ما عرفتش كيفاش نشرح هاد اللقطة فاش كاتشوف شكلك ٪100 محطوط قدامك
قلت ليه : شكون نتا
هو : انا القرين ديالك
بقيت ساكت حتى نطق و قاليا : ما تخافش ، ماجبتكش هنا باش نخلعك و انما باش نتافقو على واحد الحاجة لي غاتكون مزيانة ليك و ليا
انا : اشنو هاد الحاجة ؟!
هو : غانعطيك لي بغيتي و غانعطيك القدرة باش تعرف الناس اللخرين فاش كايفكرو ، و مقابل هادشي كاين واحد الشرط
انا : اشنوهوا الشرط ديالك !!!
هو : تطلق احد البخور فالدارو مرة مرة تحي الاجواء و الطقوس ديالي
انا : صافي ( وافقت و يا ليتني ما وافقت )
هو : ما تنساش انا دايما غانكون معاك و دايما غاتحس بيا ، و لكن عنداك تقولها لشي واحد غادي يسحابوك غير مسطي
انا : اوك صافي ، شي حاجة خرا
هو: اه فين تبغي تلاقاني نعس فهاد البلاصة
شوية حليت عيني لقيت راسي فبيتي ، شفت فالساعة لقيت راسي ناعس ساعتين هادي ، نضت غسلت وجهي و هبطت لعند الواليدة لقيتها باقا كادوي مع هناء ، گلست حداهوم تاناكل و انا كانحنزز و مخرج عيني فالواليدة باش نشوف فاش تاتفكر شوية و انا نسمعها كاتقول فخاطرها ( ينعل الحمار تاع بوك ، مخرج فيا عينيك باغيني نوض و نخليك معا الدريا ) و الله حتى هادشي خدم ، ساليت ماكلتي و قلت ليهم بالسلامة و خرجت
شوية و هو يقول ليا داك القرين فوذني ( ما تنساش داك البخور لي گلت ليك عليه ) مشيت عند العطار لقيت داك البخور غالي و فيه واحد الريحة خانزة خديتو و رجعت للدار و خبيتو فالمجر ، هي هاديك مشيت ندوش شوية كانحس بشي خيال كايدوز بزربا قلت ( اعوذ بالله من الشيطان الرجيم ) دخلت للدوش و كانحس بشي يد على ظهري فين كانضور ما كانلقا والو ، هزيت الفوطة و خرجت ، مشيت نعست يالاه حطيت راسي على المخدة و هو يبان ليا القرين ديالي
القرين : دير داك البخور دبا دبا
انا : بلاتي حتى الصباح ملي تمشي الواليدة للخدمة
القرين : قلت ليك ديرو دبا ماتخلينيش نتعصب حيت غادي تندم
انا : بلاتي بعدا قبل من هادشي ما تبقاش تدخل معايا للدوش
القرين : شنو الدوش حنا گاع ما كانقدرو ندخلو للدوش
انا : و شكون لي حط يدو على ظهري قبيلا
القرين : واش متاكد شي حاجة مساتك و لا تكون غير كاتخايل
انا : لحمي هاداك و كانحس بيه ، ياك غير نتا لي كاين هنا
القرين : حاجة وحيدة هي الجن حيتاش هوما لي يقدرو يدخلو للدوش
انا : شنو ؟! الجن ، و علاش مابانش من شحال هادي حتى بنتي نتا ؟؟
القرين : تسنى ندوي معاه و نعرف شنو كاين ، غير نتا ما تنساش ليا داك البخور راه كانحس براسي مخنوق فهاد العالم ديالكوم
انا : صافي
مشيت نعست كيف موالف ، فقت فالصباح هبطت كانفطر معا الواليدة
الواليدة : راه باك عيط البارح غايجي عندك اليوم باش يشوفك ، خرج معاه اولدي و عنداك يعمر ليك راسك عليا ، تعيش هنا حسن ياك قريبا ليك لافاك و صاحبك و هناء
انا : وليتي ظريفة الواليدة هاد الصباح ، موالف كانسمع منك غير فايق حتى لزك النهار
الواليدة : 😂😂 الله يمسخك كون تحشم
انا : الواليدة من غير لافاك و هشام و هناء راه مانقدرش نخليك بوحدك هنا
و هي تحل بزطامها عطاتني 200 درهم
الواليدة : هاك هادي اوليدي الى بغيتي شي حاجة شريها بيها
انا : ايوا هاكا نبغيك ، اراي ديك ليد نبوسها
الواليدة : ( مدات يدها ) الله يرضي عليك اوليدي
انا : امين
نضت لبست حوايجي و بقيت كانتسنا الوليد حتى جا ، سلم عليا و مشينا للبحر ، بقيت كانعاود ليه على لافاك و على صاحبي هشام و على هناء شوية مشى يعوم و انا حطيت راسي على المخدة ، و هو يبان ليا القرين ديالي
القرين : حمزة رجع للدار
انا : علاش !!
القرين : رجع هاداك راه جن عاشق و خليتيه هو و ماماك بوحدهوم فالدار
انا : كيفاش راه ما فهمت والو
القرين : من بعد و نشرح ليك دبا خاصك ترجع للدار تخرج ماماك من تما
نضت خرجت الواليد من الما
الواليد : مالك احمزة
انا : رجعني دبا للدار
الواليد : راه يالاه جينا ، بغيت ندوز معاك هاد النهار واش توحشتي مك
انا : لا الواليدة الى ما مشيناش عندها دبا غادي توقع ليها شي حاجة خيبة
الواليدة : كيفاش
انا : فالطريق و نشرح ليك
ركبنا فالطونوبيل شدينا الطريق ديال الدار ، صونيت على هناء قلت ليها تمشي عند الواليدة بزربا تبقى معاها و لا يخرجو بجوج من الدار ، غادي انا و الواليد و كنشرح ليه حتى وصلنا للدار لقينا الباب مسدود و مبغاش يتحل بالساروت و فنفس الوقت كانسمعو الغوات ديال الواليدة ، ضرب الواليد الباب بكتفو دخلنا و لقيناهوم ....
__________________________________________________________
البنات كانعتادر منكم بزاف بزاف بزاف على التاخير و الله ما بيدي راه غير المشاكيل و صافي
المهم غانحاول و يا ربي توفقني نكتب ليكم جوج اجزاء من بعد هادا
لي بغيت منكم دبا هو توقعاتكم اش غايكون طرا لمامات حمزة و هناء ؟؟؟
و ماتنساوش ليا تصوت و كومونتير يكون زوين بحالكم
❤❤❤❤❤❤❤❤❤❤❤❤
أنت تقرأ
قصة_حمزة مع دعاء
Romantizmسلام البنات اليوم جبت ليكوم قصة مختلفة على لي كاتقراو قصتنا فيها الرعب بشكل كبير بالاضافة للحب لي ما كانستغنيوش عليه فقصصنا لي بغيت نقوليكوم الى عجباتكوم القصة ما تبخلوش عليا بڤوت ( تصويت ) و بتعليق لي غادي يزيد يشجعني ( مرحبا حتى بالتعاليق السلب...
