الجزء الخامس
فتح الباب وصرنة عين بعين اقترب مني وگلبي گام يدگ الف دگة بالثانية
فتحت عيوني وجسمي ظل يرجف
اتقرب مني ووگف مقابيلي نزل راسة ودنگ علية
دخيلك ياربي ساعدني
- ها شو اشوفج ترجفين ،، چا وين القوة واللامبالاة الي چنتي عايشتهة هاليومين لو چانت كلهة تمثيل
چا شو صرتي چنچ فارة هسة
شوفي ياحلوة هاي الحركات والخوف ماالة داعي
اصلا مالي نفس بيج ولااريدج
نزعي بدلتج ولفي راسج ونامي مااريد اسمع حسج
دار وجهة وطب للحمام !!!!
صحيح اني چنت اتمنى ميطخني ولا يتقربلي
بس كرامتي انهانت وحسيت مثل الراجدي اجاني من هو الي رفضني
بس وحق هذا الله الة اخليك تتمنى تطخ شعرة مني
نزعت بدلتي وحطيتهة على صفحة
جريت دشداشة من الكنتور ولبستهة
ومسحت مكياجي ومچنت مسوية تسريحة مجرد فاتحة شعري وحاطة تاج
نزعتة ورحت للفراش تمددت واني اغلي من القهر وادعي بداخل گلبي
ظليت استغفر رب العالمين لحد منمت شوية وحسيت واحد نام بصفي حاولت ابقى على وضعي ومااطلع صوت او اتحرك مكدرت ظليت احوص
- دخيل ربج شكد تحوسين نامي عاد اريد انام
مجاوبتة وانطيتة ظهري ونمت
كعدت الصبح على صوت هلاهل فزيت بسرعة لكيتة نازل
كمت غسلت وجهي وردت انزل تالي كلت لا ولله الة اخبلك
رحت طلعت گلبية بيضة وحطيت مكياج قوي ورشيت عطر وفتحت شعري
دانزل وانفتحت الباب ظل فاتح عيوني ويباع علية من فوك ليجوة
- شمسوية بروحج ؟؟؟
شنو هالمكياج هذا والشعر وين رايحة لحفلة
درت وجهي وردت انزل بس هو جان قريب عالباب جرني من ايدي
- شنو شو ماتجاوبيني !!
مو جاي احاجيج !!
- شتريد !! الناس تصبح بالاول تحجي باسلوب
مو تحجي وية صانعة عندك
من البارحة لليوم مستلمني رزايل واني ساكتة
عبالك اني الي غصبتك تتزوجني
لو اني الي خطفتك من اهلك وبيوم خطوبتك وجبتك هنا
شو وخر خلي انزل من البارحة محاطة شي ابطني خلي اروح اتسممة وخرت ايدة وداانزل
- لفي شعرج وحطي شال على راسج اكو زلم جوة
- بس اني مو محجبة ؟
- من اليوم تتحجبين وتحطين شال على راسج
ماعدنة بنات يفلن شعرهن
- ماعندي شال !
زفر زفرة وطلع صاح زهرااااااء
- ها خوية أأمر
- جيبي ربطة لهاي ختلبسهة
- شنو هاي !! ماعندي اسم
- شوفي تلبسين ربطة وتنزلين وديري بالج تفتحين حلگج بحجاية زايدة
- انخرس يعني!!
- تنخرسين وبطلي تراددين افتهمتي لو لا
وبعد اكو شغلة!
اي واحد يسئلج عن البارحة متحجين شي افتهمتي لو لا
اياج ادري بيج حاجية لايً كان متلومين الة نفسج
اندكت الباب
انطتني زهراء الشال وباركتلي ونزلت
لبست الشال ودرت وجهي
- يلا ارتاحيت هسة
بدون ماانتظرة يجاوب درت وجهي وطلعت
نزلت استقبلوني بالهلاهل والتبريكات وامي تباع علية وعيونهة مدمعة
گضينة اليوم بين الناس الي تجي تبارك والمجاملات والتقديم
وعمي چان مسوي غدة عازم الاقارب والاصدقاء والجيران
صارت الساعة ب٤ العصر
صعدت لغرفتي ذبيت روحي على فراشي ونمت
حسيت على صوت الاذان گمت الغرفة ظلمة وهدوء
فتت للحمام توضيت وكعدت اصلي
انفتحت الباب وفات فهد
بدون ميباع علية اخذ الخاولي وفات للحمام
يعني اكثر شي يموتني من يتجاهلني وكأنما اني مموجودة
اني هم گمت اعاملة بالمثل كدام العالم احجي ويا هاي طبعا اذا جان موجود
وبالغرفة واحد متجاهل الثاني
مرت الايام واحنة على هذا المنوال وزوجة عمي الله يسلمهة استلمني بس خلص اول اسبوع
دگ شغل كأنما تريد تنتقم مني
واني اشتغل واني ساكتة ومااعترض وهي عبالك من اسوي هيج تنتقم مني اكثر
چانت تتمنى بس اجاوبهة حتى اطلع مو خوش
لكن رغم اوصل مرات اريد اعيط من القهر والتعب
بس اذكر موقف ابوية واهلي وارجع استغفر ربي واسكت
بس جانت زهراء خوش بنية وجانت تجي تساعدني لكن مو دائما تكدر على امهة
مرة من المرات صاحتني انظف البنكات
وچان السقف مالتهم عالي
صعدت عالدرج والگاع سيراميك اول مابديت اشتغل اتزحلگ الدرج ووكعت على ظهري وراسي من گد الوجع صرخت من كل گلبي وكأنما هاي الصرخة چانت مكبوتة من اول يوم فتت لهذا البيت
على صوتي فات فهد يركض
شاف الدرج وشافني بالگاع
اجة لزمني
- جوري بيج شي !!
راد يگومني رديت عطت
- يعني ماكو احد غيرهة ينظف البنكات وتدرون الگاع تزحلك شلون تجيبون هالدرج المكسور
- يمة احنة شعلينة هي مسوية روحهة نادرة ينً
شالني وصعدني للغرفة وحطني عالفراش
- شنو يوجعچ بالضبط
اشرتلة على راسي وظهري
لزم راسي وباوع كال ماكو جرح بس راح تطلعلج هواية عنجورات براسج
هسة تصيرين چنچ هذا الاسفنجة الصفرة شسمة
(سبونج بوب ) وابتسم
نزلت دموعي وظليت ابجي
مدري من الوجع مدري لان اخيرا احد التفت لحالي وحاجاني
- هاها ليش البچي يمعودة
- راسي يوجعني
- هسة اجيبلج مسكن
بقيت يوم كامل مااكدر احرك ظهري وتعجبت من موقف فهد چان كل سا يصعد يطمن علية
وزهراء جابتلي اكل
- ها جورية شلون صرتي حبي
هاي غداج يلا كومي اكلي
- زهراء وداعتج مااكدر اكل كلش موجوعة
- سودة علية تريدين اوكلج
انتي من الريوك لسة مماكلة شي والله فهد يگلب الدنيا علية
- فهد !!
- اي شبيج استغربتي ؟ فهد رجلچ
شوفي جوري اني صحيح مااحب ادخل بحياتكم الخاصة
بس اني حاسة اكو شي غريب بعلاقتكم !
يعني مايوم شفتكم اتشاقيتو
او ضحكتو
او اي شي طبيعي يصير بين اثنين عرسان جدد
- زهراء ارجوج سدي الموضوع
- باعي اني صحيح ممتزوجة بس عندي صديقات متزوجات واسمع من هاي حجاية
ومن ذيج حجاية وبديت اكون فكرة عن الرجال ومطاليبة
جوري لا عبالج فهد صعب وقاسي
ترى ماكو مثل گلبة وحنيتة
لكن الظروف الي مر بيهة هي الي خلتة ينغلق على نفسة
- وشنو هاي الظروف !!
- راح احجيلج بس امانة الله عليج تسمعين بهاي الاذن تطلعين من الثانية ولاچنچ سمعتي
اني لو مااحبج واريد مصلحتكم انتي واخوي مااحجيلج
جوري اخوي بالكلية حب وحدة
حبهة حب صادق وهي بادلتة المشاعر وبقو ثنينهم يحلمون بمستقبلهم ويخططون
تخرج فهد واجة حجة وية ابوي يخطبهة الة
فرح ابوي ودز على عمامي وخطبولة والفرحة چانت مسايعتهم وحضرو كل شي ونصبنة الغرفة وقبل يومين من الزواج طالعة هي وامهة للسوق يكملن النواقص بعد عروس وعدهة هواية احتياجات
صار انفجار بالبصرة وراحت هي وامهة
انطتج عمرهة
جوري حتى جثة مالگالهة
من يومهة وفهد صار غير واحد بقة سنة كاملة هو بالبيت حتى ميطلع ولايختلط بأحد
لحد ماطلع تعيينة وگام يداوم وشوية وشوية رجع طبيعي
لكن ما شفنة ضحكتهة من ذاك اليوم الاسود .
الي اريد اوصلچياهة يااختي
انتي بيدج هسة تكدرين تخلي ينسى
- شلون !! وهو رافض حتى القرب مني
- جوري العتب مو بس عليّ
فد يوم اجة من الدوام وابتسمتي بوجهة وكتيلة الله يساعدك
فد يوم دخل لگاج امكيجة ولابستلة شي حلو
فد يوم جربتي تسولفين ويا او حتى تسئلي شلونة!!
خوفة عليج اليوم مو مال واحد يكرهج وماعندة مشاعر ناحيتج
استغلي هذا الموقف لصالحج وابدي علاقتج بي
يلا گومي اكليلج لگمة
الله يهدي سركم حبيبتي ...
يتبع
أنت تقرأ
جوري
Romantikقصه منقوله للكاتبه shahad of love تحكي القصة عن الزواج بالاكراه بسبب العادات التي مازالت الى الان في مجتمعنا لكن !! هل جذور الكراهية تنبت وتنتج ثمار الحب
