جوري

البارت الرابع

الجزء الرابع

انفتح الباب وصرنة وجه بوجه
خزرني وراح واني كملت طريقي ورجعت لغرفتي ماادري شكد بقيت افكر بالحجي يعني فوگاهة الاستاذ هو مرايدني ومعاجبتة
ليش اني دزيت عليكم وكتلكم اخذوني ،، بسيطة اذا مااحرگ گلبك باجر شوف شلون راح اوافق واخليك انت الي تتوسل اعوفك
الة اشربك من نفس الكاس الي سگيتني منة
بقيت سهرانة افكر وحسيت خيوط الفجر بدت تظهر وبدة يوم جديد
واني حسيت براحة نفسية لان رسمت بمخيلتي خطة انتقم بيهة من هذا الشايف نفسة بلكت هو يمل ويعوفني وارجع لاهلي
نزلت لكيت عمي كاعد كعدت يمة
- صباح الخير
- هلا هلا بنيتي تعاي كعدي بعد عمج يمي ان شاء الله هسة انتي احسن
- الحمد لله عمو
- يلا سمي وتعاي ناكل سوى مرة عمج هسة تجي ومها تتأخر بالنوم
جنت حيل جوعانة ،، صبيتلي استكان چاي وبديت اكل وچان يطب علينة فهد وجهة ميتفسر مبين اعصابة تغلي وخصوصا من شافني كاعدة اتريك
نفسي انسدت من شفتة لكن ظليت امثل اكل حتى اغثة اكثر
- مكتلي عمو شوكت يجون اهلي
- ان شاء الله باجر حسب تساهيل رب العالمين
- يعني باجر عرسنا
فهد رفع راسة وباوعلي بغضب ورفع تك حاجب
- ان شاء الله بنيتي العاقلة اي هيج اريدج عاقلة ورزنة
كملت ريوكي واني مرتاحة لان حسيت خطتي ب ت تنجح
صعدت للغرفة سبحت وبدلت وكعدت انتظر مها تكعد لان طگت روحي مااريد انزل واشوف الوجوه العكرة فهد وامة
بقيت الوب دااطلع من الغرفة وحسيت اكو شخص گبالي وگف رفعت راسي شفتة فهد بسرعة ردت انهزم وافوت للغرفة لزمني من ايدي وجرني
- ها شو شردتي !! اشوفج عجبتج شغلة العرس
مو البارحة الطريق كلة تبجين وتنوحين على خطيبج
شو اليوم تسئلين على العرس هيج عندج عادي يومية خطيب جديد
- عوف ايدي اولاً ،، بعدني مو حلالك حتى تكمش ايدي براحتك
وثانيا انتو قررتو عني بعد شيفيد العناد والبچي غير بس اضر نفسي شفت احسن حل امشي مثل متريدون
- هيج فقيرة انتي واني ماادري
عبالج من تصغرين عيونج وتطبكين حواجبج راح اصدك انتي بريئة وفقيرة
بسيطة الايام طويلة ونكتشف شخصيتج العظيمة
جريت ايدي وفتت للغرفة ركض واني جسمي كلة ينفض
كعدت مها وكالت لازم نروح للسوك نجهز لوازم العرس مقبلت اروح وياهم راحت هي وامهة وجابولي ملابس ومكياج وسيتات نوم وشغلات هواية
اهل البصرة معروفين بنفسهم الطيبة وفعلاً شفت هذا بيهم يعني ماقصرو بشي جابولي كل لوازم العروس تفاجئت
صاحتنة مرة عمي وكالت نظفو هاي الغرفة راح يجبون الاخشاب
نضفناهة اني ومها وعطرناهة وجابو الاخشاب غرفة تركية لون ابيض وبيجي كلش نازكة وحلوة
وجتي مها وفرشت عليهة فرشة بيضة وطشو عليهة چكليت
وعلگت بردات جديدة
واني صافنة بيوم واحد كملو كل شي والناس تبقى شهر تجهز
دخل فهد وامة هلهلت وراوتة الغرفة
الغرفة تصير بالطابق الثاني مقابيل غرفة مها
بقيت من ورة الباب اباعلة شلون طافرة روحة وطلع منهة بسرعة من دينزل لمح خيالي بسرعة سديت الباب ورجعت ليورة
اجة يوم زواجنة ومن الصبح اجوي امي وزهراء ماما تبجي وتحضن بية
- بنيتي متمنيت هيج يكون عرسج لكن شنكول حسبي الله على الي چان السبب
ابوج راح يموت يلوم بنفسة وليلة مدينامة
- ماما خطية بابا ديري بالج علي صح خطأ بس كلنة بشر وخطائيين
وفهد خوش ولد وعمي كلش حباب لتخافين علية
اخذوني للصالون واجرولي بدلة طبعا اني مثل اللعابة يلبسوني وينزعوني ويمكيجولي واني لاحول ولاقوة
بيت عمي چان بمنطقة الجزائر منطقة راقية بالبصرة وحلوة وبيتهم هم چان كلش حلو واثاثة مرتب
باوعت على نفسي بالمراية وچانت النتيجة حلوة
زهراء شبكتني وگالت شلون راح نتفارك لج البيت وحشة بلياج جوجو
اتمنالج من كل گلبي الله يسعدج
رجعنة للبيت وبقيت كاعدة شوية ولبسوني حجاب طويل فوك البدلة ودخلو سيد ودخل ويا فهد وعمي واخوية سالم وظل يردد واني اعيد ورا ونفس الشي سوة فهد لكن احسة بركان على غفلة ينفجر
باوعت علي واول مرة انتبه على محلامحة
عيونة واسعة وحواجبة ثخان
وخشمة طويل لكن بترتيب وعندة لحية خفيفة
لونة حنطي
جان لابس قاط نيلي وقميص سمائي
عقدلنة السيد وطلع وطلعو ويا وبدت الناس تهلهل وتصفك وتبارك
- ماما لعد ابوية وين
- ابوج مكدر يجي جوري ابوج تعبان نفسياً
سكتت وبلعت الغصة يعني ليش يابابا فوك مورطتني بهالزواج متحضر زواجي
دخل العريس ولبسني حلقة والذهب نطا لامة تلبسني كال مااعرف
وراهة عشو الناس وصعدوني لغرفتي
امي وزهراء شبكوني واني دموعي مبطلت ابد ودعوني
وامي وصتني وصايا على الزواج والمرة وشلون تتعامل وية رجلهة
طلعو كلهم وبقيت وحدي بالغرفة اباوع عالسكف
وادعي بگلبي انو الله يوفقني حتى مااضعف وابقى مستمرة بخطة الانتقام مالتي
هناك وسمعت هلهولة وصوت اقدام عالدرج
انفتح الباب!!!
وصرنة عين بعين !!!
وللقصة تكملة ..............