#شقة_مشبوهة29
بقلم ... شيماء عثمان
🔞
أبوي وين ....
انتصار : مابعرفو
غزل : مش قلتي في ليبيا
انتصار : اصلا مابعرفو
غزل : كيف مابتعرفيه
انتصار : مابعرف ابوك منو
غزل : و الاسم الورا اسمي في شهادة الميلاد دا اسم منو
انتصار سكتت
غزل : ردي ابوي منو .... جبتيني الدنيا كيف
انتصار : قلت ليك مابعرفو ولو على شهادة الميلاد .. اسم مزور تكلفتو ميه جنية اديناها للموظف و طلعها ... اعرف ابوك كيف وانا بقابل رجال اشكال الوان افهمي مافي بت ليل بتعرف حملت من منو
غزل رفعت راسها منططه عيونها و دموعها نازلين ... يعني انا بت سفاح و ابوي مجهول الهوية .... مسكتها من توبها ... جبتيني ليه .. عشان اعيش بالعار دا لبقية عمري ... ماقتلتيني و انا في بطنك ليه ... زي مابتعملي مع البنات الشغالين معاك .. ذنبي شنو اعيش مذلولة بسبب غلطة ارتكبتيها ... كان تموتيني ولا ترميني في الشارع للكلاب .... فاكرة كده حكون ممتنه ليك
انتصار مسكت يدها حرام عليك يابتي ...ماتقولي كده
غزل بتصرخ ... ماتقولي بتي انا مابتك و ماعندي ام .... انا بكرهك و ماعايزة اشوفك .... امشي من قدامي وشيلي معاك الماضي القذر .... انسيني زي زمان و اوعك تظهري في حياتي .... بقت تبكي بصوت عالي بترتعش وجسمها زي التلج .
ام سماح قالت لانتصار اطلعي خليها تهدأ ... حتتعب تاني بالطريقة دي
انتصار : مابقدر اخليها كده
ام سماح : ماتخافي احنا معاها
انتصار عاينت ليها و العبرة خانقاها ... طلعت من الغرفة مكسورة
سماح قربت منها ... اهدي خلاص عشان خاطري
اياد كان واقف في الركن بعاين على الارض مذهول بسمع كلام انتصار وقلبو موجوع على غزل .... اتحرك قرب منها وهي مغطية وشها بيدينها وبتبكي .... مسك يدينها نزلهم ... كفاية دموع لحد كده انسي كل السمعتيه و اعتبري مافي حاجه حصلت ..
رفعت راسها عاينت ليه ... سحبت يدينها منو بقوة ... فضلت تعاين ليه بطريقة غريبة وساكته ... هو مستغرب حبيبتي مالك
غزل : انت كمان اطلع برا ...
نزلت الكلمة على مسمعو تقيلة .... اتقل من جبل إنهار على راسو .... من الصدمه رجلينو ماشالتو لدرجة انو رجع خطوة لورا .... بصوت مخنوق ... قلتي شنو
غزل : قلت ليك اطلع من هنا ولا في فضايح تانية عايز تسمعها .... خلاص العرض انتهى ..
مندهش بعاين ليها ... حياتي شكلك تعبانة ... أنا اياد
رفعت صوتها .... عشان أنت اياد اطلع من حياتي ماعايزاك فيها للابد و أعتبر البينا كذبة و انتهت زي الكذبة الكنت عايشاها من اول يوم اتولدت فيه .
اياد : غزل كفاية تخريف
غزل : اطلع برا يا اياااااد ... طلعت الدبلة من يدها رمتها الارض ... كده ماعندك حاجه عندي
اياد : ما بالسهولة دي .... مابتخلى عنك ابدا فاهمه
قعدت تبكي خاته يدها في فمها .... ام سماح مسكت اياد من يدو ... تعال معاي ياولدي .... طلعتو من الغرفة و هو بعاين ليها على امل ترفع راسها تناديه ..
وقعت على السرير وبتبكي .... سماح حضنتها خلاص روقي كلهم مشو يداب كده عملتي الصح ...
مر يومين طلعت من المستشفى .... ناس سماح اخدوها معاهم بيتهم ..
أنت تقرأ
شقة مشبوهة
Romanceالظروف ...... الشماعة الأزلية للمخطئين ... كل البشر عندهم ظروفهم الخاصه .... أصلا الظروف أتوجدت كأمتحان ... يبقى الخيار في يدك ... أما تخليها تقودك وتستسلم لمسار التيار المجهول ، هو ممكن يوصلك بر الأمان و ممكن كمان ينزلك للدرك الأخير . و أما تستلم...
