الجن العاشق

1

#الجن_العاشق
#ليوثي المياحي

اليوم الاول اليه بمستشفى سامراء العام فرحت هواي بالوظيفه رغم هواي ناس يشوفونهه وضيفه متعبه بس اني جانت بنظري احله شغله انسانيه  . يجون ناس هوايه بالمستشفى اشكال والوان وانواع ناس محتاجه للعنايه وناس تعبانه وناس تبجي من الضيم الواكعه بيه... وناس فرحانه بشفاء حبيب او قريب صحيح شغله التمريض يرادلهه خلك وطوله بال وتعب ويوميه مبيت..
ارجع وجه الفجر للبيت بيتنه جان بحي المعتصم  . و جان بسيط كلش بيه غرفتين وصاله ومطبخ وصحيات . ابويه رجال مستور ويحبني هواي عمرة سبعه وخمسين سنه  وامي عمرهه ثنين وخمسين سنه ابويه  ازوج امي عن حب ورة خمس سنين من الزواج ياله خلفتني امي ابويه جان يتمنه اطلع ولد يكول حتى يعيني بكبرتي وامي مكيفه بيه .. واربعه وعشرين ساعه بس تدعيلي  ..
ابويه عندة محل زغير يم البيت يبيع بيه مواد غذائيه .. وامي ربة بيت..
يكلون اني حلوة طالعه ع بيبيتي ام امي.. صحيح اني احس شكلي حلو .لان الدكاترة والممرضين اللي ويانه كلهم يتغزلون بيه . اني هيج احس . لان بشرتي بيضه وعيوني عسليه وجبيرة وبيهه شويه حور بس لايكاتلي هواي وشعري اشكر وطويل ودائما المه بقراصه واسويه ذيل الحصان مثل ميكلون.
&&&

اليوم جان متعب هواي الطوارئ مزدحمه حيل . خلصت النوبه مالتي ورحت دا ابدل ملابس الشغل والبس ملابسي حتى ارجع للبيت اتقربت زميلتي سناء مني وكالتلي هدى استري نفسج لان دكتور حاتم ديباوع عليج من جوة ليجوة .
ضحكت واني اعدل بكصيبتي ذيل الحصان جدام المرايه  وكتلهه عادي هوة مو اول واحد يباوع ومشيت وحسيتهه ادردم ورايه وتكول شكد مغرورة هم عاجبهه روحهه.
باوعت عليهه وضحكت ويه روحي كلت همه كلهم يغارون مني عاد انتي ...حتى المرضى من النسوان من يجون يخافون على رجالهم مني... بس والله مو ذنبي يعني اني شاسوي الله خالقني حلوة جنت اعرف اي رجال يتمنه ابتسم بوجهه ..
وبالردهه مالت الطوارئ كلهم يباعون عليه . حتى بالشارع من ااشر لبو التكسي يوكفن التكسيات سرة ... هههه
خو الدوائر الحكوميه كل دائرة اطبهه دقايق واخلص المعامله ..
هاي كله لان شكلي حلوو .. بيناتنه الحجي اني هم جنت افتخر بشكلي وبجمالي اللي حاسداتني هواي بنات عليه.
طلعت اني وسناء زميلتي  من المستشفى واجرنه تكسي ومشينه ابو التكسي الطريق كله مشال عينه مني وصلنه للمنطقه ونزلنه .. سناء كالتلي شفتيه ابو التكسي عينه انحولت من وراج كتلهه شسويله عوجت حلكهه ومشت يمكن جوابي معجبهه..  طبيت بالبيت وعفت سناء تروح لبيتهم اللي يبعد عن بيتنه خمسه بيوت وهمه سادس بيت بالفرع.
طبيت للمطبخ كبل لكيت امي دا تحظر  تطبخ للعشى كالتلي هله يمه اصبلج لكمه تاكليهه خاف جوعانه . كتلهه لا يمه ما اريد اكلت بالمستشفى راح اروح انام لان تعبانه كلش ،روحي يمه اخذيلج غفه عود اكعدج ع العشه لا يمه عشاويش اصلا اني مسويه رجيم . كالتلي وج  رجيميش هوة انتي شباقي بيج اشو جلد وعظم . طلع ابويه من غرفته وكال عوفيهه براحتهه خليهه حتى تحلو بعد اكثر  واكثر . كتله بابا محد فاهمني غيرك باسني من كصتي وكالي روحي نامي وارتاحي بابا .
امي حجت على ابويه وكلتلهه محد راح يطلع عينهه غيرك انته بهذا كلامك راح يصير عمرها 27 سنه وليهسه ما ازوجت وياهو اللي يجي ترفظه ما ادري شتريد . طلعت راسي من باب غرفتي وكتلهه اني ما ازوج ياهو الجان وبعدين كل اللي تقدمولي ولد منطقتنه وكلهم تعبانين . سديت باب الغرفه مالتي وكمت ابدل هدومي ولبست بجامه ستريج  وتي شيرت احمر اتمددت ع السرير مالتي وبديت افكر بالكلام اللي امي كالته وبديت احلم يجيني اما دكتور او ضابط او رجل اعمال ويخلصني من هاي المنطقه التعبانه ويكعدني بقصر حديقته جبيرة وبيهه انواع الوروود نعست واخذتني النومه وما حسيت بنفسي الا قبل اذان الفجر كعدت فركت عيوني شفت واحد كاعد ع حافه السرير مالتي معقوله اكو واحد وياي بالغرفه غوشت عيوني وفركتهه مرة ثانيه وثالثه لحد ما دمعت وكامت تحركني ما كو احد استغفرت ربي ورجعت خليت راسي ع المخدة وغطيت وجهي ردت اتاكد وخرت الغطا وباوعت بتك عين ردت اشوف اكو واحد وياي بالغرفه لو مجرد تهيئلي باوعت شفت خيال مال شخص كاعد نفس الكعدة الاولى ويباوع عليه حتى حسيت بصوت نفسه وصل لحد اذاني ردت اصيح واعيط بس صوتي مدري وين راح ردت انهزم ع باب الغرفه خفت ورجليه وجسمي كله يرجف . معرفت شسوي بذيج اللحظه راح كلشي اتذكرة انمسح كل شي موجود بذاكرتي ومخيلتي . ياربي منو هذا الغريب اللي كاعد بغرفتي وعلى سريري . صخنت وحسيت العرك بلل مخدتي ولزمتني الباردة وكمت اطكطك بسنوني مدري من الباردة اللازمتني مدري من الخوف اللي سيطر على كل جسمي حاولت اكوم بس......... للحكايه بقيه