#شقة_مشبوهة10
بقلم ... شيماء عثمان
🔞
أنا في بيت دعارة !!!...
قفلت الباب بالمفتاح و هي بترجف ... مشت على الركن نزلت على الارض حيلها ميت ... ورجلينها ماشايلينها .... مدت يدها اتناولت مصحفها من الكومودينه الجنبها .. فتحتو وبدأت تقرا ... بس من الخوف صوتها مبحوح حتى الكلمات بتطلع متقطعه .... دموعها على خدها وبترتعش .... لحد ما طلعت الشمس وشعرت بالهدوء رجع في الشقة تاني ..... وهي لسا في في ركنها ماسكه مصحفها ... سمعت صوت الباب بدق كم مره .... رفضت تفتح .... انتصار برا بتنده ... غزوله افتحي لسا نايمه ... قامت فتحت وبتعاين ليها بنظرات تعجب كلها استفهامات
انتصار : مالك يابت ... شكلك كده ليه .. امبارح مانمتي كويس
رفعت راسها بنظرة حاده و نبرة غضب .... انتي جبتيني لشقة مشبوهة ؟! ..
انتصار بقتت تتمتم ....ششششقة شنو يابت جنيتي
غزل : ماتكذبي شفت كل حاجه
انتصار : حاجه شنو كان عندنا عشا عمل و ديل رجال اعمال
غزل : و هسي اليونيفورم حق الشركات بقى قمصان النوم ! ... قلت ليك ماتكذبي انا شفت كل حاجه ... صوتها علا .. يداب عرفت امي ليه مابتزورك و مانعاني منك ... دقيقه مابقعدها في المكان دا و ماشه بيتنا هسي ....
مسكتها من يدها ماشه وين وتعيشي لوحدك كيف انتي جنيتي
غزل : اكون مجنونه صح لو فضلت ثانيه في بيت الدعارة دا
انتصار : حتمشي وين
غزل : بيتنا موجود
انتصار ابتسمت بسخريه .... بيتكم ايجار و زمان سلمت المفاتيح
غزل : كيف يعني
انتصار : اجرت البيت دا لامك بعد ولادتك و شهريا كنت بدفع الايجار بعد طلعنا ما محتاجين ليه
غزل : بمشي اي مكان مابقعد هنا
انتصار : مابخليك تغيبي عن عيني انا المسؤله عنك حاليا
غزل : كيف تسكنيني في مكان مشبوة ما خايفه علي
انتصار : طول ما انت تحت عيني ما في شي بجيك .. بس اقفلي بابك وتكوني بأمان
غزل : لو في اي لحظه الشرطة جات
انتصار : انتي هبله .. مين يتجرأ يدخل بيت ناني وياستي شايفه اللابسين كاكي و دبابيرهم بتلمع في الشوارع بالنهار هم نفسهم السكرانين بتطوطحو عندي بالليل
كانت بتعاين ليها بأستغراب ... انا مامجبورة اعيش في الجو دا بفتش ابوي واهلي اعيش معاهم
انتصار اتخلعت ... ابوك العمرك ماشفتيه ... عارف ليك شنو .. خلينا منو انتي عارفه مكانو في اي مدينه في ليبيا ... عندك ليه عنوان ولا رقم تلفون
غزل : اهل ابوي اكيد عارفين
انتصار: هم اصلا وين
غزل : بسأل عنهم و بلقاهم ..... انتي اكيد بتعرفي راس خيط
انتصار : البعرفو زمان خلو الخرطوم في كسلا ولا الابيض ما متأكدة ... اقول ليك حل ...خليك معاي وانا وعد ارسل زول يجيب خبرهم واخدك بنفسي ليهم
غزل : اكيد
انتصار : انا وعدتك ..... و بعدين معارفي كتار و واصلين بخدموني
غزل : خلاص بمشي اقعد في داخليه لما تنفذي وعدك
انتصار : داخليه !! .... انتي بتحلمي
غزل : ليه
انتصار : كل البنات البشتغلو في الشقق بجو من الداخليات
غزل : انا مالي و مالهم
انتصار : اذا ماسالتيهم هم مابرحموك .... اساليني انا كم واحدة بريئه وقعت بسبب المؤامرات الوسخه البعملوها ... انتي لسا مابتعرفي الدنيا و لابتعرفي العالم ماشي كيف
غزل : كل البتقوليه ما بهمني ...حاجه واحدة بعرفها مابقعد هنا ابدا
انتصار: طيب اسمعي ... عندي شقة بتتشطب بستلمها كمان كم اسبوع ... خليك هنا لما تخلص ... وتقعدي فيها
غزل : برضو حتكون شقة دعارة
انتصار : لا دي مالها علاقه بالشغل ... اشتريتها مخصوص عشان اريح فيها راسي .. اوعدك تفضلي فيها بعيد عن كل شي بس مابخليك تطلعي من هنا الا اطمن عليك ..
سكتت و وافقت على مضض ...ماعندها حل تاني ... غير ترضى بالواقع الاتفرض عليها.... طلعت انتصار ... صادفتها سمر جنب غرفتها لابسه روب نوم خفيف .. شعرها منكوش ... بتدعك في عيونها و في وشها اثار النعاس ... مالها البت دي بتكورك ... في ناس نايمين ..
انتصار : ادخلي كملي نومك
سمر : بعد صحيتوني باصواتكم تاني مابقدر انوم
انتصار : لا امشي ارتاحي عشان المسا حتمشي مع وصال و سميرة مزرعة سيادة اللواء .. وغمزت ليها
ابتسمت بخباثة ... كلنا فداء الوطن ....ولايهمك هسي بولع سجارة و اموري تبقى ميه ميه .... المهم نسبتي تزيد
انتصار : كل مرة نتكلم في الموضوع دا
سمر : نتفق من الاول نسبتي 60% انا بكون شايله الليله كلها في راسي ... خالاتك ديل عجزو و مامطلوبات كتير و العويرة رهام تقضي الليل كلو ضحك
انتصار : عارفه خلاص اتفقنا ... بس الخالات مايعرفو ... ماناقصه وجع راس
سمر : اوامرك ياقلب .... وقعدو يضحكو
غزل لبست و مشت جامعتها .... لما وصلت وشافت سماح جرت عليها حضنتها و قعدت تبكي .... سماح مخلوعه .. سجمي يابت مالك .... طيب نمشي نقعد في حته هاديه نتكلم .... مشو مكان بعيد عن الانظار جابت ليها مويه وعصير ... وبدات تحكي ليها الحصل .... سماح منططه عيونها ... قلتي شنو...
غزل : انا قاعده في بيت دعارة
سماح : وطي صوتك يابت ... و روقي حبه خلينا نفكر
غزل : مامحتاجه تفكير ... عايزة اطلع من المستنقع الانا فيه
سماح : تعالي معاي بيتنا تقعدي لحد ما اجي
غزل : مافهمتك ماشه وين
سماح : كنت عايزة اخبرك بس موضوعك شغلني .... ساره ولادتها قربت ومفروض اسافر ليها عشان امي مابتقدر مع الرطوبه
غزل : بتبالغي تسافري و تخليني في المعمعمه لوحدي
سماح : امشي بيتنا امي و نهى مرة سامح قاعدين
غزل : لا بفضل مع خالتي لحد ماشقتها تتشطب ماانتي عارفه نهى مابتحبني
سماح : هوي دا بيت ابوي ولو ماعاجبها تطلع طوالي
ابتسمت نص ابتسامه .... اريتك ما اخت راجلي
سماح : ياريتك انتي مرة اخوي ...... عاينو لبعض وقعدو يضحكو
لما رجعت البيت ..... سمر في الصالة عامله قناع في وشها ...لافه شعرها لابسه شورت ماسكه شيشه وبتشربها ... رهام لابسه بيجاما وبتضرب منكير
عاينت ليهم ... وعايزة تدخل جوا ..
رهام : غيري ملابسك الغدا قرب
غزل : شكرا ماعايزة
سمر : هي سلام ماسلمت عايزاها تاكل معانا ... على فكرة احنا برضو بشر زيك
رهام : مالك مع البت
سمر : من جات و ماعاجبها حد
غزل بتعاين ليها بطرف عينها .... والتفتت لرهام .... لو جعت باكل تسلمي .. ودخلت غرفتها ... انتصار صادفتها في الممر ... غزوله مالك اتأخرتي ... ماردت عليها ... حصلتها الغرفه ... انتي لسا زعلانه
غزل : مافي شي ممكن تطلعي عايزة اغير ملابسي ... كانت بتتكلم و بتعاين للاتجاه التاني
قربت منها مسكتها من كتفها ... ارفعي راسك و عايني لي .... ليه بتعامليني كده
غزل : مفروض اعمل شنو
انتصار : مرات الظروف بتجبر الواحد يعمل حاجات ما بحبها ... انتي لسا صغيرة مابتعرفي شي
غزل : الظروف شماعة الضعيف .... وبعدين ماعندي حق اسألك ولا احاسبك و لابهمني بتعملي شنو ..... عتبي الوحيد ليه طلعتيني من بيتي و كذبتي علي
انتصار : و هسي وعدتك اسكنك بعيد
غزل : طيب ممكن تطلعي
انتصار : بجيب ليك اكلك هنا ... قربت وباستها في خدها و طلعت ... غزل اتضايقت وقفلت الباب ...
في الصالة .... سمر ورهام بتغدو ...
رهام : ليه بتتعاملي معاها كده
سمر : كيف يعني ... بتكلم معاها عادي
رهام : لاعادي و انتي عارفه
سمر : شوفي البنات الزيها بعاينو لينا زي الحاجه النجسه او المرض المعدي .. بنظرة تعالي و استحقار شايفين نفسهم احسن مننا وان الاخلاق والشرف حقهم براهم بس على الاقل احنا واضحين امورنا كلها واضحه عارفين اصلنا اما الزي غزل ديل تظهر ليك بمظهر الشريفه الطاهرة ست العذاراى و هي في الظلام ملخبطه البلد كلها و مصاحبه بدل الواحد الف
رهام : انتي متحسسه منها بس وبعدين شكلها طيوبه و مسكينه ماليها في الدروب دي
سمر : انتي الطيوبه ياختي ... المهم ركزي في سهرة الليله ما عايزين عوارة
رهام : مافهمت
سمر قامت من مكانها وقعدت جنبها ... و بصوت منخفض .. احنا صغار وحلوات و اكيد الطلب علينا اكتر وصال و سميرة عجزو و دمهم بقى تقيل .. نستغل الحاجه دي لصالحنا و ناكل الجو ... بطلبونا بالاسم و ناني حتفرح و تزود لينا نسبتنا الضعف
رهام : لو على الحلاوة و الصغرة بنات الداخليه ما مقصرين و مين قال ليك ناس سميرة عجزو ياخ ديل خبرة عشان كدة مابستغنو عنهم
سمر: اعلمك لمتين ...البنات ديل ما طوالي متوفرات وناني زهجت من اعذارهم مره المشرفه و مره اخوي و ابوي بعدين طلباتهم كتيرة وكان على الخبرة اتلحلحي مامحتاجه قرايه مش تقضي الليل ضحك و شراب
رهام : فاكراني بشرب مزاج .. بشرب عشان استحمل المناظر البنشوفها واقدر اكمل ليلتي
سمر : حتفضلي طول عمرك هبله ... ما حتتعلمي ...
لنا لقاء أخر...........
أنت تقرأ
شقة مشبوهة
Romantikالظروف ...... الشماعة الأزلية للمخطئين ... كل البشر عندهم ظروفهم الخاصه .... أصلا الظروف أتوجدت كأمتحان ... يبقى الخيار في يدك ... أما تخليها تقودك وتستسلم لمسار التيار المجهول ، هو ممكن يوصلك بر الأمان و ممكن كمان ينزلك للدرك الأخير . و أما تستلم...
