گبل سنتين ماتت ضحكة ايامي
وجفن حسرات لف روحي ولياليها
گبل سنتين...
والفرحه خذاها الروج بكتاره
وصل شاطي الضياع وغرگ صاريها
واجه مسيس ونين الشوگ
شگ روحي ونزل بيها
قفل العين والعشره
ولا رّف الجفن من خطب طرايها
نستني وگلت ناسيها
ولا ردّن واطش باجي العمر
شوباش للجيّه
شرد ؟
وانتي الگبل سنتين عفتي الروح
لا للموت ... لا ليٌّ
يالذبّج قطار الظيم
گلبي مو محطه يشيل عبريه
ولا ردّن...
واطش باجي العمر شوباش للجيّه
شريد اذكر ؟
ودخّان الجگاير زنجر ابصدري
وعشت عمري ابفرد ريّه
ولو فززتني...
بعيوني حنين ايام منسيه
ولو فرشتي بدروبي
عذاب اوراق مطويه
ولو يجي العطش بيدي
لجن مايج ولا شربه
ركد دمي ابشواطيه
ولو تبجي مكاتيبج انه اقره احروفها بعيني
لچنها بكلبي منسيّه
ولو دمعة حسافه اتوسدت خدج
ولا حطّن چفوفي الدمعة التمساح چفيّه
يالذبچ قطار الليل گلبي مو محطه
يشيل عبريه
كلبي مو محطه يشيل عبريه
_كاظم اسماعيل الكاطع
