هوسه والبيت مكلوب ومحددين رقم الموبايل وين بيا جهه ونزلت الطيارات وبحث وتحري وره ساعتين كالو مموجودين بس جثث موجوده جثث لخمس شباب جابوهم للطب العدلي . طبعا اني وصلت للانهيااار وكل شويه اوكع ها هيه دقت ساعة الصفر مثل ميكولون هسه راح يعرفون النتيجه . المشكله دماغي ميكدر يستوعب هلشي ابد يعني مو بيدي واني حاليا بحلم ارفض اصدك نعمتي راح تزول اني خو ادري الدنيا جاره عكس وياي بس مو لهل درجه . جان كرار وياسر ميتين متانين مخابره من علي . علي بلطب العدلي . وباقر بلشارع مدري وين . ما حسيت الا على الاصوات تتصايح والزلم ادك على صدرها وكلها تصيح يا خووووويه وعمتي تملخ بروحها ...
اجيت اركض شبيكم شبيكم وصوت عالي يصرخ ...
ما حسيت على امي لزمتي شبكتني . اني صحت عليها شببببببببيج شوكت اجيتي ...
ماما حبيبتي الصبر من علامات الايمان عند الانسان وهاي مصير وحرام الجزع ...
انتي وانتم شجاي تمخرطون يا صبر يا مصيبه شببببببببيكم . فهمووووووووني ليش تخلوني اكتل روحي هسه ....
طبعا جان ضميري الباطني خايف ومصدك بهلحجي لان صارت كدامي تجربه نور بس هلمره شكل ثاني هلمره عقلي ميرضه يستوعب ....
بدت امي تبجي والي سمعته منهم انو همه لاكيهم رامين عليهم خمستهم ...
ااااااه يا كلبي رموك بصدرك جان يأشرلي عليه ويكلي انتي هنا ...
كعدت من النوم حسيت بروحي نايمه بس ما اعرف احس بثكل قوي . صحت احمدددد كولت بلكي يكلي ها واخذت نفس حسيت تجمع اانفس مالتي بمكان معزول هاي شنو كل طاقتي فتحت عيني لكيت حاطيلي اوكسجين وكانونه بيدي ركزت قوي شفت محمد ونسوانه ثنينهن واكفات على راسي حسن بيه صاحن الدكتوره اجتي كالت خل نجيك حالتها حته اكتبلها خروج بس دير بالكم عليها ...
وضلو ٤ ساعات ياخذون تحاليل وشغلات وكل ساع دكتور يطب ودكتور يطلع . واسمعهم يحجون بلانكليزي واحد يكوله مريكل . يعني اعجوبه ...
اخر شي قررو يطلعوني وكالت الدكتور تجي تجيك وضعها كل سبوع..
لبست عباتي كوه لبسني وكعدت اريد اسألهن عن احمد لكو لو لا ما كدرت اباوعلهن ثنينهن لابسات اسود هنه صح خبيثات وكل من بيهن تفكر بمصلحتها بس لا من توصل الشغله للصدك يحبني مينطن بيه . طلعت بلسياره . كلي محمد . امونه وين تردين اوديج كوتله يم جهالي كلي يلا رحنه لبيت عيالي طبيت اني تعبانه واحس نفسي تعبت بلزايد من رجعت . لكيت عمتي نايمه ع القنفه ومخليه اديها على راسها . سلمت عليها . كالت ها يمه اجيتي . كوتله اي عمه . ما لكيت ولا احد موجود . سألتهم شصار كالت عمتي يمه راح راعي بيتج ابو طول الحلو حمودي بنيي ما تهنيت بجهالك . اني كوتلها عمه تره مستحيل لتصدكين هسه شوفي اذا ما طلع عايش . وضليت ابجي سألت اسراء مره محمد اخويه كوتلها اني وين جنت شوداني للمستشفه كالت صارلج ٨ ايام نايمه والدكتوره كالت اذا ما كعدت خلال هلايام معناتها تضل على الجهاز بس دماغها يشتغل واعضائج كلها توقفت ....
اني بسرعه كوتلها لعد ليش رجعت ما ضلت متوقفه وكمت ابجي نهاريت بلبجي . المن رجعت مو جان بيني وبين الموت شعره المن رجعتت . ولطمت على صدري واصيح ولك حمووودي من صحتي على صحتك من حيلي على حيلك من روحي على روحك . ليش هيج كطت ييه بهلاثناء طبت امي لزمتني ولج ماما هذا قضاء وقدر ولج اصحي لبيتج ولجهالج ....
وخررررري جهالي شسوي بيهم وبدون ابو ويني وينهم وخرووووو عني ما اريد احد يلزمني ...
ولج ماما حرام عليج انتي هسه حاده وصوتج كون مينسمع حرام عليج .....
وخررررري جاي اكلج حاده شنو . اني ما احد على احمد لو اموت . لان يرجع اني متأكده ...
ماما اكو اكثر من نوره ماتت وهذا البزر اعز من كل شي . الله وكيلج ...
ههههه والله يا ماما يا يابزر ولج والله رووووحي روححححي راح تطلع . اجتي عمتي شبكتيني كالت تعاي . رحت وياها وما ادري وين ماخذتني كعدت لكيت جايه مواجها ومله لزمتني لبستني اسود وكالت تعاي . وضلت تقره المله اني ابجي ماخليت لا خدود ما خرمشتها ولا شعر ما كطعته ولا رجلين ولا صدر ما دكيت عليهن وبس ابجي وره ساعه طلعت المله واني ابجي وضلت عمتي تسولف وياي على الحد وتكلي تضل سلسه بركبته الرجال الي متحد عليه مرته وخلتني انوي احد عليه واني مثل الصنم بس دموعي تصب وكالت ضلي بجناحج علما تخلصين حد ومنا اذاك الوقت الله كريم ...
مدة الحد ٤ اشهر و١٠ ايام اني نويت احد وغسلتلي عمتي وكالت حته باقر ما يوصل للبيت بهذني الايام ...
طبعا اني خلال هاي الفتره كل يوم اموت ١٠٠ موته كل يوم احس بروحي بلذل عايشه مع العلم محد دايسلي على طرف وجهالي يوميه يجي عمهم علي ياخذهم ويروح ويرجعهم تالي الليل اصلا ما اشوفهم ولا اشوف علي ضليت حبيسه الغرفه اكوم مثل السكرانه وارجع انام ويوميه احلم بأحمد ضليت كأنما عايشه ويا بلحلم وحتذا بعيد عني بس اني كلش متونسه ويا اسولف ويا واحجي ويا وهو يكلي اني ما ميت . ويباوع لجهاله ويأشرلي عنهم . يربي معقوله هيج صارت حياتي معقوله عافني وراح . جان الزمن كفيل انو يهدأني بس مسسستحيل انسا ابد مستحيل انسه روح ارتبطت بروحي .
ممكن الانسان ينسه نفسه لكن من غير الممكن ان ينسى روح سكنت نفسه ..
هاي جانت المقوله الي تنطبق عليه كوولش . اااااه يا زمن درت عليه خوش دوره وجرة عليه خوش جورة . رحم الله والديك كفيت و وفيت . بعز شبابي اخذت اخيتي وهسه زوجي وابو بيتي وابو جهالي . دائما اباوع الهم اكول ذوله انكس من حظ امهم على الاقل ما تيتمت من جنت صغيره على الاقل جنت مرفوع راسي . اااااه تمشي فتره الحد واني بس اتصفن معقوله الي صار ؟؟؟ وجانت علامات الاستفاهم بدماغي يعني معقوله هذا اختبار معقوله هذا امتحاني بلدنيا الصبر اصبر على شنو على يا مصيبه اصبر بيها ...
كامو حمويني ياخذون شهاب وعليا ويرحون لليل يجيبوهم . خلص الحد قررت اروح لبيت اهلي وعمتي ما وكفت بطريقي ولا حمويني كالو شي . اخذت جهالي ورحت طبيت لبيت اهلي رجعت لغرفتي جهالي كبرو وصارو وحدهم مسأوليه ثنين حفاظات وحليب عيالي ما سكتو بين يوم ويوم يمنه كل ما يجي علي جايب حفاظات وحليب ويسأل عن صحتهم ويخلي فلوس وبابا ميقبل يكوله بتي وجهالها مسأولين مني واني خير من الله ممحتاج فلوس وعلي صار عصبي كله ابو محمد تره الجهال جهالنا وهلحجي ما مقبول بتك تصرف عليها براحتك محد يمنعك واذا تضل علينه احنه شايلين الجهال وامهم واحنه منقصر . بابا سكت بعد ما حجه . امي هم خطيه مكسوره كسره شكبرها ساعات احسها هي الي ترملت مو اني . كل ما افوت غرفتها الكاها تبجي . طبيت يمها كعدت على حافه الجربايه . كمت ابجي شبكتني وكالتلي شبيدي عليج عمر بيدي وجان شلته وخليته اله . روح بيدي جان شلته وخليته اله . اني وياها كمنه نبجي لحد الليل اجه باقر جايب الجهال ويا . واجتي عمتي باستني مو ذيج عمتي الي شخصيتها قويه اشوفها شلون مكسوره ودمعتها بطرف عينها . تذكرت احمد من كلي اريدج تصيرين قويه مثل امي . امي قويه وربتنه على القوه ناخذ حقه من حلك السبع . اتفقت اني وبابا بس ادور السنه مال احمد اني ادرس دراسات عليا واكمل احسن من ما كاعده . كلي بابا ايمان سدي هلموضوع وديري بالج على جهالج احسن ما ياخذوهم منج . كتله بابا ياخذون منو . منو الي ياخذو . كال بابا حموينج مبينين يردون جهالج ...
شحدهم اكبر واحد اسحكه جوه نعالي انعل ابوهم لابو الخلفهم ...
عيب بابا هلحجي هلحجي مو لايق بيج انتي انسانه واعيه ومثقفه والجهال من حقهم ...
حقيشششششش حقيشششششش ....
هسه انتي ليش تصيحين جاي احجي وياج حجي مال اوادم مو مال حيوانات . لو انتي بهيمه ومتفتهمين ....
اني بهيمه خلفله عليك ...
يا بابا يا بنتي انتي بعدج صغيره . والجهال من حق اهلهم هم لازم يشوفوهم ...
وهو منو مانعهم . عليش هلحجي جهالي يضلون يمي وهو شوكت ميجون اهلا وسهلا بيهم . والجهال جهالهم بكيفهم شوكت ميردون خل يجون يشوفوهم ...
بكيفج بابا سوي الي يعجبج ...
عافي وراح . واني بكلبي هذا شبي ابويه يمخرط شيريد شو كلشي ما فهمت ....
اجيت يم امي تلكتني بوستني . كالت ماما حماج علي كايل لابوج عليج يريد ياخذج لباقر ...
ش ش ش ش ش ن ن ن ووووووووووو .....
باااااااباااااا باااااباااا وينك ....
ها بابا شبيج ... جان بلغرفه واجاني يركض ... ها خيرج ....
شنو هلحجي يا قندره يا باقر . لك ذوله صدوك مو اوادم ...
بسبطه لزمت التلفون بابا سحبه من ايدي . كلي بابا اني من يمي رفضت وانتهى الموضوع عليش تكبرين السالفه ...
اول ما راح دكيت على عمتي ...
هلا يمه شلونج ...
عمه شنو هلحجي الي سمعته ...
عليش يمه ....
عمه شوفي لا باقر ولا اي احد غير باقر اني اخذه واتفكرون بلهشي واذا فكرتو اخذ جهالي واسافر ومتلكون الي وجود بعد تحلمون بيه هذا اخر حجي عندي باقر وغيره لو اموت ميلزمون شعره مني ومستعده اواجه العالم كله علحساب جهالي وجهالي الي شتردون تسوون سووو . وطبكت التلفون اني جان محترك كلبي بس اعرف تصرفي غلط من تصرفت هيج ....
.
.
.
وره ساعه من المخابره عمتي وحمويني كوولهم اجو ...
وكلها تشمر بكتر والي يكول نقيم دعوه والي يحجي ويصيح وابويه يكله المن مخابره لان ابويه ما مفتهم شي ومحمد اخويه يكله كمتو تتبلون علينه بزركم اخذوهم واختي تضل يمنه . اني سمعت محمد كام يجفص لبست عباتي وطبيت . كووولها سكتت كوولها باوعتلي بس باقر مباوعلي .
.
.
.
اخذت نفسسسسسسس.
اول شي سلام عليكم .
كولها ردت السلام كانما صوت واحد .
ثاني شي يا محمد احجي واوجه عيوني لمحمد اخويه . جهالي ما اعوفهم لو اعرف تصير مذابح . شي ثالث يا باقر ما اتزوجك لو مدري شيصير سمعت .
هو ضل صافن ..
علي كال . ام شهاب تعاي كعدي عندي حجي وياج ..
كعدت . كام يحجي خويه وهيج وهيج احسن واحسن للجهال واحنه مراح ننتظرج لمن تاخذيها وتشردين بيهم ...
اول شي شوكت ما تردون تجون وتشوفوهم هلا بيكم بس مال اني ارجع وياكم تعذروني بعد . ثاني شي اني ما اريد ازوج ....
خوش براحتج احنه كلنا الي علينه . وضل يسولف وي ابويه واني طلعت بس ما احاجي محمد اخويه . وتالي ابويه مصيح عليه كله لتمضرط من كيفك . كله يابه يصير هسه اني وحده من نسواني تمنع جهالي عنكم . اني طفرت من مكاني هو منو الي مانع . همه يمي وشوكت ما يردون يجون ياخذوهم انتم ليش همج . ضل هلحجي مستمر على طووول الفتره تالي اخر شي . اني كمت اغلس ياهو الي يحاجيني اغلس ما افتح الموضوع ...
.
.
.
طبعا جهالي كامو يفتهمون يعني صارو كبار دخلو بلثامن يعني وكل الي بيهم يزحفون وحركه كووولش قويه وجهال محمد هواي . محمد ماخذ ثنين نسوان وحده عدها ٤ و وحده عدها ٣ وكووولهم صغار وطبعا صايرين ذوله الجهال احزاب كلمن وي امه والي طايح بلنص جهالي يوميه واحد معضوض كل ساع اطفر على صرخه ميكومون منهم المن يشلعون وذره منهم واني اضل افرفح ونوبات حته اضرب جهال اخوتي مع العلم هم صغار . بس صارت الوضعيه لا تطاق اخر شي قرر بابا انو يعزلي قسم من البيت ويبني اليه ...
