فداء:
ايام ورجعت ام رضا وهالمره ابوي موجود وسألته اله مباشر كنت كاعدة يمهم طفرت من يمي وكلت الها ما ننطي شمس بعدها صغيرة وتدرس باوعتلي بنص عين وكملت كلامها ويه ابوي
ام رضا:البنت كبرت واللي ادريه انت تزوجهن بعمر صغير واحنا اولى من غيرنا مو صدك هالكلام
بيناتنا نسب وانت اخذت حليمه بعمرها بعد تكول صغيرة ما ازوجها كلام ما مقبول منك ابني عباس دكتور وانت تعرفه يداوم بالمستوصف اذا عدكم احسن انطوها لغيره والله وعاد هي ما تطلع لغريب ما دام هو كال عليها عمام احنا واهل واذا ما تطي لابن عمك ياهو احسن وتطيه
ابو محمد :يا ام رضا انت عزيزة وجيتكم غاليه بس البنت تدرس بعدها واني ما اشوفها فيد زواج مو مثل باقي اخواتها
ام رضا:وبشنو يفيدها العلام واذا تريد تدرس نسأل عباس وهو واعي ودارس ويجوز يخليها ويجيبها ويوديها بايدده لمدرستها وهاي مدرستها بصف دوامه
فداء:شنهي حجيه يجوز ونسأله اختي ما تتزوج وهاي دا نكول الج كاعد تدرس بعدها وابنج شوفيله بغير مكان بنات عم وبنات خوال عنده بعد شكو يم بنتنا واحنا مو عمام اللح حتى تنهون عالبنت الزواج مو غصب تره
ابو محمد: فدااا؟؟؟؟؟.......خزرها ورجع كمل كلام ....حجيه جيتج غاليه كلت الج والشيخ ابوهم صاحب افضال برقبتي ونطوني حليمه وهي بعدها بنت ١٤ سنه بس اني ما اكدر اجبر البنت اسألها ومن بعد رايها اني موافق ما معترض ابد
ام رضا :خوش اسبوع وتجيك مشية زلم ردوا الخبر قبلها ابو محمد هذا زواج ما بي مجامله ولا مفاشل
كامت الحجيه طلعت زعلانه ومغندبه علينا الله لا يردها حليمه تركض وراها راحت واني بقيت كاعدة اندار الي ابوي
-ها فدا خير شبيج وياها للحجية هيج تردين عليها
-يابه شعندي وياها كل شي ماكو بس اختي ما تريد زواج واني اختها سولفت بمكانها هي تخجل خو ما نغصبها
-اي اسأليها ورديلي خبر مو منج الرد منها يكون اسمعه
-تدلل ياب
فرحت وانتشيت ضامنه اختي ترفض وفعلا سألتها ورفضت بالبدايه
شمس:
اجتنا الحجيه واني واكفه وره باب غرفتي اتسمع شيحجون وفدا انهدت عليهم كلش ارتاحيت شويه من رفضناه لعباس ما اريده اخاف منه هذا مو مثل الزلم هنا ما عنده حيا وايده وعيونه يخوفون ما اريده اني.. تربات بغداد على كولتهم
هذا ابوي وحليمه متزوجين من وعيت للدنيا ما شفته بيوم باوع عليها ليش بس ابوي هاي خواتي الماخذات محد منهن تكول رجلها باسها لو كمشها وهذا المخبل هو يشوفني يتخبل ما اكدر اعيش هيج بعدنا ما متزوجين وهو ما يعرف لا حرام ولا عيب ما رايدته روحي كشت منه مو مثلي ما نتشابه واني اكره الرجال هيج
فات يوم وطلعنا للزرع وصرت اخاف ابقى وحدي واخاف امشي وحدي بالزرع الله لا ينطيه خبلني
كنت مأمنه فدا وياي بالكاع وما يكدر يجيني شفت فدا مشت لحكتها امشي وراها مثل جاهل يمشي وره امه وهي ما تسكت بس ترزل بيه وتطردني تريدني ارجع للبيت وحدي كان عدهم سقي ويتأخرون ولازم ارجع الحشيش للدير الدواب مربوطة بي وهسه ماتت جوع
شفت الامر ما منه فايدة وهي تريد لو هي ترجع لو اني شلت الشلفان وحطيتهن عالدابة ومشيت واني اطك رجل برجل يا ربي كون ما يشوفني ولا اشوفه بعدني ما كملت دعاء لكيته واكف مقابيلي
-هلا عروسي
-روح عزه بعيني وتراب براسك يبوو والله اعيط والم عليك العالم لا تقرب مني والله اكر رقبتي بالمنجل وابليك هالمره
-هاي يا عالم درب البساتين فارغ وبس اني وانت والحشيشات والزمالة على كيفج يا حلوة
-شتريد مني انت
-اسمع موافقه منج ما يهمني اختج شتكول ابوج شيكول وافقي كله بايدج
-بروح ابوك امشي منا ابوي يذبحني والله
-وافقي واعوفج
-خوش اوافق بس روح يا ربي بيمن ابتليت
-ابتليتي بدم قلبي وما اعوفج اطلبج ثار رديه الي يا بنت الناس لا عقل ولا قلب امشي الله وكيلج مو تكولين الله ماخذ رايك هههه اي والله حجايتج بمحلها وهسه اريدج ترديهن الي باجر جايب الشيوخ كلها تخطبج وبالج ترفضين والله ببيتكم اطلع الج اخبلج افتهمتي
سكتت وكملت طريقي وهو فتح الي درب بس ردت اوكع على وجهي واني اسمع الغزل اللي يكوله يبوو شلون اعيش وياه هذا
رجعت لبيتنا وتلكتني حليمه استفردت بيه لان فدا ما تخليها تحجي وياي كلمه من يوم جتي الحجيه
-لج شمسه معليج بفدا الرجال رايدج واني لمصلحتج احجي وافقي وتزوجي احسن الج
-انت؟؟؟ تريدين مصلحتي هاي من شوكت واني ما اعرفج كولي تريدين تخلصين منا اني واختي
-اي شكو بيها يعني تزوجن ابوج رجال جبير والمرض اكله اكل لج تعيشين مدللة عدهم والله لج اني كنت ازيحج عنه واخليه ياخذ من بنات عمي عداي بس ليش خيرنا يروح لغيرنا وانت هم مثل بنيتي
-ههه وصرت بنيتج بعد .....على العموم اسألي فدا وهي تجاوبج
ما ردتها تفرح هالحيه بس كلامها صحيح ابوي رجال تعبان ومريض وما النا والي بعده حتى اخوانا اللي متأمليهم هذوله ولد حليمه شيطلعون يعني
ثاني يوم انكلب البيت واجتي المشية غفلة قبل لا اهلي يردون الهم الجواب زلم ترسوا بيتنا واني وفدا بالغرفه مالتنا اذنا عالباب وهي تسب وتلعن بيهم حسبالها جايين قبل ما ياخذون كلمه مني ويريدون يحبرون ابوي يوافق على زواجي ويحرجوه
دخلن خواته كومه وخواتي وانكلب بيتنا وفدا واكفه تكول الهم ما موافقين شكو جايين وشعدكم وتلاكت ويه خواته وامه لان همه يريدون يسألوني الي وهي تجاوب
فدا:
كنت واكفه تعاركت وتلاكيت ويه نسوانهم اختي رافضته شنو هاللزكه بعد وهمه يريدون يسألوها وامه حتى الذهب جايبته وجايه شنو غصب هو بين عركتي وياهن واصواتنا العاليه كلت الهم يلا اسألوها هاي هي اني عيني بعيونهم وبتحدي اشو اختي ساكته انداريت لكيت عيونها الي تتوسل وحلكها يكول موافقه شفت انكساري وانهزامي وطعن اختي الي همه فرحوا وهلهلوا واني مشيت طلعت من البيت اجر خيبتي وحسرتي شيريدون مني بعد ليش هيج وياي اسمع الكولات والهوسة من بيتنا اني كاعدة بضهر البيت ودي املخ روحي راح كل شي بنيته تعبي وسهري اباوع لايديه شلون خشنات واصفكهن وحدة بالثانيه على خيبتي وخيبة اهلي ودمعي جرى غصب
بيوم اللي كنا بفقر وعازه نفسهم هذوله ما رادونا واتذكر امهم واهانتها الي ابوي يشتغل عدهم وما يصير ابن الشيوخ ياخذ الا بنت شيوخ ومن صار ابوي صاحب املاك واللي متنا لما صارت عدنا وعلى ضهورنا شلنا وحطينا يلا حصلناها نطوه مره وموتوا امنا بقهرها وهسه يدورون نسبنا وصار ابن الشيوخ يجيب اهله ويطلب واختي اللي تعبت وربيتها اني اللي ربيتها وكعت صفحتي بشيلها عليها واخذت من عمري سنين تالي تطعن بيه
بجيت على نفسي ما بجيت عليها ولا ضجت بالعكس دعيت الها بفرح اني ما شفته ودعيت الها براحه ما جربتها بس هي اللي اختارت هالزواج وهي تتحمل اللي يجيها منه وكل هذا بكوم ومصيبتي اني اللي صارت اقوى وامر ......
رضا:
كاعدين بمشية اخوي عباس اشوفه طاير من الفرح هو بلغنا بموافقتهم المخبل ماخذ الموافقه باذنه ما كدر يصبر لما يردون خبر وما رضيت عاللي سواه لان سولف الي كل شي شلون اخذ موافقة البنية وشلون حبها من البداية
اخوي فرحان واني فرحان لفرحه كعدنا وخليت غانم يحجي بالخطبة كونه الاكبر بيناتنا ويطلبها من ابوها بده يحجي وهو متكلم جدا خله الحضور كلهم يسمعون لحد ما وصل لطلبنا يمهم وهنا جانت الصدمة....

