حين يستبد أدم /همس ليل
البارت الاول
قصص غزوان علي
_اجو...اجو....
اجت بنت خالي تركض ...ماما اجوي...
سمعت صوت الطبل...وكلبي كام يضرب وياه...
صوت الطلقات على كولتهم الجيلات ...
شعلوا بيها الدنيا...تكولين داخلين حرب مو زفة...
رجلي نملت...وحسيت كلبي يريد يطلع من مكانه...
باوعت لامي...واكفة مسافة عني...وتنظرلي بغضب...
نظرتها تكولي ليش هيج سويتي...
بعدت عيوني ورجعت باوعت لعمتي...اشرت براسها...
_لا تخافين حبيبتي...كولي يالله...
اجى صوت اختي يطمني...همست باذني هالكلمات
باوعت حولي...ماكو هواي خوالي وخالاتي كلهم رفضوا يحضرون وزعلوا....
بس الموجود عمتي وبناتها...وصديقاتي وجوارين...
الصوت اقترب وبدت السيارات تطبك باب بيتنا...
وصوت الطلقات زاد....
شوي وسمعت الهلاهل وطش الجكليت بلش بدخلت اخواته واقاربه
وبس وصلن يمي بدن يهوسن
هاي الرادها وهاي التمناها ...بنت العم لابن العم جبناها...
بس لا هو رادني ولا اني ردته...اجاوبهم بكلبي
بت عمنا لاخونا تصير جنتنا ومانريد الغريبة ادوس عتبتنا...
واني اعرف كل الزين مايريدني هنة ويتمنن بهاللحظة يفركشن الزفة....
شوي وسمعت هوسات الزلم...عرفت راح يدخلوه..
اجت اختي تلبسني الغطى على راسي....دفعت ايدها...
وماخليتها...لا تعاندين هسة يكوم يحجي...
شاورتني...هزيت براسي...
دخل والنسوان تلكنه بالهوسات والهلاهل ...
رفعت عيني له...لابس دشداشة بيضة وغترة بيضة ...ومخلي عباية رجالية بيجي منقوشة بخيوط ذهبية....
اعرف تعمد يلبس هاللبس العربي...حتى يغثني..
عباله استنكف منه....
هو طالع هيبة بيه...لو غير شخص جانت نعجبت بيه....
بس اني اعرف هالانسان شنو ...لذلك ماتأثرت بوسامته...
تقربت اخته تكومني استقبله....لكن ماكمت...
نظرة عينه وهو حاطها بعيني جمدتني بمكاني...
نظرة بيها انتصار وشماتة...
كانما يكول لي كسرت خشمج واخذتج غصب...
رضيتي ما رضيتي صرتي لي...
كعد بصفي والهوسات والدبج مال قريباته مستمر...
وهوسات الزلم برة نفس الشي...
ماطول وكف...ومد يده ولزم ايدي...وسحبني بقوة...
أذاني بس سكتت...نزع عباته وخلاها على راسي...
من واكف كدامي ديلبسني العباية رفعت عيني له...
ابتسم...كأنما يكولي اعرف بيج تريدين تعاندين وماتلبسين شي .... قصص غزوان علي
سحبني وطلعنا...وسط هوسة نشكر من كال اخذوها نشكر من عمها وبوها
واني بكلبي اكوللهم وين الشكر مالكم شو كله غصب
وكف بالباب سلم على ابوية..
اجى ابوية علية باس راسي...يابة الله يرضى عليج...رفعتي راسي وماكسرتيني...
دمعت عيني...هو واكف يمي
ماردته يشوف دمعي ويشمت بية...
بس من دانطلع اشتغلت الطلقات ...خفت ..جلبت بيده حيل...
صعدني بالسيارة...واني مدنكة...لا اكدر اباوع صفح استحي ولا اكدر اباوع لكدام لان ابن عمه يسوق ولا اريد اباوع عليه...
جنت احاول اعيد تماسكي...ومااشوفه دموعي
من مشينة دنك عليه شاورني....شكد كوية خاطر ربج
جان بودي اضربه بشي ...بس شسوي...راح ترجع علية
لحد ماطلعنا من بغداد...بيتهم اطراف بغداد بالمناطق الريفية...
وصلنا وية مالافت السيارة ...ما اشوف الا رمي مو طبيعي كمزت من مكاني بالسيارة وجلبت حيل بيه...هو تفاجأ ...همس لا تخافين هاي استقبال لنا...رجعت عدلت كعدي...
يا استقبال خاطر الله عبالي صار هجوم علينا..
احجي وية نفسي...
دخلنا ممر طويل وصلنا لبيت كلش جبير ...
طبك السيارة وية الباب...نزل واجة من جهتي نزلني...ودخلني للصالة من وصلنا...وكف نزع عبايته عن راسي...وعافني وطلع...
ظليت اباوع براه صح اكره كره العمى بس احس عافني وسط غابة وحدي...
اباوع بالوجوه ..ناس تنظرلي بغضب وناس بحقد...وناس مالها علاقة بالموضوع...
بعدين شفت عمتي دخلت جريت نفسه...
اجت باتجاهي ...عمة لا تخافين اني اجيت وياج
جلبت بيدها وهية اطمني...
_لعد وين حبايب العروسة...شو ماكو احد وياها..
وحدة حجت ماعرفها بعدين عرفت هاي خالته..
جاوبتها عمتي...هي بنص اهلها وكلهن حبايبها لو نسيتوا ذولة بيت عمها..
ذيج عوجت حلكها ماعجبها الحجي...
_عمة اريد اصعد لغرفتي...
_ميخالف عمة بس اصبري شوي...عيب هسة دكومين
ظليت مصلوبة وهنة يتفرجن علية...
بس انتبهت اكو وحدة احس تريد تاكلني بنظراته
_عمة منو ذيج البنية
_وينها...
_ذيج ام الوردي...احسها تريد تكوم تهجم علية
جرت نفس عمتي...هاي فرح
ها هسة افتهمت حقها لعد...احجي وية نفسي
كالوا راح يصبون عشا ...اجت امه كالت خلي نصعدها لغرفتها...صعدوني...
طبعا وية دخلتي للغرفة كومة دخلن وياي ما اعرفهن...
وكلهن يحجن سوية...واني راسي صاير طبل ...هم ضغط نفسي وهم تعب ...
اريد بس يطلعون...عاد امه حجت
_حبايب راح يصبون العشى خلي العروسة تاخذ راحتها...
شفت عمتي تريد تطلع وراهن جلبت بيدها...
_وين رايحة...
_رجعت دنكت باست كصتي...عمة هسة شوية ويزفوه قبل العشى اخذي راحتج...ولا تنسين مثل ما وصيتج
_عفية عمة ابقي شوي
_يمة انتي مو صغيرة...بس بنتي الله يرضى عليج...لا تمانعين...مالنا خلك للمشاكل...هنا يريدون بياضج...لو يفسروها بغير شي
عافتني وطلعت...احنة بالقرن الواحد والعشرين...وبعدهم يوكفون للعريس يطلع بياض البنية...
بقيت اتفرج واني افرك بيدي من الخوف... على الغرفة جبيرة وماثثها بأخشاب ضخمة...
سمعت بدت الهوسات الزلم...وبدت تقترب...جان اكو احد مثل الي يغني وهمة يردون وراه وبعدها تصير دبجة برجليهم قوية...
من دخلوا سمعت الصوت واضح..
جان يكول نفرح واليوم العيد لنا ...هم يردون نفس الشي...بعدين يكول لو هلهلت واسمج عيدة واحدنا يلاويله مية
تبدي النسوان تهلهل...ويكمل بس كمت ما استوعب باقي الهزوجة من الخوف
واستمرت الهوسات وبدة الصوت يقترب ودبجة الزلم تزيد..انفتح الباب
فزيت ورفعت عيني شفت عمتي وامه دخلوا...كومتني عمتي وكالت حتى نسلمج له...
فتحت الباب الثانية ...عرفت هو دخل من عطره سبقه...بس هالمرة ما رفعت عيني...
كلبي احسه يريد يطلع من ضلوعي من كد مايضرب سريع...
تقرب...وعمتي اخذت يدي وخلته بيده
_منك المال ومنها العيال
وقبل ماتطلع...دير بالك عليها عمة ما اوصيك...
طلعوا وبقينا وحدنا...هو قفل الباب وراهم...
من حسيت بطكت المفتاح فزيت ورفعت عيني..
اندار...نفس النظرة بعينه جانت...
نزع عباته وعلكها وبعدها الغترة والعكال...
بدة يفتح دكم ردن الدشداشة ويطويها....
واني اتبع حركاته بفزع...
_مبروك بنت عمي
اجى وكف مقابيلي عينه بعيني ...مانزلت عيني
_مو كتلج ...من اريد شي اسويه اسويه...دير بالج فد يوم تحطين راسج براسي...
_يجوز سويت الي تريده بس انتة هم خسرت
_شلون بلة
_هم خسرت الانسانة الي تحبها...
_منو كلج...اني ما امشي خطوة اذا مااكون واثق منها...
_شنو هالغرور
ماحسيت الا لزم زندي حيل ...شوفي لج اياج تتجاوزين بالحجي...لا تعرفين شغلي وياج
جان يضغط على ايدي ...بس ما كلت اخ
_شنو شغلك.. اتمد ايدك علية...كلشي اتوقع منك
_غلطانة مو اني الي امد يدي على مرة...بس اذا انتي فرس جامحة..ترة اني خيالج واعرف شلون اروضج
_قصدك تعرف شلون تكسرني
_فهميها مثل مايعجبج
هد ايدي وراح كعد على الجرباية...
بدلي فضيها ...
ظليت صافنة عليه...شنو من قابلية...شلون يكدر يتقبل انسانة يكرهها...ولو همة الزلم تقودهم غرائزهم مو الحب...
_شلون ابدل اطلع...ضحك...صدك تحجين...
انزعي ولا دوخيني...
من ضمن طلباتي كان حمام يبني بالغرفة...بنو بس حتى ماينولي الي اريده سواها خارج الغرفة...
زين شلون اطلع للحمام...فزيت على صوته
_شنو راح تظلين واكفة صافنة
ماكدرت اجاوبه...بس ايدي ما تقبل ترفع تفتح البدلة...
كمز من مكانه ..تراجعت ليورة من شفته اجى باتجاهي...
وكف وراي وبلحظة فتح سحاب البدلة ونزلها...
دنكت واني احس الدمعة صارت بطارف عيني
خله ايديه على جتافي احسها نار تجويني ...ودارني باتجاهه
حسيته بقى يتفرج علية...رفع وجهي بأتجاهه
_وظل يباوع بوجهي...والله جمال عندج...
خزرته بعيني....ضحك.. كروب قصص غزوان علي
_لو كل الخزر اليوم انتي الي...بعد مايفيدج شي
دنك يبوس بركبتي واني نفسي لعبانة منه
وبدت ايده تسلسل لجسمي...دفعته اني
تعصب...جرني باتجاهه وهو لازمني من اجتافي...
_شوفي لج...الي تسوي مو بصالحج...ما اعتقد تحبين يكولون غير شي
شهكت واني استوعب كلامه...وهو جرني للجرباية ...دفعني عليها...وكف مقابيلي ونزع دشداشته....
جنت اتمنى اقاومه...ادفع ايده الي انتهكت حرمة جسمي وهية تتلمسه....
امسح كل مكان مشت عليه شفايفه من جسمي
بس شنو بيدي...
ما طول وحقق الي يريده...وهو خال ايده على حلكي حتى ما اصيح...من ألمي وقهري عضيت ايده حيل...بس ما كال اخ
_مبروك بنت عمي...صرتي مرة
حجاه وهو واكف....
جريت غطى استر نفسي ...هو شاف حركتي ضحك
_بعد مايفيد..
شفته لبس وطلع...ومن سد باب الغرفة...نفتحت دموعي شلال...
خلص كسرني مثل ماحلف مرة...
_صدكي اخذج واكسر خشمج لو اخر يوم بعمري وبعمرج
هاي كلماته ما انساها ابد...
لفيت الجرجف حولي نفسي ...كمت اريد اخذ شي استر نفسي بيه
سمعت بدت الطلقات تشتغل مرة ثانية...لبست دشداشة...
اندكت الباب...ودخلت عمتي من شفتها ركضت لحضنها....شبكتني
_عفية حبيبتي مافشلتينا...
جنت ابجي بقهر
_عادي حبي ...ترة كل بنية تحس بشعورج ..لان تحس اكو شي حافظت عليه طول عمرها راح
هي ماتدري شعوري قرف وكره ....
_ليش يضربون طلقات ...
_هاي...شلون نسميها من يطلع العريس بياض مرته...نوع من التهنئة
_ليش اكو ناس لسة باقية على هالعادات
_اي يمة المناطق الريفية تبقى متمسكة باعاداتها مو مثل المدينة..
خوما بيج شي..
_اريد اروح للحمام...
ودتني وشفن نزف ماديتوقف...
_عمة ...عبالك عندي نزف..
_لا تخافين شوي ويوكف
بدخلتنا للغرفة لكيته موجود...عمتي باركت له وطلعت..
_جابوا عشى تعاي اكلي...
_ما اشتهي...
_حتة لو تعاي اكعدي هنة
جانت الصينية بالكاع..كعدت كوة بس ما اكلت
_تعبانة اريد انام...
جنت احس نفسي مجهدة ...رحت للجرباية...واني احس نظراته تتبعني..
نمت على الحافة وما اتوقعت راح اغفة بهالسرعة...
من كعدت الصبح ...
جنت وحدي بالغرفة...
صفنت اريد استوعب وين اني....بعدين اذكرت
تنفست بعمق واني وية نفسي اتعهد اخذ حقي منه...
اخذ حق كسرة خاطري....اخذ حق دراستي العفتها
حق كل ساعة ويوم توترنا وتعاركنا من وراه ..ومن ورة اهله...
اذكرت اول مرة اجى ابوية لهنا ...
ومن رجع كان ضايج ومكسور خاطره...
حاولت امي تساله ما شرحلها...
بقى يومين ضايج ومهموم...كان المفروض راح يطلب منهم يحضرون خطبة اختي...
الجمعة راح يجيها استاذها بالجامعة ...واهله رادوا يلتقون بعمامهة...
اهل الولد من المحافظات الجنوبية...وناس معروفين...ولهم سمعتهم ومكانتهم...
ومثل مامعروف عد اهلنا بالجنوب يقيمون اهل البنية ولازم العمام يحظرون الخطبة
اختي ريم اكبر من ب٤ سنوات تخرجت من كلية الصيدلة....
بوقتها طلبت من ابوية يروح لاعمامي...
حتى يجون...ماجانت تدري ولا احنة اسباب خلافه وية اهله....
راح ابوية ورجع شايل هم وميقبل يحجي وية احد
ريم...ماما اشو ابوية ما كال راح يجون عمامي الجمعة لو لا
ام ريم...والله حبيبتي ابوج من رجع لسة مايتحاجى...
ريم...ادري شلون لعد
ام ريم...هو استاذ علي هم يتعيقل ...هسة شنو الا عمامج يحضرون ...يجون خوالج وخلص
ريم...ماما همة هيج طبعهم...اهله يكولون له غير نعرف اهل ابوها مين مامين...
جنت كاعدة استمع لحديثهم....
ريم...ذرى احجي وية بابا...بس انتي تكدرين تفتهمين منه
انتبهت تحاجيني....واني شعليه شداخل بجيسي
ام ريم...هاي من شوكت انتي شعليج...اشو كل صغيرة وجبيرة تحشرين نفسج بيها...
ذرى...هالمرة مالي خلك ملتهية بدراستي...
ريم...لج لخاطري...مو اختج
ذرى ...والله ياالله اني ادري المفروض الجبيرة هية تتوسط لاخواتها...مو هنة يتوسط لها
طبعا احنة ٣ اخوات....بين كل وحدة ٤ سنوات...امي كوة يصير عدها حمل...
باختي الصغيرة سما وصلت امي للموت....لذلك ابوية قرر بعد ما يسوي طفل...
والدي مدير مدرسة...ورغم اصله من الارياف...بس ما اهتم لموضوع عنده بس بنات...وماعنده ولد يشيل اسمه...
ريم اختي شخصيتها مثل امي...ماتهتم الابنفسها...مو انانية بس ما اتحب ادوخ نفسها
بينما اني جنت بكل شؤون البيت ادخل ...واحب اكعد واتناقش وية ابوية...
رغم عمري ٢٠ سنة بس تشوفيني اكبر من عمري بالعقل....وطبعي عنيد
ابوية يكول انتي ذكريني بجدج...صح انسان يدوب يقرة ويكتب...
لكن صاحب شخصية...وذكي وماينزل راسه لاكبر واحد
صحاني من افكاري صوت ريم...هاشكلتي ذرى
ذرى...بخيروهم ماخيروني
كمزت من مكانها تبوسي...حبابة خيتي
من رجعت من الكلية وتغديت...سويت كهوة
ورحت لبابا...الله يساعدك جواد
_هههههه...شلون بيج بابا
_اضحك الدنيا ماتسوة
اخذ كهوته...واني كعدت يمه...
_جاي انتظر...
_شتنتظرين
_اسمع منك الصار يم عمامي
رجع فنجان الكهوة للميز وهو ضايج وتنفس بعمق...
_ماعرف بابا شاكولج....مدري اني تغيرت والدنيا بالمدينة صقلتني....
مدري اهلي زادو طغيان بعد ما صعدوا...وصار عدهم فلوس ومراكز
_بابا ممكن تحجيلي اساس المشكلة وية اهلك
_بنتي هذا موضوع قديم يرجع لتاريخ جدي
_بابا احنة ابد ماعرفنة سبب الخلاف والانقطاع بينكم...
زين شلون نفهم الي صار هسة ...اذا ماعدنا فكرة عن الماضي....
تنهد...هو حمل ثكيل اريد اخفف منه...وانتي طول عمرج ذكية راح تفهمين...
الموضوع يرجع لجدي ابوابوية.....يتبع
