الصامتون

💔 ...من مرات واحد يبدي يحجي و يكول جملة (اصعب شي بهل الدنيا) اني اضحك .. اضحك بيني و بين نفسي لان كل واحد بينا يشوف اصعب شي بهل الدنيا من منظوره هو و من الزاوية الي يشوف بيها الوضع ... اني عن نفسي وصلت لمرحلة اصعب شي بالدنيا و شفته بس هم ارجع واكول من وجهة نظري اني و من صفحتي اني ... لان مية بالمية اكو اصعب من الي صار وياي ...
اصعب شي بالدنيا ................. هو من اني عمري ١٣ سنة و انطرد من بيت عمي ساعة ١٠ بليل لان ضربت ابن عمي الي اكبر مني بتلث سنين لان غلط على امي (الي اصلا اني ما احبها لا هيه ولا حتى ابوية) بس ماعرف شنو الي خلاني اضربة ... امي و ابوية عبارة عن كتلة و صخرة مال قساوة ... اي مشاعر ماكو بداخلهم ولا يعرفون معنى شنو ابنهم يعيش ببيت مو بيته و يتعرض لكل سخافات الدنيا .... ابوية طلك امي وامي صغيرة بالعمر ... ورى طلاكها بفترة طلع للشمال و من الشمال لتركيا ومن تركيا لليونان ومن اليونان راح استقر بالمانيا بميونخ تحديدا ... وامي ورى طلاكها بسنتين تعرفت على واحد اكبر منها و متزوج اصلا و اخذها على زوجته ... بس اشترالها بيت و كعد وياها اخته لان زوجها ميت ... و اني متاكد كعدها مخابرات على امي حتى لاتحوص ولا تنوص لان هيه صغيره و حلوة جانت ... و طبعا اني ادري كلش زين هو مجان عنده اعتراض على عيشتي وي امي بس هيه لان تكره ابوية و تكره كلشي يذكرها بي رادت تخليني عله و داء على ابوية و عبالها راح تلزم ابوية من ايده التوجعه و تخلي يتاذى ... شلون يتاذى ؟؟
يتاذى بعيشتي وشلون يدبر احتياجاتي لان ابوية اصلا مو صاحب مسوولية و يعتمد على غيره دائما .. اني ما ابرر هالشي لابوية و اطلعه من المعادلة هو الاحسن .. ثنينهم نفس الشي ... بس الي اتاذى بهل الموال كله اني ... اني الي صرت مثل قطعة الشطرنج ... يشيلوني كل شوية بمكان يخلوني ... والله والله والله حتى بالممر الي يفصل الصالة عن المطبخ نمت و جنت وي كل روحة واحد للمرافق افز ... افز لان يعبر من فوك راسي و يروح للحمام ... وصلت الدرجة بيا ...
ادعي .. واتمنى .. بس شتمنى ؟؟؟
لا اتمنى يصير عندي بايسكل و لا اتمنى يصير عندي اتاري صخر ... ولا اتمنى تصير عندي طوبة كريكر ولا حتى اتمنى اشتري مسدس ابو الطلقات الصوتية و اصلا ما افكر واتمنى يرجع ابوية لامي لو امي ترجع لابوية ..
جنت اتمنى و ادعي قبل ما انام انو محد متوجعه بطنه لو ينحصر حتى يروح للحمام لان اكثر من مرة ينداس على رجلي بالغلط ... وخصوصا الي يكعد من النوم و يريد يروح للحمام راح يكوم خامل و نعسان و سيطرته على جسمه قليلة و ميشوف ..
الى ان شفت الاصعب ... شفته من انطردت واني ماعرف وين اولي بليل.. وطبعا الي طردني مو عمي لان هو اصلا مجان بالبيت بذيج الدقيقة .. الي طردتني مرة عمي ... و اني طلعت ... طلعت و بقيت امشي بدون عم بداخلي وين رايح و وين راح انام الليلة ... طلعت بدون حتى هدومي و مشيت ... لحد هسه اتذكر النعال (مكرم القارئ) جان جبير على رجلي لان نعالي ملكيته بسبب العركة بيني و بين ابن عمي و من ردت اطلع لبست نعال عمي ... جبير و رجلي جانت صغيره و نصها طالعة برى من النعال ... و كل شوية تصير حصوة جوى اصابيعي و اوكف ... مشيت و رحت عالشارع العام ... عالشارع العام السيارات جانت تفوت سريعة و حسيت نفسي وحيد كلش بهل الدنيا ... ماعندي سند ماعندي احد اشكيله ماعندي احد اروحله ...
كعدت عالرصيف كمت ابجي ... جان بذاك الوكت (طبعا هالحجي قبل الفين و تلاثة) .. جان بذاك الوكت اكو دورية مال شرطة تفتر بالمنطقة و السيارة مالتهم لو سلبرتي لو اولدز بس عالاكثر اولدز ... اني هالحجي تقريبا صار ساعة دعش بليل واني على كعدتي و جنت مدخل راسي بالتيشرت وابجي و امسح عيوني بالقماش مال تيشرت ...
بهل الاثناء حسيت واحد من كلوبات السيارات الي تفوت بسرعة جان مختلف عن الباقي ... لان كل الكلوبات جانت تفوت سريعة .. بس هالكلوب (الايت يعني) صار بطيء و بقى ثابت عليا ... سيارة الشرطة طبكت عليا لان كاعد عالرصيف و شارع عام ..
و بهل اللحظة التقيت بأهم شخص بحياتي كلها .. (ابو زينة) ابو زينة مفوض بالشرطة و جبير شوية مو مثل باقي الدورية ... نزل عليا وهو الوحيد بيهم جان يحجي وياي ومقبل غيره يحجي ... كالي شبيك بابا ليش كاعد هنا ؟؟؟
بقيت ابجي وماعرف شجاوبة ... جنت صغير و مو ذكي كلش ... كالي شبيك ابني احجي ؟
و بنفس الوقت مقبل ينادون بالجهاز على الحالة ... يعني مينطون علم للمركز انو لكو او شافو هيج حالة ... بقى يحجي وياي واني ابجي .. عاد من مد ايده على جتفي حسيت بحنان من عنده .. حنان فاقدة اني بذيج الفترة بالتعامل وياي .. ملكيت هالحنان لا بابوية ولا امي ولا حتى بيت عمي كلهم ..
حضنته وكمت ابجي و هو دمعت عيونه عليا ... كالي احجيلي بابا شبيك ؟
كلتله كلشي .. كلتله تعاركت وي صفاء و جنت من احجي اذكر اسماء عبالك هو راح يعرفهم .. بس مو بقصد .. جنت عالفطرة اسولفله .. و الي غير الحديث كله و خلى ابو زينة يغص و يختنك من كلتله على سالفة امي وابوية ... جان يكلي امشي وياي هسة .. كلتله وين ؟
كال لاتخاف امشي ... طلع بنفس الدورية وطبعا هالشي ممنوع بس هو تحدى القانون وسواه .. طلع لبيته اخذني و العناصر الي بالدورية ولا واحد بيهم فتح حلكة وياي و مراح فتنو عليه لان خالف القانون ... اخذني لبيته و حاجى مرته .. وصدقة لعينها واروحلها الف فدوة ام زينة شلون ام زينة ... مرية جدا حبابة و حنونة و كامت تبجي من عرفت وضعي ... و سبحت و تعشيت و لبست هدوم مال ابنه الي بعمري و كلهم عاملوني بطيب ... طبعا بهل الحجي ابو زينة رجع لدوامه و عافني بالبيت يم اهله ... و ثاني يوم من كعدت من النوم سمعت صوته جوى .. نزلت جان يكلي باع حبيبي .. اني راح احل مشكلتك و اتصالي بيك راح يكون اسبوعي ماشي .. كلتله شلون ؟
كال معليك انت هسه بدل و راح نروح لبيت عمك احجي وياهم ..
و صدك والله اخذني لبيت عمي واخذ زوجته وياه ... وطلعنا لبيت عمي ... و بصراحه هدد عمي و خوفه و بنفس الوقت ريحه .. يعني استعمل اسلوب وياه (اكسر و اجبر) .. و عمي كلش جبان و هذا مفوض بالشرطة و بذاك الوكت المفوض يلعب لعب ... خوفة كلش و عمي سوى نفسه كبال ابو زينة ملاك ... كاله تعاركت وي زوجتي و بقيت ادور عليه للصبح ... المهم ..
ابو زينة كاله راح كل اسبوع نجيكم للبيت .. و كل شهر اخلي بيدك مصرف للولد ... وقبل عمي و تغيرت معاملتهم وياي بالبيت و حتى ابن عمي غير معاملته وياي ... كام ميغلط ولا يندك بيا اصلا ... و كل اسبوع جان يجي ابو زينة و ام زينة لبيت عمي يشوفوني و يسألوني بيني و بينهم .. مو كدام بيت عمي ... و بصراحه جنت اجاوب بلي يصير و صدك بيت عمي غيرو تعاملهم وياي مية وثمانين درجة ... و مرت اكثر من سنة و اني كبرت شوية ... و شاهد الله صار عمري ١٩ سنة و ابو زينة مكطعت مساعدته اليا ولا شهر ... وطبعا اني من نفسي بديت ادور شغل لان شفت بعيني ابن عمي يشتغل .. و بديت اشتغل بس انطيت وعد لابو زينة انو ابقى ادرس ... شغلي جان يوميا شكل الى ان ابو زينة نفسه شغلني بمكتب عقارات يصير مال اخو زوجته ... و بالمكتب بالبداية جنت انظف و ارتب المكتب و بس اسمع شلون يحجي ابو المكتب وي الناس ... و بديت شوية شوية اودي الناس للبيوت اشوفهم البيوت او المشتملات و صار عندي اسلوب شلون اقنعهم ... و كامت تمشي سالفتي و كمت اخذ نسبة بكل شغلة اسويها ... و الحمدلله مشت وضعيتي ... طبعا بقيت اداوم و اشتغل بنفس الوقت و كمت اساعد بالبيت بالمصرف و البيت الي انطردت بي مرة صرت بي شي اساسي و يناخذ رأيي بكلشي تقريبا ... و كمت ارتب بي للبيت من فلوس شغلي ... و كل هالسنين اي تواصل مصار وي ابوية بس امي علساس تريد تكسرها و تصير زينة كبال الناس .. جانت تجي لبيت عمي بالسنة مرتين تشوفني و اني اضحك على تمثيلها بحجة خايفة عليا و تسال عني .... حتى فد مرة كلتلها ليش تجين و تتعبين رجليناتج ... ابقي بمكانج و ابقى بمكاني .. طلعت تبجي من البيت و بصراحة و حتى اكون صادق وي نفسي .. ابد ما رف كلبي و ابد منقهرت ... عالعموم .. صرت دلال معروف بالمنطقة الي اشتغل بيها و صار عندي سيارة و ما كملت دراستي بطلت ... لان شفت الدراسة ما بيها مستقبل و فلوس بكثر الدلالية الي اشتغل بيها ...
و بيوم من الايام ... اني بالمكتب و اجى ابوية ههههههههههه والله اذا هسه احلف واكول خربطت بشكله محد يصدكني .. سلم عليا وحضني و علساس كام يبجي ... كال اني غلطان بحقك من السما للكاع و كام يتعذر ... ابو المكتب طلع وعافنا بالمكتب .. اني صافن عليه هذا شديسوي بحاله ... كلتله خالي توكل بالله ... كال صدك تحجي .. كلتله اني مراح اكلك شصار بيا و هالخرط مال مسلسلات وافلام ... بس توكل بالله و ارجع بالطريق الي جيت منه لان عندي شغل ... كال اني ابوك ابني ... طبعا (مكرم القارئ) ردت اسوي حركة بلساني من كال هيج بس لزمت نفسي و ضحكت ... كلتله توكل خالي .. عافني وراح و بيومها اني مرجعت لبيت عمي لان ادري بي هو هناك ... من يومها قررت اطلع من بيت عمي و رحت بتت ببيت ابو زينة ... لان علاقتي ابد منتهت بهل الرجال ... و هناك فاتحته انو اني اريد اعوف بيت عمي و عندي امكانية ااجر وحدي ... بس المصيبة شغلتي واعرفها زين ..
ماكو ابو بيت عنده مشتمل يأجر لواحد وحدة .. وخصوصا لو شاب بعده ... ابو زينة كالي ليش متتزوج ؟
كلتله بعدني صغير ... كال ياصغير اني اصغر من عمرك تزوجت ... ابني تزوج و لم نفسك لان محد ميفيدك غير بس زوجتك واطفالك ... كلتله انت هيج تشوف؟
كال اي .. كلتله خلص زوجني .. كال عندي الك مرة .. وطبعا اني اعرف ابو زينة بنته اصلا متزوجه بذيج الفترة .. و لو ممتزوجه احلف بلي خلق الكون ينطينيها ... بس هو طلع حجية على غير وحدة ... البنية الي حجالي عليها بنت اوادم واهلها كلش على كد حالهم و امكانيتهم مو زينة خطية .... والله رأسا قبلت وهو بعده ممكمل حجية لان حسيت هالبنية من ثوبي وراح تصيرلي كلشي بالدنيا ...
و طبعا ابوية رجع سافر و رفضت كل تواصل وياه ... وامي قطعت علاقتي بيها اصلا ...
و تزوجت والي خطبلي ابو زينة ... و كعدت بمشتمل صغير بالبداية ايجار ... وشوية شوية كدرت اخذ مكتب دلالية لوحدي ... ومشت العيشة ... و بيوم من الايام اجاني خبر وفاة عمو ابو زينة ... طبعا من سمعت الخبر عبالك ابوية الي اني من صلبة توفى ... و ما قصرت وميصير احجي الي سويته ... بس ادري بنفسي ما قصرت ... و ساعدت ولده بلي اكدر عليه و بصراحة هيه متعتبر مساعدة لان هالعائلة همه اهلي ... اهلي الحقيقين ...
طبعا هاي كلها امور عدت و راحت و صارلها سنين .. واني صرت غير شكل و غير انسان حاليا .. بس تبقى مرات اكو غصات بالكلب ... لازم تنذكر وتنحجي .. و سلامي للي ربوني و من ضمنهم بيت عمي .. صح اذوني فترة بس عالعموم هم احسن من الي راحت و الي راح و عافوني ...
و اخر شي ...
الف رحمة على روحك ابو زينة ..
(عافوني)
انتهى