#شقة_مشبوهة2
بقلم .... شيماء عثمان
🔞
في اليوم التاني بالعصر جاتها سماح .... دخلت ليها غرفتها ... ازيك ياقلب .. عاينت ليها و أبتسمت ... اهلين
سماح : لسا ماغيرتي رايك
غزل : خليني كده مرتاحه
سماح : يابت العريس شغال في الخارجيه تبع السفارات يعني اصحابو كلهم هيئه دبلوماسيه .... أحييي انا اموت وادردق في الجواز الاحمر
عاينت ليها و ضحكت ... والله أنت مجنونه معقول أقصى طموحك في الدنيا عريس!! ولو مغترب خلاص تكوني وصلتي القمه دا شنو التفكير العقيم ... زي أمي واحد
سماح : اها قولي اتخرجت وعملت الدكتوراة كمان اشتغلت و بقيت وزيرة ... حبه المشاعر و الاحاسيس اوديها وين شهادتي بعدين بتحضني ولا عايزاني اترهبن
غزل : شهادتك بتكون سلاحك و شغلك بكون سندك ... افكارك البدائيه دي بتكون اتغيرت و تفهمي ان الرجل مش محور الحياة وان السعادة عندها ابواب كتيرة ... وياستي العرس نصيب وقت ماربنا كاتبه بجي ... بس خلي عندك طموح وهدف بدل ما كل همك تلبسي عشان يشوفك شاب يجي يخطبك
سماح: عايني انا الليله مجهزه مشاعري و ما فاضيه لاي فلسفه ... طلعي فستانك الكبدي الجابتو ليك خالتك ... تعالي اعملي لي الميك اب و لو سمحتي من علبة الايشادو الجديد الماك هديه خالتك يوم عيد ميلادك ... بعرفك بخيلة
غزل : قوة عين عجيبه لكن
سماح : عايزه اسألك سؤال بس ما تفهميني غلط
غزل : أحكي
سماح : هو خالتك أنتصار ابدا ما مشيتي ليها ... هي بتجيكم من وقت للتاني و شكلها مروووقه كل ماتجيكم تجيب شي وشويات ... لما دخلتي الجامعه جابت ليك هدايا بالشنط و كلهم ماركات
غزل : هي مستقرة في القاهرة واصلا عندنا خلافات عائليه وانتي عارفه ... هسي عايزه امكيجك ولا تتكلمي
غزل اتضايقت من سؤال سماح بس ماحبت تظهر ليها .... بعد مالبست و أتظبطت عاينت لروحها في المرايا ..
سماح : الليله كان ما جبتو سفير برمي روحي البحر
ضحكت غزل و قالت ليها ... من هسي اقرب كبري و نطي ... عاينت ليها .. هم الاولاد ديل عميانين بالله يلقو زيي وين .. حلاتي حلبيه عيوني كبار جسمي حلو وشعري طويل
غزل : الحكايه ماجمال بس
سماح : لا جمال بس بدليل اولاد الجامعه المكسرين فيك وانتي عامله رايحه .. يومتا واحنا ماشين سمعت واحد قال لصاحبو البت دي تقول ملاك منزل من السماء ... لونها قمحي زي الدهب والعجب العيون العسليه الواسعه لما تعكس مع الشمس توقف الكرة الارضيه بنظرة وكلو كوم والشامه الفوق شفايفها كوم اما الجسم المقسم والخصر المضمر قيامة قايمة صحي القصر فتنة زي مابقولو ..... قربت اقول ليو لو شفت الشعر المموج النازل على اكتافها تعمل شنو
أنت تقرأ
شقة مشبوهة
Romanceالظروف ...... الشماعة الأزلية للمخطئين ... كل البشر عندهم ظروفهم الخاصه .... أصلا الظروف أتوجدت كأمتحان ... يبقى الخيار في يدك ... أما تخليها تقودك وتستسلم لمسار التيار المجهول ، هو ممكن يوصلك بر الأمان و ممكن كمان ينزلك للدرك الأخير . و أما تستلم...
