اعرفكم بنفسي اني زهراء عمري 15ساذجه وكلبي طيب ولليوم بكولشي اصدك مااكدر اتعامل ويا المقابيل بخبث ولااعرف امثل ولااكدر اجامل تصرفاتي وشخصيتي نفسها بكل مكان مااعرف اتصنع ابد وهالشي سببلي هواي مشاكل بحياتي
عندي اختي التؤام مالتي هم عمرها 15
عائلتنه عليك يالله وبسيطين حالتنه الماديه تعبانه شويه بس الحمدلله عايشين ومستورين
* زهراء : الجمعه الساعه ب5 العصر دااقره امتحان انكليزي ( اني بصف ثالث متوسط)
* بنين (اختي) : زهراء اجوي بيت عمتي كلهم عوفي الكتاب وتعالي ساعديني
* زهراء : يمه هلا بعمتو شلونج شلون صحتج
* عمتي : الحمدلله بنيتي شلونج انتي اخبارج والثالث شلونج ويا
* زهراء : الحمدلله .... طيح حضي الثالث ههههه
* عمتي : ها لازم صايره كسوله
* زهراء : لا والله عمه بس صعب واني اريد اطلع معدل
* بنين : كيفتي عالسوالف مووو تعالي عاد
* زهراء : شبيج ذبحتي روحج هو ببسي وتقدمينه بكلاصات خبصتينه قابل حتذبحين الطلي
* بنين : انتي بس فالحه بطول اللسان لو بيج خير روحي رتبي نفسج
* زهراء : ههههه اي مو جاييني خطابه حتى ارتب نفسي وبعدي عندي امتحان انكليزي حتى اذا اللبس ملابس مشككه معذوره
* بنين : طبج مرض
* امي : زهراء روحي بدلي وعدلي وجهج بمكياج خفيف
* زهراء : شبيكم انتو اليوم شبيهن ملابسي خرب
* امي : لج جايين يخطبونج لعلاوي ويخطبون بنين لحسين
* بنين : 😱 يمه عمتي كالت جايين بس ع زهراء
* زهراء : هههه وتعلم بيه المعفنه وهي متدري جايين علينه اثنينه
* بنين : يمه ليش بس زهراء تكوليلها بدلي واني لعد
* امي : انتي رايدينج لحسين المبهذل عليمن كاشخه بس زهراء عيب من علاوي طالب جامعه وكشاخ
* زهراء : انصدمت وفرحت لان علاوي يخبل وممفكره بي هلكد ما حلو وكشاخ دائماً اشوفه شي مستحيل لان بالفعل مستحيل يعني يباوع عليه ويعوف بنات الجامعه
* بنين : زهراء والله اشتغل كلشي بمكانج حتى ملابسج وملابس رجلج وغرفتج اني انظف واغسل وجهالج اني اكبرهم واربيهم بس خلي نتبادل
* زهراء : هههههه انجبي حسين هم مابي شي ............عمتي حجت ويا اهلي وويانا تقدمتلنه وبابا سألنه احنه وافقنه صح صغار بالعمر بس حالتنه تعبانه لازم نساعد اهلي ونخلصهم من مسؤوليتنه
* امي : يمه اكيد موافقات ؟ فكرن زين صح قسمتجن كل بنيه تتمناهه بس مو باجر عكبه تكولن زوجونه اهلنه واحنه صغار
* بنين : يمه زهراء احلى مني تمشي قسمتهه بسرعه دكولي لعمتي نريد بنين لعلاوي شيصير يعني هههههه
* زهراء : يمه تره اغار صيحي بيهه
صغيره ونظرتي للحياه بسيطه واحس نفسي حصير مسووله عن بيت والبس بدله واروح صالون والبس ذهب واكشخ واطلع اني ورجلي واتونس واصير حامل ويصير عندي طفل كلش حبيت فكره الزواج وبنونه هم مثلي فرحانه واحنه نعرف بيت عمتي سبورتيه وحالتهم الماديه كولش زينه
بعد اسبوع
* عمتي :الووو ..... شلونج ام زهوره ....البنات شلونهن
* امي : الحمدلله ام علي بخير اذا انتو بخير
* عمتي : شو مارجعتولنه خبر
* امي : ياااا خيه مو كتلج بساعيتها البنات بناتج وانتي حره بيهن ...هي مال رسميات ام علي؟
* عمتي : كلللللللوووووش والله ع هاي حجايتج اعيشهن ملكات والله لدللهن دلال مصاير
* امي : اني انطيتهن لايدي امينه بلا متكولين اعرفكم شنو
* عمتي : ام زهراء الجمعه الجايه حفله الخطوبه ومهر السيد وبعد شهر او شهرين تزوج بنين وحسين وزهراء وعلاوي يبقون مخطوبين لحدما علاوي يكمل دراسه
* امي : يا يتزوج الصغير قبل الجبير ههههه شلون رهمتوها
* عمتي : كناله اصبر اتزوج ويا اخوك ماقبل يكول مستعجل ضروري تزوجوني بنين ههههه
* امي : هههههه هم سبحان الله صدك هذا جدر وقبق بنين وحسين نفس السوالف ... الله يقدم البي صالح اكول لابو زهراء وارجع اخابرج
* ابو زهراء : هو علاوي بعدله شكد ويتخرج ؟
* امي : تكول سنتين الا يتخرج والولد يكول ماكدر دراسه وزواج هسه بس خطوبه
* ابويا : بس ياام زهراء البنات متعلقات وحده بالثانيه شلون تبقه وحدها زهراء
* امي : ابو زهراء صلي عالنبي اعتبرهن كل وحده قسمتها وحد غير الله يحبنه وخلاهن لأخوان
* ابويا : هذا هو بس ارجعي اسالي البنات خاف يكولن ابونه تعاجز من يمنه ويريد يزوجنه انتي امهن لحي عليهن
* امي : اكلجن خابرت عمتجن وهيج وهيج كالت
* بنين : هههههه بيها صالح صرت لحسين كبر انتي ابقي انتظري سنتين
* زهراء : الحمدلله جنت شايله هم الدراسه مو مثلج كسوله بعدج بالاول متوسط
* بنين : اكلج يمه تره اني ابطل وحسين هم مبطل من المدرسه ونخلي زهراء وعلاوي هم يقرون بجهالنه
* زهراء : يمه شبيها بنتج شو اني شايفه البنات يستحن شو هاي ماصدكت يجونها خطابه
* امي : ههههه خليها فرحانه يمه بناتي عرايس فدوه لالله
حجزنه صالون وحجزنه فساتين اثنين وترتيبات الخطوبه وتفاصيلها اسبوع كوه كفانه وطلبت اجازه من المدرسه وبنين بلا اجازه هي تريد تبطل
* حسين : اني عمري 20 سنه كسوووولي كلش شبعت طن كتل من وره الدراسه شواربي طلعن وابويا يكتل بيه علمود المدرسه اخير شي استسلم وفتحلي محل وبطلت .... احب اتزوج من جان عمري 7 سنوات من الاول واني اجلب بالتروح وبالتجي اريد عرس وهوسه وركص واغاني .... بحدما الله هده امي عليه وكالت اخذلك بنين بالاول ردت زهراء لان زهراء احلى بس امي كالت اخوك يريدها وكلت ماكو فرق هن توم اصلا بس زهراء لان ثكيله ردتها ههههه بعدين فكرت كلت بنين مثل طبعي شكو بيها
* علاوي : اني طالب جامعه مرحله ثانيه عمري 22 سنه ممفكر بالزواج بس امي وحدهه وتعبت من شغل البيت واقترحت عليه فكره تخطبلي بنت خالي زهراء مارفضت لان البنات الجوه ايدي كلهن للونسه ماكو وحده للزواج وزهراء تخبل بعدها صغيره وفقيره اعلمها ع ايدي فكلت لامي عادي شكو بيهه
* زهراء : اجه يوم الجمعه وامي ودتنه اني وبنين للصالون وخلت تلفونهه يمنه لان احنه ماعدنه تلفون وكالت من نكمل نتصل بيها ع رقم بابا ورجعت للبيت لان محد بمكانها .........لبسنه الفساتين وشعرنه طويل حيل
