#ثار الدم
#ليوثي المياحي
_6_
سحبني عليه حطني بحضنه..رعشه لزمتني وماعافتني دكات كلبي كامت تنسمع من بعد امتار.. كمت ادفع بيه واتعارك وياه..كتله عوفني..انته شتريد تسوي.. اللي ابالك شيله.. اكتل روحي ولا اخليك اتمسني..حضني حيل وضغط عليه حتى ما خلاني اتململ..ضغط جسمي باديه وبرجليه..كمت افرفح ..زحزحت روحي ردت اخلص روحي..لزم وجهي بيدة وجتي العين بالعين.. والنفس بالنفس..والكلب كام يدك..والعيون بيهن كلام وكلام...
آه..آه.. يمه تعاي شوفي اشجرة لبنتج.. شحجي وشكول..عيونه من كثر ما هيه عسل ..خضارهه فاتح..اول مرة تتلاكه عيوني وعيونه من قريب..
بصوت ابح ..صوت يكطر عذاب..كالي..ليش تحبين تحرميني..من فرحتي..وليش تحبين تصير حرب ويه رجالكم..وليش ماراضيه تخليني حتى ابالج عسى تحبيني.. عصيت اهلي ومستعد للموت لخاطرج..وانتي ولا حاسه بيه.. ما كلتلج حبيني.. بس ع الاقل حاولي تحبيني...اني جنت لابدة بحضنه.. والحجي الحلو مالته ذوبني..بس من كال حاولي تحبيني..ركبني الخبال.. وتذكرت انو اني مغصوبه..ورجعت احاول املص روحي من حضنه.. واحاول ابتعد عنه..كتله انته بطريق واني بطريق ثاني.. وطريقي وطريقك ما يتلاكن سويه.. انته ما اخذتني برضاتي ..ولا اخذتني برضاة اهلي.. انته ذليتني وذليت اهلي ..عمري مراح اطيعك. ولا اكون الك..لو تشعلي صوابعك العشرة شمع ..نجوم السما اقربلك مني...
جن جنونه ونار اشتعلت بعيونه..والله اني مو زينه بنت نجيه..اذا ما اكتل كل احساس حب عندك ..خسرت كل شي خلي ع الاقل كرامتي.. ما تتهان..جرني من ايدي بقوة راد يكسرهه.. كالي انتي ماناويه .. تهدي..وحاطه راسج براسي..بس ميخالف انطيج حقج لان بعدج متعرفيني..سوي اللي براسج وشوفي شلون اكسرة الج..حل ايدي ورجع مشه ونام ع السرير .. اني كيفت عافني من حضنه حتى ارتاح.. كالي الله شكد حلوة زينتي.. تصبحين على الف خير..وتمدد ولا كأنه جنه نتعارك.. كعدت وكمت اتفرج عليه..من غير ميشوفني.. كالي نامي بصفي..وباعي حتى لو نتعارك او نتزاعل ..ماكو واحد يبات بعيد ع الثاني.. وهذا اول درس لازم تتعلميه مني..والدروس الجايه هواي.. اني رجعت نمت بصفه بس على حافه السرير حتى ما اطخه.. حتى لو بالغلط..حرارة جسمه جانت واصلتني ..ما كدرت انام..وامي وابويه اشوفهم بايتين بغير ديرة.. خواني واولاد عمي واولاد خوالي.. يتحسرون على عرسي ..وعلى حنتي.. عقلي كام يودي ويجيب..ما اعرف شلون اخذتني النومه وغفيت...
بلال يباوع عليه واني نايمه يحجي ويه روحه..محلاهه نايمه بالفراش..عقلهه جبير.. واديهه ورجليهه بيض ومحليتهه الحنه والنقشه المختارتهه.. اباوع عليهه واشمهه اريد اشبع شوف منهه واريد اشبع من ريحتها.. حتى لو ماحبتني.. يكفيني موجودة ابيتي مكفيتني وموفيتني..حتى لو منطيتني ضهرهه..ميخالف احسن من متبات بحضن رجال غيري..احبهه وكلبي رايدهه من سنين ..حقي وما اعوفه لاحد.. يجيهه يوم وتعرف وتفهم شكد احبهه.. باقي اتكلب ع الجمر لا يجيني نوم ولا يغمضلي جفن.. قربهه مني نار تحرك حرك بس ارحم من بعدهه عني.. اباوع عليهه اريد امله عيوني من صورتهه نومهه محير ..اعرفهه وفاهمهه واعذرهه لان صعبه كل اللي صار بيهه.. لان ما عاشت ولا صارت المرة اللي تكسر كلمتي.. وتطلع عن طوعي..جبت كرسي وكعد كبالهه شعرهه نازل ع وجها..نايمه واني ابتسم وحدي مديت ايدي وشلت الشعر من وجهاا..
آه من جسمهه ..غطيتهه بالجرجف ...الفجر.اذن ..فتحت الباب وطلعت ..لان نهار طويل يتانيني ويتانيهه..
الصبح رحت للحمام سبحت ونعنشت ومشيت حتى اكعدهه...
اني كعدت ع الدغدغ اللي جانت ع جتفي.. لان ما جنت لحد الصبح مستوعبه كل اللي صار.. اني وين ...لكيته واكف جدامي ..لابس وكاشخ ..دشداشه سودة وجاكيت اسود.. قترة ع راسه هم سودة..كالي ..صباح الخير يازينة العرايس..
كتله صباح الخير..
كالي..يله احنه عدنه المرة اتكوم من الفجر وتحلب الهوايش وتريك رجلهه..وتنضف بيتهه ..ما يطلع النهار الا كلشي مخلصه.. كومي..كومي..عدنه كومه شغل..
اني استغربت.. شيريدني اسوي واني ستوني عروسه.. واني ما اعرف لا احلب الهوايش ولا اسوي شي.. غير اليوم صباحيتي؟؟؟
باوعلي وهوة يتمهزء بيه.. كالي هذا اذا جنتي عروس.. وبيت رجلج..بس انتي.. بايته ابيتنه بعدج مصايرة عروس..وانتي تعرفين كل الزين... ياله حضري روحج حتى نروح للحصاد...صفنت شويه وكفت وكتله هاذ شغلك انته ..اني عمري ما طلعت للحصاد اني جنت اقرة بالمدرسه .. وجنت اشتغل شغل البيت وبس..بعدين اني بعدني بحنتي..شنو تريدهم يشوفوهه حتى الناس تكوم تتمسخر وتقشمر عليه...لو تريد اتذلني كدام ديرتك حتى يشوفون الحرة بنت الشيوخ شلون تنذل...ابتسم بسخريه كتله ادري بيك تريد تكسرني حتى اكوم احبك واتوسل بيك.. بس تحلم... ماشي اطلع كدامي بس البس والحكك...
كالي لا تبطين.. راح اتانيج برة..زين..هوة طلع واني دموعي نزلت قويت روحي بعد ما فرغت حسرة كلبي.. غسلت وجهي وتكحلت وتحمرت.. ولبست دشداشه بيضه.. لكيتهه بالكنتور.وطلعت وراسي رافعته.. ماعاش ولا كان اللي يحاول يذلني وهاي جانت بدايه الحرب بيني وبينه...
طلعت واني اتبختر بمشيتي شمتانه بيه..هوة عباله اكوم ابجي واتوسل بيه..حتى ما يخليني اطلع للحصاد بس والله ما اسويهه وافرحه.. بذيج الصبحيه طلعت من غرفتي للحوش لكيته كاعد..من شافني جان يوكف..
كام يحجي ويه روحه .. آه.. يحليلتي.. اشسويتي بكلبي.. دمرتيه ..شنو انتي غزاله.. جايه تتمشى بنص الوادي.. عروسة كلبي ..ونور العين.. حلوة..ومنورة ..وردة ..بنص الوروود.. خصرهه يتمايل ومشيتها تكول زلزال بكلبي..آ آ آ آ آه ياكلبي ..تلوعت وانجويت بنار حبهه ...باوعت عليهه وكلتلهه هاي شمسويه بحالج...كلتلج نروح للحصاد مو للعرس.. جايتني محمرة ومكحله ..المن..روحي امسحي هل شخابيط واستري حالج ..لا تخليني اطلع من طوري بهل صبحيه....
اني سكتت وما جاوبته..جان تدخل حماتي المصونه.. وبناتهه..يهلهلون وجايبين ريوك الصباح ..حماتي كالت.هلا بجنتي.. اللهم صلي على النبي...زين ما اختاريت اخذت وربحت..وليدي.. الله انطاك ع كد نيتك ..
هيه تحجي واني.. اتذمر وعاوجه حلكي.. تكول هديه وجايه على كلبهه ..ومكيفه بيهه..
كالت ياله افطرو وقوو رواحكم بالكي نسمع خبر حلووو عن قريب... اني كلت هاي شبيهه راح تجلطني..شنو جايبتلج ارنب.. وتردين تولدينهه.. واني اصلا من البارحه شايله عليهه من كالت كلنه فدينا ثارنه..
بلال كال لاخته علياء ..اللي جانت قريبه مني بالعمر... كاللهه علياء شوفيلهه دشداشه حتى تروح بيهه للحصاد...ملابسهه كلهه جديدة مو مالت حصاد...علياء فتحت عيونهه وهيه مصدومه.. اجتي وكعدت بصفي جرت ايدي ..التكول جانت اتصبر بيه على مصيبتي.. امه اللي هيه حماتي ضربت صدرهه بايدهه..وليدي شتكول..تريد تفضحنه.. تريد تودع عروستك للحصاد.. شنو اتخبلت انته.. هاي تصرفات مال جهال...كال اني كلمتي ماتتكسر ولا تصير اثنين.. وما اريد واحد يناقشني.. مرتي واني حر بيهه..كالتله وليدي شيكولون علينه الناس.. يعذب مرته.. لا وليدي لا لا تضلمهه.. خواتك ما نخليهن يطلعن للحصاد شلون انخلي بنت الناس...
آه بردتلي كلبي.. همزين لكيت واحد واكف وياي...
بلال واكف نافخ روحه.. وخشمه رافعه للسمه.. كال الامه ياله يمه اخذي البنات واطلعي.. كالتلهه عود اكول كبر مابقه جاهل..ثاريك ماكبرت وبعدك ..الناس تجي تبارك وتهني ع الصباحيه...ياله امشي يعروستنه روحي لغرفتج..وانته اطلع ترة اكول الابوك ع اللي ناوي تسويه.. عوف المرة براحتهه..ترة خطيته تعبانه تعب ما يعلم بيه بس الله... روح وليدي وخليني راضيه عليك.. حسيته شويه ارتخه.. واجه وباسهه من راسهه ..وباسني من راسي...اووووه اني لزمتني دوخه..وجان يشاورني باذني همزين امي ما اجتي بالعراضه.. راح اعوفج هسه ولا تنسين بعدهه العركه ابيناتنه..جان يغمزلي بطرف عينه وطلع...هوة حله بعيني وكعدت اباوع عليه وهوة طالع من غير ما احس ع نفسي.. وما حسيت بحماتي وهيه كاعدة بصفي..
كالتلي..بنيتي..ادري انتي وياه مو على صلح.. اني مرة جبيرة وافهم واعرف اللي صار بيج..مو شويه.. شوفيه بعين جبيرة عين رجال.. يحبج ويريدج..بالحلال..تحدى كل الناس او وكف وكفة رجال من اجو اهلج.. زينه بنيتي..صعبه الرجال يجيب بنيه من وسط اهلهه ويجازف برجاله وهوة فاتح صدرة للرصاص..لخاطرج..عامليه باللين مو بالعناد ..رخي الحبل شويه عليه..وانتي بنيه مثقفه وتعرفين شلون تدللين وتتحايلين عليه ..حتى تحبيه ويحبج.. ومو اني اللي اكولج شسوين ..ياله تعاي اتريكي.. لان راح يجوج ناسنه واهلنه حتى يباركولج..اتريكت وتريكو وياي.. امه وخواته..واني كلبي انمله حقد..وشر.. همزين امه خلصتني منه..
اللهم صلي ع النبي ع الخيرات اللي حطوهه جدامي.. خبز ركاك..وعسل ودهن حر..وحليب وخاثر وزيتون وبيض..عبيت كرشي..ومن خلص الريوك كمت الملم وياهم..ما خلوني بحكم اني بعدني عروسه جديدة..وحتى حنتي بعدهه بايدي..اجوي كل الناس علينه.. ونسوان ديرتهم..كلهم..والبنات جايين يشوفون هاي اللي دوخت الفارس مالتهم..شلونهه ..وكامن يسلمن عليه وحدة وحدة..بيهن بنت عمه.. تباوعلي بكره وحسد وغل واني كمت اتموع وادلل ع روحي ردت اغور بنات الديرة وابين الهم اني اسوة التعب..النسوان شعلن البخور وسون دائرة وكامن يغنن ويركصن..واني اضحك بسخريه..كامن يهنني وكل وحدة جايبه هديه اللي جايبه حلاوة..واللي جايبه دهن حر واللي جايبه لحم وكل وحدة وامكانيتهه..حماتي تريد تفتخر بيه.. كامت لبستني شركه كامله مالت ذهب..جان اتكوم بنت عمه.وتلم الهدايه وتبسمر.. وانته شلون قبلتي اتوقعين..ع العقد وانتي مغصوبه....اني كمت اسمع وابلع ..بنت الحرام رمتلي جم كلمه وضوجتني وحرت بيا كلام اجاوبهه...
نوب راحت يم حماتي..وضلت تكص بيه..بالحجي..جان يدخل بلال ..سمع حجي بنت عمه.. جان النسوان كامن يهلهلن.. وهوة عصر عضلات وجهه.. ورفع خشمه للسمه.. وردهه وجاوبهه وهيه سكتت وخجلت.. بلال كال اني عمري ما اغصب مريه.. هاي مرتي زينه.. وغمزني بضحكه ..حبيبتي وتاخذ العقل..البنات ضحكو ..اني خجلت..زادت الهلاهل..وامه تضحك ..عاجبهه رد ابنهه.. بداخلهه بس كدامهم كالتله ..عيب وليدي استحي.. سواله درب بين النساوين.. واجه عليه.. ولزم ايدي.. وكال هاي حبيبتي اكولهه بدون ما اخجل او استحي...وللحكايه بقيه..
