ضيعت سبع سنين من حياتي كل يوم يفوت نحسو قرن سبع سنين من العذاب سبع سنين ماشافتش عينيا الراحة قلبي مات وليت وحش بلا قلب عشت حوايج جامي كنت نتخيلهم اختطاف تعذيب تدريب اغتصاب جوع برد قسوة مسدسات دم قتل كره حقد انتقام الشبح ، عشت في عالم آخر عالم كل مانحب نخرج منو نلقى روحي تعمقت فيه أكثر و أكثر ، بعد سبع سنين قدرت نهرب خرجت من هاداك العالم بلا رجعة ولا هاذا واش كنت نظن ، ركبت أول طيارة و خرجت من مدينة التعاسة و دفنت فيها ذكريات هادوك السبع سنين ، رجعت لعايلتي و بلادي كنت جثة بلا روح دخلت في حالة نفسية صعيبة نهلوس و نتخيل و نبكي و نعيط ، عامين من عمري الحاجة الوحيدة لي درتها هي أني نحاول ننسى و نمحي هادوك السبع سنين من راسي نهائيا و نبني شخصية جديدة و قدرت ننسى صح وليت ضعيفة و خايفة مي مهما صرا مانيش راح نرجع ولا نتفكر و نرجع الوحش لي كنت جامي رح نرجع ليهم ولا هادا واش كنت نظن ، في هادوك العامين كل لي لقيتو من عايلتي هو الكره مالغري سنيت منهم الحب و الحنان و المساندة مي الوحيد لي وقف معايا و عاوني هو بابا ، ماما طبيبة و من عائلة غنية بزاف والديها تبراو منها بسكو خافو على سمعتهم و هدرة الناس كي بنتهم تزوجت بابا لي يخدم عند الناس ليل و نهار باش مايخصنا والو ، نعيشو في حارة مليانة بالمحابسية و ناس على قد حالها ، إلهام ختي كثر مني بعامين و لقيت منها غير الكره و الغيرة مالغري ماما تحبها كثر مني بسكو مشات وراها و خرجت طبيبة مي أنا حققت حلم بابا و درت محامية هو كان ديما يشجعني باش ندافع على المظلومين مي قرايتي مادرت بيها والو جامي نقدر نخدم الخدمة هادي مانقدرش نكون في بلاصة فيها سلاح ولا مجرمين هاد الشي يفكرني بأيام نحاول ننساها ، بابا تعرض لحادث في خدمتو و تشلل و ماما و بنتها العزيزة تخلاو عليه بكل بساطة ولاو يحشمو بيه و يتقززو منو بعد مدة بنات العز كرهو الفقر و جراو ورا الدراهم رجعو لجدي و عاشو عندو و ماجربوش يدورو وراهم ولا حتى يسقيو عليه ....
بعد ما راحت ماما بقيت مع بابا ماكنتش واجدة للمسؤولية مي علا جال بابا ندير كلش ماكان عندنا حتى مدخول و الدراهم لي كان بابا مخبيهم خلاصو كنت ندير كلش باش نجيب المصروف نخدم فالديار نحكم الحوانت تاع الجيران مرات نخدم فالقهاوي نغسل المواعن أي حاجة المهم ندخل دراهم حلال نصرف عليا و على بابا عشت حياة صعيبة فالحومة تاعنا كامل عصابات و مجرمين مي فادوني بزاف علموني نكون قوية و نجيب حقي بيدي ولاد الحومة كامل يعرفوني و يعرفو حالتي كانو يعاونوني بزاف بالدراهم ولا الماكلة مهم وقفو معايا وقفة رجال ، ماما من نهار المحكمة كي تطلقت ما شفتهاش ما تجي ما تطل نساتني و نسات بلي خلات بنتها و مام أنا مع الوقت نسيتها ، إلهام كانت ساعة على ساعة تطل علينا حتى تزوجت و سمعت بعرسها من عند الجيران ماكلفتش روحها عرضتني و الأهم تخبر باباها قطعت علاقتها بينا خلاص ، جارتنا ممرضة مي قاعدة فالدار لا خدمة ولا هم يحزنون ألوغ حكيت معاها و قبلت تتهالا في بابا كي نعود نقرا و نخلصها كل شهر و هي كانت تتسامح معايا فالدراهم بسكو تعرف البير و غطاه تعلمت منها بزاف حوابج على خدمة الدار و التمريض و مام ماما كانت تعلمني بسكو كنت حابة نخرج طبيبة كي نكبر مي من بابا حبيت المحاماة ، كنت خاطيني شغل الدار أصلا ماما بنت العز يديها مكسرين ما تعرف دير والو و ما عندناش من وين نتعلمو مي جارتنا ربي يخليهالي كانت تجي طيبلنا و تعلمني و حتى باقي الجيران ما قصروش معانا يعني لي لقيتو فالبراني مالقيتوش في يما لي ولدتني ، مع الوقت تعلمت شغل الدار و الطياب و كلش و وليت لالات النساء كل صبع بصنعة كنت صح نتعب بين لقراية و الدار مي كي نشوف الفخر في عينين بابا و نسمعو يدعيلي ننسا كلش بعد سبع أشهر نضت الصباح رايحة كشما نخدم و قبل مانروح لازم نبوس بابا و نسمع دعواتو مي ربي دا أمانتو و توفى بابا كان هو الشمعة لي مضويتلي حياتي مي هاد الشمعة طفات و خلاتني فالظلمة ، بلا بيه الدار كانت فارغة و ما نقدرش ندخل ليها ماما ماحضرتش جنازتو و هاد الشي خلاني ننساها خلاص صح كنت نكرها مي بابا قالي بلي الحقد و الكره ماوش راح ينفع و راح يثقلني الحياة قصيرة بزاف و مالازمش نضيعوها فالكره و الحقد لازم ننسا و نسامح و نكمل حياتي ، سمعت لبابا و نسيت و سامحت ، بعد ما خلصت الجنازة إلهام أصرت عليا نروح لدارها مايش محبة فيا مي ماكانش عندها لي يعس بنتها كي تروح تخدم و أنا كنت لا خدمة لا زدمة تخرجت و حكمت الدار ألوغ قبلت باش نلهي روحي ....
ما ننكرش إلهام و رياض (راجلها) فرحو بيا بزاف و داروني فوق راسهم حاجة ما تخصني مي ماكنتش مرتاحة ماحسيتش روحي في داري المهم إلهام و رياض يخدمو و ما يرجعوش حتى لعشية و أنا نبقا فالدار مع غزلان (بنتها ) حبيتها كثر من روحي و حسيتها بنتي ، كنت نتلها بشغل الدار و الطياب و مع الوقت والفت هكا واحد النهار كنت قاعد نطيب درت طاجين زيتون وصاني عليه رياض بسكو إلهام ناقصة فالطياب هوما راحو لخدمتهم و أنا رقدت غزلان و بديت نطيب و نغني بصوتي المزعج حبيت أنا نكبر معاااااك خلقني رب العالمييين ، شعري طوماطيشة و لابسة بيجاما قصيرة كي عدت وحدي فالدار و نتزعبل و مدايرة عرس حتى حسيت بواحد ورايا زير عليا ممبعد حط شوارب البغل تاعو على رقبتي هنا يا خاوتي ضربوني لجنون و العفاريت تفكرت ياماتي الكحلة تفكرت كيفاه حط يديه عليا و كيفاه حطمني غمضت عينيا نحاول نحكم في روحي مي كلش راح كي زاد قالي كي الداب (حاشاكم) : اااااه هبلتيني من نهار جيتي عقلي طار من راسي و مازدتش شفت النوم ، أنا كنت ساكتة و هادية نحاول نتحكم في روحي آخر حاجة حابتها هي ندخل للحبس بتهمة قتل راجل ختي ، هبطلي ذراع البيجاما و بدا يبوس فيا ، غمضت عينيا و هزيت يدي بشوية باش ما يفيقش و جبدت المقلة و نعطيه بيها على راسو و بديت نعيط و نضرب فيه : يا هامل يا فايح يا كلب تزيد تحط يديك الخامجين عليا نقصهملك يا حمار يا طحان تلعب بختي و تزيد تقرب ليا ضربت ضربت حتى تعبت و سمعت غزلان تبكي و هو مازدتش سمعت صوتو طلعت نجري لبست و طميت حوايجي بست غزلان و حطيتها في سريرها رح نتوحشها بزاف ولات قطعة من روحي و علابالي اذا خرجت من الدار مستحيل نرجع ، هبطت نجري شفت مع الكوزينة لقيتو مكسل و مايتحركش يااا ويلي نكونش قتلتو رحت قربت ليه لقيتو يتنفس و أنا مازال مابردش قلبي مليح ألوغ رحت جبت ماء بارد و صبيتو عليه و كي فتح عينيه ضربتو برجلي ل**** و خليتو يسب و هربت طريق كامل و أنا نبكي ذكرياتي كامل رجعتلي صورتو صوتو ضحكتو هدرتو : رح تكوني تاعي نتي هي ورقتي الرابحة ، بديت نترعد خايفة يرجع خايفة يلقاني و يرجعني ليا هزيت راسي نهدي في روحي ، وصلت لدار شميت ريحتو فيها حسيت باﻷمان حطيت حوايجي و سكرت لباب بالمفتاح و رحت للدوش دخلت تحت الماء و نحك في لحمي حسيت روحي توسخت ........
لبست و تكسلت فوق سريري نخمم حتى داتني عيني و رقدت نضت الصباح كنت نوجد فالفطور حتى سمعت الباب راح يتكسر و العياط : افتحي ياخانزة يا خامجة افتحي يا رخيسة يا كلبة إلييييييييييييين افتحي فتحت الباب و هووووب و تجيني كف من حيث لا أدري حكمت خدي و راح نهدر مي و نرجعلها الضربة مي آخر حاجة حابتها هي أني نظهر فالصفحة الأولى تاع الأخبار تحت عنوان الفتاة التي قتلت أمها ، هزيت راسي شفت معاها و الدموع في عينيا سنين فاتو ما شفتهاش سنين ما سمعتش صوتها و ما حسيتش بحنانتها و ليوم كي جات ضربتني قدام دار بابا و الناس تشوف وقاتلي: ينعل النهار لي جبتك فيه يا رخيسة يا خطافة الرجال ما تحشميش تدوري براجل ختك يا كلبة مي حتى الكلب ما يعضش اليد لي وكلاتو مي العيب ماوش فيك العيب فلي رباك يا ***** من اليوم ماني يماك ماكي بنتي و ماعنديش بنت اسمها إلين ، صدقوني ما قاستني بحتى كلمة قالتها غير كي قالت " العيب فلي رباك " علابالي تحكي على بابا خاطرش هي ماقعدت معايا مارباتني ما لعبت دور الأم معايا من هاديك الدقيقة حسبت روحي يتيمة الوالدين ، ضحكت و شفت معاها و سكرت الباب نسمع عياطها بكيت حتى رقدت نضت مدقدقة و عينيا منفوخين لبست و خرجت نمشي ماعلاباليش وين المهم نمشي دموعي في عينيا و الناس تشوف معايا و أنا مانيش سامعة بيهم مشيت مشيت حتى رجليا تعبو قعدت فوق كرسي و قعدت نخمم واش ندير نبقا فالدار ولا نخدم كيفاه راح نعيش طفلة عايشة وحدها و في حي شعبي تعيش فيه غير العصابات و المافيا و المحابسية بلا دراهم ماعنديش حتى باش نشري عشاء ليلة و لا نسلك الكراء ألوغ قررت نخدم مي وين و كيفاه و عندمن بففففففف مانيش خايفة من هاد الشي قد مانخاف نرجع لحياتي القديمة غمضت عينيا و زيرت على يدي و قررت بلي مهما كان الشي لي راح نديرو مانيش راح نزيد نتفكر ولا نحكي على واش صرا ، أنا نخمم و نسمع صوت سبان و كلام فاحش ما عطيتهمش أهمية بسكو حاجة كيما هادي نشوفها كل يوم يكونو ولاد الحومة لصقو بين بعضاهم بسبة شي طفلة مي زادو فيها المرة هادي و أنا قتلني الفضول و حب التقرعيج ديجا ولاد الحومة يعرفوني و مستحيل يضروني بحاجة عندهم الراجل عيب يمد يدو على مراة ألوغ مشيت بشوية و بلا حس وقت المغرب و بدات تظلام و كنت خايفة أول مرة نبقا خارج الدار لهاد الوقت نمشي بشوية حبس قلبي كي سمعت صوت الرصاص حطيت يديا على وذنيا علاه كل مانحب نهرب من الماضي تجي حاحة تفكرني فيه زيرت على يدي و مشيت منين جا الصوت لازم نواجه خوفي ....تبعت الصوت وصلت قدام واحد الخرابة ، طليت شفت واحد مرمي فالأرض و الدم مغطيه كامل و خمس رجال لابسين لكحل يضربو فيه و جامي شفتهم فالحومة ديجا ولاد حومتنا مشرشحين و يخدمو عمرهم كامل ما يلبسوش اللبسة هادي ، بعدت كامل الأفكار لي في راسي و رجعت ورايا الصراحة حبيت نقرعج و نفهم كتر مي خفت ألوغ مشيت وصلت لنص الطريق و جا في بالي هاداك لي ضربوه كنت حابة نعاونو مي قلت واش دخلني و مشيت مبعد تفكرت بابا كان يعاون الناس كامل لي يعرفو ولي ما يعرفوش و كي نسقسي علاش يقولي يجي نهار و تحتاجي واحد يعاونك و القدر ماجابكش هنا غير باش تشوفي لازم يكون عندك دور فالحكاية ماتكونيش ديما شخصية ثانوية ، خممت بلي لوكان جا فالموقف هادا أكيد راح يعاونو بالشي لي يقدر عليه ألوغ رجعت للبلاصة هاديك و أنا علابالي بلي هاذا أغبى حاجة نديرها مي رح تعاوني باش نواجه خوفي ، ماسمعت والو طليت لقيتهم راحو وخلاوه مرمي قربت ليه ميتة بالخوف و كامل لي شفتهم مقتولين جات صورتهم في بالي هزيت راسي نبعد فهاد الأفكار و حكمت يدو و قربت ليه مازال يتنفس تبسمت بلا مانحس و فرحت و درك كيفاه ندير معاه ما نقدرش نخبر لابوليس ماعلاباليش واش مداير ، نديه للدار و أنا ما نعرفش أصلو من فصلو ولا واش وراه و علاه ضربوه ولا نخليه يموت بففففف راسي حبس قعدت قدامو حاولت نفيقو حركتو ضربتو والو هزيت يدو حطيتها على كتافي و حاولت نوضو بالسيف قدرت نوقفو ثقيل بزاف مقارنة مع قوة الذبانة لي عندي حطيت يدي على صدرو و سندتو بيني و بين الحيط و نمشي بالشوية و كي نغلب نحبس ممبعد نكمل و نحاول واحد ما يشوفني ، دارنا مايش بعيدة بزاف فتحت الباب دخلتو وصلتو للبيت تاع بابا و حطيتو فوق السرير و قعدت قدامو نلهث كي رتحت رحت نفتش في حوايج ماما لقيت حوايجها تاع الخدمة و أخيرا فادتني خدمتي القديمة في حاجة ، نحيتلو الرصاصة و خيطتلو الجرح ، كملت مسحتلو الدم و نحيتلو ساعة و خاتم من يدو و سباطو مبعد جبدت حوايج تاع بابا و بقيت نشوف معاه كيفاه راح نبدلو حوايجو ممبعد تشجعت و عافرتو نحيتلو التريكو مليان دم جبت ماء سخون و مسحتلو الدم لي في صدرو يا ويليييي داك الكور طابلة تاع التشيكولا مي يخوف صدرو كامل موشوم إليين ماوش وقتك ، لبستلو تريكو من عند بابا جاه ضيق شوية مي لاباس و درك المهمة المستحيلة السروال .....غمضت عينيا و حطيت يديا عالحزام راح نفتحو ما قدرتش ألوغ فتحت نص عين و نحيتها ممبعد فتحت السنسلة مع لمس بعض الأماكن المحرمة من غير قصد طبعا خدودي رح يطرطقو مالغري ماوش يشوف فيا نحيتلو السروال هووووب و المفاجأة مايروحش بالكم لبعيد يا منحرفين ، غير نحيتلو السروال طاح منو سلاح قلبي طاح رجعت ورايا حتى خبطت فالحيط و عينيا ماتنحاوش من السلاح كانت عندي رغبة كبيرة نهزو مي قاومت غمضت عينيا و جبدت تركو هزيتو بيه و لفيتو و لحتو فالخزانة ، قعدت نتفس حتى هديت ، عدلتو و غطيتو و سكرت عليه الباب بالمفتاح ، مالقيت والو في حوايجو غير دراهم و تلفون بالكود عييت ، غسلتلو حوايجو ممبعد بدلت لبست بيجاما بلو نوي قصيرة و هزيت شعري لفوق و حطيت راسي عالمخدة نخمم شكون هادا و علاش ضربوه و واش من بلية حطيت روحي فيها لازم نبعد عليه بسكو كل حاحة فيه تفكرني فالشبح ، غير جافي بالي بلعت ريقي ، خممت خممت حتى وجعني راسي تغطيت و رقدت بعد ساعة ولا ساعتين نضت مخطوفة على صوتو يعيط من الوجع رحت نجري فتحت الباب و دخلت لقيتو يغلي بالحمى ساعة كاملة و أنا قدامو نبدلو فالكمادات مي ماكان حتى فايدة و ما حبش يفطن باش نقدر نشربلو الدوا بفففف كيفاه نديرلو خممت مبعد نضت لبست و خرجت عند عصام جارنا فاتح فارماسي كسرت عليه الباب فتح لابس شورت و كرشو قبلو تقول حامل بتوام فالشهر العشرين و شعرو أونفان ثلث شعرات لي عندو واقفين تقول خيط تاع تريسيتي و صدرو مغطي بالشعر تقول شي قرد و قالي بصوتو لي يجرح طبلة الأذن : اووووه زارتني البراكة واش الزين توحشتني و تبسملي بانو سنيه صفورة و مكسرين تقول شي بناء فوضوي - أنا : عصاااام بلا رومانسياتك ضرك و أعطيني ابرة تاع الحمى - هو : عمري مريضة جوزي نتهلا فيك نحطك في عينيا - أنا : عصاااااااام - هو : أوكي أوكي اصبري راني جاي ، عطاهالي خلصتو و ديتها نجري دخلت للدار لقيتو مازال على حالو مي الحمد لله بعد الابرة 💉 راحت الحمى ليل كامل و أنا ساهرة معاه خفت تزيد ترجعلو الحمى كي لحقت السبعة الصباح دخلت دوشت و لبست روب بلو قصيرة شوية و طلقت شعري ينشف و شربت قهوتي خرجت جبت حوايج للدار و رجعت لقيتو مازال كيما خليتو سكرت الباب و رحت للكوزينة و جدت الغداء درت شربة و سلاطة ......
💕💕💕
تتبع .....
أنت تقرأ
bang bang (don)
Actionبونسوااغ ... راح نهبط حكاية كتبتهاا #ميساء شاابة بزاف بزاف راح تعجبكم نتمنى انكم تبعووها 💕💕 💋💋💋💋 . . . . . . ترتجف الجبال لذكر اسمه ، ينحني أعتى الرجال في حضرته ، بروده يضاهي جليد الشمال ، و قلبه يماثل صخور الجبال ، تفننت الحياة تمزيقه و رمت...
