حــب سـرمــدي (باللهجه العراقية )

فزة كلب ♥

ادم ..

من شفتها و انا اغني "كلي ياحلو منين الله جابك ♥ "

عيوني كوه فتحتهن و انا اسمع صوت العركة جوه ياربي سترك الواحد مايرتاح بهل بيت لبست ملابسي و احس جسمي كله مكسر و تالي حتى بعطلتي يطلعون روحي بعرايكهم نزلت الدرج و انا اسمع غلط امي على مرة اخوي الاصغر مني

ادم: خييييير الواحد مايرتاح بهل بيت ولكم حتى بيوم عطلتي مااكدر انام شكو ....
صرخت بزعت من حياتي يوميه عركه و من سافرت قبل اسبوع ارتاح كلت اروح لاربيل شهر اخلص يوم ثاني يخابر اخوي و الله تعال امي تعاركت ويه مرتي و مرتي زعلانه بيت اهلها و انا لازم اجبر

ام ادم : تعال شوف المصونه اكلها غسلي الطارمه راح يجولنه خطار ماتقبل و ماده لسانها ..
انا مو ضد امي بس اعرفها ماتحب سارة لان بت عمي و اخوي اخذه عن حب

سارة : و الله خويه تعبانه كتله بس اشوي ارتاح و اغسلها بس هي ماتقبل .
باوعتله وجه اصفر و مبينه تعبانه استغفرالله يايمه

ادم : ريييييييييم .
صرخت على اختي المنطمره بغرفتها بكل عركة اضم راسها اجت تركض وكفت كدامي

ادم : روحي غسلي الطارمه و نظفي الدوانيه بسرعه .
ريم : اوكي
امي باوعتلي ماعجبه الحجي

ام ادم : و ليش الخاتون ماتنظف
ادم : يمه تعبانه كلتلج خليها ترتاح بعدين تشتغل تره هي هم انسان .
خليت و صعدت لغرفتي اووووف يارب بس خلصني من هل حياة انا شصير اخ لو اب لو شاب مااشفت شي من حياتي غير الالم احس البيت صار يخنكني ليش انا من دون الكل توني عمري 30 سنه اعيش بهل نار التكوي صدري احسني شيبت و انا بنص عمري من مات ابوي و انا عمري 9 سنوات كلشي تغير بحياتي عفت الدلال و تحملت المسؤلية اشتغل ويه عمي و ادرس لان ماردت احد يصرف علينه و بيوم يعيرنه و اعتني باخواني هاي الدنيا كلش كسرتني من كل جهة

طلعت من البيت بسيارتي تعبان رحت للسوك اتسوكت لفيت حتى ارجع كلت اشتري حلويات لريم اكو محل قريب من بيتنه دخلتله و سلمت على صاحب المحل بعدني اختار و سمعت صوت الباب انفتح و صوت اخ عبالك ماي يروي درت شفت لبنيه منطتني ظهرها تفتح الثلاجه صفنت بكصيبته طويله و الشعر فحم دارت عليه صفنت كلت بكلبي ربي سترك شهل طركاعه هاي لو عندي مااطلع ظفرها لبنيه نزت و طاح العصير جوه رجليه و تكسر

ادم : ديبرالج لا تنجرحين
شفته بعد مارفعت عيونه عليه حقج و الله هو لعنده وجهج يباوع للناس شفته حركت شفايفه بس ماسمعتله صوت جان يمه صاحب المحل استغفرالله هسه انا ويني وينه اباوع عليه ناقصني اذنوب لو ناقصني الم و حسره على حظي التفتت اله من جديد و انا كاره روحي اشلون اباوع على عرض غيري شفته ابتسمت و بعده ماتباوعلي درت وجهي عنه مابيه اكل بروحي من وراها ثانياً مبينه مو منا غريب اول مرة اشوفها درت وجهي عنها و بعد مالتفتت الها سمعتها تحجي ويه صاحب المحل تسئال عن معجون الاكل و تالي اجت وكفت يمي و هي ترفع بنفسها حتى تاخذه بس ما وصلت

ادم: لو سمحتي .
ابتعدت و بعده ماتباوعلي اخذت المعجون و مديته الها خذته مارفعت راسها بس عيونها وجهتها الي بس يمكن دمي الي بجسمي وكف سبحان الله ولج انتي ربج شلون خالقج بس لعيون تهد زلم و الرمش طاخ بلحاجب كلبي فز عليها مو جني شايف و عايف هواي و يمكن حتى احلى منه نزلت عيونها بسرعه بمستحه و همست شكراً عوافي على روحي هل صوت رديت عليه العفو درت وجهي عنها و رحت لاخر المحل هاي لبنيه طركاعه نبتعد عنه الف متر افضل بعد مااشترت سمعت صوت الباب درت لكيتها وره الباب منطيتني ظهرها اشوي دارت عليه افيش مو نظره باكت روحي وياها و راحت .

بهاي اللحظة صدك تحسرت على حياتي
و من ساعتها و انا اغني كلي ياحلو منين الله جابك

#نور

شمرت كصيبتي ليوره و انا اعدل كذلتي اشوي طالت و نزلت على عيوني و جاي تزعجني يله من ارجع اكصه حطيت مرطب لشفتي و سحبت محفظتي و طلعت

"ماما هسه وكته سالفة المعجون شوفي الجو يموت "
حجيت و خزرتني ماما يمعودين الساعه ب 11:30 و تريد توديني للمحل اجيبله معجون و ابوي اليوم معزوم يم عمي و اطيح براسي

" يمه شكد تلغين لو رايحه من مساع جان وصلتي "
عادي مو اول رزاله سحبت الباب و طلعت هلا هلا انوب الشارع فارغ غير انصهر قبل لا اوصل مشيت فرعين يله وصلت للمحل احس روحي معت خدودي راح يطكن حركت ايديه حتى اهفي على وجهي من الحر فتحت باب المحل و الهوى البارد ردلي روحي

" السلام عليكم "
سلمت بصوت ناصي و انا ادخل للمحل جان فارغ بس موجود رجال تقريباً ب الاربعين صاحب المحل و واحد ثاني واكف بنص المحل منطيني ظهره رد السلام بدون مايلتفت فتحت الثلاجة حتى اخذ شي بارد اخذت عصير و درت عيوني اجت عليه واكف يباوعلي شكد جنت ثابته و قوية بس من اجت عيوني بعيونه رجف كلبي لاول مره عيونه سود يتيهن الواحد دربه فزيت من وكع العصير من ايدي و تكسر جوه رجليه

" ديبرالج لا تنجرحين "
فز كلبي على صوته الخشن شهل انسان اول مره احس روحي ضعيفه من دون سبب مارفعت راسي توترت منه ابتعدت اشوي عن الكزاز اجه صاحب المحل جاب مكنسه و كنس الكزاز

"اسفه "
صوتي خافت شكيت سمعه صاحب المحل و بعدني احس عيونه عليه

" لا عادي مصار شي "
ضحك صاحب المحل و فتح الثلاجة طلع باكيت عصير و كلي هاي حتى نتلافه الكسور ضحكت و اخذته و هو رجع لمكانه عيوني رجعتله بعده يباوع دنكت و مابوعتله بعد بيه شي يخلي الواحد يرهب منه يخليه حساب يعني من يشوفه الواحد يكول هذا زلمه و فوكها يحظي حلو ☹ سئالت صاحب المحل عن معجون و لكيته ب الرف بس بعيد عني ماكدرت اوصله هو اجه يمي افف الصوت خشن ياربي مدلي المعجون اخذته ماكدرت ارفع وجهي اله صح انا طولي مناسب 160 بس يااخي هو شطوله رفعت عيوني اله و رجع كلبي يرجف ياربي هي كل عيون عيون اشكرته بصوت ناصي و رد العفو باوعت ملابسه مرتبه قميص مقفله ازرق و بنطرون اسود قماش هو حنطاوي نازك ياربي بسرعه اشتريت و طلعت من المحل اخ شمس الله الحاره ماجوتني بكثر ماسوت عيونه درت وجهي عليه اجت عيني بعينه تكهربت اول تالي انا يتخربط وضعي

مشيت بشارع و احس روحي تايها اذكرت حجي امي الحب مو الي تحجين ويه واحد وره مده كلتي احبه لا هذا اسمه تعود الحب هو اول ماتخلين عينج بعينه يفز كلبج

كلبي فز لاول مره و خوفني حيل

*******

رأيكم كلام ام نور صح؟!!

ادم حصل من الدنيا بس الالم شتكولون تعوضه ؟!