هدية شيخ

البارت 13

زهره

يمه انه ما ادري شلون اگلج اريد ارجع لعلي

امي

شنو شنو عيني انتي مخبله هذا كله الي سواه بيج وبعدج تحبينه وتردينه انتي صدگ تحجين زين الي يسوي بيج ما عندج كرامه

زهره

يا يمه بس سمعيني والله وبعدين حكمي يمه انه هسه عايشه بجالج انتي وابوي من عگب عينكم وين اروح يمه مالي غير رجلي

امي بعصبيه

ورجلج تعرفيه كلش زين مو الج وبعدين واخوانج وين راحوا هذا شلون حجي لو هاي حجه

زهره

يمه اخواني وراهم نسوانهم ومحد يريدني

امي

ولج زهره لا دورين حجج حتى ترجعيله والله اذا اگول لابوج اله يذبحج افتهمتي لو لا هالمره حجيتي هالسالفه مره ثانيه تتحملين النتائج شلون سالفه تريد ترجع روحي يمه روحي فورتي دمي ورجعه ماكو ابوج ميقبل

زهره

يمه انتي قنعيه فدوه

امي

شلون اقنعه واني نفسي ما مقتنعه وما راضيه زهره روحي من يمي صعدتي ضغطي

...............🍁🍁🍁🍁...............

رحت لغرفتي ودموعي ترس عيني وگلبي ما اعرف شلون اگوللهم انه احبه واريده مشتاقتله اوووف اسكت وابلع قهري وضيمي احسلي لان ماكو احد يحس بيه تعبت والله تعبت وشنو الحل ما اعرف انتضرت واترجى من الله

بقيت هذا حالي بيت اهلي معززه ومكرمه من قبل امي وابوي واخواني بس نسوان اخواني صرت ثگيله عليهن ويسمعني حجي من يشوفن امي ما موجوده  حجي يسم البدن ويبسمرن بيه ويحرگن گلبي هيج حجه وياي وهيج گالي ومن الحجي عود شوفينا احنا عايشين مرتاحين ورجالنا بس ألنا وانتي على شرج وهم ماكو

تحملت وصبرت بدون ما احجي ولا اعترض بقيت عدهم بس مجرد انفذ اوامر زهره تعالي زهره روحي زهره ماكو كلام خلاص زهره هيج راح نسوي مو ياخذون رايي بس مجرد يبلغوني بقراراتهم عدت الايام والاشهر ودخلت بشهري وعلي كل فتره يدز احد لابوي وابوي يرفض ما يحسب حساب لاي شخص مهما تكون مكانته ومرتبته عند ابوي وانه يوم عن يوم اذبل وعيوني تذبل من القهر والبجي اباوع لنفسي بالمرايه ليش هيج تغيرت معقوله القهر يغير الواحد لو انه من الحمل تغيرت صحيح اهلي ما مقصرين وياي بالاكل والشرب بس مصرف ماكو وما اگدر اشتري شي لان ما عندي وما أگدر اطلب منهم لان اخذ على نفسي اگول هسه يگولون هم كاعده واكل وشرب وهمين تريد مصرف من گعدت لليوم ما اكو احد خله بأيدي ربع ابد مرات اشتهي موطا او حلويات ما احجي اسكت يلا هذا كله مو مهم

ثگلت حيل والنفس گوه اجره مخنوكه من الحمل ومخنوگه من القهر لحد ما حان وكت ولادتي وحسيت بألم قوي ووجع بطني وضهري ما گدرت اتحمله

زهره

يمه لحگيني راح اموت

امي

اصبري امي ان شالله سهله لا تخافين

ابوي

لا تگولون لاحد زهره عدها ولاده بس احنا ناخذها للجده ونجيبها ما نريد يسمع علي بالموضوع

زهره

ليش بويه غير لازم يجي يشوف ابنه

ابوي

امشي بويه لا تخليني افرغ همي بيج وانتي عندج ولاده انسي هذا ابن علي لو راح تشوفينيه بيوم

امي

مو وكت هالحجي هسه خلي تجيب بالسلامه وبعدين ربك يحلها

اووف يالولاده صارت عليه موت دخيلك ياربي هيج ألم مستحيل احد يشوفه ويتحمله صدگ لو گالو تطلع روح من روح ردت اموت والله بس الحمدلله جبت ولد اشگر وعيونه ملونه من شفته كل تعبي راح ونسيت كل همي حضنته اوووف يا ريحة ابوك نسيت نفسي وياه كلشي بيه ناعم  يمه شكله يرد الروح كتلهم

زهره

يمه علي جان يحب يسميه سيف خلي نسميه سيف

امي

لج انتي شبيج ما عندج كرامه مراح نسميه مثل ميريد هذا صار ابنا مو ابن علي خلي اشوف ابوج واحنا نسميه

يا ربي كل حقوقي مسحوبه مني ابني ما اگدر اسميه مثل ما اريد رجعت امي

امي

ابوج يگول سميه محمد على اسم اخوي الشهيد

زهره

يمه انه اريد مثل ما اسميه يمه هذا ابني

امي

يمه خلاص ابوج سماه محمد وخلاص بعد لا تحجين محمد يعني محمد وانسي يمه انسي لخاطر الله لا تعبيني وتعبين نفسج ولا تفكرين بعد بيهم

زهره

يمه هو بس الاسم شمسويه انه

امي

ولج زهره جوزي راح تموتيني اطلع احسلي

اوووف يا ربي لا تحجين ولا تعلقين ابوج گال وابوج راد وانه مجرده من كل حقوقي تعبت حيل تعبت مليت من حياتي هسه اني لشوكت ابقى هالشكل لا حجايه ولا راي والله ما ادري الي يسونه هو الصح لو اني الصح ما ادري منو الغلطان

من سمع علي اني ولدت دز عمامه واهله علمود يرجعوني وما قبل ابوي رادو بس يشوفون الولد وهم ما قبل گال اعتبروها ما جابت وعلي ماله شي عدنا وصارت عركه جبيره وابوي طردهم وگاللهم راح اسجل الولد بأسمي  وزادت الامور تعقيد بحيث ما حسب حساب لاي بشر ولا خاطر لشخص ضل مصر على رايه وكلما يشوف علي يتمسك اكثر هو يعاند اكثر من الاول  بس علي ما استسلم زاد اصراره علمود ابنه

هيج مرت اشهر صار عمر محمد ٧ اشهر وانه نفس وضعي كلشي ما تغير بحياتي  اكل وشرب ونوم وقهر وشغل البيت ابوي يجيب حفاضات وحليب لحمودي ومن يخلصن استحي اگوله ومن يدز علي مصرف يرجعه وما يقبل ياخذ منه يگله ما عدنا شي الك ولازم تطلگ زهره وانه عايشه بنار وحرب ويه نفسي لا امي تسمعني ولا ابوي عايشه بس بالاسم

لحد ما فد يوم من الايام اجانا شيخ عشيرتنا

لحكايتي بقيه💕💕

لا تنسون التعليقات ورائيكم بالقصه