الفصل الرابع (ذكريات لا تموت )
بقلم دينا محمود
قالت لي قولي ل خيلانك انك دايره تقعدي في داخله الجامعه وما اظن يرفضو لانو كلها بنات وحتوفر عليهم حق المواصلات ..
داخليه شنو يا ريم والبدفع قروش الداخليه منو .. لا لا مادايره ..
يابت انتي عويره انا بدفع قروش الداخله ..
لا لا ياريم قلتا ليك مابقبل ب صدقه وشفقه من زول لا لا مادايره ..
يخسي عليك يارغد والله انتي زي اختي واحد ما تعتبريها كده ويازوله كان متضايقه شديد اعتبريها دين ورجعيهو بعدين وقت ما الله يسهل ليك ..
اها وكان مالقيت طريقه ارجعو ليك ..
واي من البت المعولقه دي انتي وافقي وبتتسهل بس ..
طيب انا اذا وافقت خيلاني حيوافقو ..
يلا دي نشوف شطارتك فيها ..
طيب اذا سالوني قروش الداخليه ..
قام صلاح نط ..
قال لي قولي ليهم ناس الجامعه بشوفو اليتامه الماقادرين ع السكن بدوهم سكن في الداخليه بس ..
قلتا ليهم خلاص خير اشوف خيلاني وبرد ..
واخدنا قعدتنا وبتونسو وانا مامعاهم بالي في الموضوع وردت فعل خالي الكبير لانو لو وافق الصغير ماعندو مشكله ..
خلصنا ورجعنا البيت ..
الصباح بدري .. مشيت ل خالي في بيتو كان اول مره بعد ما انا اكبر كده امشي ادق ليه باب وخايفه ارجف ..
مين ..
انا رغد ياخال ..
فتح لي الباب ..
اووووف اها خير ..
ضايقتني بس مشيتا دايره يوافق لي ..
خير يا خال انا بس حابه استشيرك في موضوع وعايزه اخد اذنك ..
في شنو ..
انا يا خال عايزه امشي اعيش في داخليه الجامعه ومنها اوفر حق المواصلات ..
داخليه شنو يا بت والبدفع ليك حقها منو ..
لا لا ياخال ما ناس الجامعه بشوفو الناس اليتامه في الجامعه وماقادرين ع السكن بقومو يوفرو ليهم سكن في الداخليه حقت الجامعه ..
عاين لي كده .. قال لي كدي افكر وارد ليك .. واحنا بنتكلم جاء ولدو الاصغر من صهيب .. في شنو ومافي شنو ..
قام خالي قال ليه قالت دايره تمشي داخليه جامعتا وواها الداخليه كلها بنات وكده ..
بسال ..
ولد خالي قال ليه اي وسمحه وكلها بنات وحراس تحت وامان شديد ..
عجبتو قال لي خلاص ولا بفكر مش انتي عايزه كده خلاص امشي ..
استغربنا ب السرعه دي مالو عيان ..
تاني التقول قراء افكاري حب يجاوب لي ههههه ..
قال لي كويس زاتو انا اصلا محتاج قروش حاقوم ااجر البيت حق حبوبتك مدام انتي ماعايشه فيه ..
في قلبي ايوه ي دوب عرفتا السبب بس ماعلينا اهم شي اطلع من البيت دا ..
مشيت ع بيتنا جري شفتو شنطني الختا لي فيها الهدوم وجدعا لي يوم باع العفش بس ياها زاتا شلتها ب هدومي وشتتا ودعت جارتنا ومشيت .. كلمتا ريم قالت لي تمام بمشي هسي بحجز ليك تعالي لي هناك اركبي امجاد انا بحاسبو ..
فعلا ركبتا ولا ودعتهم ماصدقتا حأفتك من صهيب وحركاته وحريم خيلاني وغلاستم ..
ولاقيت ريم انبسطت شديد بي ودخلتا الداخليه ..
حاجه عجيبه عالم جميل البنات واللبس والحركات ..
وانا خجلانه من نفسي ومن هدومي وشنطتي الشايلاها .. يعني في البيت هناك براي مافي زول جايب خبري وفي الجامعه ب عبايه .. هنا مافي عبايه كلنا بنات ..
ريم قالت لي مالك بتمشي كده ..
عايني لابسين كيف وانا ماعندي لبس زاتو حاعيش معاهم كيف ..
قعدت تضحك ..
عويره دي كدي تعالي اوريك غرفتك .. بعدين نتفاهم ..
حجزتا ليك رباعيه قلتا عشان تلاقي البنات وتتونسي معاهم واخترتا ليك بنات كويسات شديد وتقريبا بعرفم بس ما كتير بلاقيهم في الجامعه بس بنات ناس .. اغلبم من الجزيره ..
قلتا ليها تمام ..
وفعلا دخلت الغرفه البنات لاقوني بكل صدر رحب مبتسمات وحلوات وظراف وطوالي دخلو فيني ونسه وانتي من وين حبيتم ..
ريم قالت ليهم يلا انا حاخد منكم رغد شويات وبعدين برجعا ليكم عندنا مشوار .. قالو ليها اوك ..
وطلعتا معاها ..
مشوار وين الماشنو ..
لمن نصل بتعرفي ارح اركبي العربيه ..
ومشيتا ..
