#شقة_مشبوهة21
بقلم ... شيماء عثمان
🔞
شنطتك مليانه قروش !!
رفعت راسها قلتي شنو ... اخدتها منها وشافتها ... قالت ليها اديني تلفونك ... وفتحت تلفونها طلعت رقم رهام ضربت ليها ....
رهام : غزوله طمنيني عليك انتي بخير
غزل : الحمدلله حصل عليكم شنو
رهام : فيلم هندي بس ... خالد هايج وماسك المسدس وبضرب في الهوا .. الشارع كلو بتفرج فينا بعدصعوبه حتى مسكوه .. ناني قالت لناس الشرطة زول سكران اتهجم علينا ومابنعرفو .. واتفرقنا كل واحدة نامت في حته ... على فكرة خالتك كانت بتسال منك ماقلت ليها مشيتي مع اياد
غزل : فتحت التلفون هسي وشفت منها مكالمات وماتكلميها ... بس انتي جبتي القروش من وين
رهام : اي قروش
غزل : لقيتهم في الشنطه
رهام : مابعرف ضرب لي اياد طلب مني ارجع الشقة اجيب ليك حاجاتك واديتهم ليه
غزل : اممم تمام
رهام : خلي بالك من نفسك وخلينا على اتصال
فقلت منها الخط واتصلت لاياد
اياد : ياصباح الورد ... كيفك
غزل وبنبرة غضب .... الحركات البايخه دي مابحبها ولو جات في راسك اي فكرة كلمتك انا مابتاعه الحاجات دي ولا في يوم ممكن الظروف تجبرني وابيع نفسي وماتفتكر انك مسكت علي ذله ..... قاطعها .... يابت الناس بسم الله مالك فايرة كده ... هم جماعتك بصحو منفسنين ..
غزل : تعال شيل قروشك مامحتاجاهم
اياد : لاحولا ... كلو عشانهم ... الموضوع مامستاهل شوفي مخك مشى وين وحللتي الحكايه كيف ... ابدا ماقصدي يابت الحلال
غزل : مابهمني تعال شيل قروشك
اياد : ياخ اعتبريهم دين
غزل : قلت ليك تعال شيلهم
اياد : ماجاي ولو ماعايزاهم اتصدقي بيهم
غزل : خدهم اتصدق بيهم براك على الاقل تخفف ذنوبك
اياد : اذا كان عشقك خطيئه مستعد ادخل النار واملأ القلب بعشقك عشان تزيد الذنوب
سكتت وماعرفت ترد عليه ....
اياد : الوووو ......غزل .... يابت ... انتي كويسه ... لسانك الطويل مشى وين ..
غزل وعت على نفسها .... قلت ليك تعال شيل قروشك
اياد : طالما مصره تشوفيني جدا مابخليك مشتاقه وحالا جاي اشوفك
غزل : لا والله .... وقفلت الخط
فضلت سرحانه متجمده مكانها وساكته ... سماح خبطتها في كتفها ... مالك
اخدت تنهيده ... ولا حاجه ..
سماح : بعرفك كويس في شنو
غزل : ماعارفه في حاجه غريبه بتحصل لي
سماح : قصدك شنو
غزل : اياد ... الولد دا فيه حاجه تحير .. كلماتو بتكهربني ... بتحاشى عيني تجي في عينو فيهم نظرة مامفهومه بتلخبطني ... عمري ماكنت مهزوزه قدام شاب بس اياد مختلف
سماح : مالك عايزه تخوفيني عليك يابت الولد ماهين لقاك مسكينه وعايز يلعب بيك .. ارجعي غزل الزمان الحازمة و القوية ماتخلي كلامو المعسول يأثر فيك
عاينت ليها بنظرة مشتته ... اتنهدت ونزلت عيونها الارض ... يصير خير
سماح : قومي اتاخرنا على الجامعه
اتجهزو وطلعو ... في نهاية اليوم ضرب ليها ...
اياد : انا برا تحبي ادخل ولا تطلعي
غزل : جايه عليك ... قالت لسماح تعالي معاي .... شافتو واقف جنب عربيتو خاتي يدينو في جيوبو و مبتسم
سماح : امشي انتي بنتظرك هنا ..
قربت عليه قال ليها ... هو القمر بطلع بالظهر ... عاينت ليه من فوق لتحت .. وقالت ليه ... احترم نفسك
اياد : مش متفقين انا واحد صفيق ومامحترم
رفعت عينها وابتسمت
اياد : خليك مبتسمه على طول التكشيرة مابتناسبك
خجلت وعاينت للارض ... فتحت شنطتها طلعت القروش ناولتهم ليه ... اتفضل وتاني ماتعيدها
اياد : ادخلي العربيه نتفاهم
غزل : صحبتي منتظراني
اياد : مابطول عليك ... فتح ليها الباب .. ركبت واشرت لسماح تنتظر .. هو ركب العربية ... طوالي ختت القروش في الطبلون
اياد : قبل كل حاجه طمنيني عليك
غزل : الحمدلله
كان بعاين ليها بنظرات دافيه و هي عينها على الارض .. اتلخبطت من نظراتو .. قالت ليه مش اخدت قروشك خلاص ماشه .... مد يدو بس رجعها ... انتظري لحظه مستعجله ليه
غزل : في شنو تاني
اياد : عايز اتأكد انك بخير وماناقصك شي
غزل : انا وصلت اهلي ... مرتاحه والحمدلله .. بشكرك على الاهتمام ... عن اذنك
اياد : ممكن تردي على اتصالاتي لاني بكون عايز اطمن عليك
عاينت ليه وابتسمت ... فتحت الباب ونزلت من العربيه متجهه لسماح ..
سماح صارة وشها و زعلانه ... قلت ليك ابعدي منو
غزل : مافي اي حاجه من الفي راسك ماتشيلي هم
وهم راجعين البيت نزلو من المواصلات وماشين ... غزل شعرت بيد مسكت يدها بقوة من ورا ... التفتت مخلوعه لقتها لبنى اخت خالد ..
لبنى : انتظري هنا
غزل صرخت بتتوجع من يدها .... اتركي يدي
سماح : هيي انتي في شنو
لبنى : اخر الزمن واحدة زيك ما معروف ليها اصل ولا فصل تدخل اخوي السجن
غزل : احترمي نفسك احنا في الشارع
لبنى : الشارع مكانك هو انتي عندك بيت الاقيك فيه
غزل : يالبنى اقصري الشر وامشي من قدامي
سماح : تعالي البيت وانا اربيك احنا بنات ناس مابنتشاكل في الشوارع
لبنى ضحكت بصوت عالي ... قلتي لي بنات ناس... عاينت لغزل .. ماحكيتي ليهم خالد لقاك وين والشقة الكنتي فيها حقة شنو
غزل بتبكي وختت يدها في فمها ... سماح صرخت فيها اسكتي يالبنى واحترمي نفسك .. مسكت غزل من يدها ... خلينا نمشي .... لبنى جرت غزل من طرحتها لما نص شعرها ظهر .... ما تخدعي الناس بالشويتين ديل ياعاهرة والليله الحله كلها تعرف انتي منو ..... سامح جا من بعيد ادى لبنى كف لما قربت تقع ... نهرها بصوت عالي .. ادخلي بيتكم ماعندنا بنات يرفعو صوتهم في الشارع والحله دي فيها رجال .. عاين لسماح وغزل قال ليهم ادخلو سريع ... لبنى خاته يدها في خدها ... حسابك مع اخوي
سامح : خليه يجي اصلا بينا حساب
غزل مشت غرفه سماح رمت نفسها في السرير وبتبكي ..... نهى مسكت سماح دي مالها كمان من جات وتعمل في حركات عشان الكل يهتم بيها .... سماح بطرف عينها قالت ليها ... خليك في حالك ... سامح جا وراهم دق الباب استاذن ... غزل صلحت طرحتها ..ودخل
سامح : استاذة اقبال ماربت بنت ضعيفه كلمه تكسرها ... الاستاذة خلفت بنت الحله كلها تعمل ليها حساب
غزل : وين استاذة اقبال تجي تشوف بتها والحصل ليها من بعدها
سامح : ربنا يرحمها ... اياك تضعفي خليك قويه زي ماعهدناك ...قومي غسلي وشك اتجهزو عازمكم غدا برت ونمشي محل الايسكريم البتحبوه كمان
غزل : تسلم ماعندي نفس
سامح : تسلم شنو ... دا امر قومي سريع
سماح : بتبالغي طبعا عزومة سامح زي مذنب هالي في الاربعميه سنه مره واحده عايزه تفوتيها
سامح : طولي لسانك كويس ...وحمر ليها
اتجهزو وطلعو ... مشى كلم نهى .. هاجت وعملت موضوع ورفضت تمشي معاهم ... طلعو اتغدو وانبسطو .... انتصار كانت بتضرب ليها طول الوقت وهي مابترد ... ضربت ليها رهام كلمتها ان خالتها حتججن عليها غزل قالت ليها لما افضى بكلمها ... اما اياد طوالي بضرب يطمن عليها والمكالمات بينهم بتطول .... بعد يومين كانت قاعدة في الحوش بتشرب نسكافيه و بتقرا .... جا سامح من برا قال ليها تسمحي اقعد معاك ... ابتسمت وقالت ليه البيت بيتك اتفضل ..
سامح : طول عمرو البيت دا بيتك بس انتي مامعتبراه كده
غزل : عملت حاجه زعلتك مني
سامح : يعني ماعارفه
غزل : في شنو
سامح : لما يكون عندك مشكله وماتشاركي اهلك و تفتكري ماعندك اخ كبير اكيد بزعل منك
غزل : كنت عايزني اعمل شنو
سامح : تجي طوالي ولو ماشالك البيت تشيلك عيوننا ... شكلك ماعارفه معزتك عندنا
غزل : العفو
سمعو صوت نهى بتنده ... سامح تعال عايزاك .... عاين لغزل ... ماشي ألبي نداء الوطن .... وقعدو يضحكو
اول مادخل الغرفه كانت بتتكلم بصوت عالي .. ما اكون خربت عليك مزاجك والقعده الرومانسيه الكنت قاعدها
سامح : وطي صوتك في شنو
نهى : مابوطي صوتي وعايزاها تسمع ماتفتكر دموع التماسيح والحركان المايعه البتعملها ليك بتخش عقلي ... فاهماها كويس وعارفه قصدها
سامح : قلنا خلاص واقفلي الموضوع
غزل كانت سامعه ... زعلت ودخلت جوا .... في المسا وهي نايمه ...صحت مشت المطبخ عشان تشرب موية ... سمعت نهى وسامح بتناقشو
نهى : يا انا ياالبت دي ومن بكرة ماشه بيت ابوي
سامح : ماتكبري الموضوع واعقلي
نهى : قلت ليك يا انا ياهي و دا اخر كلام
رجعت الغرفه زعلانه وبتفكر ... الليل كلو مانامت .... اول ماطلع الصباح .. سماح صحت من النوم بتفتش عليها مالقتها ... طلعت سألت امها قالت ليها ماشفتها مفتكراها نايمه معاك ...سماح رجعت الغرفة وبتفتش مالقت حاجاتها ... ضربت ليها تلفونها مقفول .... جا سامح من غرفتو ... خير ياجماعه مالكم من الصباح سماح قالت ليه ......
غزل شالت حاجاتها وطلعت من البيت !!! ......
لنا لقاء أخر ......
أنت تقرأ
شقة مشبوهة
Lãng mạnالظروف ...... الشماعة الأزلية للمخطئين ... كل البشر عندهم ظروفهم الخاصه .... أصلا الظروف أتوجدت كأمتحان ... يبقى الخيار في يدك ... أما تخليها تقودك وتستسلم لمسار التيار المجهول ، هو ممكن يوصلك بر الأمان و ممكن كمان ينزلك للدرك الأخير . و أما تستلم...
