#البارات_العآشره《10》
من روآية 》》#جوزوني_قآصر 💍
💫💫💫💫💫
فضيل...توا كنت نحكي مع العيال وكنت انتفاهم معاهم ع اللي صار اليوم وقدرنا نوصلو الحل وهم رضوه بيه عشان نحآفظو علي الحوش الحل اني بعد تفك مرآده الربآط انردهاااا و....
نوريه...ايش قلت ايش قلت...
فضيل ...خليني نكلم كلامي قبل ياوليه😡
نوريه..كلام ايش تحكي من جدك انت تبي تاخذك مني هالحقيره وانت ياراجلي ترضاااا اتجي علي جرت خوك ياربي انت غالي عليك المرمده من قبل كنت ماتبي تجي علي فراش خوك عبد الكريم .......
فضيل...تعرفي اتسكري فمك لما نحكي معش تحكي وراي....
نوريه...لا مش ساكته ومستحيل نسكت هالحقيره هذي ها ....
فضيل...ضرب نوريه كف لكي فمك قلت...
نوريه...وصلنااا لضرب يافضيل بعد عالسنين...
فضيل...نا اللي طمعتك في طول هالسنين الكلمه كلمتك والشور شورك...
مراده...ماسكه ايديها في بعضهن وتبكي 😢😢😭😭
انا...خلاص ياعميمه ماتزعلش روحك كلام انقال في ساعة غضب...
فايز....عمتي نوريه امي لأ تفهمي 😡😡😡 كل شي الا انك تغلكي فيهآ ....
نوريه...لكن امكم ......
فايز...مهمااا ادير هذ امنااا وبعدين امي مش جايبه ع الموضوع توا اعلمت كيفنا وعمي قال نقعد خيال يعني عشان يقدر يخش ويطلع في اي وقت بس انتي اسرعتي...
نوريه...ماسكه التليفون في يدها وترن ع خوهاا سليمان...
نوريه...وهي تبكي سليمان تعالي فيسع توا...
فضيل...كنك ياوليه وين ماشيه...
نوريه...بعد الضرب تبيني نقعد معآك لا والنبي خلآص نمشي لحوش هلي ونآخذ أحقوقي ونقعد ع عويلي...
فضيل...ياوليه رانا اكبار واعيالنا اكبار عيب كلامك هذا...
نوريه...لو انت عاد الكلام هذا راه ماصار شي مافكرتش في اعيالك مافكرتش....
انا...طلعت من الدآر ولما حقيتها تبكي وجعتني 😓😢💔مانحسبش روحي نزعل عليهااا هكي ....
ردينه...تبكي في التركينه😢😭😭💔اقربت من ردينه...
ردينه.. توا غير جربت احساسك ..عازت الاب عازه...
انا...😓اي والله مش غير عازه ...
ردينه...تعرفي عمي شن قالنا جوا...
انا...شن قآل😢
ردينه...قال املاك بابا وكل شي تحت يده حتي سيارة بابا يبي ياخذهااا...
انا...😳😳😳تحكي جد ؟؟؟
ردينه...اها والله خفنا نرفضو نطلعو بلا شي...
انا...نفس مادارولي نااا.😒😒😒..
ردينه...ماقتلك جربت احساسك ااااه يابابا...
انا...وجعتني وحسيت بحرقة قلبهااا ...ضميتها شوري...وندمت علي اللي درته كله...
انا... في عقلي اااه مع انكن ياما درتن في بس والله مانقظر قلبي وجعني....
بعد اشوي جاء خو نوريه...
نوريه...😭😭😭 هنت عليك يافضيل ياخسارة العشره ...
فضيل...نا مادرت حاجه عيب ولا حرام ...
نوريه...خشت علينا في الدآر وهي تبكي...تريحتي يامرآده كان قلبي حاسني فكي الرباط قبل ياساتر عليك عرسان ودنيااا شايله خربتي حوشي منك لله...
مرآده..جت شورها وهي تبكي...وحياتك مانقصدهااا ولا في عقلي نيه سوده شورك...
نوريه...وآضح نيتك البيضه ضالمتك ناااا ضالمتك وقعدت اتحزز علي مراده بالضرب...
ردينه... قعدنا نمسكو فيها نا وردينه...
ردينه امسكتهااا زين مع يدهااا.....امي لأ يااعميمه وياريت تطلعي برا حوشنااا كل شي الا ماما دونهااا الموووت اطلعي برررررااااا ...
نوريه...اتطردي في ياقليلة الأدب....
ردينه...لما توصل بيك تبي تضربي ماما انطردك وهذا حوشنا نستقبلو فيه اللي نبوه ونطردو اللي نبوه...
مراده...قاعده ترتعد وتبكي ...وتبحت وخلاص ...
نوريه...طلعت وهي ترفع في أصبعها حسبي الله ونعم الوكيل حسبي الله ونعم الوكيل.... وماعقبت دعوه الا دعتها علي مرآده...
انا ...قعدت نبحت في الناس...وووواو معقوله نا حقيره لدرجه هذي شعلت النار دمرت عائله بحآلهااا ..ااااه كله منهم كله منهم هم اللي خلوني اندير هكي ....
ردينه...طلعت علي عمي...عمووو خلاص الموضوع فوته ...
انا...قاعده نبحت فيهم😓😓😓...
عمي حاط ايده علي راسه....ايش انفوته ماانفوته مصيرهااا ترضااا امغير هكي بس...
ردينه...بس ياعمي توا تنقلب الدنيا...
فضيل...رفع حاجبه...كلامي نا هو اللي يبي يمشي وماحد ايقول بعد قولي...
فايز وسالم وجهاد...امطبسين راسهم 😓😓😓 ...مايقدروش يحكو مع عمي لانه واعر بكل معاهم من ايام وعمي مرعي عايش....
فضيل...بعد فكت الربآط توا نحكووو توا سكرو ع الموضوع...
ردينه...😓تمام ياعمي اللي تريحك....
روح عمي ...والعيال اطلعو من الدار...
مراده...متربعه في الدآر وماسكه منديل وتبكي 😭😭يانا المقهوره يانا المكسوره كسرتني يامرعي...
ردينه...تضم في امهاااا ...وتبكي معاااهااااا كسرنااا بابا ياماما...
انا...قعدت ندمع معآهن 😭😭تأثرت وخطر ع بابا ااااه وخلاص....
مرآده...كسره عطيبه كسره عطيبه وتمسح في دموعهااا وتنهدت الله غالب علينا....
انا...صبيت من مكآني وقعدت نلم في حوسة العشاء..
ردينه صبت من مكآنها تبي تلم معآي....واللهِ ماتقربي حاجه ماعليك فيهااا توا انلمهاااا نا...
ردينه...نعلي الدنياااا حآيسه...
انا...ابتسمتلهاا ماعليك فيهااا تريحي بس....
ردينه ...اسلمتي ياصفاء...
انا...سلمك ☺
...لميت الحوسه كلها وغسلت العوايز...ولعت المكنسه الكهربآئيه...
كملت وجيت احذاء اعميمه مراده...اسلمتي يااصفيوه اسلمتي ...
انا...سلمك يااعميمه عليك خبر مادرت شي ...
انا...مسكت تليفوني ورنيت علي يحي...
انا...يحي هيااا تعالي ...
يحي...هياااا عيوني جيتك...
مراده...الستر يابتي مازال بدري خليك بايته معانا...
انا...اقعد الخير يااعميمه...
ردينه...تعالي بكره باهي ...
انا...ان شاء الله توا نجي وانتي طيبه...
قعدت اشوي وجاء يحي...
انا...ركبت في السيآره...وانا متضآيقه...
يحي...كنك بسم الله قآلبه وجهك...مفروض نا اللي نقلب وجهي...
انا...عليش كنك😒
يحي...الراجل جاني وداير في يوم ومهزل بي في الأرض ...بس تحملت عشان خاطرك عشان خاطر نرضيك ...
انا...ابتسمتله ☺🙈 سلم خاطرك ...
انا...تنهدت اااه 😓😓😓 ياريتني مادرت الجو هذا كله ...
يحي...نبي نعرف شن غآيتك في الموضوع...يعني عمتك هزبت وطردت العرب ....نبي نعرف شن المقصود...
انا...انسى انسى مش مشكله حاجه وصآرت...
يحي...صدقتي صآرت لطن جت ع راسي...
انا...اوووف خلاص راك سكنت....
يحي...الله علينااا علي خاطرك ياسمحه انتحملووو...
انا...ونحنا في الطريق ...وهو يحكي معآي ويبصر ...ونا في عآلم ابروحي معقوله نا قعدت هكي شرانيه لدرجه هذي...ااااه وخلآص...
***مرت الشهور وبعد فك الرباط بأسبوعين...
انا... قآعده ع مرآية المدخل ....ولابسه ومتأنقه ....يحي وينك...هيااا تأخرنااااا خلينااا نمشووو...
يحي...طلع من الدار ..نعلياااا ماني عآرفه عليش مستعجله....
انا...هههه مش شورك خليناااا نمشو ....
يحي...اتهبلي طالعه 🙈🙈
انا...نهبل علي روحي امشي هياا اطلع قدامي ...
يحي...هيااا نطلعووو خير مااا .....😁😁😁
انا....هههههه هيا هي...
##وصلنآ لحوش عمي مرعي...
انا...فتحت البآب كيف تبيش تنزل ....
يحي...لا عندي شغل توا نجي علي العشاء...
انا...ابتسمتله ☺عينك من روحك...
يحي ....نعلياااا خايفه علي ...
انا...مش شورك يابارد...
انا...راك تنسى الدواء بآهي ...
يحي...لا مش نآسيه بس امتى قآلك الموعد الجآي...
انا...الخميس الجآي ان شاء الله....
يحي...راه وحده تشوف الاوراق ...
انا...بآهي اللي فطنتني هاك خليهن معاك هذوم مايعرفوش دكآتره نفسيه توا يحسابوني مجنونه ...
يحي...بآهي هيتي خليهن توا ندسهن تحت الكرسي...
انا...تمام ...وطلعت الأوراق منشنطتي وكآن معاهن المذكره اللي نكتب فيهااا في يومياتي ومافطنت اني عطيتها له معاهن...هيااا باي بيش تجي بعدين...
يحي...بآي ان شاء الله ....
انا...خشيت ...خير عليكن ...
سلمت ع هنادي وهنده..منظرهن مكسورات والحزن بآين عليهن...
ردينه...في الدآر ...خشيت عليهااا....شفتي ماما شن دارت فينا...
انا...😢😓شن تبي اتديرلها هذي امك...
ردينه...توا بالاهي عليك شور ايش الحنه والمكياج اااه ياماما خلاص نفسيتي صفر ..
انااا....به اعميمه نوريه وين ؟؟؟
ردينه...قاعده مع خلاتي في الدآر وحالاتها حاله...
انا...اصلا هيااا بعد مشيتها ل تونس وهي طفت ...
انا..قعدت نذكر ...بعد يوم اللي عمي حكي ونوريه عدت لهلها....
بعد اسبوعين...
ونا قاعده عند اعميمه مراده...
خش فايز وقال انه اعميمه نوريه طاحت وشالوها للمستشفي وبعد كم طلع عندعا ورم مشت ل تونس طلع خبيث حميد ومع العلاج توا اكويسه بس قعدت نأنب في روحي وياما صار في لعند ماشالني يحي لدكتور نفسي وقعدت تحت العلاج وطبعا حتي يحي قعد يتعالج معاي وقعد يعالج فينا ع الموضوع اللي داره يحي ويحي مش عالم بالمواضيع اللي درتهن كان يحسابني مرضت نفسيا من قصته.. ...
انا...خلاص ياردينه ارضي بالواقع والله غالب عليك...
ردينه...نعلي انقهرت انقهرت دار نوم جديده ودايره جو كأنها شباب مقهوره والعيال منغصين حتي هم...
انا....ااااه ياربي وخلاص ...
انا صبيت وقعدت نساعد في خوات مراده..
وكل مانخش ع اعميمه نوريه في الدآر نلقآها منستها وخلاص وعيونها ملينات مع انها شارلها ذهب جديد ودفعلها مبلغ عشان توافق وهي وافقت وكان مقابل الفلوس والذهب انها تحصر الفرح ..
وجت اعميمه مرآده...
لابسه عربي وامحنيه ودايره مكياج...
مافيش حد فينا راضي...
انا...نبحت في روحي ومقهوره كله مني نا اللي سببت الحزن هذااا كله كله مني...
انا...كان يعلم يحي اني نا درت هذا كله ح يطلقني اكيد اااه ياربي وخلاص...
انا...خشيت للكوجينه.وقاعده نلم....
هنادي..خشت تبكي بغصه مانحسبش يسير فينا هكي اه ياصفاء...
انا...😢كله خير كله خير...
خشت هنده...نعلي ياهووو مقهوره ماتخشمش ع وجهها عزوز كبيره وامحنيه ومكياج وخبر انعن حبه....
هنادي...اه مقهوره ع ماما خلاص نا قريب نموت عليها....
ردينه...خشت وعيونها متورمات...تنهدت ااااه وخلاص...
هنادي وهنده...لما شافنه طنسن عليهااا وخشن جوا...
ردينه...شفتيهن شفتيهن...
انا...نعلياااا مصيرهن يرضن امر واقع عليكم كلكم ....
المهم عدا اليوم هذكي وتم الفرح والحزن في عيون الكل ومافي حد فرحان غير مراده وفضيل...
وعدو لشآليه كأنهم عرسان ...
××خش علي جبريل...
جبريل...صفاااء صفااااء....
انا....نعمممم كنك شن تبي...
جبريل...يبيك يحي بررررا...
انا...قوله اشوي بس نوتي روحي...
وتيت روحي وسلمت ع البنات وطلعت ركبت في السياره...
يحي...وهو امطنش خشمه سقمي قعدتك😡
انا...كنك بسم الله كنها قعدتي...
يحي...تضايقني في السواقه ...
انت...تمام 😏
وصلنا للحوش..
يحي ...حط مفاتيحه علي الطاوله بالقوه ...نين خفت نا...
انا...كنك بسم الله...
يحي...ماكني شي غير نبي نوريك حاجه....
انا...شنووو تبي اتوريني...
يحي...شنووو هذاااا....
انا...😳😳😳😳
رايكم يهمني 🌺❤
