الغوغاء .......11.....
بقلم ليلان العطواني .....الشكر لله لله .....
حظيه وحميزه بايكين ذهب هواي وفلوس وحتى ملابس وفراشات جابت سياره محمله ماخلت شي يعتب عليها
اهل القريه تعجبوا بس حجوا عليها ونكثوها نكث ...
حميزه جاب سياره حمل بايكها ومحملها لاهله غراض...
وحتى فلوس دولارات جاب وياه ايام والخير طفح عنده وصار يلعب بالفلوس لعب ...
الناس كعدت تحجي البايك الحرامي نهب حلال الناس اكله كله حرام ...
كل فتره يروح بالسياره الحمل يجيب اشكال والوان ويرجع
وامه صارت تلعب لعب وحتى رادت تبيع البيت وتروح تكعد بالولايه تشتري بيت جبير ...وتزوج حميزه ..
بس شغل حظيان اقوى من ام حمزه ... حمزه رفض بيع البيت وصمم يبقى بالقريه الخاطر حظيه ..
حظيه لاعدها اهتمام بخلفتها ولا عبالك بزر بطنها لامهتمه للطلوك والحباله متيهتهم لاتغسل ولا تلبس واربعه وعشرين ساعه عزايم لخواتها تطبخ وتنفخ وتكعد هي واخواتها وامها
بالغرفه ياكلن والمزعطه من يخلصن تلملهم الفضاله توكلهم
عيونهم تباوع ...مرات ينكسر خاطري عليهم ومرات اكول اني شني بيهم ذوله طبهم طوب خلفة حرام ....
حميزه طك طكوك وصار يحجي بالملايين والناس والاقرباء يفترون وراه حتى ياخذون اليوكع من ايده ...
اهل القريه جانوا فقره وماشايفين والفكر مرات من يزود عن
حده يجيب الكفر وياه ....
جنت اكعد بحجرتي وحدي ومرات من اضوج اعوف ابوي نايم واروح اتعلل يم بيت افرغ همي ويفرغن همهن فضيله
وضعها الصحي تخربط خصوصا من رجعوا الاسرى مال الحرب العراقيه ..الايرانيه ..وحاكم ما رجع وياهم ...ومن راجعت الدوله حولوها ع الصليب الاحمر وكالولها زوجج مفقود ...مو من ضمن الاسرى ...
بيت وبدون والي شيصير بيها النساوين تتبهذل ...جنت اكعد يمهن ساعه نبجي وساعه نسولف بس انه جنت اروح يمهن حتى املي عيوني من صورة حسن احفظ شكله عيونه شعره
طوله سماره ...واعاتب ربي اكله ليش اخذته مني وحرمتني منه ..خليتني مثل طير مذبوح ويلوع بروحه .
ومن ارجع للبيت افوت للحجره لو اقره قرأن لو افتح راديو اسمع الاخبار لو ادعيه دينيه ....وجنت اكثر شي اسمع اذاعة مونتكارلو ...حالي حال الناس نتابع الاخبار ....لان كالوا امريكا حشدت جيوش وراح تغزوا العراق .. بوقتها كالوا تلاثه وتلاثين دوله ...والريس جان يخطب ويبدي خطابه ويكول الى ابناء شعبنا ...الى ابناء جيشنا الباسل ... ويكمل خطابه
الدوله دخلت انذار والناس خايفه من هاي الحرب ...الي متعجب والي خايف والي يكول اسم الله بالطبك امس خلصنا من حرب ايران ..والي بده يسوك ويشتري المونه خاف الحرب اطول والعراق عليه حصار والجوع يكثر
انه هم حالي حال الناس اشتريت طحين وتمن وحجي رايح ماقصر وياي هم دزلي سياره محمله تحمل عينج وما تشوف
من قربت الضربه الرفاق الحزبيين كلهم ملثمين وشايلين سلاحهم ...ولازمين واجب الليل كله حتى حمزه وياهم بس مرات يلزم الواجب يم حظيه للصبح ...
