الفصل السابع (ذكريات لاتموت)
بقلم دينا محمود
كلنا قاعدين ع اعصابنا ي يوم بكره ماتسرع .
وبكره جاء وريم مشت اتغدت مع عمها ومحمد والاسره ..
ونسه وضحك وهظار ومحمد وريم زي توم وجيري طوالي بتناقرو ..
خلصو اكلم وجابو الشاي قعدت ريم ومحمد وعمها ومرت عمها ام محمد ..
يلا ياعمو ع قول السعودين قول تم ..
هههههه خلينا من السعودين هسي بقول ليك كان بقدر ع الحاجه الدايراها عيوني ليك ..
ان شاء الله بتقدر ..
طيب قولي ..
الموضوع يا عمي بخصوص رغد صحبتي الدايره محمد ..
طوالي سكتا ..
شوفي يا ريم انا كلمتا محمد ب راي وانتي اطلبي اي طلب تاني انا بنفذو ليك بس دا لا .
انت يا عمي هسي سبب رفضك دا ما سبب كبير يعني الود ماعايز من اهلو ويا عمي الجيل الجديد دا اي زول بختار براهو براحتو ما زي ناس زمان الا بت عمك وتغطي قدحك .. خلي يختار براهو ويتحمل اختيارو ..
بس لو غصبتو ع زوله هو مادايره من اختيارك انت ابسط مشكله حيخت السبب فيك انت .. وكلام كبار كبار كده ودخلت تخصصا السايكو فيه ومحمد شويه شويه يجدع كلمتين معاهم وامو برضو بتحاول ..
محمد حس بيه رخا شويه ..
انت يا ابوي اقعد معاها مره وحده بس اتعرف عليها وانا بوعدك كان اتعرفتا عليها وماعجبتك وطلعت ما الانسانه المفروض تعيش معاي وتشيل اسم عيلتنا انا بخليها طوالي ..
انت بس اقعد معاها ..
وريم تحنس وامو تحنس ..
قال خلاص موافق .. بقعد معاها وبعدين بديكم راي النهائي وزول تاني يناقشني ماف ..
خلاص اتفقنا ..
بكره خلوها تجيني في المجمع ..
وطلع منهم ..
كلهم انبسطو التقول وافق ع العرس وهو ي دوب وافق ع انو يشوفني ..
طوالي محمد وريم ركبو جوني الداخليه اركبي اركبي ركبتا ..
حكو ل ب الرصه كلها ..
وكيف امشي بكره الاقي البروف وبوروني مابحب شنو وماتدققي في كده المهم حاسه نفسي ماشه معاينه ل شغل .. استفزتني الحركه شديد طبعا ..
بس ما بينت ليهم وقلتا خير ..
مشيت الداخليه بكيت زين .. يعني عشان انا يتيمه يحصل لي كده ..
اتوضيت وصليت ودعيت ربنا ونمتا ..
بكره جاء ومحمد وريم الاتصالات ماوقفت ..
ماقلتا ليكم داخله معيانه بتاعت شغل ..
لبست واتزبط ومشيت المجمع ..
ريم انشغلت مشى معاي محمد قال لي بنتظرك بره انا انتي خشي وزي ما وصيتك وخليك ريلاكس ..
اخدتا نفس عميييق دقيت الباب ودخلت ..
اول مره اشوفو كان من شافني ابتسم ابتسامتو ريحتني حبه ..
اتفضلي يا رغد يابتي ..
كان في مكتبو .. جيت سلمت عليه دايره اقعد في المكتب قال لي لا ارح الكنب هناك ..
مشيت معاهو وقعدتا ..
حس بي متوتره ..
حب يشيل التوتر مني .. وقعد وخت يدو في الكنبه .. وبقى يزح في الكرفتا حبه ..
الايام دي الجو مسخن موش .. واصلا التكيف كان بجمد الزول بس شكلو داير زي ما قلتا ليكم كان داير يشيل التوتر مني ويعمل الحاله وحده ..
اي والله سخنت شديد .. وابتسمت ..
بقى يسال من تخصصي شنو ويوريني شويه حاجات بتتعلق ب تخصصي ومره يضحك وينكت زي محمد ولدو بس محمد داك مجنون رسمي البروف ضحكو في حدود المعقول ..
شويه شويه .. بقيت ارتاح في الكلام حسيتو طيب ومسالم ما البروف البسمع بيه عند محمد وريم وعصبي وزول يناقشو ماف والكلام دا .. لقيتو شخصيه لذيذه .. اتونس وضحك وسالني من اهلي شويه ومحروجه وانا بجاوب هو زاتو حس ما حب يدقق معاي كتير المهم اتونس ونسه عاديه جدا ..
شويه جاهو اتصال حاله طارئه استاذن مني ..
طوالي استاذنت انا وطلعت محمد واقف لي بره انا بشري ..
