جنة فؤادي

جنة فؤادي الجزء الرابع

جنة فؤادي
الجزء الرابع

#zainab_alnajar

عندما تخرجين من تجربة فاشلة بحياتك .. انهضي وكأنكِ تزيلين الغبار عن ملابسك .. استقيمي وأكملي المشوار كمنتصرة وليس كضحية ... واخرسي بقوتكِ كل الالسن الحاقدة .. لن تستفيدي من نظرات الشفقة اذا ضعفتي .. فقط سيتناقلوا خيباتكِ فيما بينهم

_ اوي اني شورطني وحملت من جديد .. شوف جسمي شلون تخربط .. والله بس اولد اروح للجم واسوي دايت مو تگولولي رضاعة ،، دينا تحجي ويه حارث ،،
_ الي يعجبج سوي
_ شو كأن ماعاجبك كلامي
_ هسه شگلت اناقشج ادري الحجي مايفيد وياج .. اسكت مايعجبج ماتگوليلي شأسوي
_ وانت شدعواك وصاير عصبي اني صوجي وجيت اسولف وياك ،، سكت ماجاوبها ،،
اگول حارث شنو رأيك بلون شعري هالمرة حلو مو
_ اي حلو
_ وره ما اولد اريد نسافر صار هواية ماطالعين
_ ماصار سنة من رحنه لمصر .. وبعدين الطفل شلون تاخذي
_ شنو يعني هاي مو خواتي وبنات خالاتي كل شهر سفراتهن شنو اني اقل منهن .، وبعدين احنه نروح اني وياك ويه اهلي ونترك الجهال يم عمتي
،، حارث تعصب صار نار ،، _ لج شنوووو هذا دماغج بس طلعه وسفر وونسه بطلي انانية وفكري بيه وبأطفالج شويه انتي مو صغيرة عمرج 25 سنة ..
خلي ايدج بأيدي وخلي نبني مستقبل لجهالنا
خلي اطلع احسن من ابقى يمج اتعارك
_ تعال وين رايح .. نطلع نتعشا بره ضايجة
_ الصبر منك يااارب ،،، طلع وتركها تحجي وراه ،، مشهد من حياته الفارغة .. ويومية سالفة جديدة
يفتر بالسيارة وليل مايعرف وين يروح .. ليش صار مايتحملها هي نفسها من تزوجها لحد الان ما تغيرت يصير هو مل .. بس لازم اتحمل لخاطر اطفالي وعسى بيوم من الايام تتغير وتحس على نفسها
اتصل بصديقة نزار حتى يطلعون هذا صديقة قريب منه كلش
_ ها نزار عندك شيء امرلك نطلع شوية
_ هلو حبيبي .. لا والله ما اگدر عيد ميلاد حمودي ابني وامه مسويتله عيد ميلاد .. تعال اكل كيك
_ لا عيني اخذ راحتك ،،، ما تذكرت بيوم تفرح الاطفال بعيد ميلادهم بس هي لازم اتذكر واجيبلها هدايا ثگيله والا اطلع مقصر واختي هيج وبت خالتي هيج ،،
اخذته ايده واتصل بزبيدة وهو متردد لان بالليل خاف يسببلها احراج تأخرت يالله جاوبته
_ هلو ابو داليا شلونك خوية
_ عفية زبيدة شيلي الألقاب
_ شبيك حارث صاير شي؟ شعجب متصل هيج وكت
_ اعتذر سببتلج احراج .. اسف ،، وقطع الاتصال ،،
رجع راسه على كرسي السيارة وغمض عيونه..  حيره بداخله وضياع .. صحى من شرودة على صوت تلفونه يرن
_ الووو .. ليش قطعت الاتصال
_ ماريد احرجج زبيدة .. انا بس مخنوگ وماكو احد احجي وياه
_ وانا هم اخاف زوجتك يمك وتفهم اتصالك خطأ .. لا تزعل مني ..
_ اخذ حسره جبيرة ،،، زوجتي .. من شوكت تهتم
_ لا كل مرأة ماتقبل  وتريد هي الوحيدة بحياة زوجها حتى لو صداقة واخوه
_ وشعجب انتي قبلتي يتزوج عليج وصارت ثانية وعاشت وياج وگدام عيونج  واخذت كل شيء منج
_ ،، دموعها نزلت غصب عنها ،، وحارث حس بكلماته شگد قاسية بس هو ماقصد يقهرها جان قصدة يقارن…  اسف زبيدة والله مو قصدي اقهرج بس ردت اگولج مو كل النسوان تفكر مثلج
_ لا حارث كلامك صح بس انا عقيم وحرام علية احرمه يكون اب .. هذا نصيبي من الدنيا .. وهذا امر رب العالمين..
_ شوفي اتصلت احجي وياج و انسى هم دينا .. نوب قهرتج .. اعذريني الله يخليج
_ لاتهتم مو أگولك انت مثل حسام اخوية…  ودينا هي من تزوجتوا هذا طبعها تعود عليها ليش صاير حساس .. بعدين تذكر زيناتها يعني قابل كلها اخطاء ومابيها شي زين ..
_ ما أگدر اتذكر شي زين عدها .. يمكن قبل كنت اشوفها بگلبي واتحمل .. هسه صار يشوفها عقلي واكرها
_ لا لا هذا خطأ حارث بت خالك وحلوه وشغلتين مهمات بيها المهم صاينه شرفك اولاً وثانياً… اولادك شوفهم وافرح بيهم لو ما هي مايجون للدنيا هاي احلى هدية الك من رب العالمين
_ بس هي ماصاينه هاي الهدية
_ كافي تصير حساس .. اطفالها شلون تهملهم .. يالله ارجع للبيت واخذ شي حلويات وكرزات واسهروا و انسى الهم والنكد .. بعدكم شباب خوية
_ ماشي رايح للبيت والله كريم شلون تالي وياها

…
ومرت الايام بنفس الروتين
بيوم رقم غريب يتصل عليها ودائمًا بالليل هي متعوده ماتجاوب ارقام ماتعرفها.. وصلتها رسالة
،، شو ماتجاوبين عيني زبيدة لو انتِ بس حصة المدير ماألنا نصيب ،،
يارب اكفيني شر الناس هاي منو
راحت للدوام سلمت على الموضفين وأول ما گعدت هم اجتها رسالة ،، طالعة گمر ،،
تتلفت تريد تعرف منو الكل مشغول ومحد منتبه
بقت تشتغل وبالها شارد .. دخلت للمدير ونفس المضايقات .. رجعت لمكتبها .. ورسالة جديدة وصلتها ،، اااخ شوكت ناخذ حصتنا مثل المدير ،،
خلت التلفون ونزلت راسها ودموعها تنزل .. حارث انتبه عليها بس ماحجه خلاها براحتها گال تهدأ وافهم منها
رفعت تلفونها واتصلت بصديقتها ايمان وهي تمسح دموعها
_ هلو ايمان شلونج
_ هلو بيج عيني
_ شلونج مشتاقتلج
_ الحمدلله زينة والله مشغوله بالبيت والاطفال
_ عندك وكت نطلع محتاجة شغلات من السوق
_ لا والله ما اگدر زوجي ما يقبل
_ ليش مايقبل مو جنه نطلع سوه
_ اي هاي قبل هسه لأن تطلقتي مايقبل يگول ماتمشين ويه مطلقة اعذريني
_ 😢😢 معذورة حبي لا تهتمين بعد ما ازعجكم
قطعت الاتصال ومسحت دموعها من جديد ورجعت اتصلت على سما
_ هلو سماوي شلونج عمري ،، كاتمه دموعها بالگوه
_ هلو زبيدة
_ اگولج حبي امرلج اليوم نطلع للسوگ
_ لا ما اطلع ولا اريدج تجين .. زوجي صار يقارن بينج وبيني ويگولي شوفي صديقتج نفس عمرج بس حلوه ومامبهذله نفسها مثلج ودائمًا يباوع عليج من تجين انا منتبه عليه .. كتله طبعاً هي ماخلفت حتى يتخربط جسمها وعدها وكت فراغ هواية تهتم بروحها .. رجاءً بعد لا تجيني ولا تخابريني اخاف على بيتي منج
لحظة صمت .. ودموع مخنوگة صارلها اشهر كاتمتها .. حارث ساكت مايعرف بالكلام الي دار بس حس بيها موجوعة .. وگفت شمرت تلفونها بالحايط ووگعت قرب المكتب مالتها .. راح عليها شاف وجهه مليان دم يطلع من خشمها .. يصحي بيها ماتصحى طلع بسرعة صاح موضفة وياهم وبأيده مي يخلي بوجها ومايفيد بدون تفكير شالها بين ايده والموضفين يباوعون خلاها بسيارته والموضفة وفاء وياهم ..  كانت بنت صغيره عمرها 20 سنة متخرجة من معهد وتحبها لزبيدة كلش…  اخذها للمستشفى اول مره يحس بشئ مميز بمشاعرة الها .. دخلوها الطوارئ واكفين ينتظرون بعد نصف ساعة طلع الدكتور
_ منو مع المريضة زبيدة
تقدمو حارث ووفاء _ احنه دكتور
_ الله سترها ارتفاع بالضغط الا شوية تصير جلطه .. وعدها انهيار عصبي .. سوينه اللازم ضغطها بعده مرتفع حالياً صار 15 .. انتبهوا عليها يحتاجلها راحه وكتبتلها علاج اخذو من بره .. والافضل تبقى اليوم هنا
_ مشكور دكتور
هسه شلون ماعندي رقم اخوانها وتلفونها اصلاً بالمكتب ومنو يگول ماتكسر
دخلوا عليها يشوفوها..  بس دموعها تنزل
حارث ..ست زبيدة كافي .. ليش تبجين..  انتِ بيوم الي تطلقتي ماكنتي هيج منهارة
وفاء ..عفيه زبيده لاتبجين فدوه انا هوايه احبج واحسج اختي الجبيرة
ساكته ماتجاوبهم بس مغمضه عيونها ودموعها تنزل
_ انطيني رقم حسام اخوج الدكتور يكول لازم تبقين اليوم
_ لا هسه اطلع مابيه شي
_ هو شنو عناد ضغطج عالي
_ لا هسه صارت احسن شويه ارتاح ووصلني اخذ سيارتي وعود اخذولي اجازه كم يوم
_ زبيدة خلي نخابر اهلج .. لازم ترتاحين
_ عيني ابو داليا ابوية من يسمع مريضة هو يتخربط نوب وتعرف صحته تعبانه وبعدين منو يداري وينطي علاجة .. انا مابيه شي .. هم الدكاتره يبالغون .. گامت ومسحت دموعها .. اجتي الممرضه شالت المغذي ووقعت زبيدة وطلعت على مسؤوليتها

وأصليلك
صلاة ألما لگة ذنوبه اعله ياهو يموت
صلاة التيه دروبه اعله ياهو يفوت
صلاة الما دره جروحه بحلك ياحوت

اضغط على نجمة 🌟 التصويت لدعمنا رجاءاً 😊