لاتتركني فأنا يتيمة

مستفزة...حقير

اسمي حلا عمري 18 مواصفاتي بيضة عيوني سود وشعري اسود طولي متوسط انسانة كئيبة حزينة وهادية مانحبش نحكي واجد انطوائية ونكره الخلطة والناس
ماما ..متوفية الله يرحمها وباتي متزوج عليها .. موتت ماما قاعدة كاسرتني هي ليها اكثر من 4 سنين بس مش قادرة ننساها ...عايشة مع جدتي في حوش خوالي
خوالي او بالاحرى عيلتي:
جدتي (امنة)طيبة وحنونة نحبها هلبااا نفس ماما بالزبط
خالي علي:متزوج عنده بنتين وولد..منار عمرها 2 سنتين..ميرال عمرها 10 سنين..مؤيد عمره 5 سنين ..مرته زينب
خالي مراد:عمره 25هدا صاحبي وديما معاي يعني كل شي يصيرلي مراد يعرفه
خالتي وفاء:متزوجة وعندها 3 بنات و ولدين..مودة عمرها 19 اكبر وحدة في البنات انسانة حقودة ماعنديش عليها هلبا او بالاصح هي مخلية الناس تكرهها ..مرام عمرها18 طيبة وجوها حلو صاحبتي واختي وكل شي بالنسبة ليا..رغد عمرها 15 مطرشقة والدنيا قالبتها على راسها بس تهبل..محمد 23 عصبي ومش بتاع بصارة بس مرات يبدى حنون هلباااا..قيس 21جوه فري مطرشق ومطفوش ويهبل معتبراته خويا وقريب مني واجد
~~~~~~~~~~~~~~~~~~~
نبدو روايتنا

نضت الساعة 7:30 توضيت وصليت نزلت تحت ندور شن نفطر

مراد " خش للكوجينة "حلا يانفاخة نايضة تقربجي عليش ماتخليش الواحد يرقد

انا:صباح الخير باهي الحمدلله حالي باهي..هكي تقول الناس

مراد:ههههه خزي باردة

انا: انت البارد حول هكي

مراد:اي وخيرك انشاء الله نايضة بكري مش من عوايدك

انا "شهقت " هيييي قصدك نسيت

مراد: شن بننسى

انا "ضربته ع كتفه "اليوم اول يوم ف الكلية

مراد: اياه نسيته مرة وحدة

انا:باهي قعمز افطر مزال الوقت هو

مراد:وشن اللي بنفطره يعني ماهو من فلاحتك موتية السفرة

انا:هههههه باهي اسكت تو ندير

مراد"سحب كرسي وقعمز "هي بسرعة جعان را

قعدت نساوي ف الفطور وهو يهدرز .. كملت وقعدنا نفطرو..بعد ما فطرت وتيت روحي لبست سروال اكحل وسورية بيضة طويلة و وشاح جيشي وسبيدرو جيشي لبست ساعة سودة ونزلت

انا:مراااد مرااد

مراد"طلع راسه من الباب"تي باهي "وطلع"شن رايك فيا طرف صح

عجبني لانه بجد كان طرف ..مراد كانن عيونه زرق وابيض بس مش واجد وعنده لحية خفيفة بنية وشعره بني وجسمه رياضي وكان لابس سروال امريكي باهت وسورية ازرق كحلي عاكسة على عيونه وسبيدرو

مراد:ههههههه عارف روحي طرف بس مش لهادرجة تسرحي فيا

انا" ابتسمت"ربي يحفظك يا خالو