مفيوزية في قلب الحدث

الجزء 20

عماد هاز الفردي على ادريس، و سارة عند راسها هازة الفردي على عماد، شافت فالفردي، و ادريس ضرب وجهو بحسرة من الغباء ديالها فهاد اللحظة حيت هازة الفردي بالمقلوب و موجهاه جيهتها، عاد عاقت و قاداتو
سارة: نزل الفردي ولا نتيري
عماد: وريني علاش قادة
ادريس مصاب ما يقول، بغا يقول ليها نزلي الفردي ولكن عارف بلي عماد غيغدرهم و غيولي قاتلهم بجوج
سارة: نزل الفردي حسن ليك
و مع الخلعة ولا الفردي كيتزعزع ليها فايدها، ووعماد تبسم كيستفزها
عماد:راك مقادا على والو فيك غير الهضرة
سارة (غمضات عينيها و زيرات على الفردي): و الله تا نتيري
عماد: يالاه بداي، ولا بغيتي نعونك
كانت اصلا سارة كتعصر فراسها باش تقدر ضربو، ولكن ملي سمعات صوت الطوموبيلات ديال البوليس خرجات الرصاصة بلا مشاوراتها، و المسخوطة جات لعماد ديريكت فالعنق، و معودش الهضرة طاح بموتو... البوليس مجاوش غير لالله في سبيل الله، ادريس ملي قال لسارة الله يرحمك و بلابلا مشا عيط لواحد صاحبو بوليسي غيعود ليه الاساسي من هادشي باش يامنو حماية لسارة، و ملي دار شاف عماد حتا دخلها لوطو، هز هوا لوطو لي جات بيها سارة و لي مولاها مشا ديكلارا بلي تشفرات و تبعهم، و صاحبو بطبعت الحال دار الجبس و تبعهم مع فرقة... طيحات الفردي مشي حيت مخلوعة لي قتلات عماد، هي من الاصل كانت كتمنا النهار لي غتهز فردي و تقتل شي واحد، ولكن مشي بهاد الطريقة، مشي فهاد الوضع... تحرك ادريس هز الفردي من الارض و جرها لعندو
ادريس: سارة مالكي
سارة: انا قتلتو
كانت بحالا ممتيقاش انها دارتها، يمكن هادشي مكانش ساهل كيفما كانت كتوقع، عمرها تخيلات ان المنضر ديال شخص كتقتلو بايدها غيكون بهاد البشاعة...
ادريس: نتي مقتلتي حتا واحد سمعتيني
يالاه غتهز فيه عينيها، وقفو عليهم البوليس هازين السلاح عليهم، و مشاو شدوهم بجوج و غطاو جثة عماد...
دخل عادل على سارة للحبس و برك قدامها
عادل: يالاه نمشيو اسارة
سارة (باقا ساهية خزات فيه عينيها): فين غنمشيو
عادل: ادريس عتارف بلي هوا لي قتل عماد و نتي غير كنت معاه، مبقا عندك ما ديري هنا
سارة (بصدمة): شنو، واش من نيتو هدا، انا لي قتلت...
سد ليها عادل فمها
عادل: نرجعو للدار و ندويو
سارة: لا بابا مغديش دارهاكدا، هوا مدار والو...
خرجها عادل بزز و داها للدار، و ادريس بارك قدام البوليس ببرود
الكوميسير: كيفاش قتلتيه
ادريس: كان هاز الفردي باغي يقتلني بيه، خفلتو و خديت الفردي رجعت بلور و ضربتو
الكوميسير: و علاش
ادريس: كنت كندافع على نفسي واش مواضحاش
الكوميسير: اش كنتو كديرو تما فهاداك الوقت
ادريس: هوا كان خاطف سارة و...
الكوميسير: و اش كتجيك سارة
ادريس: خدامة عندي
الكوميسير: صافي
ادريس (تنيرفا): علاش هاد الاسئلة، ياك القتل و عتارفت بلي انا لي قتلتو اش خاص من بعد
الكوميسير: مترفعش صوتك هنا حنا لي كندويو و نتا كتجوب و تسكت
خالد حتا هاذ الخطة مصدقاتش كيفما نواها، ولكن على كل حال تهنا من عماد، و عادل ولاو عندو مشاكل فالخدما، دكشي علاش خلا القضية لمحامي و مشا هوا لخدمتو... بركات فالدار كتخمم فهادشي لي طاح ليها على راسها، حتا صونا تلفونها، و كان فهد لي معيط، و الوقت معطل هادي 00:02
سارة: الو وي فهد
فهد: ختي سارة، واش عندك شي خبار على الشاف، راه هادي 3 ايام مبان ليه اثار من نهار خديتي الموطور و خرجتي
سارة: فهد عافاك قابل المحل راه غير مشكل صغير و نحلوه نشاءلله
فهد: معجبنيش صوتك اش طاري ا سارة
سارة: لا والو ا فهد غير عافاك قابل الخدمة
قطعات عليه قبل ما يزيد الهضرة، و حطات راسها بين ايديها كتفكر حتا فدنيا و رباب لي كان هوا لي كيعيلهم اش غدير دابا...
ستدعاها الكوميسير باش يحقق معاها فالقدية و ياخد اقوالها... مشات معاها فتيحة و امنية ولكن بقاو برا حيت خاصها دخل بوحدها... دخلات و بان ليها ادريس بارك و حداه الكوميسير، و مشات بكل هدوء بركات قدام ادريس و شافت فيه كتمناه غير يشوف فيها مي والو هي لي مدارهاش
الكوميسير: تقدري تقولي لينا اش طرا
بقات سارة ساكتة، و ادريس مشافش فيها
ادريس (ببرود): ياك انا قلت ليكم و اعتارفت لاش جيبينها
سارة: مشي هوا لي قتل عماد
ادريس (غوت حتا قفزها): سارة متبقايش تكدبي
سارة (كتغوت): انا مكنكدبش نتا مقتلتيهش
ادريس: سارة سكتي
الكوميسير (ضرب فالبيرو): اش هاد الفوضى ديرين ليا هنا، سارة دوي طلقي داكشي لي عندك
خرج فيها ادريس عينو و وحلات ليها الهضرة، و حدات عينها باش متشوفش فيه... ولكن ايدو لي شدات ليها من ايدها حبسات ليها الهضرة فحلقها
سارة: كان عماد باغي يقتلني...
الكوميسير: اهاه كملي
سارة: و ملي جا ادريس باش يعوني بغا يقتلو حتا هوا
الكوميسير: دكشي علاش قتلتوه
سارة (هزات عينها و غوتات عليه): كان خاصنا نحميو ريوسنا، نتا مشفتيش انه هوا لي جيب الفردي، حنا غير حيدناه ليه
الكوميسير: و شكون لي تيرا، واش ادريس ولا... نتي
زير ليها ادريس على ايدها، و بقات ساكتة
ادريس: انا لي تيريت
الكوميسير: مدويتش معاك خليها دوي
سارة:..