رواية شاهيستا

رواية شاهيستا 1

البارت الاول…

#بقلمي_شمس
#قصص_عراقية_حقيقية

هناك غيمة في حياتي .. سوداء مظلمة كئيبة .. مرت يوما ما على احلامي وماضي ومستقبلي ..

اسمي شاهيستا معناه الورده ناصعة البياض .. لكن حياتي سوداء…
اني من عائله متحرره بيتنا بالمنصور .. هسا عبالكم طاگين بس حالتنا متوسطه ..
بابا مدير مدرسه .. وماما مدرسه..
بابا كان مدرس بثانويه وماما كانت طالبه عنده هي كرديه وحلوه حبها وتعلق بيها ..
خطبها كم مره اهلها مانطوها الى ان خلصت سادس ودخلت كليه ..
نفذ طلباتهم كولها يله وافقوا ..
بعدها اهلها رجعوا الكردستان .. وماما بقت وي بابا ببغداد ..(بقلمي شمس)
ماما مصار عندها اطفال ..
كم سنه وتالي سوت اطفال انابيب . 
ولدتنا اني واختي بسنت ..
احنا توأم غير متماثل ..
اني اسم ع مسمى ناصعه البياض .. ع ماما
واختي بسنت حلوه بس جمالها بغدادي حنطاويه عيون 👀 كبار عسليه ..
معنى اسمها الزهره ذات الرائحه الجميله والجذابه
وهي صدوگ جميله ..
بس رغم الجمال والجسم الي نمتلكه ماعندنا حظ ..

ماما نطتنا الحريه بكل شي ..
كانت ماتمنعنا من الطلعه .. حتى حجاب مانلبس ..
وبابا صحيح عصبي . بس حنون
تارك تربيتنا الماما وميخلفلها امر ع گد حبه الها ..
ماما تحب الحديقه وكانت دايما تزرع زهور ..
زرعت ورد ابيض ناصع وسمته شاهيستا ع اسمي ..
وورد جوري وورد ريحته تخبل وسمته بسنت ..

حب ماما النا مو طبيعي وماترفض اي طلب النا ..
وهذا الي خلانه نوگع بالخطأ .. او نثق بالناس بسرعه
من غير حساب وتفكير ..
عبالنا الناس كولها صادقه مثلنا ..
رغم كولشي بس ماعرفنا الخيانه والكذب
كنا ع نياتنه وهذا سبب استغلال جنس آدم بالذات النا ..

نسيت اگلكم اني وبسنت حاليا ثالث كليه ..
بس هي تربية انگليزي .
واني علوم حاسبات .. #بقلمي_شمس

من كنا بالسادس اعدادي كنت داخله .. دورات تقويه
ردت اعبر الشارع .. واجه ولد عنده راكب سياره اخر موديل وحلو ووسيم ..
راد يدعمني بس طخني شويه ..
اني وگعت نزل .. واعتذر
وگلي بيج شي اخذج للمستشفى.. 
شاهيستا .. لا مبيه شي مشكور ..
الولد گلي .. هاج هذا كارتي .. اذا حسيتي بيج شي .
اتصلوا ع هذا الرقم واني حاظر الاي شي ..
اعتذر مره لخ .. وحلفت اله گوتله مبيه شي وگمت بس الم برجلي لان طخني شويه ..
گدرت اگوم ..

گال اوصلج .. گتله هذا المعهد مالتي حدخل ميحتاج توصلني ..
گال سلامتج وركب سيارته ومشى .

…… مرحبا اسمي رامي بيتنا بالكراده وعندنا محلات بمول هادي سنتر  .. حالتنا الماديه جيده ..
عندي اخو اسمه رعد اكبر مني ومتزوج .. بس ساكنين وحدهم ولسا مصار عندهم طفل ..
وعندي اخت وحده اصغر مني اسمها ريما ..

عندي بيت عمي بالمنصور .. وولد عمي هناك دايما اروح يمهم .
اني ووالدي واخويه رعد نشتغل بالمحلات وقت فراغي اروح للمنصور اغير جو يم بيت عمي ..
علاقتي بولد عمي قويه وخاصه وليد ..(شمس) من احنا صغار تربينا سويه ..
مثل الاخوة ..
بيوم رحت الهم ومرت بنيه .. حاولت اوگف بسرعه والحمد لله مااتأذت بس طخيت رجلها شويه ..
وخفت ليصير بيها شي .. نطيتها كارت المحل
حاولت اخذها للمستشفى مقبلت ..
بس هي سبحان الخالق شنو البياض وسافره وحتى حجاب ملابسه ..
واني من النوع البنيه الي تعجبني لازم .. اسوي علاقه وياها متحرر وميهمني شي ..
مااطول وي البنيه شهر واتركها ..
وهاي البنيه دخلت عقلي .. وعرفت تداوم بمعهد دورات تقويه يعني سادس اعدادي ..
عندي اختي ريما بگدها هم تدرس سادس ..
بس اختي محجبه ومستوره ومتربايه مو مثل بنات هذا الوكت كله حصر والشعر نازل ..
يگولن للولد تعالوا باعولي .. وفوگاها يبيعن شرف بروسنا .. #بقلمي_شمس

شاهيستا .. خلصت دورات بسنت كانت ممداومه بيومها لان هي ادبي وداخله بس انگليزي ورياضيات مو مثلي اني علمي ..
دخلت للبيت كالعاده ماما بالحديقه تسقي الورد ..
بوستها ودخلت ..
صاحت ورايه .. شاهي ماما شبيها رجلج اشو متگدرين تمشين ..
شاهيستا .. ماما حادث بسيط بس رجلي دتوجعني
ماما .. ادخلي واني هسا حجي اشوفها ..

لگيت بسنت دا تقرأ .. شافتني طفرت ..
شبيها رجلج ..(شمس)
شاهيستا .. شبيج واحد صاك راد يدعمني .. بس اعتقد دعم گلبي 😂 مو رجلي ..
بسنت .. خرررب رجلها توجعها وتنكت ..
اشو خليني اشوفها .
نزعت البنطرون .. واشوفها قطعه زرگه ..
دخلت ماما تخبلت من شافتها ..
هاي وين ومنو وليش متصلتي علينا ..
اووووه خبصتني بالاسئله ..
ماما لتخافين والله مابيه شي مجرد رض ..
والولد مقصر الح ياخذني للمستشفى ومقبلت ..
جابت ماما مرهم ودلكتها الي ولفتها الي ..
بدلت ملابسي لبست تراك ..
ولزمتني بسنت .. تعالي سولفيلي ع هذا الصاك .

شاهيستا .. لج يخبل صح هو حنطاوي بس وسيم وسيارته تخبل ..
ونطاني كارته .. عنده محلات بمجمع هادي سنتر ..

بسنت .. امممم اموره توووب .
شاهيستا .. لج اني ماادور امور توب وكذا ..
امنيتي احب واحد يحبني مثل ماما وبابا شوفي الفرق بينهم هوايه بابا اكبر منها ب 15 سنه بس يموت عليها وهي بعد تحبه كولش ..

بس ادري ماعندي حظ بالحب .. لج حتى ميس الزرگه اجت اليوم لابسه حلقه .. وتعوج بحلگها وتگول بعد حب سنتين خطبني حبيبي ..( شمس)

بسنت .. لا صدوگ هذي ميس الي بشعبتكم .. وشاف منها
شاهيستا .. اني ادري حظ بابا حظ😂😂
صدوگ اكلج متخلينا ناخذ ماما ونروح لمجمع هادي سنتر بحجه اكو ملابس حلوه هناك ..
بسنت .. متعبر ع ماما .. اكيد هسا تگول المنصور مليان مولات ومتقبل ..

شاهيستا .. نجرب والله كريم ..

اني بيومها رجليه موتتني من الالم اخذت مسكن ونمت وبسنت وماما حضروا العشا ..
گعدوني ع العشا . تعشينا وبابا عصب عليه لأن مااخذت رقم السياره او اتصلت عليه ..

مگلتلهم ع الكارت خفت ..

كانت عطله بس احنا دا نحظر للسادس والدورات من العطله تبدي ..
ثاني بدلت واتأنقت ورفعت شعري .. گلت بلكي اشوف رامي الصاك ..
وفعلا رحت لگيته واگف بباب المعهد وهالمره بسنت وياي .. #شمس
سويت نفسي مشايفته .. بس هو جريئ اجه وتقرب النا
صباح الخير ..
شاهيستا .. صباح النور
رامي .. بقى بالي يمج البارحه شلون صرتي ..
بسنت .. شاهيستا اني داخله للمعهد ..
شاهيستا .. وين رايحه .. ( اووووف تركتني وحدي واني مرتبكه )
رامي .. اسمج شاهيستا غريب اول مره اسمعه ..
شنو معناه ..
شاهيستا .. شكرا ع سؤالك بس لازم امشي حيبدي الدرس بااي ..
رامي .. باي بس .. خرررب تركتني ومشت .. لتخافين اجيبج اجيبج حقج تبعين ثگل اذا شايله هذا الجمال كوله .
بس مو رامي الي يستسلم ..
#بقلمي_شمس
يتبع…