فدا:
بعد ايام قرر رضا نطلع من البيت وامه ما خلت شي ما حجته عليه بالبدايه طلعنا لبغداد لبيت عباس فتره واعتبرها رضا اجازه النا من المشاكل اني حسبتها شهر شهرين بس بقائنا ببغداد طال سنوات اشترينا بيت وسكنا بي طبعا هو استمر يروح كعدات وفصول بس الشيخه صارت لابن عمهم غانم
طبعا كلش صعبه كانت هالخطوة بالنسبه الهم بس رضا كل اللي سواه لخاطري ولاجل راحتي
نسيت كل الدنيا ونسيت كل القهر وياه وحتى عمتي نسيت اللي سوته بيه لان خي صارت تتصرف بغير شكل لان شافت شمس واستحمدت ربها عليه
شمس الفقيره صارت ما تنجرع تمشي الماي من جواهم وما يدرون تعاملت وياهم بمكر وحيله وكانوا يستاهلون بحيث سوت اصلاح كامل للبيت
تدرس كليه وعدها اولاد اثنين وخاشه بعيوننهم بيهم عباس اذا اعترض يروح بخبر كان فاضطر يسكت ويصير بس متفرج مرات الومها على تعاملها ومرات اسكت لان ام رضا ما يفيد وياها بس هالشكل اني ما عرفت اعيش لان احرك بروحي واهتم هي كانت مطنشتها كلش
كنت اروح خطار وام رضا حست بروحها غلطت ويايه وصارت تتوسل رجوعنا بس رضا يرفض مل من المشاكل وخصوصا بعد ما شاف الراحه واحنا بعيدين بهاي السنوات دلالي اله صار اضعاف وعوضنا ايام القهر اللي شفناها ببداية زواجنا
بناتي كبروا مروة صار عمرها ١٤ سنه ومريم خمس سنوات وكل هذيج السنين اتوسل برضا اخلف وهو يعاند لحد ما بطلت من هالشي
رجعنا لبيتنا القديم لان ام رضا كلش انكسرت ورضا ما يهون عليه يشوف امه هيج ورجعنا لخاطرها واني خفت لا امر بموقفها بيوم وابني يخليني اتوسله يرجع
بقيت الح على رضا يرجعنا من دخلنا للبيت تلكتنا هي وهالمره صدك منصلح حالها
ام رضا:هلا يمه هلا بيكم توه بيتي نور يا عمارته واهله
رضا:منور بيج حجيه وهاي رجعنا لاجل خاطرج
ام رضا:يجبر خاطرك يمه
تقربت ابوسها بس تفاجأت بحضنها وبجيها خلتنا كلنا نبجي عباس وشمس فرحوا كلش برجعتنا جهالهم وبناتنا انطلقوا بس رضا يضوج من ايهم وخايف على مريم وكل كا يجي يمها يصيح بعباس شيل ابنك الاجكم من يم بنتي واحنا نضحك وعباس يقهره يكله هاي الحلوة منهيه لابن عمها فنكم تنطوها ورضا يكله ما انطيها الكم انت ومرتك مشاخيط
ورجعت حياتنا الاولى ورجعت بين اهلي واحبابي بيومها كنت فرحانه بحيث نسيت رضا وبقيت اسولف واضحك وياهم لحد ما اجتني مريم كالت ابوها يصيح رحت لغرفتنا القديمه اووف شكد احبها دخلت وجهه معصب ومبين زعلان
-ها فدا هذا اول يوم رجعنا نسيتي عندج رجال ما تكولين احضر هدمته نومته اشوفه محتاج شي نسيتي
-لا والله اعذرني بس بعد وكت
-ساعه تسعه كل يوم انت تتفرغين بس الي عسى ما البيت متروس اوادم هالوقت انت يمي
ضحكت وتقربت حضنته
-كلي الك والله شلون انساك وانت النفس
-اي هيج هاي السوالف الحلوة
لف ايديه عليه وحضني وهمس باذني
-ها تريدين اخ للبنات
-شنووو؟؟؟
-وجع شكو فزيتي قابل كلت الج شي حرام
-لا والله تحجي صدك
-اي شكو بيها غرفتنا مشتاقه النا واني هم مشتاق الها
كمت اركض ادور شي البسه اعدل نفسي غرفتنا على حطتها لان رضا ما قبل نشيل الاثاث وكل ما نجي خطار نبات بيها
انخبصت اطلع الي ثوب واريد احط لوجهي شي هو تقدم وجرني من خصري
-تعالي كل شي ما اريد اريد حبيبتي اللي اعرفها
