الغوغاء ..........3
________________________ليلان العطواني ....
سمعت نعالها يخط جنها جايه على حجرتي غطيت روحي بالبطانيه ..سويت روحي ...
سمعتها فتحت الباب حجت بصوت ناصي بس كدرت اسمعها
كالت هاي شبسرعه اجت ....
طلعت من غرفتي ...وخرت البطانيه واني الوب بروحي ما اعرف شسوي اسولف لبوي لو اسكت ....صفنه تاخذني وصفنه ترجعني اذا سولفت لبوي ما يتحمل يوكع ويتخربط
واذا سكتت خاف احظيه تزيد عن حدها والناس تحس وسالفتنا تصير على كل اللسان .....
كعدت افكر ...ما كو غير ام حاكم اروح اسولفلها هي احسن استشيرها وهي ادكلي شأصرف .....
بالليل اكلت لكمه كوه وترخصت من ابوي اروح لبيت خالتي ام حاكم كالي روحي .....
احظيه ما قبلت اروح كالت لبوي بتك حدثه جبيره شكو موديها البيت ام حاكم وعدهم زلمه جبير ....
ابوي ما سمعها ولا اهتم بحجيها ...كال يابويه روحي تعللي مو تبطين ....
لبست عباتي ورحت اول ما دخلت تلكتني خالتي ام حاكم وهي تسال شبيج وجهج مصوفر وذبلانه خيرج سنيوه صاير شي ....
رديت عليها واني ابجي ...اي يخاله صايره مصايب تلاحكيني
ما اعرف شصرف شسوي خالتي اريدج تعينيني ...على مصيبتي ....
سولفت السالفه كلها لام حاكم المره ما تفاجأت وكالت اني جنت حاسه بيها وشاكه كلبي لاجمني منها هاي الذيبه
ولج سنيه ديري بالج تحجين لو تسولفين هسه اسكتي وضميها بكلبج الحد ما تكمشينها كمش هاي اذا فتحتي حلكج تشمرج بمصيبه وذب زناها بيج .....
وابوج عمت عيني عليل اذا سمع يجوز يموت ومنو الج تبقين تايها ومحد بحالج هسه خلي سالفتج ببطنج احسن ولا تورجين احد على حالج تره الناس ياكلون الوجه وشماته
راي خالتي ام حاكم جان صحيح فكرت بمخي وعرفت هي الي كالته حق يجوز اذا حجيت راح ادكول هذا رفيج سنيوه وهي تكرهني وكلشي تسوي من بلاوي ...
خل اسكت ويحلها الف حلال ...
مرت الايام واني الشك ياكل بيه اكل جنت ادري احظيه
بعدها على نفس تصرفاتها بس جنت اخاف لا ابوي يدخل على غفله ويشوفها ....توالت مصايب الدنيا على راسي وحده فوك الثانيه واني لا عندي تدبير ولا شور ....الحرب مر عليه سنه ونص...
كل سنه يطلبون مواليد جديده وشباب تروح شي اسير وشي شهيد وشي مفقود والقليل جان يرجع ...
واني كل وقتي افكر شلون اخلص من احظيه ...وارتاح ...
وبيوم ابوي كال اريد اروح الكربلاء ازور ويه شياب المنطقه
وانتي بويه روحي طري الزرعات وارجعي ...موش تتاخرين
كلشي يصير .....
ابوي غبش من الفجر ويه صلاة الصبح ...واني خدرت استكان جاي اكلت كسرت خبز وشربت استكان جاي واخذت
الحمار وطلعت ...كلما اريد الحمار يمشي ...ما يتحرك مره مرتين تلاثه ماكو ما اعرف شبي ....
عندي صونده رفيعه بس جانت ضربتها تلسع توجع ضربته ضربتين اتحرك بس كلبي وجعني عليه لان جنت اعتبره حيوان ما له ذنب بهاي الدنيا ....
طريت الزرعات بالعجل وجنت بساعتها مهمومه اركض ركض
فتحت الماي ونظفت شويه ....بالكاع ورجعت ...للبيت
الحمار هم نفس الشي حرن ما اعرف شبي لسعته بالصوينده
تحرك ...بس كل ضربه تجهشت روحه بيها ....
وصلت للبيت من وقت تقريبا الضحى ....
من طبيت للبيت سنطه لا حس ولا نفس ...ياااا احظيه وين
شنهي لسه نايمه ما صدك ...لكشني كلبي وكلت خل تخنس كتر حجرتها وافتح الباب على كيفي واشوفها وين ما وين
ادنيت يم حجرتها شويه شويه اسمع صوت سوالف وتبسبس على كيف وصوت رجال ومره يضاحكون ...لعب الفار بعبي
وخفت كلت بسم الله الرحمن الرحيم شني هالصوت شني قابل زلمه جاي يبوك هو احنه شعدنه ....شويه سمعتها هي تتمضحك تسولف عرفت هي وياها واحد بالغرفه .....
شبت النار براسي انتبهت على روحي بيدي الصونده فتحت باب غرفتها ما حسوا عليه اثنينهم ربي كما خلقتني ...رفعت ايدي ولسعته بالصونده ضربات على ظهره وراسه ورجليه هو صاح وطفر شفته حميزه يتلاحك يلم هدومه واني اضرب بي
وهي لفت روحها بالبطانيه وصاحت صخام سنيه شجابج
ما اهتميت بقيت ادك عليه وصيح يانذل شجابك شطببك حجرت ابوي ياخايس دفعني وشرد من باب الغرفه
وهي انداريت عليه كامت رادت تشرد لزمتها بالصونده
كطعتها وسحلتها بالكاع والتراب سحل وشلعت شعرها
وزلغتها بالصونده الحد ما ما طلع دمها واني اصيح يافاجره ياخايسه ....يا ام الربوعه ياعار سزز ....هي ولا نفس ولا حجايه الحد ما وكعت بالكاع ماعت روحه ....
من طاحت سحلتها للحجره سحل من كفشتها وذبيت عليها مي هي فزت ..شافتني واكفه على راسها ...ركضت لبست هدومها وركضت وراي وكعدت تتوسل بيه حبابه لا تسولفين لبوج ولا لاخوتي دنكت على رجلي وباستها وتتوسل وتبجي
اني لان كلبي شويه مو علمودها ...
خفت على ابوي اذا يسمع يوكع ويصير بي شي ....
كتلها راح اسكت بس اذا عدتيها اذب عليج نفط واحركج
وانتي عدله هيج اطلعج مصلخه افضحج واحركج ...
هي حلفت كالت ما اعيدها ...
بالليل رجع ابوي من الزياره تلكته هي بس جانت مزوركه من سالها ابوي كاللها شبيج كالتله تعاركنه انه وبتك على شغل البيت وتكافشنه ....
ابوي ..كالي شجاج بويه هاي مثل امج شلون تسوين هيج
اني عفست وجهي وكمت وكتله رايحه على بيت خالتي ام حاكم ....
تسرسحت على بيت ام حاكم وسولفتلها كل السالفه
ام حاكم ما رضت على تصرفي وكالت شبيج رعنه احميزه مسودن ومايسكت وهسه يلفلفج هو واحظيان طلابه شكبرها ويذبوها براسج .....
المره خوفتني اكثر من كالت احميزه يشتغل بالامن وهو يلكط بالشباب ما تشوفين الخير ينكط عليهم اسكتي وبعد لا عليج بيهم تره تروحين بالرجلين وادعي الله يخلصج من احميزه وحظيه ...
وللحكايه بقيه ....انتظرونا .....ل_______يلان العطواني
الشكر لله لله ....
