زَمـن الغَـدر والخيانات 💔

الحلقة ~~ الاولى ( 1 )

.
.
.
.

امل : هيَ بسرعة جيبي الروزاطة من الكوجينة مديها لي خوك يادراه وانتِ مادا ودانك وتسمعي مفهمتش في شن تسمعي يابهلولة..

هداية : تي اووووف  باهي اسكتي وانتي تزني علية الهم نبي نعرف شن يقولو

احمد : من باب الكوجينة ، يماا يماا

امل : هكي باهي نوضي بسرعة شوفي خوك هدا اكيد يبو عصير اللوز والعبمبر

هداية : نعم حميدة شن فيه ؟

احمد : هاتو حاجة خلي نعطو لناس ..

هداية : هاك السبات هدا ونادي علي خوي يجي ياخد معاك سفرة العصير

احمد : باهي هي والعقبالك يامختشة نفرحو بيك

هداية : ههههه قاعدتلكم اني مش ح نتزوج لين تفدو مني 😛

احمد : وووه علية من النفخ هدي ياشينة و ريشها من شعرها__ وينادي ( محمود محمود )

هداية : توا هدا شن يقولوله 😒

....... .......
هدي القصة بدت من سنة 2008 ✋

نحكيلكم شوية علي شخصيات الرواية 👈  ( عائلة سعيد ) تتكون من 2 بنات و 2 شباب   . امل مواليد 90 ، هداية 94   ، احمد 88 ، محمود 97  وامهم ( فاطمة )
__ هداية بنت جميلة طويلة وبيضة وشعرها عسسلي وطووويل لركبتها  وعيونها زي الحوتة . تحب العلم وتقرأ لغات ...
سعيد بوهم  حالته المادية كويسة يملك ارضي وهوا رئيس شركة المياه والخدمات العامة وخوته الولاد زوز اصغر منها عنده خمسة خوات بنات كان باني قصر مش حوش علي تلاتة ادوار ومداير نظام زوز حياش جنبه على اساس لصغاره بعد مايكبرو باش يتزوجو فيهم   بس بعد ماسخفه حال خوه سليمان  من شقة لشقة للأيجار وحالته حاله عطاه حوش جنبه

( عائلة سليمان ) _ مرته زينب يلي هيا اخت  فاطمة  ، عندهم تلاتة بنات و ولدين 
سماح م 99، سالمة 94، سهى 2000 ، هيثم 90، طه 2002 .

__  نهى صديقة هداية وعائلتهم صغيرة آمها عائشة و بوها متوفي وعندها اخ واحد  ،،
وباقي الشخصيات بنكتشفوهم بعدين 😉👣👣.....

..............

جي محمود واحمد رفعو العصير والعبمبر وبعدها الحاجات وكانت فاتحة آمـل من فاروق  .. في مربوعتهم الرجالة

فادي : او الف مبروك ويسلم علي خوه  ( فادي سلف امل )

وكلهم ناضو يسلمو علي بعض كبار العيلة ، العقبة ليكم والف مبروك

فادي : يامحمود نبي نغسل ايدي تبزت علية القهوة
محمود : تقدر تخش ع الكوجينة ع اليمين

الكوجينة فيها باب من الخلف وفاتحينه باش يحطو ااحاجات ويخشو ويطلعو

وداخل الحوش عيلة عمهم يلي هيا خالتهم وبناتها المحسديات .
هداية هيا وسالمة فرندات مقعمزات مع بعض