#شقة_مشبوهة1
بقلم ... شيماء عثمان
🔞
نزلت من الأمجاد زعلانه شديد و معصبه ... ماشه سريع وصحبتها وراها بتناديها ...
_ يا بت ماتمشي براحه ... شنو مركبه في رجلينك صاروخ ... غزل ياخ استني ... بطلي حركات الاطفال .. مابتكلم معاك ردي
وفقت غزل وإلتفت لسماح صحبتها ... صاره وشها وبزعل قالت ليها ... عايزه شنو تاني ... مش عملتي الفي راسك و كذبتي علي ... ألف مره فهمتك مابحب الحركات دي ..... أولاد ولا عمرنا شفناهم نمشي نقابلهم ليه .... وبعدين أنتي مصدقه واحد لقيتيه في قروب فيس بوك عمل ليك طلب صداقه اتونستو في الخاص كم مره وقال عايز يقابلك حيتزوجك! ..... كان بنات السودان كلهم أتزوجو ماهم زيك24 ساعة في الفيس حايمات في القروبات وأخر فصاحه مع الاولاد
سماح : وااااي انا من موشح كل يوم والله اليسمعك يقول مشينا قابلناهم في شقة مشبوهة .... مابراك شفتي كنا في مطعم محترم وضح النهار
غزل : أنتي لسا بتتفاصحي ... من الجامعه قلتي عازماني ... اختك حولت ليك مصاريف ... اتصدمت لما دخلنا ولقيت شابيين قاعدين منتظرين ... وحضرتك قعدتي عادي اخر ونسه مع واحد و فكيتي فيني التاني ... ياخ ما كان فاضل إلا اجرك من طرحتك اطلعك
سماح : ما انا لو قلت ليك من الجامعه احنا ماشين وين ما حترضي .... بعرفك مخك دقه قديمه ... بعدين الاولاد ظريفين و محترمين اتونسو اتغدينا وطلعنا... مع انك كنتي بايخه مع طارق لما محمد اتحسس
غزل : انا حره مامجبوره اسايرك على الغلط
سماح : اقعدي أتعاوري كده لما تبوري ... العرس بقى مقابظه الايام دي
غزل : أبور بكرامتي أحسن من عرس الخفه دا .... أتحركي سريع اتأخرنا ... المغرب هسي بأذن ... أمي حتقتلني بسببك بتعرفي استاذة اقبال صعبه كيف
سماح: انتي السبب محمد قدر ما حنسك يوصلنا بعربيتو رفضتي و احرجتيني معاه ... حتى لما وقف الامجاد عملتي حركات و رفضتي تركبي لو ما عمو سيد الامجاد هرشك عجبني ليك
غزل : اخر مره تختيني في موقف زي دا و إلا والله لا بيني لا بينك
سماح : خلاص ياستي أسفين
غزل : يلا وصلت بيتنا مع السلامه
دخلت البيت لقت امها لابسه و منتظراها في الحوش ... مابدري ياهانم كان تجي بعد أذان الصبح
غزل : ياخ لو شفتي شكلك وانتي زعلانه حلو حلاه .... ابتمست وقربت منها عايزه تبوسها
اقبال : اتكلمي زي الناس يابت قبل ما اجي اطين عيشيك
غزل : يا ست الناظره امور الاستاذات خليها انا كبرت ما لسا طالبه عندك في المدرسه و بعدين ضربت ليك عندنا شغل مهم في الجامعه حتى الدكتور كان معانا اها أقول ليه امي بتزعل عشان يرسبني و يمكن يفصلوني من الجامعه افشل و مستقبلي يضيع عشان خوفك الزايد علي دايراني افشل... ما بهون علي تحسي بعقدة الذنب بسببي .
أنت تقرأ
شقة مشبوهة
Romanceالظروف ...... الشماعة الأزلية للمخطئين ... كل البشر عندهم ظروفهم الخاصه .... أصلا الظروف أتوجدت كأمتحان ... يبقى الخيار في يدك ... أما تخليها تقودك وتستسلم لمسار التيار المجهول ، هو ممكن يوصلك بر الأمان و ممكن كمان ينزلك للدرك الأخير . و أما تستلم...
