بغداد

الفصل الثاني عشر

#بغداد
الفصل الثاني عشر
#قصص_اسراءالجميلي

رجع كرم من العسكريه راح يم امه لحد ما دا ارتب غراضي وي اخوتي ..
لكه صديقه بشركة طيران سوانه الفيزة بنص السعر و حجزنه و علساس بعد ٣ أيام سفرنه ..

جان عدنه سيارة كيا سورينتو بعناها اشتريناها بـ٣ دفاتر و نص ..
بعناها بدفترين بس من السرعة ..
دا اشتغل بغراضي اني و نسرين ..
جان الباب الرئيسي مال البيت انفتحت ..
احنه فزينه راساً صحت منو ؟
اني كرم ..
اجه عليه يجر بيدي ..
بسرعة مريم البسي عباية و امشي اندلو مكاني يم اهلي ..
و عرفوا انتوا اهنا هددوني بيج يلا بسرعة ..

اني مصدكت بيه گلت يجوز ديكبر الامور ..
بس كلت امشي مثل ما هو يريد ..
انطيت المفتاح النسرين و كتلها اتصرفي بالبيت بكيفج و انطيه المفتاح لام البيت ..
رغم ما مصدگته بس قلبي يلعب و يوجعني ..
طلعنه ركض رحنا البيت احمد لان جهالي جانوا يمهم ..

دا اعدل بغراضنه و اوراقنه جان الكه دفتر الحساب و اتذكرت فلوسي الي بالبنگ ..
من المشاكل نسيتهم گتله الـ كرم ..
حمد الله و شكره ..
وعدني بس الله يرزقه يردهم الي كلهم لان ذولة ورثي من اهلي ..

اكثر شئ احبه و حبيته بـ كرم ايمانه بالله ..
رغم كل المصايب الي صارت بينه عمره ما جزع و لا مل من شكر الله على ابسط الامور ..
دومه يگلي ابو خيمة الزرگه فوگانه و مينسانه ابد ..

المهم رحنه ثاني يوم سحبناهم ..
رجعنه البيت احمد ..
و احنه بالطريق حسيته بس يتلفت بسيارة التاكسي ..
خطية حبيبي يخاف لا احد لاحگنه ..
وصلنه للبيت كلي بسرعة جيبي الجنط و الجهال ..
شبيك بابا خبلتني ؟
لج امشي بسرعة بلا نقاش ..
احمد : شبيك كرم يمعود شكو ؟
كرم : ديلحكونه احمد عارفين احنه وين ..
احمد : الله اكبر شلون عرفوا ..
كرم : اكلك ليش ؟
لان كتالي مني و بيه ..
كتالي يعرف كل تحركاتي شلون يعرفها اذا غريب ..
هو كتالي لو علي لو خالي اكو غيرهم ..
احنه گرايب اكيد يعرفون ما اروح الغيركم ..
احمد : اي صح يلا بسرعة مريم ..
بوسناهم و دموعنه بطولنه ..
ودعتهم و دا احس شوفتهم من جديد كلش بعيده ..

خابر واحد صديقه گله تتحملون اليوم باجر مسافرين كله تعال حبيبي على راسي ..
طلعنه لبس شماغ و كلي نزلي الربطة على وجهج ما اريده يبين ..
عبالك احنه الحرامية ..
حسبي الله و نعم الوكيل بكل ظالم ..

مشينه اجرنه تكسي ..
دك تلفوني مسج .. قلبي راد يوكف ..
مريمانه انتبهي على السيارة السودة الجوكور على يسارج ..
طلعت من كرم المسج ..
باوعت على السيارة شفت بيه مسلحين لابسين اقنعة سودة ..
شاهرين اسلحتهم و لا خايفين من الشرطة و الناس ..

شفت الرجال الكاعد بصف السايق باوعت بعيونه و عرفته ..
باوعت لحظة حتى لا ابين و يركز عليه ..
اتاكدت عيونه عيون الي مفروض يكون الي السند بعد ابوية ..
حزام ظهري و قوتي ..
عيون و حواجب اخوية ..
الي لا يمكن انساهم طول عمري ..