#أكتفي_بي
1
كاعدة كدامة وتلفوني بأيدي ...
اي ابو عزوز شتريد.اسوي عشة اليوم
ماكو رد.منة .....
ابو عزوز شنو اسوي عشة يمعود ....هم ماكو جواب
شفت ابتسامتة اتسعت ولا يمي بالة ... سجلت خروج من فيسي ودخلت لحسابة . كبل للماسنجر رحت ....شفت رسائل دتوصل الة من زهرة البنفسج ...
دخلت ...
دكلة حيدوري لا صدوك. احسك ما تحبني ..؟
يمعودة والله والكعبة احبج .. ليش جلبتي
لعد ليش ما ترضى نتخابر
عزة بعينه هي دجرجر بية وهذا مثل الخروف يكول الها بس اطلع من البيت ..اووف
زهرة ابنفسج وحده من عشرات اللي يعرفهم زوجي علية بالفيس ... تذكرت اول مرة كشفتة بيها كبيت علية و ضليت ابجي وزعلت كم يوم ويتوسل بيه ...هيجت علية المواجع من كالت اله زهرة البنفسج خو ما تعرف غيري ...وهو يكول الها وروح كلبي بس انتي معشعشة بي ؟؟
رحت للغرفة وعفته يراسل وسديت تلفوني ...احس بية شي مات كبل جنت اتهتسر وازعل عليه من اكتشف مراسلاته ... حتى مرة زعلت لبيت اهلي وتدخلوا اهلي ...هسة صرت جماد .. و اصبر نفسي واكول اني طبيعية كل مافي الامر تعودت على كلمة جملة مدام بس كلام بكلام مرجعة الي ...
سديت حسابة اللي خليت ابني يجبلي رمزة السري لان البريد اني حافظته بس الرمز عصى علية . بس ما عصى على ابني معتز المدلع بعزوز ..
دخلت لحسابي ورحت لام الخيرة ...لكيتها فاتحه بث واني متأخرة ما لحكت دخلت عليها ..
عفية ما لحكت ع البث .. اريد خيرة .
حتى لو برصيد وما اكول للأدمنية والله
رحت احضر عشة نكعت للحم للكباب و نشفت الملابس ودزيت بتي رسل اشرهم عمرها 8 سنوات ..
اجاني مسج من ام الخيرة
دزيت الها رصيد ابو ال5 ....
اسمج واسم امج ..
كوثر بت أماني ..
و زوجي حيدر ابن سلمى ..
كالت الي انت منفوسة على نعمتج ... واكو وحدة لافة على زوجج .... ومسوين الج عمل ..
ومن هذا القبيل .... ضجت على حظي منو اللي حاطه عينها علية اوووف ياربي
...
اني كوثر ..عمري 35 ...عندي ثلاث اطفال معتز ابن ال13 عام ...و رسل بت
8 اعوام و رسول عمرة 5 اعوام .. تزوجت من 15 سنة ... من زوجي اني خريجة معهد وهو بكالوريوس و موظف واني ربت بيت .
..
ثاني يوم جان يوم جمعة
دا امسح البيت الساعة عشرة الصبح .. وهمه بالهول ...
صحت بابني يرفع رجلة
ارفعها ولك ...
جانت اعيونه مبككه بالأيباد ..
رفعهن ...
ولج رسل ليش كفشة روحي مشطي
اي هسة
صارلج ساعه اي هسة وكلشي ماكو ...عوفي الايباد وروحي يلا ...
ما راحت !!
ابني الصغير بيده تلفوني و منزل بيها العاب ويلعب ...ورجلي ابصفه كاعد على القنفة يلعب بتلفونه اتعمدت اسوي نفسي امسح ابصفه ووكفت يمه ..ابسرعة طفى التلفون ...
اكلج سوي اليوم قيمة مشتهيها حيل
