TORPE
Nahihiya ako at naguguluhan
Tuwing dadaan ka’y di ko maiwasan
Na ang aking mukha'y ikubli at takpan
at paglampas mo ay saka susulyapan.
BABAENG INIP
Hindi rin kita naiintindihan
Ang mga tingin mo ay may kaibahan
Wari ko’y meron kang nais pakawalan
Di ko lang matiyak ang oras kung kaylan.
TORPE
Mayrong mga bagay na hindi masabi
Tuhod ko ay nginig at di mapakali
Sa isip ko'y lagi na lamang sumasagi
Na baka ayaw mo at ako’y magsisi.
BABAENG INIP
Binatang makisig, wag mag-alinlangan
Sabihin sa akin, gusto kong malaman
Wala akong maisip na ‘yong sasabihin..
Ano bang gusto mong iparating sa akin?
TORPE
Wag mo naman sana akong madaliin
Kayhirap pag lahat ay pinapatulin
Mahirap simulan, baka di mo dinggin
Kaunting dahan lang ang tangi kong hiling.
BABAENG INIP
Paano malalaman kung ayaw simulan
Paano tayo nyan magkakahusgahan
Sige na, sige na ako’y naghihintay
Magsalita ka na’t wala na tong rewind.
TORPE
Ganito kasi yon magandang binibini
Sa iyo ako ay sadyang nabighani
Ganda mo at kilos ay nakakahumaling
Sa iba’y di ko na kaya pang ibaling.
BABAENG INIP
Natutuwa ako sa iyong tinuran
Ano pang hinihintay, kamay ko’y hawakan
Ang iyong sinabi tagal kong hinintay
Kung di pipilitin di ka pa bibigay
TORPE
Kung ako’y mabagal, giliw paumanhin
Di ko kabisado ang iyong pagtingin
Maraming salamat sa pagkakataon
Inaasam ko ang meron satin ngayon..
__________________________~~*~~__________________________
Salamat sa panahong iniukol mo sa aking pahina - ito ang nagbibigay dahilan sa akin upang patuloy na sumulat at magbahagi. Sana'y mabasa mo rin ang iba ko pang mga tula at kwento at makalikha ako ng ngiti/luha sa 'yong mukha. Hindi ko sasayangin ang panahon mo. Lubos kong ikaliligaya kung makapag-iiwan ka ng iyong rekomendasyon, puna o anumang reaksyon patungkol sa aking akda.
Nagmamahal,
Sami Bathan de Ramos
BINABASA MO ANG
LIGAWAN STAGE
PoetryMinsay kailangang gumawa tayo ng mga hindi ordinaryong bagay upang makuha ang mga hindi rin ordinaryong karanasan.