احجي يمه بردي گلبي وگلبج
علي
شصاير يمه احجيلي
عمتي
بس گلي احجيلنا الصدگ انت مرجع سلوى
علي دنگ وضل يسبح بالسبحه مالته
زهره
احجي علي لا تضل ساكت خبر اليوم بفلوس باجر بلاش احجيلنا لازم نعرف خلينا نعرف منك احسن لا تكذب
علي
اي رجعتها
تعرفون شنو شعوري من نطق هالكلمه كانما جنت بالسما ووگعت على الارض كانما سجين ودخلت لصدري غصه بروحي ما اعرف اوصفها شكو الم حسيت بيه كانما فقدت اعز شي بحياتي صدمه قويه ونار تلهب بروحي تمنيت اگطعه بأسناني اريد شي يشفي غليلي نزلت دموعي بدون تعابير على وجهي احس وجهي گب نار
زهره
ليش گلي ليش بشنو قصرت وياك بس فهمني ليش
عمتي
ما توقعتها منك يمه ليش هيج كسرت گلبها وأذيتها شمسويتلك هالبنيه متحمله كلشي وساكته
علي
كافي انتم حسو بيه فهموني ما گدرت اضيع جهالي هم محتاجيني وما اگدر اعوفهم
زهره
اذا متگدر على فراگ جهالك ليش تزوجتني ليش كسرت بختي ليش اخذتني من اهلي ما بقيت ويه مرتك وجهالك
سجاد
ميصير هيج يا خوي هذه هم مرتك والها راي ليش هيج وياها جان اجيت وحجيت
علي
رجاءً سجاد انتم ما تعرفون ضروفي شنو ابني تمرض وضليت افتر بيه بالدكاتره جان لازم ابقى وياهم واشوف احتياجاتهم جهالي شلون اعوفهم
زهره
منو گالك ضيع جهالك ليش مگتلي اني جان گتلك جيب الجهال عندي واخليهم بعيوني واذا قصرت بواجبهم الك حق تعاتبني لو شنو تريد تسوي سوي الك حق ترجعها وتاخذ عليه عشره بس مو تطعني بضهري
علي
شلون اجيب الجهال يمج الجهال محد يتحملهم اله امهم وانه ما گدرت اخذهم من امهم
زهره
اني اتحملهم انت سئلتني واني گتلك لا بس انت تريد ترجع مرتك ابقى طول عمرك وياهم هو مو صوجك صوج ابويه الي وثق بيك واعتبرك زلمه من حجايتك وانطاني هديه وذلني
گام وضربني راشدي
علي
والله لو ما اگول حامل جان دفنتج هنا على هاي حجايتج بس اني اعلمج واشوفج الرجال منو الضاهر انتي مو مال احترام
زهره
ما اكعد عندك ولا دقيقه هسه اروح لهلي وهم يتصرفون وياك وابوي مثل ما ورطني وياك يخلصني منك
عمتي
استهدي بالرحمن يمه انعلي الشيطان لازم اكو حل بنيتي
زهره
حل شنو عمه انه ما اكدر اخلي اهلي ورى ضهري وابقى گاعده يمه لازم اهلي يتصرفون
سجاد
خويه گولي يالله ماكو شي ماله حل
زهره
لا خويه ما أكدر ابقى لازم اروح
علي
هسه روحي شنو تهدديني شنو يعني اذا رحتي
زهره
اي طبعا عندك بديل بعد ما تفكر بزهره ولا باي واحد حسبي الله ونعم الوكيل عليك
.............🍁🍁🍁🍁🍁............
رحت لغرفتي والم بغراضي دخل علي
علي
زهره تعودي من الشيطان انتي حامل عليج شهرين والله نجبرت ارجعها ما گدرت اضيع جهالي زهره انه طلگتها لان احبج واريدج وعلمود ارضيج وارضي ابوج صدگيني راح اعدل بينكم ومراح تحسين بفرق
زهره
علي كافي انه تعبانه هذا الحجي احجيه يم ابوي لازم اروح واگله ما يصير اسكت وارضى بالغلط وانت ابقى اشبع بيها وعوفني احسن
علي
يا غلط اني ما غلطت وانتي تخوفيني بأبوج وروحي هسه عادك انتي من حورج مرتي ورجعتها وشتردين تسوين سوي يلا تحضري خلي سجاد يوديج
وطلع گعدت على الجربايه ابجي نار ما اتصور هذه دموع يمكن عيوني طاحت من گد ما بجيت لميت كل اغراضي جنت حاسه انو هذه اخر مره اشوف بيها هالبيت اباوع للبيت وابجي اجيت هنا والفرحه غامرتني وجنت متأمله بحياة حلوه وراحه عمري ما توقعت الغدر بس كافي لازم اخليلي كرامه بين الحسبات والحسره اخذت جنطتي وطلعت
زهره
سجاد عفيه وديني لهلي
عمتي
يمه فدوه لعينج كلشي اله حل لا ترحين تعودنا عليج وانتي بنيتنا
بوستها
زهره
لا يمه اروح ما اتحمل ابقى والله يعز عليه فراگج ديري بالج على روحج وتشكريلي من مؤيد گوليله ما قصرت
عمتي
يمه زهره على كيفج لا يصير بيج شي انتي حامل يمه ديري بالج كلشي اله حل يوم ومؤيد احسابه يمي مثل ما حرگنا بنار راح اخليها تجويه
زهره
بعد الحجي ما يسوى يا يمه ان شاءالله اداري روحي يمه لا يضل بالج
ودعتهم وطلعت علي جان طالع ما ودعته ولا اشتهيت اشوفه الطريق كله ودمعتي ما نشفت ما اگدر اخلي اهلي ورى ضهري واسكت ولا اكدر اتحمل گتله الف مره علي لا تصدمني ولا تخذلني اني تحديت امي واخذتك اوووف يا امي جانت حجايتج صدگ من گلتي ما يفيدج شجاني وما سمعتج صدگ لو گالو الحب يذل الواحد شگد راح اشوف مذله بعد من ورى علي وحبه الزائف الي تورطت بيه عيوني ما بطلت بجي وگلبي ينزف دم ومثل ما طلعت من اهلي هسه ارجعتله شراح احجي وشگول وشلون راح يتقبلون الوضع
لحكايتي بقيه 💕💕
