جنة فؤادي

جنة فؤادي الجزء الأول

الجزء الأول

#zainab_alnajar

_ الست زبيدة سالم موجودة ؟
_ نعم تفضل اني زبيدة .. !!
_ ممكن توقعين .. هاي ورقة طلاقج
،، يا الله مو معقول .. سنين عمري راحت وياك ماصدگت راح تسويها ،، الورقة بأيدها تقرأ وتنزل دموعها ويه كل حرف .. وتعيدها مرة ثانية وتتمنى يكون شيء خطأ بيها .. او تكون بحلم .. وقعت وگعدت على كرسي بالحديقة كانت طالعة تروح للدوام تريد تستوعب الموقف..  شنو راح تحجي .. شنو تگول لأبوها وأهلها وصديقاتها…  وشنو تگول لگلبها المكسور
مسحت دموعها وخلت الورقة بجنطتها وصعدت بسيارتها تسوق وبالها بعيد .. رجعت لكل ركن بيتها وكل حجاية وكل موقف .. واصوات السيارات وراها والي يفوت عصبي من يمها لحد ما وصلت للشركة .. ربع ساعة مرت وهي تريد تنزل من السيارة بس دموعها مو راضية تتوقف تمسح وحدة تنزل عشرة
12 سنة من عمرها كأنها راحت بلمح البصر .. قوت نفسها ونزلت دخلت غرفتها وهي ساكته
غرفتها هي وحارث سوه .. نفس الاختصاص ( محاسبة ) قريبة من غرفة المدير . كل واحد مكتب صاجي وتخم بلون البيجي .. وبردات ذهبي وجوزي .. كان ذوق زبيدة وألوانها المفضلة اكسسوارات بسيطة لوحة بالحايط ونبتات اثنين ضليات .. ومعطر جو عطر خفيف تحس براحة وانتعاش وانت داخل للغرفة . ..
_ ست زبيدة .. اليوم ماكو صباح الخير ولا ابتسامة .. خير شبيج وجهج مخطوف وليش هاي الدموع بعيونج ،، استمرت بصمت وبالها شارد اصلاً ،،
تقرب من مكتبها _ زبيدة .. احجي شبيج خوفتيني
ساكته بس فتحت جنطتها وطلعت الورقة نطتها اله… يباوع للورقة ويرفع راسه يباوع عليها… 
_ معقوووله .. هذا مجنون اكيد .. زين انتي ليش مارحتي للجلسات من استدعوج بالمحكمة
،، تمسح دموعها ،، _ كنت اخجل اروح حارث .. تالي وكت اروح للمحاكم .. وأبد ماصدگت راح يتخله عني بهاي السهولة .. كنت اضنه مو جاد وراح يأجرلها بيت ثاني ويجي علية
_ وهسه ليش تبكين ؟ .. ما يستاهل دموعج .. ولا يستاهل تنقهرين عليه
_ حارث انا مو مقهورة علية .. مقهورة على نفسي .. على سنين عمري الضاعت مني .. مقهورة على تعبي وصبري .، هذا البيت بنيناه سوا طابوگة طابوگة ياما شلت وحطيت ونضفت .. كل ركن بي انا سويته .. كل لوحة بحايط وكل وردة بالحديقة وكل قطعة اثاث جنت بروحي اشتريهن بعد هذا امسح ايدي بالحياطين ..
_ عمرج..  !! بعدج توج طبيتي الثلاثين .. وكل هذا كان سببج انتي
_ السبب مني لأن مارحت للمحكمة !! ما صدگت گلت يريد يسكتها هذا بيتي هسه يرجعني ويطلعها الها .. حارث هو ملابسي ماجابلياهن
_ لا السبب منج من الأول لان سمحتيلة يتزوج
_ الله ماقسملي اجيبلة طفل..  هذا حقه وهذا حكم رب العالمين اكون عاقر .. گلت حرام علية احرمة حقة بعدين الله يحاسبني .. سمعت هواية منها، كنت اضحك أكول صغيرة ماتفتهم .. داريتها وهي حامل بأبنه ودللتها من ولدت وربيت الطفل وسهرت عليه ايام وليالي ومن حملت مرة ثانية فرحت اكثر منها برغم كل السمعته منها وبرغم هجره الي ويبقى يمها بس أكول حامل محتاجته.. وبيوم رجعت من الدوام هي نايمة وموجوعة انقهرت عليها وسويتلها اكل وابنها اخذته منها .. ومن اجة هو گالتله دفعتني ووكعتني وصرت نزيف وتضرب ابني وتأذي .. وصدگها ومد ايده علية وضربني وطردني من بيتي بملابسي ..  تجي وحدة طفلة عمرها 19 سنة وتفر عقلة واني الي گضه سنين هيج بلحضة يبيعني .. معقولة مايعرفني
_ اتصلي بي طالبي بحقوقج
_ حقوقي راحت بعد من مارحت للمحكمة وطلقني غيابي
_ اتصلي بي گدامي هسه ..  احجي صيحي طلعي الغضب الي بداخلج…  اووووف خليت نار بيه لو گدامي اشرب من دمه اكو احد يتخله عن هيج انسانة…
_ راح اتصل بس يمكن ما يستحق حتى العتب
، ،، اتصلت ورد بصوت استهزاء
_ شرايدة . خيررر ..
_ اشكرك طارق .. اشكرك على سنين التعب وعلى مجازاتك لأيامي وياك
_ سكتي سكتي .. يا تعب الشفتي..  هذا بيتي وبأسمي وخاف قصدج على كم فلس الصرفتيهن بالاثاث والبناء فأنتي من كيفج صرفتي ماضربتج على ايدج مو جاية تعيريني
_ معقولة هذا انت .. مدا اعرفك .. انت انسان ثاني .. شنو ذنب الي سويته حتى حقوقي ماتنطينيلها ولك هي ملابسي ما اخذتهن
_ جاية تتوسلين ارجعج يعني .. ما ريدج ولا اريد اشوفج .. وخلاگينج توصلج لان مامحتاجيهن مو قياس مرتي ام زياد
_ اني اتوسل بيك انت .. !! ع بالي ادمي واحاجيك .. اني الماريد اشوفك وراح انتظر بيكم يوم لان رب العالمين مايقبل بالضلم ،، وسدته قبل ماتنتظر جوابه ،، بس نهارت بالبكاء
_ حارث معقولة ماعرفت هذا الانسان شنو كل هالسنين لو هيج جنت عمية عنه مدا اصدك حارث اريد احد يگولي هذا حلم اصحي منه شنو أكول لبابا من ارجع وهو مريض وأخواني شنو اگول للناس لصديقاتي حارث گولي
_ صيري قوية زبيدة .. عمرج بعده بأوله والوالد بينيله انتي مرتاحة لهذا الانفصال وان شاءالله يتقبل .. شايله هم الناس!!  شيلي هم نفسج وبس گومي غسلي وتعالي كملي الدوام ويايه شغلنه تأخر
_ اعذرني راح اخذ اجازه واطلع حارث مو متحملة بعد
_ لا تروحين للبيت بهذا الشكل اكعدي ارتاحي واني اكمل الشغل لاتهتمين .. وفكري بشكل ايجابي .. رب العالمين يعرف الاصلح الج وكشفه لطارق گدامج بهذا الموقف .. ويمكن انفصالج بهالوكت وابوج محتاجج لان مريض ومحد مهتم بي غيرج
_ اي والله محد مهتم من اخوتي كل من عايش لحاله
_ خلاص كافي بجي اريد اشوف زبيدة القوية  ابد ماشايفج ضعيفة يالله غسلي وجهج واجيبلج جاي وأجي
…
..
مؤلم ان تفقد مرحلة كاملة من عمرك بلمح البصر والسبب هو انت ..  واختيار لطريق خاطئ .. والمؤلم اكثر ان يكون شخص اقرب اليك من الوتين هو الجلاد وحامل السكين

رجعت للبيت تحمل وياها جروح ما ممكن تضهرها مجبوره تضم غصة كبيرة بقلبها وتتصنع ابتسامة لخاطر والدها المريض والماتعرف هي بدون وجوده بحياتها شنو راح تسوي .. اخوه اثنين وكل واحد بيهم ملتهي بحياته ماكو واحد بيهم فكر يسألها شنو سويتي اوتحتاجين مساعدة .. محتاجة شي اجيبلج .. كأنما رجعتها لبيت اهلها كانت من جانبهم وخلوا حمل ابوهم عليها مايعرفون شنو يگول الدكتور او شنو علاجة .. حتى من يحتاج مستشفى تاخذه هي بسيارتها
_ شلونك بابا شلونها صحتك اليوم
_ الحمدلله زبوده بابا بخير
_ اغير ملابسي واصلي وأجي حتى نتغده اني وياك
_ اي والله جوعان .. هاي مرت حسام ما نزلت حتى عطشان وماگدرت اروح للمطبخ
_ عيوني انت هسه اجيبلك مي .. ما يخالف بابا يجوز عدها شغل
_ اي اي تشتغل خطية وعدها اطفال
،،، هسه رحمة ماكو رجال جبير ما راح ياكلج بس شأگول اعتب عليها لو على اخوية ،،
غدت ابوها وهي بالها شارد ودموعها بطارف عيونها .. تريد تگوله وخايفه لا ينقهر عليها ويتخربط
_ شبيج بابا شو ما أكلتي وعبالك ضايجة صاير شي
،، تصنعت ابتسامة ،، _ لا حبيبي ماضايجة .. بس اي صاير شي .. طارق دزلي ورقتي مطلگني بابا ،، ونزلت راسها ماتريد ابوها يشوف ملامحها ،،، هدت نفسها وحاجته .. هيج احسن هو مرتاح ويه زوجته وانا ما اخلف على شنو مبقيني .. وهم حتى ابقى وياك منو يدير باله عليك
_ هذا شگد خاين العشرة هيج يجازي وگفتج وياه .. ليش هيج حضج..  يارب والله بنتي طيبة وماعدها أذيه على احد .. لعد لو ما انتي زوجتي
_ هاي شنو بابا ما ريدك تعصب وتنقهر .. شنو ماتريدني يمك  .. خاف تريد تتزوج 😉
_ لا بابا انقهرت عليج هواية
_ هيج احسن والله .. الحمدلله هاي قسمتي قابل اعترض عليها .. يالله تأخذ الدواء وترتاح شويه
،، ابوها ضلت دموعه بعيونه ولحد المغرب قاست ضغطه جان مرتفع .. نطته علاج وبقت يمه للصبح خافت عليه .. ماعدها غيره بالدنيا…  الصبح طمنت عليه وطلعت تروح للدوام .. تفتح باب السيارة وشافت ملابسها مطشرات بالحديقة .. الضاهر طارق جابهن وذابهن من على السياج .. رجعت تجمع بيهم وتقاوم دموعها تقنع نفسها .. هو مايستاهلها بس هذا عمرها شلون راح تگضي .. تدعي من الله يطول عمر ابوها والا من بعده هي تصفه بالشارع متأكدة من اخوتها يبيعون البيت بعده .. ولا تتأمل تتزوج من جديد .. منو يأخذ وحده عقيم .. ولا هي تأمن برجل من جديد .. اذا كل سنين العشرة وغدرها
،، حسبي الله ونعم الوكيل بيك يا طارق ،،

مؤلم ايضاً هو شعورك بأنك لوحدك بهذه الدنيا .. تقاوم امواجها العاتية وتتوقع الغرق بأي لحظة ..
وليس لك أمل .. بمد حبل نجاة لك .. ليس لك سوى الله .. هو حسبك ونعم الوكيل

رأيكم مهم
لا تنسون الضغط على نجمة 🌟 التصويت please 😍