جوري

البارت السابع عشر

الجزء السابع عشر

- شنوووو انت شدتحجي ،، لك اني مرتك ،، عرضك
شلون تتهمني هيج اتهام
- لعد الي شفتة بعيني شنو
- شنو شفت ،، شنوووو واحد حقير اتهجم علية بغرفتي ودااطرد بي وانت اجيت واستنجدت بيك
وهسة تگلي شعندج ويا
- باعي جوري الرجال ميتمادى وية مرة اذا ميشوف قبول من عدهة مستحيل يوصل لهالمرحلة اذا مشايف منج شي
- باع اني ممجبورة اسمع كلامك واتهامك ،، بس اريد اكولك ياحيف توقعتك اكثر واحد راح تصدگني لكن انت كسرتني هسة ولحظة وحدة ماابقى وياك
هسة اخابراهلي ياخذوني
- جوري اي تصرف منج راح تفضحين نفسج احترمي نفسج وسكتي زين مني ساكت لحد الان ومتجاوزت عليج
واحد غيري هسة مسويج جنازة
بس اني لحد الان داانتظر تحجيلي مااريد اتصرف واتندم بعدين
- الفضيحة تجي على المسوي جريمة اني الله يعرف بية مظلومة وطز بالناس
وانت اخر واحد يهمني
كام علية ولزمني من شعري
- ولج فوك شينة گواة عينة
ولج فوك بلوتج جاية تتمادين بالكلام ،، اليوم اشرب من دمج ياحقيرة
ظلو اهلة يدكون بالباب
- فهد افتح الباب .. فهد ،، فهد
شمرني عالكاع وفتح الباب وطلع
سمعتة جوة يصيح هذا الساقط ميفوت للبيت بعد وماكو عرس وانتي اذا تريدي خلي ياخذج ويروح بس اعتبري ماعندج اهل
اني خابرت اخواني وكتلهم هسة تجون
ظلت خالة تحجي وتكول شنو صاير وليش فهد هيج يسوي
كل شي مجاوبتهة ولميت هدومي وقفلت الباب انتظرتهم يجوني
٥ ساعات اني على كعدتيراح يطلع الفجر واني انتظر اهلي
فهد طلع ومااعرف وين راح
ب٥ الفجر اجوي اخواني خابرني سالم كال احنة بالباب ركضت ركض
عمي يصلي بالهول شافني كال ها بابا وين رايحة
كتلة اخواني اجوي داافتحلهم الباب
- طبي بابا اني افتحلهم
راح عمي فتحلهم الباب ومقبل ياخذوني كال يجي فهد ونفهم السالفة ميصير هالحجي
صبولهم ريوك واتريكو واتمددو بالخطار
تقريبا الساعة صارت ب٨ سمعت باب الكراج انفتح وصوت سيارة فهد
دخل واظاهر چان عندة علم بوجود اخواني متفاجأ
بقيت كاعدة انتظر صاحني عمي
- تعالي بابا ،، اولا اعتب عليج خليتي اخوانج يتعذبون ويجون هالمسافة كلهة ،، احنة هم اهلج لو كايلتلي اني اوديج
الشي الثاني احنة سألنة فهد وهو يكول مشكلة بسيطة وبيناتنة
فيا بنتي استهدي برحمانج وصالحي رجلج
- من رخصتك عمي اني اريد اروح لاهلي وية اخواني
ومستحيل اغير رأيي
حجة سالم
- يعني شنو روحتج ويانة اذا رجلج مقابل ويكول مشكلة بسيطة
- هو يشوفهة بسيطة اني لا
ماابقى بهالبيت ابد ،، ولا على ذمتة
كلهم حجوهة سوى
- شنووووو
عمي كال
- يابنتي كل الازواج يتعاركون وتصير مشاكل حتى مصارين البطن بس مو معناتهة كل مشكلة ندور ابغض الحلال
ميجوز هذا الحجي
كمت ابجي وبصوت عالي
- عمو مااريدة اذاني اذاني مااتحمل اذيتة
اني انهانيت انهانت كرامتي ومستحيل راح اسامحة
الله يعرف اني مظلومة ورب العالمين ان شاء الله ينصفني
هو صافن علية ومفتح حلگة ابد
وعمي كال
- بابا سالم البنية نفسيتهة تعبانة واثنينهم مو راضين يكولونة شنو السالفة
اخذوهة بابا وياكم ومن ترتاح النة حجي ثاني
رحت لاهلي وبقيت شهر كامل وبهالشهر اهلة خابروني وحاولو يرجعوني بس مقبلت ابد
لكن هو اي مبادرة منة ماكو
حجيت وية سالم وبلغتة بقراري بالانفصال بس مقبل ومشجعني بس بقيت مصرة على قراري
مرت ايام وشكيت بروحي حامل ورحنة اني وزهراء للمختبر وطلع شكي بمكانة
متت قهر
ياربي اني اريد اخلص منهم وانت تربطني بيهم
حلفت زهراء متكول لاحد ابد لحد متفرج
وبيوم قررت اتخلص من الطفل
حجيت وية ام المختبر كالت اني ادليج على وحدة وهي تخلصج الشغلة بسرعة ومتحسين
وانتظرت اهلي يوم الخميس يرحون للزيارة واروحلهة
———————————————————-
فهد
بعدما تم زواجنة اني وجوري جانت احلى ايام حياتي من ارجع من الدوام تتلگاني بالباب ووجهة يبتسم ومن اصعد الگة الغرفة جنة مو غرفة دومهة نظيفة ومرتبة وريحتهة تجنن وملابس البيت معلگتهم بالحمام
مااحس براحة بس من ادخل غرفتي وجوري بحظني
كل شي ممقصرة وياية
احس بنظرات الحب بعيونهة مجرد مااحجي وياهة
شايلة اهلي بالصلوات
جوري صدگ المرة الي اتمناهة گلبي
اني من النوع الي مااعرف اعبر بالكلام
لكن اكدر اعبرلهة عن حبي من تصير بأحضاني
بس اخر فترة حسيتهة مهمومة وتفكر وصافنة ومن الزمهة وهي صافنة تفز
حاولت اخليهة تحجي محجت
مرة سمعتهة تكول لمها مع الاسف عليج وردت اعرف شنو ثنينهم نكرو
ومرة سمعتهة تكول لسعد اخوية عندي موضوع وياك ضروري وحاولت اسحب من سعد كلام منطاني وجه
لحد اخر يوم بحنة اختي
نسيت فلوسي فوك ورجعت عليهم اجيبهم
وشفت الحقير وهو بغرفة نومي يريد يلزم جوري
وهي شكلهة مرعوبة ومن شافتني صرخت
لكن غيرتي عمتني الولد راد يموت بأيدي وبعدين رجعت عليهة
اعترف اني جرحتهة بالكلام لكن رغم هذا بداخلي جنت مصدگهة وادري بيهة متسويهة
لكن احس رجولتي انهانت من شفتهة بهالوضع
معناتهة هاي مو اول مرة يتعرضلهة
ليش مااجتي گلتلي
ليش سكتت هذا الي خبلني
متحملت كلامي وراحت لاهلهة وسمعت تريد تنفصل عني ومتقبل ترجع
اني كرامتي متسمحلي ارجعة حتى لو جنت اني الي ظلمتهة
لكن بيوم اجاني اتصال من رقم غريب
- الو
- الو مرحبى
- اهلا ،، منو انتي !
- ارجوك اخوية قبل لا اگولك اني منو اريد توعدني محد يدري بهذا الاتصال خصوصا جوري
- جوري !! انتي منو ومنين تعرفين جوري !!
- اني زهراء مرة سالم
- هلا خوية شلونج !! وشلون سالم والاهل
- بخير كلنة زينين
- خو ماكو شي خوية
- فهد انت لازم تجي لبغداد
ترى جوري تريد تسوي شي ابد مو زين
- شنو هالشي
- جوري حامل ومحد يدري بس اني وهسة تريد تسقطة الخميس ولكتلهة وحدة تساعدهة
- هاي شبيهة تخبلت
- ارجوك فهد مااريد جوري او احد يدري اني كتلك بس اني اعرف بيهة اذا عاندت على شي تسوي
- لتشيلين هم خيتي ورحمة الله والديج من بلغتيني
مااعرف بوكتهة شنو الشعور
يعني معقولة لهالدرجة تخبلت هالبنية لج رووح هذا روح تريدين تموتيهة شنو ذنبة
حتى فرحة ملحكت افرح بخبر حملهة
لبست بسرعة وركبت سيارتي وعلى طريق بغداد مااعرف شكد جنت امشي ومااعرف شلون وصلت سلامات
اول شي سويتة اتصلت بزهراء
- الو نعم
- شلونج زهراء بلا امر عليج اريد تكملين فضلج علية وتخليني التقي بجوري برة البيت
لان ادري اذا راج اجي لبيت عمي مراح تطلعلي
- ماشي اخوية اني راح ادزلك العنوان باجر ب٦ العصر تلكانة هناك
- رحمة الله والديج
- ووالديك
بقيت الوب لحد مصار الوقت
الساعة ٥ و٥٥ دقيقة
تقريبا دقيقتين ولمحتهة فاتت ضعفانة ومتغيرة بس بعدهة حلوة
كعدتهة زهراء گبالي وعافتهة وراحت
تقدمت اني وكعدت يمهة
- شلونج جوري
-😨

يُتبع...