الجزء السابع♥️
ابو سارة... ولك عصام مو سارة تاخرت حيل صارت ساعة 4 وهي مجاية
عصام... عمو الله يخليك هي يومية تتاخر تلكيها دتفتر بالمول
ابو سارة... اندك الجرس الخدامة فتحت الباب شفت السايق والدموع بعينه
ابو سارة.. خير وين سارة
السايق... يعني مجتي...
ابو سارة.. لا ليش هي مو وياك
السايق.. لعد الي جنت خايف منه صار اعذرني حيل مكدرت احافظ عليها
ابو سارة.... هجمت عليه ولزمته من ياخته لك وينها وين وديتها
عصام.. اهدء عمو خل نفتهم عمو سارة وين
السايق... خطفوها مني
ابو سارة... منو خطفها شكد جانو شنو نوع السيارة احجي
السايق.... الي شفته سيارة وحدة وجان بيها واحد بس دعم سيارتي وضربني وراها محسيت على اي شي وقبل شوية صحيت بمكان معرفت حتى اني بيا منطقة اخذت تكسي وجيت هنا
ابو سارة... يعني واحد كدرلك لك شسوي بيك هسه زين شفت شكله عرفته
السايق... والله يا ابو سارة صار كلشي بسرعة مشفت شي
عصام...عمو عوفه هسه دشوفه شون تعبان روح عمو روح وبقي تلفونك مفتوح حتى نتواصل وياك
ابو سارة... خابر كل الجهات الامنية اريد بنتي اليوم تبات يمي منو هذا منو الي تجرأ علية ويخطف بنتي منووو والله لشرب من دمه
عصام... عمو بس هدي الله يخليك ليصيرلك شي
ابو سارة... ولك هاي بنتي ولك هاي سارة مدللتي ربي دخيلك.... مر 4 ايام وسارة ماكو جنيت مظل مكان الشرطة مدورت بيه حتى المستشفيات ومالها اثر انتظرنا تلفون لان اكيد شغلة فلوس ومحد خابر الى بيوم جتني رسالة من رقمها على الواتس اب فديو فتحته وياريت مفتحته سارة حبييتي مشدودة وتنضرب هاي الي محد جان يصيح عليها حتى والله لقتلهم واحد واحد وبايدي المشكله ماكو اي شي اكدر اوصللها من خلاله ماكو ماعندي غير اظل ادور وحالتي الصحية حيل تعبت ادمرت
ام وليد....كمت صليت الفجر وفتت للمطبخ اشرب ماي سمعت صوت مي باوعت من الشباك البوري مفتوح لان اني اخلي الصوندة بالحديقة حتى ازكيها بس الظاهر المي جاي قوي وفالتة الصوندة طلعت سديت البوري وسمعت صوت مثل صياح بس حيل بعيد لان دنيا فجر ويوم جمعة هدوء جانت حيل تبعت الصوت حسيته ورا البيت رحت هناك وايدي على كلبي لا الجلب الي كال عليه وليد موجود سميت بسم الله ورحت شكد اتقرب الصوت يعلى بعدين سمعته من السرداب متت خوف ياربي صوت جن انس هذا هو السرداب متروك بسم الله شنو هذا
سارة... تعبت من الصياح بعدين سمعت صوت قريب مني استمريت بالصياح بكل قوتي اخر شي سمعت صوت مرة
ام وليد....منو هنا منو ديصيح انس جن
سارة... اني اني عفية طلعيني منا الله يخليج
ام وليد... يمة شجابج هنا منو انتي
سارة... خطفني واحد وخلاني هنا طلعيني عفية قبل ميجي بسرعة
ام وليد... بس اكو قفل على الباب لحظة بس...
فتت للمطبخ بسرعة وجبت العدة وظليت ادك ع القفل الى ما انكسر فتت ولحد هسه مديستوعب عقلي انو اكو انسانة جوا فتت وشفت بنية مربوطة وبالكاع حالتها تصعب ع الكافر والكدمات عليها مبين اثار ضرب
سارة... يله خالة بسرعة الله يخليج طلعيني ليجي
ام وليد... يمة منو ليجي شجابج هنا
سارة... خالة الله يخليج مو وكتها بس فكيني
ام وليد.. اي اي هسه
سارة... فكتني وفلتت اركض اريد اخلص وهاي المرة تصيحني وتريد تفتهم منو اني
وليد... منمت الليل كله افكر بالي داسويه صح لو غلط تعبت انقهرت على البنية حيل ظليت افكر لاتموت واكسب خطيتها معرف شسوي شوية وسمعت صوت وحجي تخبلت نزلت ركض وشفتها طالعة ودتريد تنهزم لزمتها راسا...
سارة... عوفنييي الله يخليك عوفني مارجع جوا بعد مااااا ارجع
وليد... لج انتي شطلعج
ام وليد... طلعت من السرداب وشفت وليد لازم البنية قوي... وليد هاي منو
وليد... يوم مالج دخل انتي شون طلعتيها
ام وليد... ولك انت الي حابسها هنا
وليد... يوم مااالج دخل فوتي جوا خل ارجعها واجي افهمج
سارة... خالة ابوس ايدج لتخليه يرجعني مااريد اقتلني ولترجعني خليني اخلللللص متتتتت جوااااا ارحمنيي
وليد... لج هششششش صوتج
ام وليد... ضليت مصدومة معرف شصرف بس كدرت الزم الهدوء... اطمئني بنتي للسرداب متفوتين بعد تعاي ويايه
وليد... يوم شدسوين انتي
ام وليد... ولا كلمة حسابي وياك بعدين
تعاي بنتي تعاي
سارة... اخذتني المرة من ايدي وفوتتني لبيت جان بسيط بس مرتب وحلو ومدا اعرف اني وين ببغداد خارج بغداد مدا اكدر اركز
ام وليد... اخذي يمة هاي هدوم نظيفة فوتي للحمام نظفي نفسج ولتخافين اني واكفة هنا وحرجعج لاهلج اطمئني
سارة... فتت للحمام وسمعتهم يحجون هو وامه
ام وليد... فهمني هاي منو
وليد... هاي بنت الي خرب حياتي وضيع سنتين من حياتي بالسجون والتعذيب
ام وليد... ولك وهاي شعليها لو انت رجال صدك تروح عليه هو مو تتسبع بمرة
وليد.... يمة اريد اكسر خشمه
ام وليد.. اني هيج ربيتك لك شصارلك لو من عاشرت المجرمين صرت مثلهم هااا حرام عليك مصدكت رجعتلي تشيل عني شوية تريد تروح من ايدي مرة لخ ليش تفوت روحك بالمخاطر
وليد... نزعت قميصي.. يوم شوفي ماكو مكان بجسمي خالي من التعذيب انتي تدرين اني شعشت جوا وبعدين انتي عشتي بدوني وممتوا خليني اريد ابرد كلبي
ام وليد... خصم الحجي البنية ترجع لاهلها اليوم
وليد... يوم هاي اذا رجعت كلنا نروح بالرجلين انتي وعلي هم مرح تسكت واني للسجن مافوت بعد
ام وليد... لعد من خطفتها مفكرت هيج هذا هو انت تتحمل نتيجة افعالك لعد شون جنت ناوي تحلها تقتلها للبنية مثلا
وليد... ما اعرف مفكرت
ام وليد.... مفكررررت.. المهم البنيه ترجع ومالي دخل بالي حيصير تتحمل نتيجة افعالك حرام عليك من الله وين نروح ربك طلعني دنقذ هلمسكينه مخليها جوا بالسرداب بالرعب ليش ياظالم من النهاية لا انت ابني ولا اعرفك اذا مرجعتها
وليد اوف يوم اووف.. عفتها وصعدت احس عقلي نشل مجنت عامل حسابي امي تعرف ابد
سارة... سمعت الحجي واطمأنيت من ناحية امه بس لو يموت هو ماعوفه اله اخيسه بالحبوس على الي سواه بية طلعت من الحمام واخذتني امه للممطبخ مسويتلي اكل جنت ميته جوع اكلت وارتاحيت شوية
وليد.. نزلت للمطبخ شفتها كاعدة تاكل هي وامي ركضت قفلت الباب واخذت المفتاح
ام وليد... هاي شدسوي ناوي تحبسني اني هم
وليد... لتخافين ارجعها بس بطريقتي مو هي تنهزم
سارة.... ظليت ساكته اخاف احجي لا يرجعني للسرداب راح الولد ولزمتني امه
ام وليد... بنتي لتخافين لاهلج ترجعين ان شاء الله بس الي رجاء واحد لتبلغين عليه الله يخليج ماظلي غيره
سارة... الله كريم... مكدرت احجي غير شي لا هي هم تغير رأيها ومترجعني لاهلي فوتتني لغرفتها جان طفل نايم بيها كلتلي هذا ابن بنتها الميتة
ام وليد... ارتاحي هنا زين ولتخافين اني موجودة محد يكدر يطخج بعد
سارة... راحت وتاكدت ابتعدت عن الغرفة وكمت ادور بالغرفة اريد اي مستمسك عنه شفت هوية مال نقابة قديمة عرفت بيه مهندس بيها اسمه الكامل ومواليده وهذا الي جنت اريده ضميت الهوية بهدومي ونمت شوية جنت كلش تعبانة من الضرب الي ضربنياه هذا الحقير
