#شقة_مشبوهة11
بقلم ...شيماء عثمان
🔞
اسبوع عدا والحال زي ماهو .... غزل بتمشي جامعتها كل يوم.... سماح بتعمل في اجراءات السفر ... لكن الوضع في شقة مدام ناني ... عالم تاني ..... بعد الساعة التاسعة .... الشقة كلها بتتحول و بكسر سكون النهار ضوضاء مخيفه ... اصوات ضحكات و همهمات ... روائح سجاير شيشه و بنقو .... اما البشر في لحظات بتحولو لحيوانات مجردة المشاعر و الاحاسيس ..... عقول مغيبه .... تقودها الغريزة ... اجساد عاريه ...... عارية للقيم الانسانيه والاخلاق ... قبل ان تكون عارية للثياب .....
غزل بتكون في غرفتها .... حابسه نفسها ماسكه مصحفها ..... تزداد عندها مشاعر الرهبه كل ماتسمع اصوات الخطوات المترنحه و الضحكات العاليه ... الصرخات المبتزله ..... الخارجه من غرف الجحيم الحمراء ....
وفي يوم بعد ليله صاخبه .... الكل قاعدين في الصاله كالعاده قهوة و شيشه و صوت الاغاني عالي جدا .... ناني بتنفخ في الدخان ... التفتت على سمر ... جهزتي البنات ... الاسبوع الجاي الاجازة بتبدا و دا موسم رجوع المغتربين .... عايزه بنات شاطرات يبيضو وشي
سمر : كلمتهم و قالو موافقات بس على شرط تزيدي ليهم القروش
ناني : ووووب منهم ومن طمعهم
سمر : قالو لما يطلعو الشارع بكسبو الضعف
ناني : قولي ليهم ناني حماية و ضمان ... في الشارع كل يوم ناس النظام العام رافعينهم وكمان زباينهم مامضمونين عادي ممكن تصادف واحد عيان و عندو ايدز ... انا ناسي كلهم نضيفين ... و القروش ماكلها بختها في خزنتي دي تمن حمايتهم
بعد شويه باب الشقه ضرب ..... دخل كائن في هيئه رجل لكن في الحقيقه لايمت للرجولة بصله ... لابس تيشيرت ضيق و برموده ... مفلفل شعرو وفي 20 اسورة في يدو و كم خاتم .... بصوت ناعم نعومه مبالغه ..... هاي يامزز انا جيييييت ..... صرخت سمر ... كيمو العسل مشتاقين ونطت في رقبتو سلمت عليه ...
رهام : لا المره دي طولت الغيبه
ناني : هو اصلا لما يمشي دبي ينسانا خالص .... رسالة واحدة مابرسلها
كيمو : لكن دبي ما نار الحي نسيت روحي ما انساكم .ههههههاي
سمر : اشتقنا لونستك .... اهم شي جبت لينا شنو
كيمو : حلاة ارواب و عطورات كلها ماركات
ناني : ايوا دا الكلام
كيمو عاين لرهام ..... ريري جهزي لي حجر راسي وجعني ... ياخ الخرطوم بقت مبالغه من الزحمه وااي لكن .... وبعمل حركات بأيديه
ناني : الخرطوم طول عمرها زحمه ولاشهرين في دبي نسيت اهلك ياطويل العمر
قعدو يضحكو .... سميرة جات من جوا ولابسه شكلها طالعه ... ناني سالتها .... على وين
سميرة : الزفت المحسوب علي راجل جاي من السفر
ناني : الفقر دا جاي ليه طول السنه مرزوع في مكانو هسي اتذكرك
سميرة : تقولي شنو عشان يخرب مزاجي ... ولايهمك اسبوعين و بطفشو
ناني التفتت لوصال الشغالة في تلفونها .... وانتي يااخت
وصال : انا معاكم لاعندي راجل لا ولد
ناني : واخوك
وصال : هو يقدر يرفع عينو في عيني .... من زمان شايفني ادخل بالاكياس ماسألني .. صلحت البيت ... قريت اختي ... شايله علاج امي كلو في راسي ماحصل سالني متأخره ليه ولا العربية النازله منها حقة منو ... كل همو ارمي ليه قروش في الطرييزه عشان يشتري السم الهاري البتعاطاه .... وهو عارف و متأكد انها تمن نومة اختو في حضن راجل غريب ...
جات غزل داخله من برا .... عاينت ليهم و ماسلمت طوالي دخلت غرفتها قفلت بابها .... كيمو عاين لناني .... البت العسل دي منو
ناني : هوي ياكيمو دي بت اختي ابعد منها
كيمو : عجيبه لكن و حتسخن السوق
ناني : سوق شنو نقي كلامك بقول ليك بت اختي وماليها في سكتنا
كيمو : بتبالغي عسل زي دا يدسوه
سمر : شفتي .... المرة الفاتت لما كلمتك زعلتي
وصال : اي ياناني البت حلاتها و نوعية الجمال البريئ دا مطلوب
ناني : اخر كلمة و الموضوع يتقفل غزل تفضل بعيده ولو عرفت واحدة منكم حاولت تعمل ليها شي استعدو تواجهوني .. وكلكم بتعرفو ناني لما تزعل بحصل شنو ... رمت خرطوش الشيشه بزعل و دخلت جوا
سمر : دي مالها هايجه كده ... بكرة البت بنفسها تطلب تشتغل معانا
كيمو : ناني خلوها علي بعرف سكتها ... البت قطعة سكرة و حترفع اسهمنا السما
وصال : انسى الفكرة احسن ليك
سمر : على شنو اصلا في بت السفيرة عزيزة
سميرة : ناني اكتر واحدة عارفه الوسط حقنا وخايفه على البت عندها حق هسي لو بتي عايشه عمري ما ارضى تشتغل زيي
سمر : قصدك احنا زبالة و ماقدر المستوى
سميرة : احنا عارفين روحنا حنستهبل على بعض
ناني دخلت غرفتها متضايقه من الحصل .... قعدت في سريرها دموعها نزلو ... فتحت الدرج طلعت صورة اختها .....قالت في سرها .... آه يا اقبال ...لو الواحد يقدر يرجع بالزمن و يغير الماضي عشان يرتاح ... لكن لسا عند وعدي ليك غزل عمرها ماتعيش العشناه و السر البينا اتدفن معاك ..... مسحت دموعها غسلت وشها و مشت المطبخ جهزت اكل اخدتو لغزل غرفتها..... حبيتي تعالي اكلي شولي جسمك بقى ضعيف كيف ..... عاينت ليها بطرف عينها .. اكلت في الجامعه
انتصار : مالك زعلانه
غزل : قعداتكم بقت بالنهار كمان
انتصار : قصدك البنات جو يسلمو مافي شي
غزل : الشقه الجديده حتخلص متين انا زهجت
انتصار : قريب شديد
غزل : وموضوع اهل ابوي ... شكلك نسيتي
انتصار : ابدا والزول فعلا مشى بس لسا ماعرف شي ... انا وعدتك بوصلك لاهلك .. هسي تعالي اكلي وافردي وشك الحلو دا
بعد يومين بالليل و اثناء ماهي نايمه صحت على اصوات صراخ عاليه و جوطه ماطبيعيه ... طلعت طوالي تشوف الحصل .... شافت وصال وسميرة ماسكين بت عمرها 18 سنه تقريبا ملابسها غرقانه بالدم والبت ممدده على الارض شبه غايبه عن الوعي ... انتصار بتصرخ فيهم دا شنو
وصال : الغبيه دي حملت و حاولت تجهض نفسها جاتنا بالمنظر دا ماعرفنا نعمل شنو
رهام ماسكاها و بتبكي .... لميس قومي ماتخوفينا عليك
انتصار : وووب منكم جايبين المصيبه دي هنا ليه ...اعمل ليها شنو
غزل منططه عيونها و مذهوله ... قالت ليهم .... يامجرمين البت حتموت ... عندها نزيف حاد لازم تاخدوها المستشفى حالا
سمر : مستشفى بتاعة الساعة كم عايزة تجيبي لينا الهوا
غزل مسكت يد لميس من معصمها ...... نبضها ضعيف .... عاينت لانتصار ... خالتي اتصرفي البت بتموت وانتو بتتفرجو
رهام خاته راس لميس في حضنها وبتبكي .... انا بوديها المستشفى و اليحصل يحصل
انتصار : دقيقه اضرب لزول
غزل : انتي لسا حتتصلي مافي زمن
سمر : اسكتي ماتتدخلي
سميرة قاعدة في كرسي بتبكي بصوت عالي ..... وااااااي ياشهد
وصال : يامرة اصحي دي لميس
ذكرني منظر شهد بتي لما ماتت
رهام بصوت عالي موت شنو ....هسي لميس بتبقى كويسة .... غزل مسكت خالتها من يدها تتصرفي ولا اتصرف انا
انتصار : تعملي شنو
غزل : بجيب امجاد و اخدها المستشفى شوفي الدم زايد كيف
انتصار : ضربت ليكمو معاو صاحبو دكتور جايين
لميس بقت ترجف زيادة وتتكلم كلام مامفهوم .... جسمها بارد ... بقت تتنفس بصعوبه وفي صوت خرير بطلع مع كل نفس ... فمها بطلع زبد .... ثواني وجسمها اصبح في حالة سكون ..... رهام رفعت يدها .... وقعت الارض ... صرخت بصوت عااااالي ......
لميييييييييييييييييييييييس .....
لنا لقاء أخر .....
أنت تقرأ
شقة مشبوهة
Romanceالظروف ...... الشماعة الأزلية للمخطئين ... كل البشر عندهم ظروفهم الخاصه .... أصلا الظروف أتوجدت كأمتحان ... يبقى الخيار في يدك ... أما تخليها تقودك وتستسلم لمسار التيار المجهول ، هو ممكن يوصلك بر الأمان و ممكن كمان ينزلك للدرك الأخير . و أما تستلم...
