فالصباح بكري كانت ليلى ناعسة فناموسيتها مع عمر وبينهم ذكرى للي فاقت بكري ذاك النهار كغير العادة بسبب شي برد ضربها. كانت هي وعمر فايقين حتى هما كيلعبو بيديدات ذكرى، وماشي بزاف حتى بانت أريج جاية وهي كتحك فعينيها وهازة معاها نونوسها الصغير.
تلاحت معاهم فوق الناموسية حتى تكات جنب ذكرى وقالت:
_شفتو الناموسية قادانا حنا بربعة..من ليوم نرجعو نعسو كاملين فيها باش ختي ذكرى ماتخافش فالليل ويبقاو يجيوها الكوابيس الخايبين.
شاف عمر فليلى وتبسمو لبعض، رد عمر:
_ممم واش متأكدة بلي ذكرى للي كتخلع ماشي شي واحد آخر؟
عقدت أريج حجبانها بطفولية وردت بلا ما تشوف فباباها:
_وشكون غيكون الا ماكنتش هي؟ انا اصلا كبيرة!
شيرت ليلى لنونوس وقالت:
_يمكن باباك كيقصد نونوس ديالك أ اريج..ولكن اجي ماشي باقي لحال باش تفيقي؟
رجعت اريج شعرها لور بيدها وردت وهي كتحك عينيها:
_لا غير ملي فيقتني ذكرى ببكاها ماقدرتش نرجع ننعس مزيان.
شافت فذكرى وسولتها:
_واش باقي انتي ماغتقولي سميتي؟ قلتي ماما وبابا وأريج جاتك صعيبة؟ صافي عيطي لي غير بجي صافي.
***
فدار نعيمة وبالضبط فالصالة كانت هي ومروان كيشربو اتاي، كان ذيك الساعة عاد جا مروان يدوز عليها ويشوفها كيف بقات. ترددت نعيمة باش تسول:
_مروان واش انت قلقتي ليلى فشي حاجة ولا لمحتي لها لشي حاجة؟!
طلح حاجب ما فاهمش قصد خته، سولها:
_كيفاش ثاني قلقتها علاش انا منين غنتلاقاها بالسلامة گاع؟
حدرت راسها وهو يقرب منها:
_واش بانلك انتي شي حاجة ولا هي قالت لك هاذشي؟
هزت فيه عينيها:
_لا غير هي بينت لي بلي كتفضل تجي تزورني فالوقيتة للي ماتكونش فيها باش ناخذو راحتنا..وانا شي حاجة خلاتني نشك بلي هي كتفادى تلاقاك راك عارف هي دابا مرا مزوجة.
بقا مروان ساكت مدة عاد قال وهو كيبعد منها:
_اوا للي ريحها تديرو... حتى انا مرة أخرى نعرفها عندك نحاول مانجيش حتى تمشي باش نخليكم على راحتكم.
خرج مروان من باب العمارة وفتح باب سيارته، ركب وجبد تيليفونه كيطلب رقم قبل ما يحطو حدا وذنه وهو كيقول:
_دابا نشوفو واش غتبقاي بعيدة أليلى ولا غيوقع العكس!
***
وصلت ليلى قدام باب العمارة وفيدها ذكرى مع كيس ورقي من الصيدلية، هزت عينيها فالسما لقاتها مغيمة وباين ان قريب الشتا غتصب، نزلت عينيها لذكرى للي كانت قربت تنعس وجات داخلة.
جاها صوت مروان من لور وهو كيعيط باسمها، دارت لعنده مستغربة تواجده قدام دارها فحين هو قرب عندها كيقول:
_سلام ليلى لاباس؟ واش انتي كنتي خارجة؟
أنت تقرأ
نبض الحب (بالدارجة)
Romanceهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
