صباح الگاردينا 💕 لأجمل واروع متابعين ..
///البارت الخامس ///
#درب_العشگ🔥
#بقلمي_الكاتبة_شمس
آنه ابن التفگ لوصار وكت الطك
وآنه ابن الكرم لوضيف مر بيه…
ابن البصرة وشط العرب سباح مايغرك
وببحر الشعر يرسن قوافيه…
بمنكار الصگر شديت رجل الرك
لان شفت الصگر عالي بشواطيه…
عذري الهوى صادق إذا اعشگ
وإذا افكر أحب كون الا بصرية….
انة بالعشگ محد يتلاوى وياي ..
ومن اريد احب اخطبها البنية…
أنة صگر البصراااا يلما تعرفوني…..
السلام عليكم
اسمي صگر غالب ال…… محامي مع وقف التنفيذ ..
يعني اشتغل بقضايا الي يوكلني بيها الشيخ وبس ..
ابن شيوخ ابا عن جد . سادة وجدنا رسول الله ..
معروفين بالنخوة والوگفات الحلوه ..
مو غرور . بس افتخار بأهلي واصلي وعمومتي ..
انة من يوم الي جابتني امي .
علمني ابوي ع القوة وخلة گلوبنا خشنه .
ماعرفت الخوف بيوم .
ولا رضخت الاي بشر بساعة ..
احنه اثنين اخوة .. انة واسد اخوي الله يرحمه .. راح من عدنا بساعة غدر ..
ابوي الشيخ . من كبار الشيوخ وماكو مشكلها ماخلها بين العشاير ..
بيوم صارت شغلة فصل .. وابوي تكفل بيها .
وحكم الطرف . والطرف الثاني ماقبل ع الحكم وبقى يتوعد الابوي ويهدد ..
بساعتها ردت اگاومهم واهجم عليهم . لو مالشيخ يگعدني ..
بيوم طلعنا وجان اسد اخوي يسوق ..
وابوي لگدام وعمي وراه واني ورى اسد .
اعترضتنا سيارة وضلت ترمي علينا ..
وجانت بجهتنا ..
اتصوبت اني بكتفي ..
وابوي الحمد لله مابي شي هو وعمي .
بس اسد لگيناه سابح بدمه ..
ابوي گام يصيح .
الحگ اخوك . وليدي راح يابويه ..
اخذناه للمستشفى ماطول ومات ..
انگلبت المستشفى بيومها ..
ابوي بيومها مانزلت دمعته ابد .
ويگلي لاتخلي العدو يتشمت بينا ..
ابجي ببيتك ونوح على اخوك ..
هو يواسيني .. على روحت عضيدي واخوي الوحيد .
واگعد بتوالي الليل الگيه يبجي بصلاة الليل ..
ويهمس بأسم اسد ..
امي من يوم الراح اسد . وهي ماصحت . كل يوم وگعة ومستشفى .
اني عندي اربع اخوات ..
اثنين متزوجات . واثنين لا .
وديناها عند اختي الجبيرة حتى بلكي تبعد وترتاح ..
بيوم . خابرت منى اختي .. گالت الحگ امك ياخوي ..
ركبت بلا وعي واجيت اركض للمستشفى .
همه راحوا قبلنا ..
اتفاجأت بولد عممومتي وراي ..
دخلنا المستشفى جانت نص الليل .
وماكو دكتورة بس دكتور ..
واحنه ماعدنا مرة تنكشف على رجال ..
گلتلهم الا دكتورة تفحصها ..
الدكتور .. اوك اخذوها سوولها تخطيط وتحاليل واني هسا ادز دكتورة تجيكم من فوگ ..
شويه اجت دكتورة ..
بالبداية مااهتميت الشكلها ولا منو هي ..
المهم عندي امي ..
گالت شسمها المريضه ..
گلتلها غنيه ..
رادت تدخل الردهة باوعتلي . وگالت هاي ردهة نسائية مايصير تدخل ..
تعصبت من حجايتها .
ورديتها . گلتلها اعرف حدودي من تشوفيني ادخل يله الج حق تحجين .
