#الكلمات
ياللي بين كل نجمة ونجمه امتى هتحنيلنا
سكننا الليل بالنيكوتين والقهوه يمكن تسمعيلنا
علشان حلاوه الحب واقع بقى الحزن مله
محدش داق حلاوه الحب الا و انضملنا
__________________________
احنا كتير وبنعرف بعض لان عيوننا مبتخبيش
مبنتسألش مالكوا من فراغ لكن بنقول مفيش
احنا التذكره الواحده وسط زحمه الاتنينات
احنا الخميس بتاعنا ميختلفش عن التلات
__________________________
احنا صمت اقوى من الكلام تعبيرا عن صاحبه
احنا اللي بيتزهق منه وبيتقال سيبوه على راحته
اللي بنحسد اللي رافع راسه مع انه هيتكسر
اللي ماشي باصص تحت رجله ويخبط فيك يعتذر
__________________________
ياللي بين كل نجمه ونجمه اوعي تكوني سراب
سكان الليل في الأرض بسببك متشافين أغراب
ياللي بين كل نجمه ونجمه اوعي تخذلينا
محدش فينا اتعلم انه يعوم يا سفينه
__________________________
لعله خير شر حامينا من الأشر
يمكن احسن ركوبه لينا ركوبة المضطر
يمكن قدرنا الاب بتاع بعمل ده لمصلحتكوا
لعله فقد ما نملك لإمتلاك ما نستحقه
__________________________
لعله خير شر حامينا من الأشر
يمكن احسن ركوبه لينا ركوبة المضطر
يمكن قدرنا الاب بتاع بعمل ده لمصلحتكوا
لعله فقد ما نملك لإمتلاك ال نستحقه
__________________________
يا ساكنه الضفه التانيه جايلك مش هتأخر
كل شيء في حياتنا لمقابلتنا كان متسخر
اللي عشته انا و انتي ارض صلبه نبني حياه عليها
علاقتنا غايه الكون بيدور ودار حواليها
__________________________
متفقديش إيمانك بيا ولا تشكي للحظه فيا
لو هضحي بكل حاجه مقابل حاجه ف انتي هي
من ارض الخوف بحدفلك طرف اول خيط يربطنا
بنكلم نفس النجمه في نفس الوقت ودي مش صدفه
__________________________
يا كعبه عيني وعينها بشريها بيا
إلهميها بكونها مش وحيده واللي فيها فيا
إرسميني قصادها في السما وسيبيلها هي الباقي
محدش طارد حلم يقظه اكتر من هوائي
__________________________
