شقة مشبوهة

شقة مشبوهة 32

#شقة_مشبوهة32
بقلم ... شيماء عثمان
🔞

فتحت الباب ...
شافتو واقف و معاه كيس ...
غزل : نعم دكتور
حاتم بأبتسامتو الهادئه ... اتفضلي دا عشانك
غزل : دا شنو
حاتم : تلفون بدال الاتكسر بسببي
غزل : عفوا دكتور ... بس مستحيل اقبلو
حاتم : عفوا و مستحيل ديل تقوليهم للناس البرا ... هنا في البيت مافي الكلام دا و تاخديه بدون اعذار
غزل : اسمح لي دكتور صدقني مابقدر و شكرا ليك
حاتم : ياشيخة انتي مابتفهمي ... طيب اكلمك بلغتك يمكن تستوعبي .. تاخديه ولاعندك خيارين ادخل الغرفه اشيل الشريحه من القديم اركبها في الجديد و لا ارفع صوتي انادي حبوبه ولو هي جات مابضمن ليك الوضع يكون كيف ... ها تحبي تصرخي معاي ...
وهي واقفه منططه عيونها بتعاين ليه باستغراب ... جات حبوبه ماره ... في شنو يااولاد
حاتم : الطيب عند ذكرو ... هسي كنت حناديك
حبوبه : خير
حاتم : الانسه ما عايزة تقبل الهديه
حبوبه : لا لا بتبالغي يابتي ... النبي قبل الهديه ... شكلك ما عاده الحاله واحدة واحنا اهل
غزل : العفو حبوبه ما دا القصد
حبوبه : اها شنو ... شيلي منو الكيس بدون كلام
غزل : حاضر
عاينت ليه ابتسم ... اداها الهديه وقال ليها ماكان من الاول

عدا اسبوع على وجود حاتم في البيت و هي كل ماتشوفو مابتلمح فيه إلا الابتسامه الهادئه المريحه للنظر وهو كل مايشوفها يحاول بفتح معاها اي موضوع و طبعا حبوبه ملاحظه و مراقبة من بعيد ...
في غزل مع الحجه في غرفتها بتعمل ليها مساج ... وبتونسو
حبوبه : احييي يااولادي .. زمنكم صعب و حياتكم مسيخه
غزل : ليه بتقولي كده
حبوبه : يعني حالكم بعجب ... مشاكلكم مابتخلص و قلوبكم مكسورة ... انتي قليبك مجروح و حاتم قلبو بنزف من زمان ... هسي دي حياة شباب في عمر الزهور
غزل : هو الدكتور مالو
حبوبه : الفي عمرو اولادهم في المدارس ... الله يجازي الكان السبب حرقو قلبو و مشو
غزل : مافهمت قصدك
حبوبه : حاتم من ايام الجامعه بحب زميلتو وكان بحبها حب بجنون ... اول ما اتخرج مشى خطبها من اهلها .. طلعو من النوع المتعصب العرس الا من الاهل ... خطبها كم مره ودخلنا وساطات لكن اهلها رفضو ... قالو البت لولد عمها .. حاتم تعب شديد واتضايق ... بس ما يأس كل مره يخطبها ويطردوه لحد ماعرسوها لولد عمها غصب عنها ... يوم الصباحية قالو العريس طلع من الشقة يجيب حاجه لما رجع لقاها واقعه على الارض قاطعا شريانها وبتنزف ... البت فارقت الحياة وحاتم جن عديل .. بقى يكورك زي الطفل لدرجة مشى العزاء لراجلها و اتشاكل معاه ...
العقده هنا غلبتو وسافر الامارات ... ولو انا ما هنا ماكان بجي ... زمن طويل مر على الكلام دا و لسا حاتم ماراضي ينسى ولا مفكر في العرس تعبت وانا اكلمو
غزل : الله يعينو ..... كل الجروح بتشفى مع الايام و نزيفها بقيف إلا جرح الحب ... نزيفو كل يوم بزيد ... بذكرك الوجع وفي الحقيقة مامحتاج تذكير .. اصلا الالم مابخليك تنسى ... و مع كل غمضه عين بجيك طيف الحبيب يتعصر قلبك وجع و تقعد محتار تفتح عينك و طيفو يروح ولا تفضل تعاين ليه لانك مشتاق لملامحو ..
كلامك صح حبوبه زمنا صعب والحب فيه وجع وعذاب
حبوبه شافت عيون غزل على الارض والدموع بتنقط منها ... ختت يدها في كتفها ... قالت ليها العيب مافي الزمن ولا في الحب العيب في قلوبكم المابتنسى .. اتعلمو تعيشو كفاكم حزن ...