شيطان لابس بالطوا

   • شيطان لابس بالطوا •
الشخصيات - ١٧منهم ٤ أطفال

• د/ رزيق : وهو عالم موجات وترددات
• (يمتلك شخصية ضعيفة وعديمة ولكن معقدة تتغير وتتحول من وقت لآخر)
•
• ا/ شريف : رجل اعمال متغطرس وطماع جدا يطمع في كل شيء
•
• إياد : طفل يمتلك برأه الطفولة يعاني من الوحدة وتقييد حريته
• ( اياد الكبير يمتلك نفس الشخصية الطفولية البريئة )
•
• جانا : طفلة شقية تحب اللعب وكل احلامها ان تفعل مثل ابنت خالها وتصبح عروسة
• (وهكذا جانا الكبيرة سوف تكون بنفس الشخصية ولكن في شكل شابة كبيرة)
•    
• ام اياد : سيدة راقية تحب كل ما هو جديد وتهتم بالموضة والاناقة والتسوق
•  
• ابو اياد : ( طفل يحب اللهو وهو ايضا رجل ثري وميسور الحال .. يظهر بشكل اياد )
•
• ام جانا : سيدة منزل وتبجل الحياة الزوجية والمنزل
•  
• أبو جانا : صاحب مصنع كبير ورجل مبادئ من الدرجة الاولى
•
• الشيطان : كبير شلة الشياطين وهو امكرهم واكثرهم حيلة
• ( يتبعه شيطان١ ٢ ٣ كلا منهم له شخصية مختلفة عن الآخر ولكن كلهم يريدون القيادة)
•
• مسعود : مساعد دكتور رزيق وهو شاب استغلالي و منافق
•
• الطفلين : احدهم يمثل دور دكتور رزيق والآخر استاذ شريف وهما


"خلفية كبيرة بعرض المسرح مرسوم بها مجموعة من الدوائر على شكل دوامات .
ومجموعة كبيرة من الممثلون الاطفال والكبار يعدون المسرح بشكل عشوائي منظم ذهابا وايابا ,, يعبرون بشكل ما او بآخر عن مشاعر الكراهية واحيانا اللامبالاة وعدم الاهتمام لبعضهم البعض ,, ويظهر من بينهم بشكل واضح طفلان يرتدون الزي المدرسي ,, وعندما يتقابلان تقف الصورة تماما ما عدا الطفلان ,, فيقتربان اكثر وينظران الى بعضهما في نظرة كلها تودد ودون أن ينطقا كلمة واحدة ,, ويكتفيان بالنظر ثم يعبر كل منهما الآخر ومن ثم تعود الصورة للحراك مرة أخرى لكي يخلوا المسرح تماما وتتغير الإضاءة فيه الى لون الغروب ثم تعتم الإضاءة بشكل تام , ثم تفتح بؤرة ضوء في احد اركان المسرح "

أم اياد : الله على جمال اياد وعلى حلاوة وطعامة اياد ... معقولة يا خواتي .. معقولة الطعامة دي يا واد انت .. عريس يا ولاد الف مشالله عليه الله اكبر . " اطلقت الام هذه الكلمات على مسامع الولد الذي يبلغ من العمر احدا عشرة عام وهي تضع له اللمسات الاخيرة في زيه القيم عند تجهيزه للخروج في سهرة معها هي وابيه بينما تختفي بؤرة الضوء وتظهر في الجانب الآخر من المسرح على جانا وامها "

جانا : انا عروسة يا ماما !!؟

ام جانا: ايوه ياروح قلب ماما عروسة واحلى عروسة كمان

تتحول البؤرة على اياد وامه
اياد : بجد يا ماما .. يعني انا ها بقى عريس واتجوز البنت اللي بحبها
تتحول البؤرة على جانا وامها
جانا : ويتعملي فرح كبير زي نونا بنت خالوا
تتحول البؤرة على اياد وامه
ام اياد : أيوه يا حبيب قلب ماما ان شاء الله لما تكبر كده وتبقى كبير ها تتجوز أحلى عروسة وأنا اللي ها أزوقك بنفسي كمان

تخرج ام اياد من البؤرة ويبقى اياد وحيدا

اياد : . يعني ايه يا ماما ده .. يعني انا لازم اكبر.. عشان أقدر اشوفها وأكلمها ونقعد نلعب ونجري ونفرح ونبقى سوا .. كنت عايزها تلعب معايا باللعبة الجديدة قبل ما تقدم .. يعني ليه يبقى عندي الالعاب دي كلها وبالعب بيها لوحدي .. ليه برضه الكل
ها يسبني وافضل لوحدي .. حتى لما بيخرجوني معاهم برضه بيسبوني لوحدي .. ليه طيب حد يقولي ليه .. وليه لازم اكبر عشان اعمل الحاجة اللي انا بحبها .. وليه لازم اكبر عشان مبقاش لوحدي
لييييه ... ياااارب عشان خاطري يارب انا نفسي اكبر يارب يارب خليني اكبر يارب .. عشان مبقاش لوحدي

"تظلم الإضاءة بشكل تام ثم تضئ في بؤرة أخرى من المسرح "



جانا: لازم أكبر؟ .. يعني مش ها ينفع دلوقتي أبقى عروسة ...؟
يعني ماما بتضحك عليا وأنا مش عروسة ولا حاجة .


"تأتي بالعروسة اللعبة الخاصة بها والمفضلة لديها"


جانا: قوليلي يا لوسي أنا مش عروسة يا لوسي صح؟

ماما بتقولي لما تكبري يا جانا لما تكبري ... طب هو انا مش اكبر منك يا لوسي ؟... ردي عليا بقى اتكلمي .. شوفتي اهوا انتي كمان مش عارفه تردي عليا ... وانا باعرف اقول كل الكلام .. طيب هما ليه بيقولولك انتي يا عروسة وانا لأ.. حتى ماما بعد ما قالتها رجعت في كلامها تاني .. وقالتلي لما تكبري يا جانا ... ينفع كده يا لوسي ؟
ينفع ؟ ها ؟ ياريتنى كنت زيك يالوسي عشان يقولوا عليا عروسة
انا نفسي اكبر اكتر....  نفسي اوي اكبر وابقى عروسة .
"اظلام"


"مكتبه كبيرة مليئة بالكتب تدخل الصورة + مكتب بكرسي مع وجود الخلفية المسرحية الاساسية للمشهد والتي قد تنم عن تعبير لمعنى المشهد +مجموعة كبيرة من انابيب الاختبار وزجاجات مليئة بمواد ملونة .. يوجد شخص يقف في منتصف المسرح يرتدي بالطوا أسود طويل وقبعة أمريكية ويقف بظهره بدون حراك .... يدخل رجل آخر يرتدي نفس البالطو وتبدو ملامح الغطرسة على وجه وهو رجل الاعمال  "شريف الشاطر "بينما يقف هو والرجل الآخر في ظهر بعضهما وكأنهما وجهان لعملة واحده .. بعدها يدخل "د/رزيق" وهو رجل يبدو بشخصية ضعيفة ومعدومة وتظهر عليه علامات الاهمال الشخصي ومن ثم يضئ المسرح "



المشهد الاول


د/رزيق : أيوه يا شريف باشا أنا تحت أمرك

شريف : كنت فين واتأخرت ليه ؟

د/رزيق : ك . كو . كنت في الحمام

شريف: بتعمل ايه في الحمام

"تجحظ عينا د/رزيق ويحمر خجلا ولا يستطيع التحدث غير بالهمهمة ويقطعه شريف في حزم "

شريف : كنت بتعمل زي الناس

د/رزيق : ااايوه ككنت باعمل زي الناس

شريف : غبي يا د/رزيق طول عمرك وانت غبي

د/رزيق: أنا غبي ؟! أه انا عارف ان ان اااا انا غبي للل لكن ليه ؟

شريف: لانه مش من المفروض انك تعمل زي بقيت الناس , وما ينفعش تقول انك بتعمل زي الناس وما ينفعش أصلا انك تكون زي بقيت الناس

د/ رزيق: يعني أعمل ايه تقصد !! … قصدك اني أعملها وانا واقف زي الحيوانات ؟؟!!

شريف : هههههههه … مش بقولك غبي طووول عمرك غبي فاكر زمان يا دكتور رزيق فاكر هههههههه فاكر كنت باعمل ايه فيك



"يسرح د/رزيق بخياله وتعتم  المسرح وتفتح بؤرة ضوء في احد أركان المسرح  وبها طفل ضخم وهو شريف عندما كان صغيرا وطفل آخر نحيف وضعيف وهو د/ رزيق في وقت صغره "


شريف:خود يا ولد ياللي اسمك رزيق تعالى هنا

رزيق : أيوه يا شريف

شريف : اسمها ايوه يا شريف باشا يا حقير انت

رزيق : ايوه يا شريف باشا

شريف : أيوه كده برافوا عليك , قولي بقى غسلت أسنانك النهارده ولا ما غسلتهاش ؟؟

رزيق: ايوه انا غسلتها وبالمعجون كمان

شريف: كويس جدا , واكيد جايب سندوتشات معاك وعايز تاكلها

رزيق: أه .. ماما عملتلي ساندوتشات بلانشون وجبنة
شريف : عظيم جدا وطبعا سيادتك ها تاكل السندوتشات دي زي الاهبل
رزيق/ اه بس ليه اهبل يا شريف باشا؟!

شريف : لانك اهبل ما ينفعش تاكل سندوتشات بعد ما تغسل سنانك يا غبي انت .. كده التسوس يدمرلك سنانك .. السندوتشات دي لازم تتعدم .. روح بسرعة هاتهم وأنا ها تصرف في الموضوع ده بنفسي



"يذهب رزيق بسرعة ثم تخفت الاضاءة وتفتح بؤرة أخرى في المسرح على شريف ود/رزيق وهم كبار "

د/رزيق : أهم خد بقى انت اتصرف وخلصني من المشكلة دي

شريف " يهم بأكل السندوتشات "  برافوا يا د/رزيق

د/ رزيق: يااااااااه الحمد لله خلصتني من الكارسة اللي كنت هاقع فيها دي .. اسناني كانت ها تدمر من التسوس

شريف: شوفت قد ايه أنا كنت بخاف وأحافظ عليك وده لأنك غبي واهبل ومش فاهم أي حاجة يا عبيط

د/رزيق : شكرا شكرا .. انا من غيرك ممووش عارف كنت ها اعمل ايه

شريف: ها .. قولي بقى وصلت لفين في الاختراع بتاعنا .. ما تنساش أنا فاتحلك القسم ده مخصوص ليك انت لوحدك عشان تعمل فيه اختراعنا ده .... وما تنساش برضه اني رجل اعمال والوقت عندي يساوي الدهب ودي مستشفى استسماري يعني لازم تكسبني قصاد ده كله

تعتم الاضاءة وتفتح بؤرة على رزيق وشريف

د/ رزيق: اشكرك جدا يا شريف باشا لانك دايما بتقف جنبي
انا فعلا قربت اخلص قربت جدا واول ما اخلص هاعطي لحضرتك اشارة اني خلصت وتقدر حضرتك تنشر الاعلان ده على كل القنوات وبكده انا على استعداد تام اني اؤكد لك إن الاختراع ده ها يعملك سابقة اقتصادية رهيبة جدا .. مش ممكن تتخيلها ابدا ..
شريف: عظيم جدا خليني أقرأ الاعلام ده كده



د/ رزيق : لا .. هو اسمه اعلان يا فندم

شريف : اعلان .. اعلام ... ياسيدي اهوا كله  زن على الودان مش فارقة كتير .. المهم اختراعنا يظهر للنور .. اختراع  " ماجي موجي"


{تفتح بؤرة ضوء في احد اركان المسرح تدخل فيها فتاه وتفتح موسبقى "منامنا" وتردد هي كلمة "ماجي موجي بطريقة منامنا " ومن ثم تبدأ الكلام بعد انتهاء العرض ومن ثم تفتح اضاءة المسرح.. ويبدوا ان دكتور رزيق وشريف منهمكين في تحضير شئ ما

الفتاه : ماجي موجي طبعا كلنا بنسأل ايه هو الماجي موجي ده
انا ارد عليكم بإختصار ده الحلم اللي كنا كلنا بنحلم بيه أي حلم حلمنا بيه او حتى كنا بنفكر فيه ها نحققه النهارده مع ماجي موجي .. عايز تكبر وتعدي بسرعة مرحلة الطفولة الصعبة المقرفة دي ؟
مع ماجي موجي ها تقدر .. عايز تصغر وترجع تاني لايام الطفولة البريئة الجميلة مع ماجي موجي ها تقدر
قرفان من ريحة عرقك كا راجل ونفسك تتحول بنت ...مع ماجي موجي هاتقدر ....قرفانة من تسلط الرجالة عليكي كأنثى ونفسك تبقى مسيطرة زي الرجالة ....مع ماجي موجي تقدري تتحولي راجل في ثواني بدون اي عمليات جراحية ولا مخاطر صحية وكل ده تقدر تحققه مع ما جي موجي ..
ودلوقتي لينا لقاء هام وحصري مع د/ رزيق صاحب هذا الاختراع العظيم جدا جدا جدا ماجي موجي

{تذهب اليه المذيعة على مكتبه الممتلئ بالزجاجات الموضوعة على المكتب وأنابيب الاختبار والدكتور رزيق منشغل بها ويضع بعض المحاليل على بعضها البعض فيفور احدهم ليحدث دخان كثيف ومن ثم فرقعة ومن ثم يبدأ الدكتور رزيق بالسعال والمذيعة ايضا }


د/رزيق : كح كح اهلا وسهلا ...  اه اهلا وسهلا

الفتاه : واضح يا جماعة ان دكتور رزيق منهمك جدا في عمله
هنحاول نكلم الاستاذ شريف رجل الاعمال المشهور اللي اتبني الاختراع العظيم ده ... ممكن ناخد من وقت حضرتك الثمين دقايق يا فندم ؟

شريف : ايوه يا فندم عادي جدا  اتفضلي

الفتاه : حضرتك تقدر تتكلم معانا عن الاختراع ده شوية وتقولنا هو عبارة عن ايه ؟

شريف: ده يا فندم اختراع عظيم جدا ما حصلش في تاريخ البشرية
ممكن من خلاله اي حد نفسه في حاجة بيعملها واحدة شكلها وحش بنخليها ملكة جمال .. الاطفال اللي نفسهم يبقوا شباب بنكبرهم والكباربرضه اللي نفسهم يرجعوا عيال او شباب بنصغرهم

الفتاه : يعني يا فندم ده في مراحل عمرية معينة

شريف : لا يافندم ده في اي مرحلة عادي جدا جدا جدا جدا هههههههه
اي شخص يدخل الجهاز يخرج زي ما هو عايز من النحية التانية  هههههههه

الفتاه : فعلا ده شئ مزهل جدا يا فندم واهو الدكتور رزيق  الحمد لله رجعلنا بالسلامة ولازم نسأله ازاي يا فندم الجهاز ده بيشتغل ازاي بيقدر يعمل ده كله



د/ رزيق : في الحقيقة يا فندم هي مسئلة معقدة شوية بس انا ها اشرحها لحضرتك بطريقة بسيطة شوية
يعني مثلا في مثال انه في طفل عنده ١٠ سنين وعايز يكبر بيدخل الجهاز يخرج منه كأ نه اكل ٣٠٠٠ كيلو كفته

الفتاه : كفته الله دي حاجة حلوة اوي طيب يا فندم ولو هو كبير وعايز يصغر بنعمل ايه ؟؟

د/ رزيق : بنطفحه الكفته اللي كالها

الفتاه: رائع جدا يا دكتور ده اختراع جميل جدا واكيد بيقدر يعمل حاجات تانية كتير يعني مثلا ممكن يعالج النمش وحب الشباب والهالات السودة اللي تحت العين ويفتح البشرة ؟

د/رزيق : يقدر يا فندم يعمل كل حاجة بتحلمي بيها واهم شئ انه آمن جدا وها يحسسك بالآمان التام من خلال استخدامه

الفتاه : رائع جدا يا فندم حضرتك فعلا لازم تاخد جايزة نوبل على الاختراع ده حضرتك فعلا ها تخدم البشرية كلها من خلال الاختراع ده وانا هاكون اول زبونة عندك استخدم الاختراع ده

د/رزيق : نتشرف جدا يا فندم

شريف : ايوه بس ها تدفعي الاول

الفتاه : احم احم طبعا يا فندم ..  ووويييي  وفي النهاية بنشكر الاستاذ شريف ودكتور رزيق على الاختراع العظيم ده اللي فعلا لازم تجربوه بنفسكم ما جي موجي

{ثم تخرج الموديل بنفس طريقة الدخول على صوت موسيقى منامنا وهي تردد ماجي موجي بدل منامنا ... كل هذا ومشهد الاعلان يشاهده الطفلان الواقفان أمام الجمهور و  اسفل المسرح وعند انتهاء مشهد الاعلان تظلم اضاءة المسرح وتفتح مرة اخرى بؤرة ضوء حمراء على الشيطان الواقف بوجه هذه المرة والذي كان بدوره واسناء حديث  شريف مع دكتور رزيق يأتي ويهمهم له بكلمات ليست مفهومة بعض الشيء ومن ثم يصعد الطفلان على المسرح ليقوم الشيطان بالوسوسة لهم في مشهد دراما حركية يحكي انهم يريدون التضحية بأي شيء من اجل كثر الحاجز الذي يفصل بينهم  }


المشهد الثاني

{تفتح الإضاءة على دكتور رزيق وهو جالس على مكتبه ويبدوا أنه منهمك في بعض الأمور والشيطان يتحرك في المكان ويبدوا انه قد داعى بعض اصدقائه للحديث }

الشيطان : منورين يا ولاد الابلسة 😂

شيطان ١ : قصدك تقول مولعينها يا ولاد الابلسة 😂

شيطان ٢ : بتضحك على ايه يا ابن البايخة ... قلشك كله بايخ زي امك

شيطان ٣ : متحدث مع الشيطان ما تخدش بالك منهم يا بوب وقولي وصلت لفين يا كبير



الشيطان : مش لما تقولي الاول انت خليت كام واحد النهارده مات كافر يا فالح

شيطان ٣ : ٤ يا بوب  الدور عليك انت .. ما تقول يا بوب ولا مكسوف

شيطان ١: 😂  البوب خايف على نفسه من الحسد عارف انه عنينا بتطق شرار 😂😂


شيطان ٢ : يخربيت قلشك الرخيص ... مبسوط كده يا بوب خليت اللي يسوى واللي ما يسواش يتريق عليك .. ها تفضل قاعد عاطل كده لامتى ها ... فين الناس اللي بتموت على الكفر اللي انت بنفسك راهنتنا وقولت انك ها تخلي فوق المليون انسي يموتوا كفار ... كنت بتشتغلنا ولا ايه يا بوب

الشيطان : واضح انكم نسيتم انا قولت ايه بالظبط ... وعلى العموم انا ها فكركم تاني ... انا قولت بعد شهر ها يموت فوق المليون انسي على الكفر ... ومن دلوقتي قدامكم اسبوعين بالعدد وها تشوفوا بنفسكم اللي ها يحصل

شيطان ٣ : مع اني مش مصدقك يا بوب ومع اني عايز اخد مكانك دلوقتي مش بعدين وابقى انا البوب بس انا ها خليني مع الكداب لحد باب النار .. عشان ابقى قد الرهان اللي اتراهنا عليه

شيطان١.. اكتر واحد فينا ها يخلي ناس تموت على الكفر هو اللي هايبقى البوب . ... حتى لو كنت انا   { في حين كان يقولها في جدية هذه المرة  .. ضحك جميع الشياطين ضحكات مدوية  ... وخرجوا يجرون خلف شيطان ١ يريدون ان يلحقوا به الاذى  ومن ثم يبقى الشيطان على المسرح مع الدكتور رزيق }


د/رزيق : دلوقتي كده تبقى العقاقير جاهزة للشغل ..  يا سلام عليك ياض يا رزيق يا ابو التفانين يا جامد ... يا مسعووود .. يااا مسعود

مسعود : إيه في إيه مااالك انت بتنادي عليا من بلد تانية ما تهدى شوية علينا كده وقول هديت

د/ رزيق : أقول ايه يا فندم ؟؟؟

مسعود : تقول عايز ايه وتخلصنا

د/ رزيق : الاستاذ شريف مجاش لسه ؟

مسعود : يعني انت عمال تندهلي بطريقتك الغريبة دي اللي عاملة زي بياع بطاطس اهبل عشان تقولي الاستاذ شريف لسه مجاش  .. صبرني يااارب الصبر على البلوة عبادة
اهوا لولا انه الاستاذ شريف مكلفني اني افضل معاك واحترمك واعملك بكل ادب واعملك اللي انت عايزه انا كان بقالي معاك تصرف تصرف تاني خالص .

د/ رزيق : لا في الحقيقة انا كنت هسألك سؤال تاني

مسعود : هو لسه في اسئلة تانية .... استغفر الله ... اسأل يا اخويا

د/ رزيق : هو في ناس ابتدت تيجي بره في الريسبشن

مسعود : ايه ؟...ربيكشن !! .. هو في ناس كتير بره بس لسه ما حدش فيهم دخل الربيكشن ده .. ولو انت عايز تدخل حد البتاع ده تعالى دخله انت .. انا ماليش في السفالة وقلة الادب دي  .. اه .. استغفر الله

د/ رزيق : بفرحة شديدة يعني في ناس كتير بره

مسعود : يقترب منه وينظر اليه بتمعن ... انت اهبل ياله ما قولتلك في ناس كتير بره .. خلصنا بقى واخلص في يومك اللي مش معدي ده
لاحسن الوشك وربنا .. { يقطع صوت مسعود شريف مناديا باسم مسعود بينما تتحول شخصية مسعود من شخص جبار لشخص ضعيف ومطيع  }

مسعود : ايوه يا باشا امرك

شريف : تعالى هنا ... { تبدوا علامات الشر على وجه ويبتسم دكتور رزيق ابتسامة تشفي }

د/ رزيق : أحسن تستاهل يا مفتري يا ظالم  .. بصوت خفيض

شريف : الناس بدأت تزيد برا .. ركز معايا في اللي هاقوله كويس .. انت ها تقعد بره على الجهاز وتدي لكل واحد رقم .. وهما كل ما يسمعوا رقمهم ها يدخلوا على هنا .. اوعى توقف حد فيهم ولا تكلمه

مسعود : كنت بقولك يعني يا باشا اييي..

شريف : قول يا مسعود ما تخافش

مسعود : كنت عايز اخد من كل واحد عشين كنيه وهو داخل يعني

شريف : تعجبني .. بس انا ها اخد نص اللي ها تلمه ... وخلي بالك مش ها تعرف تلعب بالعدد .. كله متسجل على الكمبيوتر  وانا ها راجع العدد بنفسي

مسعود : حاضر .. حاضر يا شريف باشا   { يذهب الى الخارج وهو يهمهم }  يخربيت الطمع النص يا ابن الظالمة

شريف : بتقول حاجة يا مسعود

مسعود : لا ابدا يا باشا .. دانا بقول ياااااه الطرقة ضالمة

شريف : خلاص ابقى ركب فيها لمبة... من نصيبك  اللي ها تاخدها من الناس

مسعود : باشا اوامرك .. لا انا لازم امشي من هنا قبل ما اطلع مديون

} يذهب مسعود مسرعا وتظهر علامات الرضا والتشفي على دكتور رزيق .  }

شريف : ها يا دكتور رزيق ها ترفع راسنا ولا ايه ؟ الناس بدأت تزيد اوي  برا

د / رزيق : ما تقلقش خالص يا استاذ شريف وعشان حضرتك تطمن انت اول حد ها يجرب الجهاز اتفضل اشرب ده وانا ها دخلك على الجهاز وها تشوف بنفسك رجلك المصابة دي ها ترجع سليمة ١٠٠ %

شريف : انت بتتكلم جد .. لا دا انا لازم اجرب هات البتاع ده

{ يهم شريف بشرب بعض العقاقير ويدخل على الجهاز ويخرج منه وبالفعل قدمه قد شفيت تماما }

شريف : ايه ده .. ده بجد انا بامشي كويس مش مصدق نفسي .. انت فعلا عبقري يا دكتور رزيق ..

د/ رزيق : مش قولتلك يا شريف باشا ما حدش من هنا ورايح ها يبقى ناقصه حاجة .. الجهاز ده هايكون ثورة في عالم الطب والعلاج .. و .... يقطعه شريف

شريف : يتحرق الطب والعلاج واللي عايز يتعالج انا كل اللي يهمني الفلوس .. الفلوس وبس وبدام انا رجلي بقت سليمة يتحرق الكل .. { يجري مثل المجنون ويحضر ماكينة من حقيبته ويعطيها لرزيق }

شريف: امسك يا رزيق .. اي شخص ها يدخلك دلوقتي تخليه يدفع الاول على ATM   دي وبعدين ... (يدخل شريف في غيبوبة وكأن شيئا ما سيطر على عقله )لا ما تعملش اللي قولتلك عليه ده .. اعمل اللي انت عايزه يا دكتور رزيق .. احنا كلنا تحت امرك ...

د/ رزيق : أيوه كده يا راجل اخيرا .. دا انا مستني الحظة دي من زمان .. يلا بقى اخرج دلوقتي وادي امر لمسعود انه يدخل الناس اللي بره واحد واحد ...
شريف : أمرك .. امرك يادكتور رزيق .. احنا كلنا تحت امرك
{ يخرج شريف بينما يجلس رزيق على مكتبه ويدخل اول زبون وهو اياد }

د/ رزيق : بدأت بالعيال .. اهلا وسهلا اتفضل يا حبيبي اسمك ايه

اياد: اسمي اياد على

د/ رزيق : عاشت الاسامي يا اياد مشكلتك ايه بقى

اياد : انا ما عنديش مشكلة يا دكتور بس نفسي اكبر هو ده كل اللي انا عايزه لاني لو كبرت ها اقدر اعمل كل حاجة انا عايزها

د/ رزيق : وايه اكتر حاجة انت عايزها يا اياد

اياد : نفسي احقق حلمي واتجوز البنت اللي بحبها وابقى عريس وهي تبقى عروستي ونفضل نجري ونلعب سوا زي ما احنا عايزين واقعد اتكلم معاها زي ما انا عايز واقعد احكيلها عن كل حاجه ونعيش انا وهي في سلام وامان نفسي اوي اسعدها يا دكتور

د/ رزيق : طيب يا اياد انا هاحققلك  حلمك اللي نفسك تعمله ... وكمان من غير مقابل
تمام كده اتبسط بقى ما تزعلش كده ...خد اشرب ده ويللا عشان نبتدي .

{ يشرب اياد المحلول .. ومن ثم يدخله رزيق في الجهاز ويتم تنفيذ مشهد دراما حركية يحكي عن مدى بشاعة اختلاف المرحلة العمرية وكسر البرائة في شكل صراع نفسي عميق }

المشهد الثالث

{ طفل يجلس على كرسي ويبدو أنه يشبه اياد كثيرا .. نعم هو اياد ولكن هذه المرة لا يقوم بدور اياد ولكنه أبو اياد بعد ان اجرى هو الاخر العملية وخاض هذه التجربة  }

أبو اياد : يا اياد .... يا اياد

إياد : " بعد ان تحول لمرحلة عمرية في سن العشرين " ايوه يا بابا

أبو اياد : انت ناوي تكمل في السن ده كتير بقالك اسبوعين أهوا غير بقى مش عارف اقولك يا ابني وانت عامل زي الشحط كده

اياد : لا يا بابا طبعا ... انا ما صدقت اكبر .. عايزني أرجع عيل تاني وابقى زيك

ابو اياد : ايوه يا حبيبي عشان نلعب سوا ... ونولعها بقى

اياد : لا يا بابا أنا عايز أتجوز وأبقى مع البنت اللي انا بحبها .. انا اصلا كبرت عشان كده

ابو اياد : تتجوز ايه يا اهبل .. في حد في الدنيا يعمل كده

اياد : ايه ده يا بابا ما هو انت عملت كده .. هو انت اهبل ولا ايه :؟

ابو اياد : هههههه أيوه انا وامك كنا هبل ... ضحكة بلهاء

{تدخل ام اياد وهي تنادي على اياد  }

ام اياد : يا اياد .. يا ديدو

ابو اياد : وادي يا عم الهبلة جت اهي " ضحكة بلهاء "

ام اياد : " تقرص خد  اياد " ديدو حبيب مامي " ايه يا واد الجمال ده عسل يا خراثي على طعامتك تعالى ننزل تحت الجنينة العبك شوية في المرجيحة .. 

اياد : لا يا ماما اما كبرت على الكلام ده خدي بابا يلعب هو معاكي اهوا عيل اهوا واهبل زيك بالظبط

ام اياد : ولد عيب ما تقولش كده على مامي

اياد : مش أنا اللي قولت يا ماما .. بابا هو اللي قال


ام اياد : بقى كده  بتقول عليا هبلة .. بتهزقني قدام ابنك .. ماشي والله ما انا قعدالك فيها " تخرج من على المسرح مسرعة . ويخرج ابو اياد خلفها"

ابو اياد : استني يا ستي .افهمي بس . هاقولك يا هبلة

{اياد يظل وحيدا مرة اخرى وتتابعه بؤرة ضوء يتقدم بها للامام}

اياد : بابا عايزني ارجع تاني وابقى طفل زي زمان ؛ معقولة .. طيب ليه .. وليه هو رجع طفل مع ان المفروض ان الواحد لازم يكبر عشان يقدر يحقق كل احلامه ويعمل كل حاجة بيحبها  .. ايوه ماما قالتلي كده لما قولتلها ان عايز أبقى عريس واتجوز البنت اللي بحبها .. أنا متلخبط ومش فاهم اي حاجة ... هما عايزين ايه بالظبط .

كل اللي انا متأكد منه اني بحبها .. ايوه بحبها اوي وفرحت من قلبي لاول مرة لما شوفتها لما لقيتهاهي كمان كبرت اتأكدت انها بتحبني ساعتها ...واتأكدت انها عملت كده عشاني وكان لازم اكلمها واصارحها وأقولها اني حبيتها .. حبيتها اوي ... حبيتها اكتر من روحي

{ يسرح اياد في خياله بينما تضاء اضاءة المسرح و في الخلفية سور من الخشب يتخلله بعض الازهار وتدخل جانا في المشهد وتقف بجوار السور الخشبي وهي تحتضن بعض الكتب في يديها ومن ثم يذهب اياد اليها مسرعا  }

اياد : لو سمحتي

جانا : ايوه

اياد : ممكن اتكلم معاكي


جانا : اه .. اه اتفضل

اياد : ممكن اعرف اسمك

جانا : ها .. اسمي ... جانا

اياد : فعلا .. انتي جنتي

جانا :( تضحك بخجل) انا جنتك ؟؟! .. طيب وانت اسمك ايه ؟

اياد : اسمي اياد

{ تظلم الاضاءة وتفتح بؤرة ضوء تتابع جانا التي تقدمت بدورها وهي تركض الى اسفل المسرح }

جانا : كان اجمل يوم في حياتي النهارده .. اخيرا ... انا بجد مش مصدقة نفسي . انا هابقى عروسة "تأتي بعروستها المفضلة وتقبلها "

انا هابقى عروسة يا لوسي هابقى عروسة .. جانا ها تبقى عروسة وعارفه عريسها اسمه ايه .. اسمه اياد .. النهارده اتقابلنا وكلمنا بعض
ايوه والله .. وقالي كمان انه بيحبني اوي وانه ها يخطبني وهايجي بكره يقعد مع بابا عشان يطلب ايدي منه زي ما عريس نونا بنت خالوا عمل بالظبط .. وانا هابقى عروسة زي نونا .. انا فرحانة اوي يا لوسي فرحانة اوي اوي ..

بلاك

المشهد الثالث




{ تفتح إضاءة المسرح على اياد وجانا وكلا منهم جالس على كرسي وامامهم منضده يوضع عليها الشاي وتدخل ام جانا وفي يدها صينية تحمل عليها الشاي وتضعها على المنضدة }

ام جانا : قومي يا جانا وخدي اياد معاكي وانزلوا العبوا تحت في الجنينة

جانا : نلعب ايه يا ماما

ام جانا : يا حبيبتي العبوا أي حاجة عندكوا تحت الالعاب كتير يللا عشان انا وبابا ها نقعد نتفرج شوية على المسلسل واحنا بنشرب الشاي .

اياد : ايه ده يا طنط هو ده مش شربات وكده

ام جانا : لا يا حبيبي انزلوا تحت في الجنية ها تلاقي ثلاجة فيها كل العصاير والايس كريم والشيكولاته وكل الحاجات اللي بتحبوها

جانا : ماما اياد مش جاي عشان يلعب ولا يشرب عصير.. هو جاي عشان يشوف بابا ويقعد معاه زي ما قولتلك

ام جانا : يا حبيبتي وانا قولتله والله وهو هايشرب الشاي وهاينزل الشغل وهو نازل ابقى خلي اياد يشوفه وانتوا في الجنينة يللا انزلوا يللا يا شطااار اسمعوا الكلام

اياد : هو في ايه يا طنط هو عمو بيتهرب مني ليه ؟

ام جانا : ههههههههه .. وهايتهرب منك ليه يا حبيبي استنى يا ديدو والله لاخليه يسيب اللي في ايدوا ويجيلك يا عسولة انتي .يا اختي لمضة



{ تذهب الام وتنادي على ابو جانا بينما ينظر اياد وجانا لبعضهم في استغراب شديد }

اياد : هو في ايه

جانا : والله مش عارفة يا اياد ماما وباب لسه بيتصرفوا معايا كأني طفلة صغيرة ... انا مضايقة اوي هما ليه بيعملوا كده .. دول حتى ما خدوش بالهم اني اتغيرت وشكلي اتغير .. ولا سألوني انتي بقيتي كده ازاي

{يدخل ابو جانا ومعه امها }

ابو جانا : هههههههه .. ايوه يا ديدو ... اخبار بابا ايه بقالوا فطرة كده مش باين .. آخر مره شوفته فيها كان راكب بسكلتة اطفال وعمال يكسر فيها ... هههههه .. الراجل ده من يوم ما تجوز وهو مش طبيعي خالص .. لا وكل ما ربنا يديله يسوء الهبل اكتر هههههه .. " كل هذا الحديث مع زوجته ولا يبالى بوجود اياد "

والله انا مش عارف الناس جرلها ايه اليومين دول ناس كتير اوي اتهبلت في مخها ولا متعرفيش مخهم ضرب ولا ايه اللي حصل بالظبط

اياد : ليه بتقول كده يا عمو

ابو جانا : ههههههه ما هو ده الواقع يا اياد يا حبيبي .. سيبك انت .. اتصل با ابوك خليه يجي يقعد معايا شوية انا عايزه في موضوع مهم

اياد : ايوه يا عمو .. وانا كمان عايزك في موضوع مهم جدا


ابو جانا : هههههه . اوك اوك .. اتصل بس با ابوك خليه يجي وبطل لماضة .. والله دا انتوا حتة جيل ما حصلش

{يتعجب اياد من طريقة ابو جانا معه ويتأثر نفسيا بذلك ومن ثم يذهب ويتصل باوالده ويجري معه مكالمة صادمة .. تظهر معها علامات الصدمة علي اياد }

اياد : الو أيوه يا بابا مالك بتعيط ليه
.. ازاي يا بابا الكلام ده ... ليه بس ياربي كده ليه

ام جانا : ايه يا اياد يا حبيبي بابا تعبان ولا ايه

جانا : في ايه يا اياد اتكلم

ابو جانا : قول يا حبيبي بابا ماله في ايه

اياد : بابا اشهر افلاسه وكل املاكنا وفلوسنا راحت

ام جانا : يا ربي مش معقول

ابو جانا : لا حول ولا قوة الا بالله

جانا : يعني ايه .. كده مش ها ينفع نتخطب ونتجوز دلوقتي يا اياد ؟

اياد : لا يا جانا ما تقوليش كده انا ها شتغل جنب دراستي ومش ممكن اسيبك لازم نكون مع بعض

{ يظهر الاستغراب الشديد على وجوه ابو جانا وامها ويذهب اياد لأبو جانا مسرعا }


اياد : عشان خاطري يا عمو وافق واخطبلي جانا وانا والله هاعمل المستحيل عشانها .. عشان خاطري ياعمو عشان خاطري .. ما تحرمناش من بعض .. انا بحبها والله وها احافظ عليها العمر كله وهاشيلها جوه عنيه بس انت وافق يا عمو

{بينما تذهب جانا هي الاخرى وتقبل يد امها في تذلل }

جانا : عشان خاطري يا ماما وافقوا عليه هو والله انسان كويس جدا وبنحب بعض بجد  .. هو الوحيد اللي هايخاف عليا ويحميني بجد .. انا مش قادره اشوف نفسي عروسة لحد تاني غيره .. عشان خاطري يا ماما وافقوا عليه

{ ينظر ابو جانا وامها لبعضهم في استغراب وذهول شديد }

ابو جانا : " لام جانا " ايه الهبل ده ان شاء الله

ام جانا : ههههههه .. الله يخربيت المسلسلات التركي والهندي هي اللي عملت فيكوا كده

{ ثم لم يبالوا بأي شيء ويذهبوا الى الكرسيين ويجلسوا لكي يشربوا الشاي ويشاهدوا المسلسل التركي }

ابو جانا : ايوه سيبي نور ومهند الحلقة ١٥٢٠  .. الله عليكي ايوه هي دي اللي كان نفسي اتفرج عليها ..

ام جانا : ماشي ها سيبهالك مع اني اتفرجت عليها بس يللا عشان خاطرك انت بس



{ بينما يتحرك اياد وجانا في حركة درامية تحكي عن معانتهم من عدم اهتمام الاهل لما يرنو اليه من احلام .. يأتي صوت الاعلان الذي شاهدوه من قبل اعلان ماجي موجي }

ابو جانا : يا دي النيلة على الاعلان الاهبل اللي قرفونا بيه ده

ام جانا : والله على رأيك انا مش عارفه الناس دي بتصدق الهبل ده ازاي " بينما يفاجئ اياد وجانا بذلك ويذهب كلا منهم خلف كرسي من الكراسي الجالس عليهما ابو جانا وامها "

اياد : ايوه هو ده الاعلان يا عمو انا روحت وكنت عايز اكبر وكبرت فعلا اهوا.. دول مش بيتكلموا غلط ولا حاجة .. دول صح جدا

جانا : ايوه يا ماما وانا كمان اهوا حتى شوفي انا بقيت عروسة زي ما قولتيلي يا ماما شوفي يا ماما شوفي

ابو منه : عروسة ايه وكبرتوا ايه ... اييييه الهبل ده مالك يا واد انت وهي

ام جانا : روحتي فين ؟  ... ليه كده يا جانا تروحي تجري ورا الوهم والهبل ده ومن غير ما تقوليلي كده يا جانا .

جانا : ليه يا ماما بتقولي وهم والكلام ده .. والله يا ماما احنا كبرنا اهوا انتوا ليه مش شايفنا والله كبرنا

ابو جانا : كبرتوا ايه وبتاع ايه .. ايه اللي انتوا بتقولوه ده

اياد : ايوه يا عمو .. انا وجانا كبرنا وممكن نتجوز ونتخطب عادي


ابوجانا : ممم .. يعني انت عندك كام سنة دلوقتي يا اياد ؟

اياد : ٢٠ سنة يا عمو

ابو جانا : كده تبقى جانا ١٩ .. صح يا جانا

جانا : ايوه يا بابا ١٩ سنة بالتمام والكمال

ابو جانا : بالتمام والكمال .. يا سيدي..  لا وبثقة
حبيبي انتي طالعة ٥ ابتدائي واياد كمان طالع ٦ السنة الجاية انتوا لسه صغيرين واحنا شايفنكم كده فعلا مش بس كلام بنقولوا وخلاص  دي الحقيقة وانتوا اللي موهمين ولازم تفوقوا ... مستحيل حد يكبر كده في يوم وليلة ولا حتى في ايام ... ده كون ليه قواعد وقوانين ربنا خلقه كده .. واي تعديل او تغيير لقوانينه يبقى مجرد خلل ووهم ومستحيل يكمل . لازم يتلاشى في اي لحظة هي دي الحياة ..  افهموا بقى وفوقوا من اللي انتوا فيه .. وعيشوها زي ما هي عيشوها واعملوا اللي عليكوا وبس وخلوا التدابير على اللي خلقها .. بلاك




المشهد الرابع

{ مشهد دراما حركية يظهر فيه ان دكتور رزيق والشيطان وجهان لعملة واحدة ، وينتهي المشهد والشيطان يلبس دكتور رزيق بالطوا ابيض بالطوا الطب }

د/رزيق : "يجلس وامامه جهاز كمبويتر والشيطان يقف خلفه "

٧٥ مليون شخص ..دلوقتي باقدر اتحكم فيهم " تحول لشخص شرير"



الشيطان : هههههههه كلهم بين ايديك ورهن اشارة منك تعمل فيهم كل اللي انت عايزه وتتصرف فيهم زي ما انت عايز

د/ رزيق : انا عايز اتحكم في عدد اكبر من كده بكتير عايز العالم كله يبقى تحت سيطرتي انا بس اللي اتحكم فيه

الشيطان : تقدر يا دكتور رزيق تقدر ... المسأله في ايدك بقت سهلة جدا واسهل من التنفس حتى ... بس كل اللي انت محتاجه انك تستخدم العدد اللي انت متحكم فيه انهم يقنعوا ناس اكتر بالفكرة الجهنمية بتاعتك .. وبمتنهى البساطة يشربوا العقاقير ويدخلوا الجهاز في اي فرع من فروع ماجي موجي اللي بقت دلوقتي في كل العالم ... ههههه مش بقولك اسهل من التنفس

د/رزيق : ههههههه فعلا بقت بسيطة خالص .. والفضل كله يرجع ليك طبعا .. لولا وصفة العقاقير دي ما كنتش كملت اختراعي ده .. انا عايز اعرف انت جبتها منين وازاي

الشيطان : انا اتفقت معاك من البدايه خالص اني اساعدك .. وانا دايما باكون عند وعدي مستحيل اقول على حاجة ومنفذهاش ... انت سلمتلي وآمنت بيا وعشان كده كان لازم اساعدك بكل قوتي واعطيك كل اسراري

د/ رزيق : وده مش اي سر .. ده كان سر سحري .. البحث اللي انا عملته وخدت فيه الدكتوراه .. كان في مجال الموجات والاشعاعات واثناء دراستي .. اكتشفت سر خطير وهو انه في نوع معين من انواع الترددات والموجات الفوق صوتية بيقدر يتحكم في الكميا بتاعت خلايا المخ .. بس لازم يحصل خلل هلوسي في المخ  . .  في اللحظة دي اقدر وببساطة اوصل وبشكل الكتروني مخي بمخ اي شخص تاني ومن خلال الموجات اقدر اخلي مخي يبعت اشارات لمخ الشخص التاني   وبدام خلايا مخه
اتهايأت للاستقبال ... يبقى هو كده بقى بتاعي يشوف يسمع ويحس ويشم ويتذوق زي ما انا عايز .. يعمل اللي انا عايزه وبس .. والسر كله كان في المخطوطة المرعبة اللي انت جبتهالي.. دي اكيد صنع شيطان

الشيطان : هههههههههه .. لا هو انسان بس كان وراه شياطين ولاد ابلسه

د/ رزيق : يعني ايه ؟

الشيطان : حكاية قديمة .. حكاية شراب الحشاشين . شراب عطر الرائحة.... والشيطان اللي بتتكلم عنه ده كان قائد فرقة اغتيالية اسمها فرقة الحشاشين

د/ رزيق : ايوه انا تقريبا كنت قرأت حاجة زي كده.. 

يصاحب الحكي مشهد دراما حركية يوضح الحكي في بؤرة ضوء في احد اركان المسرح .

الشيطان : في زمن بعيد ...كان قائد الفرقة دي عنده هوس بعلم النباتات ...وقدر يكتشف خلطة عطرية عمل منها عقاقير مخدرة ..وكان  بيعطي لاتباعه العقاقيردي ..على انها مشروب الحياة.. وكان بيصيبهم المشروب ده بالهلاوس ويتصورلهم كل شئ نفسهم فيه وكأنه حقيقة... ومن هنا كان بيقدر يتحكم فيهم زي ما هو عايز ....وانتهت اسطورتهم .. وفضل سر الوصفة دي مدفون تحت قلعة فرقة الحشاشين لسنين..  لحد ما جه الاوان وخرج السر عشانك.

تظلم الاضاءة في بؤرة الدراما الحركية ويأتي احد الشياطين من مشهد الدراما الحركية ويعطي المخطوطة الجلدية للشيطان ثم يذهب

د/ رزيق :يعني  انا اللي كملت قوتها وخليتها بدل ما تتحكم في فرقة تتحكم في العالم كله ..هههههههه انا بقيت اقدر اتحكم في العالم كله ههههههه

الشيطان : لسه يا دكتور رزيق لسه .. انت اتحكمت في عدد بسيط جدا وعشان كده مش لازم تضيع وقت  " يشده ليجلسه على الكرسي من دون ان يلمسه .. امام جهاز اللاب توب الذي على المكتب وهو جهاز التحكم في الشبكة "




الشيطان : من على الجهاز ده انت بتقدر تتحكم في الشبكة يللا اشتغل اكتر ودخل ناس اكتر .. اعطيهم اوامرا انهم يخلوا ناس اكتر تدخل في شبكتك لازم كل دقيقة العدد يزيد .. عشان توصل لمبتغاك
عشان تقدر تتحكم في العالم كله

د/ رزيق : ايوه هو ده اللي انا عايزه انا لازم اتحكم في العالم كله.. ههههههههه  ..يحدث ضجة هائلة واصوات متداخلة بشكل الكتروني ودكتور رزيق منهمك في العمل
د/رزيق : ههههههههه  العدد بيزيد بقى عندي مليار شخص باقدر اتحكم فيهم هههههههه تدخل ضحكاته بعض اهات الالم

الشيطان : لسه .. محتاجين كمان لسه في اكتر
يبدأ دكتور رزيق في دخول مرحلةالالم والتعذيب
د/ رزيق : الاعداد  بتزيد بطريقة سريعة جدا .. انا مش قادر استوعب ده كله جوه مخي ..

الشيطان : زود الناس كمان يا دكتور رزيق زود

د/ رزيق : انا حا سس ان راسي ها تتفجر اصوات وصرخات وكلام جوه وداني وصور من كل مكان بتضرب في عنيه .. لازم تشوف حل فعلا مش قادر استوعب اكتر

الشيطان : هو في حل واحد

د/ رزيق : قوله بسرعة فعلا دماغي بتنفجر خلاص مش قادر

الشيطان : اخاف اقوله ترفض : لا لا انت مش ممكن تعمل كده

د/ رزيق : لا ها عمل .. ها عمل .  قول بسرعة انا حاسس اني بموت




الشيطان : من هنا من الزر ده تقدر  تخلي مليون شخص من جوه الشبكة ينتحروا وبكده تبقى خلصت منهم ومن عقولهم اللي عملتلك زحمة جوه مخك

د/ رزيق : لا ... لا .  الناس تموت لا .  انا عايز اتحكم فيهم بس

الشيطان : هههههههه  . لازم تعمل كده .  لازم يموتوا عشان انت تعيش .. وتفضل متحكم فيهم .. وخلي العدد المناسب ليك والباقي يموت هما عايشين ليه اصلا .. لازم يموتوا

د/رزيق : لا ..  لا ..  مش لازم الناس تموت انا مش ممكن اعمل كده شوف حل تاني بسرعة انت اتفقت معايا انك ها تساعدني بسرعة هاموت مش قادر

الشيطان : ههههههههه .. ده كان اتفاق وانا فعلا ساعدتك وعملت اللي عليا لكن في مقابل لمساعدتي دي
يا دكتور رزيق .  الاتفاق ده كان حاجة كده زي اتفاق سحر الكابلا بمعني انه اتفاق معايا انا الشيطان انا اديك قوة وانت تديني ارواح ناس تموت كا قربان ليه ولازم تعبدني وتسمع كلامي ..
هههههههههههه
وده دورك دلوقتي يا دكتور رزيق عشان تكمل الاتفاق ده .   هههههه  .. مش قادر تتحمل انا عارف .. دوس على الزر وانهي بنفسك العذاب ده .... {يضغط على الزر مرات متعددة بعد ان اقترب بالفعل من الموت والشيطان ينتشي وتظهر قوته وشروره اكثر  }

الشيطان : مليون .. ١٠ مليون ..  ١٠٠ مليون .  ٢٠٠ مليون  ٥٠٠ مليون
هاها ها ها برافوا يا دكتور رزيق برافوا كمل كمان كمل ههههههههههههه " قالها وهو يخرج من المشهد في حالة كبيرة من النشوة الشريرة "

د/ رزيق : موتوا ...  موتوا ... موتوا



{ يقل صوت الناس تدرجيا وتهدأ رأس دكتور رزيق قليلا ليلتقط انفاسه ويظهر عليه الندم لما حدث ومن ثم تبدأ الاصوات مرة في الزيادة لكي يجن جنونه ويحاول  تكرار الضغط على الزر مرة اخرى ولكن يصحوا ضميره }

د/رزيق : لا مش ممكن اعمل كده تاني ... " مع شدة الالم " مش ممكن اخلي اللعبة دي تكمل " يذهب للجهاز وينظر اليه "  العدد بيزيد بجنون ... لا كفاية بطلوا تزيدوا ... بطلوا تصدقوا .. فوقوا بقى .كل ده وهم .... اااااااه ... مش قادر انا بموت حرام عليكم كفاية .. اخرجوا من دماغي ...... ." مشهد دراما حركية .. موت دكتور رزيق ..  مشهد الفينال يدخل الطفلين ويجدوا دكتور رزيق ملقى على الارض ويدور حوله الثلاث شياطين وعند دخول الطفلين يظهر على الشياطين العذاب ومن ثم يهموا بالهروب فورا فيدخل الطفلين ينظروا الى دكتور رزيق ويظهر على وجهوهم حالة من الحزن عليه ومن ثم يضع اياد يد جانا في يده وينظر اليها ويذهب الى عمق المسرح ومن ثم تظلم الاضاءة ...... 😊 وشكرا"

تمت


مسرحية من تأليف / محمد إبراهيم البديوي