي: هههه لاتزعل من بيبي
ضياء: افتخر اولادي احلى واحسن مني وماازعل فعلا حلو
ضي: هم يشبهك وماتوقعته ابنك
ضياء: ههه ليش شبي لهلدرجه اني قبيح وهوه حلو
ضي: لا اكيد لا بس توقعته اخوك او صديقك
بكلامها خلتني طاير
سكتنا
واتصلت على البنات كملت محادثتي وياهن وهي ساكته
وشوي واجه عمها سامر
وصار سلام وكلام وسأل على والدته
ضي جاوبته
واشوفه شلون يحبها ويخاف عليها
مسكين الله يوفقه
ودخلنا للدكتور بتحاليل
وكلامه يطمن وكل خير لضي
وحددوا العمليه الها بعد اسبوع
كملنا
صار توديع بينا
وضي باوعتلي و ابتسمت
حسيت تودعني ونظرات غريبه ماافتهمتها
رجعنا للبيت اني وريسان
حامد اخذ الجماعه يوصلهم
وحياتي مستمره طبيعي عملي واولادي
وفكري يم ضي
وقبل العمليه بيوم
جلسة ضي
واخر يوم استقبل دعاوي بهذا الشهر ١٢
صبح تفاجأة فايلها ودعوتها
ماتوقعت هذا الشي
فرحت ح اشوفها
وشفت باسل ومحامي طليقها
شفت اني طالب الاهل الاباء
صار موعدها
وصحت اسمائهم
دخل محامي باسل وضي ومحامي محمد ونوح
وجناسيهم
ونظراتي شديده
وماالتفتت على ضي ولا اهتميت لوجودها
لان هذا عملي وماحب المصالح بعملي
العمل عمل
ضي ايضا ساكته وخايفه
هذه البنيه تقهرني من اشوفها ضعيفه
اتمناها تكون قويه
ضياء: اني طالب الاباء
باسل: استاذ ابو ضي مامتواجد وابو نوح موجود
ضياء: ليش مامتواجد
باسل: مسافر
ضياء: ها
محمد: استاذ نستدعي والد نوح
ضياء: لا
التفتت وباوعت على نوح
ضياء: ها نوح شنو رأيك نغلق الملف وتاخذ زوجتك وتستغفر ربك
حجيت هيج من حبي وخوفي على ضي
اتمنالها السعاده وشكلها تحب نوح
نوح: مااكدر استاذ
ضياء : ليش ماتكدر زوجتك راح تتعالج تعرف هذا الشي
نوح: اي سمعت
تفاجاة يعرف ومامهتم لامرها
ضياء: بعد شكو ليش ماترجعها وتوكف وياها
نوح: استاذ مشاكل صارت بينا اهواي واخاف على اطفالي يحملون المرض
ضياء: اذا طلكها وانطيها كل حقوقها😡
وكمت اصيح عليه وهوه ساكت
شفت ضي تحجي ويه باسل
ضياء: شكواستاذ باسل
باسل: نطالب بلحقوقها استاذ
شفت ضي ضاجت من كلام باسل
ضياء: بنتي ضي عندج شي دكولي
باوعتلي ونزلت دموعها
ضي: مااريد حقوقي و اتنازل عن كل حقوقي واتمنى استاذ اليوم توافق على طلاكي واخلص من هلانسان
ضياء: بس هوه زوجج
ضي: مايريدني مااريده واقدم تنازل على كلشي
ضياء: نوح تغير رأيك
نوح: لا استاذ
ضياء: انت ماتستاهلها وتستاهل الافضل منك تدري لو لا 😡
واصيح متنرفز منا وهوه ساكت
وضي تبجي
حسيتها تريد تنهي حياة وتبدي حياة
بس عملي مايسمح اخلصها بسهوله ودعوتها مرفوضه
ضياء: بابا ضي محاميج يفهمج هذه دعوه مرفوضه وترجعين تقدمين دعوة فراق خلعي ويصير الي تريدي
ضي: اليوم ماترحمني من هلانسان
باوعتلها عاجز مااعرف شحجي
التفتت على الكاتب العدلي ارددله ورفضت دعوة طلاكهم واني مقهور
هذا قانون ومو بأيدي اغير القانون
وانتهى الامر
وقعوا واخذوا جناسيهم وطلعوا
عشت هذا اليوم بكأبه
ماتحملته مختنك
الى ان ثاني يوم موعد العمليه
ب٨ اتصلت مايرد سامر
عفته وكملت لبسي وطلعت من غرفتي
ريسان: بابا الجماعه مايردون
رهف: ياجماعه
ريسان: اهل البنيه المريضه
رهف: ها وانت ليش تخابرهم من صبح
روز: شعندك وياهم خويه 😊
ريسان: اريد اخطب عمهم الج مامعرس ويريد مره 😂
روز :عابتلك
رهف: حلو نسيبي
ريسان: شعره خفيف ومشيب وجبير بلعمر واسمر كلش محلو بس زين شايل نفسه يفي بلغرض ويه روز😂
رهف: ههههههههههههههه
روز: 😡 بابا شوف شلون يضحك عليه
ضياء: ريسان من شوكت نقلد على الناس 😡
روز: اندري هذه خلقة رب العالمين
ريسان: اني ماجذبت وماقلدت بس مضغوطه روز من كلامي
ضياء: سدوا الموضوع كافي
ريسان: عندك رقمهم غير رقم سامر
ضياء: لا بس رقم باسل محاميها ويصير نسيبهم
ريسان: أنطينياه
ضياء: انتظر ابني نص ساعه اذا ماردوا نتصل على باسل
ريسان: ماشي
رجعت اتصلت بسامر اكثر من مره مايرد
معقوله زعلوا مني لان رفضت الدعوه
بس هذا عملي
وماخطأت وياهم بلعكس تعاطفت
ماتحملت خابرت باسل
وايضا مايرد
دخت شنو السالفه
تأخرت على عملي
وبقيت بلبيت
شوي واجه ريسان
ريسان: بابا حصلت رقم سامر
ضياء: ها ردوا عليك
ريسان: اي بس مو سامر
ضياء: منو
ريسان: ضي بلمستشفى
ضياء: اي زين يعني راحوا روحلهم
ريسان: لا مو للعمليه راحوا
ضياء: لعد
ريسان: ضي حاركه نفسها وبلمستشفى
ضياء:😲😲
................................
ضي
صدمني ريسان من كال اشبه امه
هسه فهمت ليش ضياء يساعدني
لاجل اشبه زوجته اذكره بيها
واباوعله شكله حلو
بس ريسان يختلف كنافه بلجبن
رغم عمري ماضايكتها بس بلتلفزيون شايفتها
وشكد طيبين اخذ بيبي يشوفون ضغطها
بلعافيه عليهم على هلطيبه
لهذا الله رازقهم
قابل يرزق ابوي المدحدح
لايسال على بنته ولا مهتم بامه والبيت
واجه كعد يمي ضياء
مستحيه وخايفه
ومن يسولف يريح بالي
كلامه راحه نفسيه وحلو ومرتب ومثقف
واني الخبله مااعرف احجي
ردت اكحلها عميتها
كلتله مامبين ابنك يعني انت صغير فهمني غلط
عباله اكله انت مو حلو
بله هذا شكله
اذا ابنك حلاوة حليب اكيد انت الاصل الحليب والشكر
ربي هذوله هم اغنياء وهم حلوين
لو ابوي حلو مثل ضياء يمكن اركص من صبح لليل
هوه محلو ومقصر بحقي واموت عليه
ويبووووو اذا عندي اخ مثل ريسان
اكيد يوكف كلبي
والله عائله عباره عن بسبوسه بلقشطه
وهم ماضايكه 😒البسبوسه بس سامعه بيها😔
وكلتله نفس الشي انت وابنك وفرح
واني خجلت شكد عيب شهلميانه الزفره ضي ويه الرجال شجاج كمتي تغردين وياه والله لو يدرون بيبي لو عمو سامر يبوووو يدفنوني
حاطه الرجال واكله حلو شاب واغازله
يابه اذا شكلهم ماينسكت عليه
كام ضياء اتصل على بناته
واني انتظر وطلعت روحي من الانتظار
اجه عمو سامر وشافني خطيه اجه يركض
يخاف عليه من القاضي
ودخلنا للدكتور وحددلنا موعد العمليه
فرحت وبيبي خطيه دمعت عينها
وتشكرنا من القاضي
وهوه باس راس بيبي من شاف دموعها
شكد محترم هلرجال
طلعنا ورجعنا للبيت
تعبانه وجوعانه
وكبل نمت حتى مااكلت
العصر كعدت
سمعت صوت بابا
يسولف ويه بيبي
من طلعت سكتوا وبابا شافني بطرف عينه وصعد
ضي: بيبي شكو
بيبي: ماكو شي
ضي: شبي يباوعلي ضايج
بيبي: زعلان لان ماسلمتي عليه
ضي: ادري على شنو اسلم وهوه زعلان لان ماسلمت وكلبه محمل عليه لعد لو يشوف كلبي شكد محمل عليه وانسى واسامح وماازعل
بيبي: دسكتي اسكتي وصيري حبابه وروحي كعدي عمج حتى تتعشون
ضي: عمو سامر ماطلع
بيبي: لا ماطلع
ضي: شعجب
بيبي: اني ادري شبيكم انتي وياه عبالك رايحين تجاهدون رجعتوا كبل للنوم
ضي: هم نام مثلي
بيبي: اي ومااكل
عفتها ورحت للهول
كعدت عمو سامر
ضي: يله كوم جوعانه خلينا ناكل سوه
سامر: ماشي والزمال وينه
ضي: مااعرف شنو يسولف ويه بيبي وتسكته بيبي وماتقبل عليه ومن شافوني سكتوا وزعلان عليه
سامر: ليش زعلان
ضي: لان اني ماسلمت عليه البارحه
سامر: اها اول مره ادري الزمال عنده احساس المطي مايحس من شوكت كام يحس ابوج كسر قاعدة الزمايل وكبر قيمتهم وانطاهم شأن بلاحاسيس عفيه عليه واخيره سوه انجاز بي خير بهلدنيا
ضي: ههههههههههههههه لاتسمعك بيبي
سامر: خل تسمع بس راح اسكت مابيه حيلها تفر راسي فر تكركر عليه
ضي: ههه عمو شفت ابن القاضي شلون جكليته
سامر: هههههه ولج شنو جكليته
ضي: والله حلو هذا شلون هيج رب العالمين رسمه
سامر: هسه الولد يصير بي شي المسكين من وره عيونج
ضي: يا ليش يمه اني مااحسد بس الله عليك شفته شلون حلو
سامر: القاضي هم حلو على ابوه اني عبالي عمره نهاية الثلاثينات هذا معقوله عمره بلخمسين ابنه جبير وكلي يدرس ماستر يعني عمر ابنه ب٣٠
ضي: يا هذا ب٣٠ والقاضي ب٥٠ 😲 شو انت ٤١ وعبالك جد جدي
ركعني بلمخده واضحك عليه
دخلت بيبي شافتنا نشاقه
بيبي: اني افرفح واسوي عشا وانتوا كاعدين تتملعبون
سامر: مرت ابوي شوكت دخلين عليه ووجهج يضحك ماترزلين
بيبي: يا مرت ابوك اني... اربي وبزري مايحترموني صدك اني مامتربيه لان ماعرفت أربيكم
سامر: ولك شعندنا غيرك ابو التربيه بس حظنا ماكاعد وياك هذولاك الناس تحبيهم لان يردون يرجعولج كراتين الحليب شلون اشتريلج حليب وهم ارجعه الج حتى تحبيني
ضي: هههههههههه
بيبي: دسكت اسكت وكوم ازقنب نفس اخلاق اخوك بله اخوك مره فاره عقله انت شكو
سامر: الزريكه بكد ماتحجي عليج كرهتج😂
ضي: ههههههه اروحلها فدوه شكد احبها
بيبي: المن تحبين ضي
ضي: انتي بيبي
سامر: ياجبانه
بيبي: دكومي نتعشا اني وياج وخلي الزريكه تعشي عمج ياابن بطني خلي الزريكه تحجي عليه من حركتها تدري ماازوجك الها
سامر: ههههه مو اني لعابه جوه ايدج وايدها وعيونج بمزاجي مأخر زواجي
بيبي: خوش بمزاجك بمزاجك
كمنا وتعشينا
ونسولف ونضحك اني وعمي ويه بيبي
وعدت الايام طبيعيه
بس بابا مايسلم عليه حتى منال ماتحجي وياي
وبيبي تهدي الوضع
وعمي سامر يكولي لاتهتمين
هوه مثلي مايحجي ويه بابا ولايسلم
وقبل عمليتي بيومين
بليل اجه عمو باسل
وبلكوه يحجي ويانا
باسل: اني مااكدر اكمل وياكم
سامر: ليش
باسل: شوفوا غير محامي اني صاحب عائله ومااكدر
سامر: ماشي تدلل ابو علي
بيبي: يا وضي باجر وحدها تروح
باسل: لا اني وياها الى ان تخلي محامي ثاني
باسل: وباجر لازم صلاح يحظر
سامر:روحي صيحي الزمال
ضي: مااكدر اصعد مايحجون وياي
بيبي: اني اصيحه
شوي ونزل ابوي
وكعد
باسل: القاضي طالبك انت وابو نوح
صلاح: مااروحله ومااوصل
سامر: تاليها وياك انت القاضي طالبك ماطالبني شوكت تحس عندك بنيه
صلاح: مو بنتي ومااريدها اخذها الك بلعافيه
نقهرت من كلامه
وكام عمي سامر راد يضرب بابا
وبيبي وباسل منعوا
ونزلت منال تركض
على صياحهم
منال: بيتنا راح ينهجم من وره ضي لو دزوها لامها ونخلص منها
سامر: الظاهر مشتهيه النعال الثاني تنضربين
صلاح: مااسمحلك وبس تجاوز او تضربني اشتكي عليك واسجنك
عمي طفر على بابا وكمزنا عليه وخرناه
سامر: اريد اقضي عليك حتى انسجن بسبب
باسل: مو هيج تخبلتوا كافي مشاكل
بيبي: يماااه يمه تسودنو ولدي يردون يكتلوني
باسل: اكعدوا خلونا نحجي ونفضها
بلكوه هدء الوضع باسل وكعد بابا و سامر
باسل: صلاح اذا ماتريد تحظر وماتتواجد خوش حجي براحتك بس خلينا نطلك خلعي وتخلص ضي من نوح بلا حقوق وتتنازل عن حقوقها
صلاح: ماتتنازل اني خسرت على زواجها واريدهن
بيبي: ولك شو انت لاترحم ولاتخلي رحمة الله بين عيونك
صلاح: يمه تبقى دعوه سنه سنتين الى ان يمل ويطلك وينطيها حقوقها ليش مستعجلين
بيبي: وهاي البنيه تبقى معلكه
سامر: ولك وبنتك تتبهذل يوميه بلمحاكم وليش خلينا نطلكها ونخلصها بلكه تجيها قسمه زينه وتزوج
منال: مو راح تسوي عمليه يرجعها
سامر: اني حجيت ويه الولد وبلغته على عملية ضي ومااهتم ويكول اريد اطلك مااريدها بعد يعني نفرضها عليه
قهرني عمو سامر بكلام نوح
قررت من لحظتها مااريد بعد نوح
واعيش حياتي بدونه
ومااحن بعد عليه ولا كلبي يرف اله
ضي: لعد عمو باسل اتنازل عن كل حقوقي
صلاح: ولج مو بكيفج
منال: اذا تنازلتي تولين لامج
بيبي: مو بيت الخلفج اطرديها بكيفج
ماارد وابقى ساكته
دائما مااعرف ارد احد واسكت
صلاح: ماتتنازل عن حقوقها مو بكيفج
عمي سامر ساكت ويباوع لبابا
وكام بابا واخذ منال وصعد
باسل: وياكم ماكو كلام ضايع
وطلع ورحت لغرفتي نمت
ابجي
مخدتي شابعه دموع وهموم
اتمنى ابجي بصوت عالي واطلع الي بكلبي
ابجي على نوح وعلى كلام بابا
وحياتي التافه
ربي اوكفلي وخلصني من هلظلم ارحم بحالي
ثاني يوم كعدت عيوني مورمه
سامر: ليش هيج عيونج الدنيا ماتستاهل
خليت راسي ع صدره وكمت ابجي
وخله ايده على راسي
سامر: شوفي صيري جريئه واني وياج خلينا نشتغل ع الصامت وتنازلي اليوم عن كل حقوقج امام القاضي ماشي وخلي ابوج يركع راسه بلحايط
ضي: شلون اخاف
سامر : اني وياج ارفضي واطلكي ياعمي خلصي واذا يهددنا على العيشه يساعدنا الله كريم ربج مايكطع ومانموت من الجوع اشتغل شغلتين واصرف عليكم
ضي: الله يحفظك الي عمو
سامر: حتى لامي لاتسولفين فاجئيهم بلمحكمه امام القاضي
ضي: ماشي
قريت الفاتحه لام البنين وطلعنا للمحكمه اني وبيبي والتقينا بعمو باسل
دخلنا للقاضي
واباوعله وجها قاسي
وماالتفت عليه ولا اهتم لامري
كأنه غريبه اني
وفجأه سد الملف وباوع على نوح
وسولف وياه
طلب منا يرجعني ومايقبل نوح
كرهت نفسي حسيت اني رخيصه
حجيت ويه عمو باسل
ضي: عمو اتنازل على كل حقوقي مااريد
باسل: اشش
ضي: زين خلي اني احجي
باسل: اسكتي
والقاضي شافنا وراد يعرف شبينا
عمو باسل يكله مانريد نتنازل عن حقوقنا
صدك نقهرت
عكس كلامي يحجي
ومن طلب القاضي اني احجي
فرحت
وطلبت اتنازل واخلص منا وحسيت رديت اعتباري ويه نوح بجزء قليل
توقعت راح اطلك
للاسف لازم دعوه ثانيه وهذه الجلسه تنغلق
نقهرت
طلعت مختنكه وعبالي انتصرت على نوح
بقيت ساكته
بيبي تسألني مااحجي
زعلت على كل الدنيا
مااريد احجي وصلت للبيت كبل رحت لفراشي
بيبي تحجي تريد تسمع اني ساكته
بيبي: ضي بيبي احجي لاتخوفيني عليج
وخرتها وغطيت راسي ونمت
مخنوكه حتى دمعتي ماتقبل تنزل
واحس جسمي معصور
وكلبي معصور ومااعرف شبيه
صوتي مايطلع
وغضبانه لدرجة صرت حمره دم
واريد ابجي اصرخ اصيح مااكدر
وعيوني شراره
بيبي خابرت عمو سامر
خطيه بالها يمي
ساعه الزمان واجه عمو سامر
سامر: وينها ضي
بيبي: نايمه ماتقبل لاتحجي ولا تسولف
دخل للغرفه
اني كاعده ومتغطيه
سامر: ضي عمو شو اكعدي
مااقبل اكعد واوخره واني ساكته
حاول وياي ووخرته
وصلت لمرحله كلهم ماتحملهم ومااطيقهم ومااريدهم
سامر: ضي
دفعته ونمت
بيبي: يمه بيها شي البت
سامر: شصار
بيبي: ماادري يمه بس الي اعرفه نرفضت الدعوه ومااعرف بعد شي
سامر: عوفيها تعبانه خلي ترتاح باجر وراها عمليه
وشاورني عمو سامر
سامر: عمو اني وياج لاتخافين وعيونج اخلصج اخلصج بس كملي العمليه وحياتج كلها تتغير وراح اعوفج ترتاحين
وكام على حيله
سامر: يمه عوفيها
بيبي: ولك شوفها حمره طماطه صايره
سامر: ااااخ ااااخ دمها محترك عوفيها ترتاح براحتها
طلعوا وبقيت بلغرفه
ومااعرف ماتحرك ولا احجي
بس اتنفس
شوي واسمع صوت بابا يصيح
بابا: والله تحلمين تطلكين خلعي ادبسزز امج ذبتج واني لفيتج هيج تجازيني
اسمع كلامه ويوميه نفس الموال
ونفس الكلام الجارح
ويزيد يوم بعد يوم بكلامه
وبيبي تسكته
سامر: شكو شصاير تنحب بلبيت
بابا: شو صاير ماتستحي تجاوز على الاكبر منك
سامر: والله ياخويه شفت الاكبر مني يتجاوز على امه وتعلمت منا
وعافه وطلع
عمو مايتعارك وهاديء
وبقى ابوي يصيح ويحجي
ويتجاوز عليه وعلى امي
واني ساكته ماكمت وماحجيت
وبيبي تسكته ومايسكت
نزلت منال
منال: اكلك بكل عقلك انت تفرفح على وحده جلبه يمعود دصعد ارتاح انت جاي تعبان من الشغل وخليها مثل الجبله تتنازل وتولي لامها
بيبي: مو بكيفج
بابا: وانتي هم مو بكيفج بنتي واني حر واذبها عند امها
سديت اذاني بكل قوتي حتى مااسمع كلامهم
وبقيت خانكه نفسي
لليل اجه عمو سامر
اسمعه يحجي
سامر: يمه وين ضي
بيبي: بعدها نايمه
دخل للغرفه وقفل الباب
سامر: ضي عمو يله كومي
وخرته
سامر: ضي مو وكت دلعج كومي
عمو بس وقعي وارجعي نامي
التفتت عليه وشفته
شايل اوراق وساكته
سامر: رحت لاهل نوح وتفقت وياهم تتنازلين عن كل حقوقج وهذا اتفاق تكاتبنا تتنازلين باجر يطلكج سيد ومن يكمل شهر ١٢ يطلكج محكمه
اني صافنه عليه
سامر: عمو هذا اتفاق اقريهن كلشي تنازلتي اني وعدتح اخلصج اخلصج منا ورحت اني وصديقي اخو محامي وتكاتبنا وبس وقعي حتى اخذها هسه الهم ويطلكوج باجر سيد
فرحت بس مااكدر اعبر عن فرحتي
ودموع ماتقبل تنزل
وارجف
شفت الاوراق تنازل عن كلشي
اخذت القلم وهوه وياي وقعني وبصمني
واني نايمه مااكدر ارفع نفسي
وباسني من راسي
سامر: ارجعي نامي ولاتحجين لاحد اسكتي
اني بس اباوعله
وحسيت بشويه راحه
بنفس الوقت خوف
وطلع عمو سامر
بليل رجع ويضحك
سامر: يمه صيحي ضويه ضياوتي ضوضه
بيبي: هاي شنو بأيدك
سامر: احتفل بطلاكج طلكتج من ابوي بكبره 🤣🤣 خطيه انتي مرته
بيبي: ياامداني اي والله
سامر: هاي كيكه لضويه
بيبي: شكو
سامر: اهوووو يعني عجيبه جبت كيكه
بيبي: بيش هذه
سامر: هههه ماكو اي يمه رحمله والديك كبل بيش
دخل للغرفه
كوموني ووكعت
احس جسمي مو وياي
نشليت
وبيبي تصرخ
وعمي سامر تخبل
خطيه ركض جاب تكسي وشالوني ودوني للمستشفى
جنت خايفه اني من نفسي
معقوله انشليت شبيه اني
وبلمستشفى كالو انهيار عصبي
وعادي
ضربوني ابر ومغذي
وساعتين وطلعوني اكدر امشي
بس بلكوه
ومااكدر احجي لساني ثكيل
وكلبي مورم مورم مايكدر يفرح ولا يحزن
ومااله مكان للفرح
وصلنا للبيت
ونمت وماكعدت اله الفجر
اسمع بيبي تحجي ويه سامر
بيبي : خلينا نأجل العمليه
سامر: مانكدر عيب.. هسه اكومها وبلمستشفى نشوف اذا ماتكدر نرجعها
كعدوني وكمت
لازم اسوي العمليه واصير قويه
ورحت للحمام سبحت
ماعدنا دوش مثل اهل نوح
بس موجود حديده شكلت الصونده وخليتها بلحديده وصار مثل الدوش ودخلت جواه
والماي بارد بعز الشتا
احس نزلت كل حرارة جسمي
اباوع على صدري
وتلمس
معقوله ح اصير مثل البنات
معقوله باجر ارجع للبيت واني بنيه كامله
بقيت نص ساعه بلدوش
دكت بيبي الباب
بيبي: ضي يمه وينج
سامر: حتى بلحمام تركضين وراها عوفي البنيه تغسل همومها
ساكته وسديت الماي
ولبست وطلعت
شفت بابا ينزل من الدرج
مااعرف من شفته اختنكت وارجف
سامر: طالع اجيب خبز حار
بيبي: ماجيبلنا كيمر
سامر: لاخطيه ضي مايصير تتريك وراها عمليه وتشوفنا ناكل كيمر غير مره
بيبي: هم صدك
سامر: ضي طالع ومحظرلج هديه بطروني من اطلعين من العمليات انطيجياها
بيبي: وشنهي
سامر: شعليج خليج محتاره بعدة طلاكج وشوفيلج رجل
بيبي: بله انت رجال عمرك ٤٠ عبالك ٤٠ بعران مو ٤٠ سنه
طلع ومنال وبابا بلمطبخ
واني بلغرفه
بيبي بلحمام تسبح
دااسد باب غرفتي وشفت منال دخلت للهول وسدت الباب
عفتها مااهتميت الها
داالبس ومااشوف اله ابوي دخل الي واني
شبه عاريه داابدل
استحيت وغطيت نفسي بسرعه لبست القميص
وابوي سحبني من شعري
مااكدر اصيح ولا احجي
مااعرف شبي صوتي
اريد اخلص نفسي مااكدر
وسحبني للكراج
ومنال واكفه وساكته
بابا: اله اطردج وبلشارع تصفين روحي ولي يم امج
طلعت بيبي وشافته ركضت وراه
وتريد توخره ودفع بيبي
ضربها بطنها وكعت من طولها خطيه
شفتها واغمى عليها
ومنال ساكته
ويجرني يريد يذبني بلشارع
عيوني صارت نار وبعد ماتحمل
فجأه صرت انسانه ثانيه
ومااشوف ايدي صارت بركبته وخنكته
وصار جسمي احمر وعيوني موجره
وهوه يرفس واظافيري ثبتتهن بركبته
..............
بعد ساعات
كعدت لكيت نفسي بلمستشفى
اسمع شخص يكول فتحت عيونها دكتور
واشوف زلم وبنيه حلوه مااعرفها
مااكدر اشوف
ولا اسمع
ضياء: ضي ضي
وللحكايا بقايا
