رگع الباب علي وطلع زعلان خلاني لوحدي بالبيت بس احس نار وشابه بروحي متت قهر وفارت اعصابي واحتار شسوي يربي انه وين ما اروح مشلوع گلبي ليش شمسويه غلط علمود هيج اتعاقب خلاص قررت اصبر واسكت وربي هو يحلها ألي لان فعلا تعبت ثاني يوم اجه وكانما شي مصاير سولفنا وتريگنا گلت عادي خلاص اتحمل بقيت على هالحال شهرين وطلعت حامل هيج مرت الايام صار عليه تقريبا خمس اشهر طبيعة عمل علي يوم يبات بالدوام ويوم يبات بالبيت عند سلوى لحد ما اجه وگالي
علي
زهره حبيبتي منا وجاي راح ابات يمكم
زهره
صدگ علي واخيرا حنيت علينا
علي
لا تگولين هيج والله دوم بالي يمكم بس الضروف اقوى مني
زهره
ادري بيك حبيبي احنا هم تعودنا بس شلون راح تبات يمنا سلوى شعجب قبلت
علي
لا سلوى مقبلت ولا تعرف اصلا
زهره
يعني شلون مفهمت
علي
باعي الدوام مالتي صار كله صباحي بعد مراح ابات بالدوام ومراح اگول لسلوى راح يبقى دوامي مثل ماهو بدل ما ابات بالدوام اجي ابات يمكم
زهره
خوش حل
باوعت عليه يعني هسه هذا شگوله يعني بعده يخاف منها اوووف ما اريد اسوي مشاكل لان اعرف بروحي لا احل ولا اربط مجرد ورطه وتورط بيها هيج گمت افكر اتحمل يا علي واشوف شنو تاليتك المهم ما بينت اني ضايجه ولا شي خلاص اني جنت اتمنى يبات يمي وهسه هو راح يبات يمي خلاص اسكت واشوف شنو تاليتي اول يوم بات يمي صدگ حسيت بالامان وبراحه حسيت اني صدگ متزوجه بدلت وتعطرت وحضرت عشى من وكت وگعدنا وسولفنا وضحكنا وشفنا تلفزيون كلش ارتاحيت لو من الاول هيج جان ما ارتاحيت ليش تقهرني واخذت نص عافيتي من القهر المهم شويه ارتاحيت وهدئت المشاكل من ناحيتنا بس بقت عالگه هو وسلوى يوميه مشكله هاا رحتلها هااا حجيت وياها هااا تقربتلها ويوم تلي درت بيه حامل گلبت الدنيا من اللطم والصريخ ولعبت بيهم طوبه ام حيدر توصلني اخبارهم مرات امر عليهم لان اضوج لوحدي ومرات ابات يمهم ومره اجه ابويه وامي تغدوا يمنا وعلي كلش قدرهم ما خله شي مجابه الحمدلله شوي ارتاحينا وسلوى بعدها متدري لحد ما فد يوم
................🍁🍁🍁🍁🍁.........
اجاني علي مقهور ومهموم والدمعه بطرف عينه
زهره
شبيك علي شصاير
علي
والله تعبان ومالي خلگ
زهره
ليش شبيك احجيلي
علي
والله ما ادري شگولج اجاني صديقي قبل اربع اشهر تقريبا وگالي علي محتاج قرض من البنگ وما عندي كفيل يتكفلني وانت اخوي وصديقي والله محتاج وما عندي غيرك گتله خلاص انه اتكفلك وخليهم يکطعون من راتبي وانت انطيني وتكفلته بنص الراتب تقريبا واستلم السلفه وتشكر مني وراح وانطاني ورقتين گالي هذه هديه مني الك ما قبلت اخذ بس هو لح عليه واخذتهم ورى شهرين ما انطاني شي اخابر عليه ما يرد رحت لبيتهم ما لگيته وگالت مرته اخذ الفلوس وذهبي ونهزم وهسه وضعي راح يتدهور وامورنا راح تصير مو زينه لان السلفه خمس سنوات شلون راح نگدر نتأقلم ويه الحياة الجديده وما اعرف شسوي
زهره
ولا يهمك حبيبي كلشي يدبر والله ما ينسى احد اهم شي انت سالم
علي
تسلمين حبيبتي ان شاءالله
هنا تغيرت اوضاعنا وصارت الامور صعبه علينا كلشي نحسب حساب وكلشي حرمان ولازم نتحمل بس همين ما سلمت من ضلم الدنيا وتعبت ضل ينطيني شي قليل وميكفيني وكل المصرف لذاك البيت يعني اذا ينطيهم ١٥ ينطيني ٥ وكلشي ميكفيني صار عندي اولاد اثنين ومصاريفنا كثرت وحالتنا تتدهور اكثر والوضع تعبان
زهره
علي والله ميكفن مو حاله هذه لا نگدر نشتري فواكه ولا نگدر نشتري حلويات للجهال
علي
انت دشوفين وضعي هذا الي اگدر عليه شسويلج منين اجيبلكم
زهره
احنا هم ألنا حق عليك يعني مو بس هم عائلتك احنا همين مسؤلين منك كلشي ما اگدر اشتريى
علي
تدرين لو عندي ما اقصر هذا الي اگدر عليه دبري نفسج بالي عندج منين اجيبلكم حملكم جبير وما اكدر اتحمل
صبرت وتحملت وحملت مرة الخ وجبت اولاد اثنين تؤام صارو عندي اربعه والوضع مثل ما هو والمصرف بالحسره وسلوى عرفت هو مديبات بالدوام ويبات يمي سوت مشكله كبيره بس ما اثرت على علي بقى يبات يمي ورضت بالامر والواقع ابن علي الكبير من سلوى يجيلنا مرات يشوفنا بدون علم امه لان لو تعرف يمكن تعدمه خطيه يبقى يمنا يلعب ويه اخوانه ويحبهم صار عندي اربع اولاد والحال من اسوء لاسوء لان المصرف بقى مثل ماهو كلش ما يكفينا گوه مدبرتها للعيشه ومرات امي تسوگ وتجيلي ترحمني شوي بالفواكه والحلويات الي گمنا ننسى شكلها بقت هيج حياتي عمري ما ارتاحيت ولا راح اشوف الراحه يمكن لان امي مكانت راضيه عليه من البدايه بس هي سامحتني ورضت وتدعيلي بالراحه ما ادري قدري هالشكل ورغم كلشي احمد ربي واشكره هالحال ولا غيره استمرت حياتي تعب وعوز وقهر الى ما فد يوم من الايام اجانا ابن علي يركض ويضرب بالباب حيل اني نخمط گلبي وروحي طلعت لحد ما وصلت للباب
ابن علي
خاله لحگي علينا ابوي سوى حادث
لحكايتي بقيه 💕💕
بنات تصويت وتعليق حبايب وتابعوا بقيه قصصي 😘
