جوري

البارت الاول

الجزء الاول

صباح الخير ان كان صباحا
مساء الخير ان كان مساءا
الوقت : الساعة الرابعة مساءا
المكان : غرفتي الصغيرة في الطابق العلوي من البيت
جنت فاتحة اغاني كاظم وشادة وصلة على خصري واركص واباع على نفسي بالمراية
هاي جانت ونستي مجنت اميل للنت
جان عندي مسجل صغير واجيب كاسيتات من التسجيلات اشغل بي اغاني واظل اركص
هم رياضة وهم اونس نفسي
اسمي جوري عمري ١٨ سنة صف خامس اعدادي تأخرت سنة بالرابع
بصراحة مستواي الدراسي مو شي
وماعندي واهس بالدراسة
واهسي جان بالاغاني والافلام العربية الابيض والاسود خصوصا من تطلع شادية وعبد الحليم لو سعاد حسني لو رشدي اباضا اويلي اموت عليهم
اتخيل نفسي مكانهم بالفلم واعيش الدور
وجان عشقي روايات عبير جنت اروح من المدرسة للمكتبة الي براس الشارع واشتري بيوميتي قصتين وارجع للبيت اصعد لغرفتي بحجة عندي دراسة واحطهة بنص الكتاب واظل اقرى واسهر وياهن للصبح
اني عايشة وية ابوية وامي واخواني ثنين واحد متزوج  سالم والثاني طالب كلية سلام
ماعندي خوات لكن الله نعم علية بزوجة اخوية
كلش حبابة وبنت اوادم اكبر مني بسنتين لكن كانما اختي الي ماولدتهة امي
اندكت الباب
- جوري ولج جوري كومي
- شكو ياستار شبيج تلهثين
- لج جوري تتذكرين بيت ابو احمد الي نزلو قبل شهر مقابيلنة
- اي شبيهم
- اجتي هسة امهم ومرة ابنهم الچبير واختهم
- يا دخلي انزل اسويلهم چاي عبالي مدري شبيج
_ لج راح املخج ياچاي كومي لبسي ملابس مرتبة ونزلي يردوج
- ليش بلا شيريدون مني
- لج خبلة جايين يخطبوج لابنهم مصطفى الي شفنا هذاك اليوم ابابهم واكف
شايفج وعاجبتة وداز اهلة يخطبوج
- بشرفج !! هذا الشاب الحلو الابيضاني
- اي ولله العظيم كومي يلا عدلي نفسج ونزلي
رتبت نفسي ولبست بنطرون نيلي وقميص وردي قصير ولميت ظفيرتي وحطيتهة صفح شعري اشگر وناعم وطويل بشرتي بيضة وجنت مااحط مكياج حتى حفافة محافة حاجبي ثخين ومشمور وعيوني كبار عسلي رومشي كثيفة وباقي ملامحي نازكة
انطي شبه لامي وماخذة من جمالهة الكردي
ابوية عربي وامي كردية
نزلت وسلمت وقدمتلهم عصير
- ام سالم عيني احنة ننتظر جوابكم لان الولد مناقصة شي خريج ويشتغل بشركة اهليةواحنة ماعدنة احد بناتي متزوجات وابني احمد عندة مشتمل فوكانة وجوة اني وابو احمد بس ومصطفى الحمد لله بيتنة چبير وامورنة الحمد مستورين واني تعبت اريدلي جنة وياية جوة ولو چنتي ام منار ممقصرة بس هي هم مرة موظفة وعدهة جهال ومتلحگ واحنة شفناكم خوش ناس والنعم منكم وطالبين القرب منكم وشتطلبون احنة بخدمتكم
- نتشرف عيوني ام احمد ساعة المباركة هاي ولله لو علية اكلج كبعيهة واخذيهة
بس انتي تعرفين الاصول وهي عدهة اب واخوان اشاورهم واردلكم خبر
- ماشي ياگلبي ننتظر جوابكم
نترخص احنة
امي حجت وية ابوية واخواني ومجان عدهم مانع غير بس الدراسة والولد كللهم ماعندي مانع تكمل يمي
مشت الايام واني محد اخذ رإيي لان حسو بية قابلة
الولد حلو مرة شفتة وانعجبت بي لكن متخيلت انو هو هم انعجب بية
بيوم قررو الجمعة يجون الزلم ويجيبون سيد ويعقدولنة
مشت الايام بين التحضيرات والترتيبات واجة يوم الجمعة وياريتة مااجة !!!

يتبع