ومَا نحن سِوى أرواحٌ عابرة نسير في متاهاتِ القدر ويوماً مَا سيختفي أثرَنا فَكن لطيفاً فَالدنيَا زائِلة
كان الموت قليل جدا ف السنوات الماضيه مافي موت الا بعد مده طويله
مش كيف تو ف اليوم يموتوا العشرات من الناس كثرث الحروب والحوادث والأمراض بدا الكل يسمعوا بحد مات يترحموا عليه عاادي ولا كأنه انسان زمان يلي يموت الكل يوجعهم وخصوصا لو صغير ف السن
كلمه مات او توفى ماتشعر بيها الا لو سمعتها ف احد اقاربك💔
اول ماسمعت هالكلمه لحد نعرفه كان خالي لله يرحمه 💔 مات بجلطه وكان عنده بنت بس
وللاسف كان المفترض نديرو عرس لخالي الثاني ف نفس الاسبوع مرض خالي يوم الاثنين ومات يوم الخميس يلي كان مفروض عرس بس انقلب لعزاء💔 موقف صعب صعب جدا
..
لكن جرعات الموت اصعب كلما يكون الإنسان اقرب ليك 💔
#وفاة اخي الاول لله يرحمه💔
كانت حياتنا هادية وعايلتنا مكتمله مافي فقد ولا موت
ف 2011 صارت الثورة
وصارت الحروب
وصار الموت ف كل مكان
مش رح نتكلم بالتفصيل لأن كلا ورايه ف الموضوع ومانبيش نفتح جروح الناس
ف نهاية شهر 4 صار قصف عنييف جدا ع مدينتي (الزنتان) قصف بالجراد من جهتين الشرقية والشمالية وسقطت صواريخ ف وسط المدينه .. اطر اغلب العايلات يهربوا ويطلعوا لتونس او يمشوا لأماكن بعيده
واحنا اطرينا كباقي العائلات نهربوا من الموت 💔 ونلجؤو لتونس مذلولين ومهجرين من مساكننا لان ماعندنا مكان امن نمشوله
كنا نضمو ف دبشنا باش نطلعو وكان هو مقعمز ..وانا واختي نبكو مانبوش نمشو ونكلموا فيه
وهو يقول اقعدو انا نحميكم .. لكن بويا عارض وقال خلاص ولي امركم هو المسؤول عليكم
شفتله وانا نضم ف دبشي كان يشوف بعيد ومايبيش يحط عينه ف عيونا
لاحظت دموع محبوسه ف عيونه استغربت هالشي قعدت نشوفلها هلبااااا وكأني خايفه معش نشوفه
طلعنا بعدها والقصف فوق رؤوسنا ومشينا لحوش جدتي وهو لحقنا ع رجليه ولما حركت السيارة قعد ماد ايده ويودع فينا وامي تقوله (استودعك لله ) لين مشت السيارة وانا نشوفلها
مع ان هذاك الوقت مش غير هو قعد ... خوتي كلهم قعدو رفعنا بس الصغار حتى خوي يلي اصغر مني هرب منا وماباش يمشي
لكن حسينا كلنا ان هو بيصيرله شيء 💔
ف الطريق كنا نسمعوا ف الضرب وخايفين تجينا قذيفه ولا نطلعوا من ليبيا معش نرجعوا 💔
وصلنا للبوابه ف الليل ودخلنا لتونس وبتنا ف المخيمات
مانبي نحكي ع المآساء يلي عشناها غادي ولا لي خاطر نذكرها
طلعنا ف بداية شهر 5 وروحنا ف شهر 7
وخوي مات ف شهر 6 💔
واحنا غادي ف تونس وقلوبنا ف ليبيا 💔
مرت علينا ليالي وايام نفوتوا فيها كلها بكاء ودموع وخوف وحزن و و و ..الخ
ونفسياتنا تعبت واااجد من جهه بلادنا ومن جهه شبابنا 💔 وماكان موسينا ف غربتنا الا تجمعنا كم عائله ف حوش واحد
