Words into Worlds

Agila (Poem)

Nananabik sa paglipad ang bagong Agila
Nais nitong marating ang tuktok ng mga ulap
Walang ano-ano'y ikinumpas ang mga pakpak
Ito'y namangha't nasilaw sa banyagang wika

Makababalik kaya ang sabik na Agila?
Sa dating pinanggalingan, lupang sinilangan?
Uuwi pa ba ito sa pinagmulang bayan?
Sa gitna ng dagat, sa bandang timog-silangan?

Bibigkasin pa rin ba yaong sariling wika?
Na may bakas ng kaniyang sining at kultura?
Iibigin pa rin ba yaong si Inang Bayan?
Kung tuka'y may iba nang napupusuang wika?

Manumbalik ka rito, o tulirong Agila
Tangkilikin at ipagmalaki ang 'yong wika
Nananatiling mababa ang iyong paglipad
Dahil sariling wika, 'di binigyang halaga

Iyong gamitin ang Filipino sa pagsulat
'Pagkat ito ang wikang sa iyo ay nagmulat
Sa iyong mahaba't makulay na kasaysayan
Mga alay ng bayani alang-alang sa bayan

Halina't 'yong hawakan ang tanyag mong panulat
Isawsaw sa tintang itim, iyong ipangsulat
Lumikha ng marikit at malikhaing obra
Gamit ang Filipino, ang 'yong pambansang wika.